ပၢင်ႁူပ်ႉထူပ်းၵူၼ်းၼုမ်ႇတႆး ထုင်ႉႁူဝ်ၵဵဝ် ပွၵ်ႈၵမ်းသၢမ် ၸတ်းႁဵတ်းတီႈဝဵင်းမျိတ်ႉၵျီးၼႃး (မိူင်းၸေႈၼႃး) ၶၢဝ်းတၢင်း သၢမ်ဝၼ်း ။ ၸတ်းတင်ႈလႆႈ လုၵ်ႈၸုမ်းၶွမ်ႊမတီႊ ငဝ်ႈငုၼ်း ၵေႃႁူမ်ႈသၢင်ႈၵူၼ်းၼုမ်ႇတႆး ထုင်ႉႁူဝ်ၵဵဝ်။
ပၢင်ႁူပ်ႉထူပ်းၵူၼ်းၼုမ်ႇ ထုင်ႉႁူဝ်ၵဵဝ်ၼႆႉၸတ်းႁဵတ်းဝၼ်းတီႈ 23 ထိုင် 25 လိူၼ်မေႊ တီႈဝဵင်းၸေႈၼႃး (မျိတ်ႉၵျီးၼႃး) မိူင်းၶၢင်။ မီးၵူၼ်းၼုမ်ႇ 230 ပၢႆ ၼႂ်း 11 ၸေႈဝဵင်း မႃးၶဝ်ႈႁူမ်ႈ။ ယိူင်းဢၢၼ်းလူင်တႄႉ ၼင်ႇႁိုဝ်ၵူၼ်းၼုမ်ႇတႆးထုင်ႉႁူဝ်ၵဵဝ် ၸေႈမိူင်းၶၢင်ၼင်ႇၵၼ် တေၵပ်းသၢၼ်ၶဝ်ႈဢွၵ်ႇ ၵွင်ႉမိုဝ်း ၵၼ်လႆႈလီငၢမ်းလိူဝ်ၵဝ်ႇ၊ ၼင်ႇႁိုဝ်တေမီး ႁူဝ်ၼႃႈၵူၼ်းၼုမ်ႇ သႅၼ်းႁုၼ်ႈမႂ်ႇ ဝႃႈၼႆ။
ၸၢႆးလွႆၶမ်းပၢင်ႇ ၽူႈၶဝ်ႈႁူမ်ႈပၢင်ႁူပ်ႉထူပ်းၵူၼ်းၼုမ်ႇ ထုင်ႉႁူဝ်ၵဵဝ် လၢတ်ႈၽူႈတွႆႇႁွၵ်ႈဝႃႈ – “ပၢင်ၵုမ်ပွၵ်ႈၼႆႉ လီႁၼ်ႉၸႂ် လီပဵင်းပေႃးၸႂ် လီမီးႁႅင်းၸႂ်တႄႉတႄႉ။ ၵူၼ်းၼုမ်ႇမႃးၶဝ်ႈႁူမ်ႈ ၼမ်လီ ၸေးလီ။ လႆႈဢုပ်ႇၵၼ်ၵႂၢင်ႈၵႂၢင်ႈၶႂၢင်ၶႂၢင် သေလႆႈတၢင်းႁူႉတီႈၽူႈယႂ်ႇၵူၼ်းလူင်ၵေႃႈၼမ်။ ယုမ်ႇယမ်ဝႃႈပဵၼ်တိုဝ်ႉတၢင်းလီ တႃႇတေမီးမႃးၵူၼ်းၼုမ်ႇဢၼ်မီးၼမ်ႉၵတ်ႉ တႃႇပဵၼ်ၽူႈဢွၼ်ႁူဝ်လီလႆႈၼမ်ၼမ် ၼႆၶႃႈဢေႃႈ ”- ဝႃႈၼႆ။
တီႈပၢင်ၵုမ် ၶၢဝ်းတၢင်း 3 ဝၼ်းၼႆႉ မီးၽူႈယႂ်ႇၵူၼ်းလူင် မိူၼ်ၼင်ႇ ၸဝ်ႈသြႃႇဝႃႇသျွင်ႇ လႄႈၽွင်းလူင်ၾၢႆႇၸၢဝ်းၶိူဝ်းတႆးမႃးပိုတ်ႇပၢင်မွၵ်ႇလၢတ်ႈၶေႃႈၵႂၢမ်း။ လိူဝ်ၼၼ်ႉ ၸၢႆးၵျေႃႇၺုၼ်ႇ (ၸုမ်းၽူႈၼမ်းၼႂ်း UPDJC )မွၵ်ႇလၢတ်ႈလွင်ႈၶၵ်ႉၵၢၼ်လွင်ႈငမ်းယဵၼ်၊ ၼၢင်းၶမ်းဢေး ၽူႈတႅၼ်းၵူၼ်းမိူင်း ဝဵင်းၼမ်ႉတူႈ မွၵ်ႇလၢတ်ႈလွင်ႈ ၵႃႈၶၼ်ၸူဝ်ႈပၢၼ်ၵူၼ်း၊ ၸၢႆးဝၼ်းလႅင်းၶမ်း ၽူႈတႅၼ်းၸိူဝ်ႉၶိူဝ်း မွၵ်ႇလၢတ်ႈလွင်ႈ ၵူၼ်းၼုမ်ႇလႄႈယႃႈမဝ်းၵမ်၊ ၸၢႆးဢၢႆႈႁိၼ်သႅင် လၢတ်ႈလွင်ႈၶဵင်ႇတႃႉၵူၼ်းၼုမ်ႇပိုၼ်ႉတီႈ၊ ၸၢႆးလႃႉ ၽူႈၵုမ်းထတ်းၽိုၼ်ၶၢဝ်ႇသႅၼ်ပၢႆး မွၵ်ႇလၢတ်ႈလွင်ႈ ၵူၼ်းၼုမ်ႇလႄႈၶၵ်ႉၵၢၼ်ၵၢၼ်မိူင်း၊ ၸၢႆးၸိုၼ်ႈတီႇတီႇသူင်ႇ လၢတ်ႈလွင်ႈ ၵူၼ်းၼုမ်ႇလႄႈပၢႆးပိုၼ်း ၸဵမ်ၸိူဝ်းၼႆႉ ။
ဝၢႆးလင်ပၢင်ၵုမ် သၢမ်ဝၼ်း ၸုမ်းၵူၼ်းၼုမ်ႇ ဢွၵ်ႇလိၵ်ႈၽိုၼ်ၽၢဝ်ႇၽိုၼ်ၼိုင်ႈ ဢၼ်ပႃးဝႆႉ 4 ၶေႃႈ။ သင်ဝႃႈတေႁဵတ်းၶူင်းၵၢၼ်ၸၼ်ႉၸိုင်ႈမိူင်းၼႆၸိုင် တုၵ်းယွၼ်းႁႂ်ႈလူင်ပွင်ၸိုင်ႈ ဢဝ်ၵၢင်ၸႂ်ၵူၼ်းမိူင်း ၸိူဝ်းဢၼ်ၵဵဝ်ႇၶွင်ႈ၊ တႃႇၶၵ်ႉၵၢၼ်ငမ်းယဵၼ်တေၶိုပ်ႈၼႃႈၼၼ်ႉ တိုၵ်းသူၼ်းႁႂ်ႈ ၵူႈၾၢႆႇလူတ်းလွင်ႈၶဵင်ႈၶႅင်ၵၢၼ်သိုၵ်းတေႃႇၵၼ်သေ ဢုပ်ႇဢူဝ်းၵၼ်ၵႄႈလိတ်ႈ ပၼ်ႁႃၵႂႃႇ၊ ၸုမ်းၵူၼ်းၼုမ်ႇ တေႁူမ်ႈမိုဝ်းၵၼ်တင်း တၢင်ႇမူႇၸၢင်ႇၸုမ်းသေ ၵႄႈလိတ်ႈပၼ်ႁႃ ယႃႈမဝ်းၵမ်ၵႂႃႇ၊ ၵေႃႁူမ်ႈသၢင်ႈၵူၼ်းၼုမ်ႇတႆး ထုင်ႉႁူဝ်ၵဵဝ် တေသိုပ်ႇပွင်သၢင်ႈၶၵ်ႉၵၢၼ် ဢၼ် လႆႈၸႂ်တူၵ်းလူင်းၵၼ်တီႈပၢင်ၵုမ်ၼႆႉဝႆႉၼၼ်ႉ – ၸဵမ်ၸိူဝ်းၼႆႉ။
