သိုၵ်းလူင်ပွင်ၸိုင်ႈမၢၼ်ႈႁုပ်ႈယိုတ်း ဢဝ်တီႈလိၼ်ၶွင်ၵူၼ်းမိူင်း တႃႈၶီႈလဵၵ်း ၵႂႃႇ 600 ဢေႊၶိူဝ်ႊပၢႆၼၼ်ႉ ဢဝ်ၵေႃႇ သၢင်ႈႁူင်းၸၢၵ်ႈ (စက်မှုဇုန်) 284 ဢေႊၶိူဝ်ႊပၢႆၵူၺ်းလႄႈ ဢၼ်လိူဝ်ၼၼ်ႉ တေၶိုၼ်းမွပ်ႈပၼ်ၵူၼ်းမိူင်းၵႂႃႇ ဝႃႈၼႆ။
ဝၼ်းတီႈ 20/05/2019 ၽူႈတႅၼ်းသၽႃး၊ ႁွင်ႈၵၢၼ်လူင်ပွင်ၸိုင်ႈ ႁွင်ႉၸဝ်ႈသူၼ်ႁႆႈၼႃး ၸိူဝ်းၺႃးယိုတ်းတီႈလိၼ်ၵႂႃႇ ႁူပ်ႉဢုပ်ႇၵၼ် တီႈဝတ်ႉႁွင်ႈလိုၵ်ႉ(ႁွင်ႉ) ပွၵ်ႉသိူဝ်ၶမ်း ၸႄႈဝဵင်းတႃႈၶီႈလဵၵ်း ၸိုင်ႈတႆး ပွတ်းဢွၵ်ႇၶူင်းသေ ဢုပ်ႇ ဢူဝ်းၵၼ် တီႈလိၼ်ဢၼ်ၵိုတ်းဝႆႉ 317 ဢေႊၶိူဝ်ႊၼၼ်ႉ တေတႅၵ်ႈပၼ်ၶိုၼ်းၸဝ်ႈၶွင်သူၼ်ႁႆႈၼႃး ဝႃႈၼႆ။
ၸၢႆးၼုမ်ႇတုၺ်ႈ ႁူဝ်ပဝ်ႈပႃႇတီႇႁူဝ်သိူဝ် SNLD ၸႄႈဝဵင်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ “တီႈလိၼ်ဢၼ်သိုၵ်း ယိုတ်းၵႂႃႇတႃႇႁဵတ်းႁူင်းၸၢၵ်ႈၼၼ်ႉ ၶဝ်လႆႈၸႂ်ႉ 284 ဢေႊၶိူဝ်ႊၵူၺ်း။ ၵိုတ်းထႅင်ႈ 317 ဢေႊၶိူဝ်ႊၼၼ်ႉ ၵူၼ်းဝၢၼ်ႈ ဢွၼ်ၵၼ်ၵႂႃႇႁဵတ်းၵိၼ်ၼႂ်းမၼ်းယဝ်ႉ။ ယွၼ်ႉၼၼ် တီႈလိၼ်ဢၼ်ၵိုတ်းလိူဝ် 317 ဢေႊၶိူဝ်ႊၼၼ်ႉ တေမွပ်ႈပၼ်ၸဝ်ႈ ၶွင်မၼ်းၶိုၼ်း။ တေတႅၵ်ႈသေပၼ်ၸဝ်ႈၶွင်ၵူၼ်းမိူင်း” ဝႃႈၼႆ။
ၸႄႈဝဵင်းတႃႈၶီႈလဵၵ်း ၸဝ်ႈၶွင်တီႈလိၼ် ဢၼ်ၺႃးႁုပ်ႈ ယိုတ်းၵႂႃႇ တင်းမူတ်း 134 ၵေႃႉ 600 ဢေႊၶိူဝ်ႊ၊ ၼႂ်းၼၼ်ႉ တေ လႆႈၶိုၼ်း 317 ဢေႊၶိူဝ်ႊ။
ပေႃးထိုင်မႃး ဝၼ်းတီႈ 24/05/2019 ၼႆႉ ယူႇတီႈၸဝ်ႈၼႃႈတီႈၾၢႆႇတႅၵ်ႈတီႈလိၼ်လႄႈ ႁွင်ႈၵၢၼ်လူင်ပွင်ၸိုင်ႈ လၢႆလၢႆ ၾၢႆႇ တေလူင်းပိုၼ်ႉတီႈသေ ၵူတ်ႇထတ်းတႅၵ်ႈလိၼ်ၵႂႃႇ ဝႃႈၼႆ။
တီႈလိၼ် 600 ဢေႊၶိူဝ်ႊပၢႆၼႆႉ သိုၵ်းလူင်ပွင်ၸိုင်ႈမၢၼ်ႈ ႁုပ်ႈယိုတ်းဢဝ်ၵႂႃႇ မိူဝ်ႈပီ 1995 (ပၢၼ်ဢူးတဵင်းၸဵင်ႇ ပဵၼ်ၽူႈ ၵွၼ်းတိူင်းသိုၵ်းသၢမ်ၸဵင်ႇ) ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ