ၸၢႆးၼုမ်ႇၵေႃႉၼိုင်ႈၼွၼ်းလဵၼ်ႈမိုဝ်းထိုဝ်ၼႂ်းႁိူၼ်းၽွင်းၾူၼ်လူမ်း ၊ ၺႃးၾႃႉၽႃႇတၢႆ ၊ မေးၼၢင်းမၢတ်ႇၸဵပ်း လႆႈႁၢမ်သူင်ႇႁူင်းယႃ။
ၾူၼ်တူၵ်းလူမ်းပဝ်ႇတီႈဢိူင်ႇၼူၼ်းသီ၊ ၸေႈဝဵင်း ၵပိၼ်ႊပူရီႊ၊ ၸေႈတွၼ်ႈပရႃႊၵျိၼ်ႊပူရီႊ ၸိုင်ႈထႆး မိူဝ်ႈဝၼ်းထိ 26 လိူၼ်ႊမေႊ ယၢမ်းၵၢင်ၶမ်ႈ။ ၸၢႆးၼုမ်ႇၵေႃႉၼိုင်ႈ ဢႃယု 31 ပီ ၼွၼ်းလဵၼ်ႈမိုဝ်းထိုဝ် ၊ ပိုတ်ႇတူၺ်း ယူႊထုပ်ႉ (Youtube) ၽွင်းတိုၵ်ႉထႅမ်ႁႅင်းပႅတ်ႇထရီႊဝႆႉ။ ၽွင်းၼၼ်ႉၾႃႉၽႃႇလႄႈ လႆႈတိူဝ်ႉၺႃးၶႃၽူဝ်မေး ဝႃႈၼႆ။
မေးမၼ်းၸၢႆး ၵေႃႉဢၼ်ၺႃးမၢတ်ႇၸဵပ်းၼၼ်ႉလၢတ်ႈတီႈၸုမ်းၶၢဝ်ႇလႄႈ ၸဝ်ႈၼႃႈတီႈ ဢၼ်မႃးၸွႆႈထႅမ်ဝႃႈ– “ၽူဝ်ၶႃႈ မၼ်းၼွၼ်းသေၸၵ်ႉဢဝ်မိုဝ်းထိုဝ်မႃးပိုတ်ႇတူၺ်း ယူႊထုပ်ႉ။ ၶႃႈသမ်ႉတိုၵ်ႉ တေၶဝ်ႈမႃးၼွၼ်းႁိမ်းၶၢင်ႈမၼ်း ။ ၽွင်းၼၼ်ႉမီးသၢႆလႅင်းသီၶၢဝ်လူင်းမႃး။ ၶႃႈၵေႃႈလူမ်ႉလိုမ်းတူဝ်ၵႂႃႇ။ ၽိူဝ်ႇၶႃႈတိုၼ်ႇမႃးၵေႃႈ မီးတီႈႁူင်းယႃယဝ်ႉ။”- ဝႃႈၼႆ။
ႁိူၼ်းသုမ်ႉၶဝ်ၼၼ်ႉ ယူႇၼႂ်းၼႃး။ မီးၵူၼ်းႁိူၼ်းယူႇၸွမ်းၵၼ် 5 ၵေႃႉ။ ၽူႈယိင်း ဢႃႇယု 47 ပီ ၵေႃႉပဵၼ် မႄႈပႃႈၽူႈၸၢႆးဢၼ်တၢႆၵႂႃႇၼၼ်ႉလၢတ်ႈဝႃႈ ပေႃးမီးသဵင်ၾႃႉၽႃႇလူင်းမႃးၵမ်းထိသၢမ်တႄႉ လႅပ်ႈၵူၼ်းႁိူၼ်းတေတၢႆတင်း 5 ၵေႃႉယူႇ- ဝႃႈၼႆ။
မၼ်းၼၢင်းလၢတ်ႈဝႃႈ -“ၶႃႈတိုၵ်ႉၼင်ႈဝႆႈၽြႃးယူႇ။ လႆႈႁၼ်လႅင်းသီၶၢဝ်ႇလတ်းၶၢမ်ႈႁူဝ်ၶႃႈၵႂႃႇတၢင်းၶႃၽူဝ်မႄးပုၼ်ႉ။ မေးမၼ်းလူမ်ႉလူင်းၵႂႃႇ။ဝၢႆးၼၼ်ႉ သဵင်ၾႃႉၽႃႇၸင်ႇမေႃး။ ၶႃႈတိုၵ်ႉဝူၼ်ႉဝႃႈ ၶႃယွၵ်ႇၵၼ်ယူဝ်ႉၼႆယူႇ သၢႆလႅင်းသီၶၢဝ် လူင်းမႃးထႅင်ႈၵမ်းၼိုင်ႈ။ ပလၵ်ႉၾႆးဢၼ်ထႅမ်ႁႅင်းၾူင်းၼၼ်ႉၾႆးၽုပ်ႉ။ သေ ၾႆးမွတ်ႇၵႂႃႇတင်းမူတ်း။ ဝၢႆးၼၼ်ႉသဵင်ၾႃႉၽႃႇၵမ်းထူၼ်ႈသွင်မေႃးမႃးလင်ဝႃႈလင်။ ၵတ်ႉၵႃႈၾႆးၾႃႉယင်းၶၢတ်ႇၵႂႃႇလႃႈ ။ ပေႃးသဵင်ၾႃႉၽႃႇလင်ၵမ်းထူၼ်ႈသၢမ်တႄႉ လႅပ်ႈၵူၼ်းႁိူၼ်းတေတၢႆမူတ်းယူႇ ” – ဝႃႈၼႆ။
ဝၢႆးလင်ၾႆးမွတ်ႇ မၼ်းၼၢင်းၸင်ႇလႆႈသိုပ်ႇၾူၼ်းႁွင်ႉၸုမ်းၸွႆႈထႅမ်မႃးႁပ်ႉဢဝ်ၶႃၽူဝ်မေးၵႂႃႇႁူင်းယႃ။ လႆႈႁူႉဝႃႈၵေႃႉပဵၼ်ၽူဝ် ၺႃးသၢႆၾႃႉၽႃႇသေတၢႆထင်တီႈ။ ၵေႃႉပဵၼ်မေး တိူဝ်ႉၺႃးၸၢၵ်ႇမၼ်းသေမၢတ်ႇၸဵပ်းတီႈပိၵ်ႇၵႆႇလႄႈၶႅၼ်။ ဝၼ်းတီႈ 28 လိူၼ်မေႊၼၼ်ႉ ၵေႃႉပဵၼ်မေး လႆႈလူင်းႁူင်းယႃ ပွၵ်ႈမိူဝ်းႁိူၼ်းၶိုၼ်းယဝ်ႉဝႃႈၼႆ။
ၾၢႆႇတၢင်းမေႃယႃ တီႈႁူင်းယႃတႄႉလၢတ်ႈဝႃႈ ပေႃးၾူၼ်တူၵ်း လူမ်းပဝ်ႇမႃးၸိုင် ဢမ်ႇပိုတ်ႇမိုဝ်းထိုဝ် ဢမ်ႇယိပ်းမိုဝ်းထိုဝ်ၼႆႉ လီသေပိူၼ်ႈ။ ႁႅင်းထၢတ်ႈသၼ်ယၢၼ်ႊတီႈမိုဝ်းထိုဝ်ၼၼ်ႉ ၸၢင်ႈၸၼ်သၢႆၾႃႉၽႃႇမႃးၸူးတူဝ်ၵဝ်ႇလႆႈၵူႈမိူဝ်ႈ- ဝႃႈၼႆ။
Ref; Thairat, CH7
