ၵူၼ်းမိူင်း သီႇပေႃႉ ႁူမ်ႈၵၼ် မႄးသဵၼ်ႈတႃႈသၢႆတၢင်း ၼမ်ႉလၼ်ႈ – မိူင်းၶိူဝ်း

ၵူၼ်းမိူင်း သီႇပေႃႉ ႁူမ်ႈၵၼ် မႄးသဵၼ်ႈတႃႈသၢႆတၢင်း ၼမ်ႉလၼ်ႈ – မိူင်းၶိူဝ်းၵူၼ်းမိူင်းပွတ်းဝဵင်းၼမ်ႉလၼ်ႈ ဢွၼ်ၵၼ်မႄးသဵၼ်ႈတႃႈသၢႆတၢင်း ထုၺ်ထႆ တႄႇဢဝ် ၼမ်ႉလၼ်ႈ – မိူင်းၶိူဝ်း တၢင်း ယၢဝ်း မွၵ်ႈ 16 လၵ်း။

တႄႇဢဝ်ႁၢင်လိူၼ်မေႊ 2019 ၼႆႉမႃး သင်ၶၸဝ်ႈ၊ ၵူၼ်းဝၢၼ်ႈၵူၼ်းသူၼ် ၽူႈၵွၼ်းဢိူင်ႇ ၽူႈယႂ်ႇၵူၼ်းလူင်ဢိၵ်ႇပႃး ၽူႈတႅၼ်းသၽႃး ႁူမ်ႈဢဵၼ် ႁူမ်ႈႁႅင်း မႄးၶႂၢၵ်ႈ ထုၺ်ထႆ ထူမ်တီႈလုၵ်းတီႈၶူင်ႈ ႁႂ်ႈၵႂၢင်ႈလိူဝ်ၵဝ်ႇမႃးထႅင်ႈသေ တႄႇလူင်း ႁဵတ်းသၢင်ႈၵႂႃႇ တီႈဝၢၼ်ႈၵုင်းသႃႇ ဢိူင်ႇၵုင်းသႃႇသေ တေဢၢၼ်းမႄးၵုမ်းႁဵတ်းသၢင်ႈၵႂႃႇ ၵွၼ်ႇထိုင်မိူင်းၶိူဝ်း ဝႃႈၼႆ။

ၸၢႆးၶမ်းဢွင်ႇ ၽူႈတႅၼ်းသၽႃးၸႄႈမိူင်းၶဵတ်ႇလိူၵ်ႈတင်ႈမၢႆ 2 ၸႄႈဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “ သဵၼ်ႈတၢင်း ၼႆႉ ပေႃးပဵၼ်ၶၢဝ်းႁႅင်ႈၼႆ မၼ်းတေၵႂႃႇငၢႆႈ။ ပေႃးပဵၼ်ၶၢဝ်းႁိုဝ်ႉၼႆ မၼ်းတေၵႂႃႇယၢပ်ႇ။ ၵွပ်ႈပိူဝ်ႈၸိူင်ႉၼႆ ပေႃးထုၺ်တၢင်း ၼႆ ႁွင်ႈႁိမ်းၾင်ႇတၢင်းၵေႃႈတေမီးၵႂႃႇသေ။ သဵၼ်ႈတၢင်းၼႆႉ ဢမ်ႇလႆႈမေးမႃး မီး 10-20 ပီယဝ်ႉ  ၼမ်ႉသမ်ႉသေး ဢဝ်လိၼ်ၵႂႃႇၸိူဝ်းၼႆ မၢင်ပွၵ်ႈမႃး ထူဝ်ႈၵႂႃႇသေ ပဵၼ်လုၵ်းပဵၼ်ထၢင်ဝႆႉၸိူဝ်းၼႆႉ တၢင်းမၼ်းဢမ်ႇပဵင်းၵၼ် မိူၼ်ထူဝ်ႈၶဝ် ၸႃႉဢၼ်သုင် ၸိူဝ်းၼၼ်ႉတႄႉ မၼ်းၵႂႃႇငၢႆႈ။ ပေႃးပဵၼ်ၵႃးတႅမ်ႇၼႆ မၼ်းတေၵႂႃႇယၢပ်ႇ။ ပေႃးမႄးၸိူင်ႉၼႆ ၵႃးဢွၼ်ႇၵေႃႈ တေၵႂႃႇငၢႆႈ ပႆလူမ်မႃးထႅင်ႈလိူဝ်ႇၵဝ်ႇတႄႉတႄႉ” ဝႃႈၼႆ။

ၵဵဝ်ႇၵပ်းလွင်ႈၼႆႉ ယူႇတီႈၽူႈတႅၼ်းသၽႃး ၸႄႈမိူင်း ၶဵတ်ႇလိူၵ်ႈတင်ႈမၢႆ 2 ၸႄႈဝဵင်းၼမ်ႉလၼ်ႈ လႆႈတုၵ်းယွၼ်းထိုင် တီႈ ႁွင်ႈၵၢၼ်လူင်ပွင်ၸိုင်ႈယူႇ ၵူၺ်းၵႃႈ ငိုၼ်းတႃႇၵေႃႇသၢင်ႈႁဵတ်းတႄႉ ဢမ်ႇလူင်းမႃးပၼ်ၼႆလႄႈ ယူႇတီႈၵူၼ်းမိူင်း ႁူမ်ႈ ၵၼ်သေ ႁဵတ်းသၢင်ႈမႃး ဝႃႈၼႆ။

ၸၢႆးၶမ်းဢွင်ႇ လၢတ်ႈဝႃႈ “ ဢွၼ်တၢင်းတႄႉ ႁဝ်းယၢမ်ႈတုၵ်းယွၼ်းမႃးတီႈႁွင်ႈၵၢၼ်လူင်ပွင်ၸိုင်ႈၶဝ်ယူႇ ၵူၺ်းၵႃႈ ငိုၼ်း တႃႇတေႁဵတ်းၼၼ်ႉ ဢမ်ႇလူင်းမႃး၊ ၽူႈမီးပုၼ်ႈၽွၼ်းၶဝ်တႄႉ လူင်းမႃးၵူတ်ႇထတ်းတူၺ်းယူႇ။ သဵၼ်ႈတၢင်းၼႆႉ မိူဝ်ႈ ဢွၼ်တၢင်း ယူႇတီႈၾၢႆႇပူၵ်းပွင်မုၼ်းလႅင်း လူင်ပွင်ၸိုင်ႈၶဝ်ၼႆႉ မီးဝႆႉ ႁွင်ႈၵၢၼ်ၾၢႆႇသဵၼ်ႈတႃႈသၢႆတၢင်း၊ ႁွင်ႈၵၢၼ်ၾၢႆႇ ၸွမ်းတၢင်းဝၢၼ်ႈၼွၵ်ႈၼႃးပၢင်ႇ ဝႆႉၸိူင်ႉၼႆ။ သဵၼ်ႈတၢင်းၼႆႉ မၼ်းပဵၼ်သဵၼ်ႈတၢင်း ဝၢၼ်ႈၼွၵ်ႈၼႃးပၢင်ႇသေ လႆႈငိၼ်း ဝႃႈ ၶဝ်မွပ်ႈပၼ် တၢင်းႁွင်ႈၵၢၼ်ၾၢႆႇသဵၼ်ႈတႃႈသၢႆတၢင်းလူင် ၶဝ်ႁဵတ်း။ တေႃႇထိုင်ဝၼ်းမိူဝ်ႈလဵဝ်ၼႆႉတႄႉ ယူႇတီႈလူင် ပွင်ၸိုင်ႈၶဝ် တၢမ်းဝၢင်းပၢင်ငိုၼ်းတွင်းမႃး တႃႇတေသိူဝ်ႇတၢင်းၼႆႉ မၼ်းဢမ်ႇမီးပၵျၢပ်ႉ” ဝႃႈၼႆ။

သဵၼ်ႈတၢင်းၼႆႉ တေဢၢၼ်းထုၺ်ထႆ ၵေႃႇသၢင်ႈႁဵတ်းၵႂႃႇ တႃႇၶၢဝ်းတၢင်း ၶိုင်ႈလိူၼ် ႁႂ်ႈယဝ်ႉ။ လိူဝ်ၼၼ်ႉ တေသိူဝ်ႇပူသၢႆး ၵျၢမ်းၼိူဝ်မၼ်းၵႂႃႇ ဝႃႈၼႆ။