ၵူၼ်းမိူင်းမု ၸေႈဝဵင်းၼမ်ႉတူႈ ၵႂႃႇႁႆႈ၊ ၵႂႃႇယဵပ်ႇၺႃးမၢၵ်ႇ တိူဝ်ႉမၢတ်ႇၸဵပ်းသေ လုတၢႆၽွင်းၵႂႃႇႁူင်းယႃ။
ၵေႃႉဢၼ်ယဵပ်ႇၺႃးမၢၵ်ႇၼၼ်ႉ ပဵၼ်လုင်းသၢင်ႇၵျၢၼ်ႇ ဢႃယု 50 ယူႇမိူင်းမု ။ ဝၼ်းတီႈ 20 ယၢမ်းၵၢင်ၼႂ်မၼ်းၸၢႆးလုၵ်ႉတီႈႁိူၼ်းသေ ဢွၵ်ႇၵႂႃႇ ဢၢင်ႈတေၵႂႃႇႁႆႈ ဢၼ်မီးတီႈ သၼ်လွႆ ၾၢႆႇတူၵ်းမိူင်းမု (တၢင်းၵႂႃႇလွႆႁၢင်း ဢၼ်ပဵၼ်ပၢင်တိုၵ်းၵၼ်မိူဝ်ႈႁူဝ်ပီၼႆႉၼၼ်ႉ)သေ ယဵပ်ႇၺႃးမၢၵ်ႇလႄႈ မၢၵ်ႇတႅၵ်ႇတိူဝ်ႉမၢတ်ႇ။
ဝၢႆးလင်ယဵပ်ႇၺႃးမၢၵ်ႇၵေႃႈ တၢင်ႇလူတ်ႉၵႃးၸုမ်းၼုမ်ႇၸၢမ်ႁွမ် သူင်ႇပၼ်ႁူင်းယႃလႃႈသဵဝ်ႈ။ ၵူၺ်းၵႃႈဢမ်ႇတၼ်းထိုင်၊ ၸၢၵ်ႇမၢၵ်ႇတိူဝ်ႉသႂ်ႇၸွမ်းၶႅၼ်ၸွမ်းပဵမ်ႉလႄႈ ၸွမ်းၼႃႈတႃႁၢဝ်ႈႁႅင်းလႄႈ လုင်းသၢင်ႇၵျၢၼ်ႇ လုတၢႆပႅတ်ႈၵၢင်တၢင်းၼႆ ၼၢင်းယိင်း ၸုမ်းတူင်ႉၼိုင်တူင်ႇဝူင်းၵူၼ်း လၢတ်ႈၼေၽူႈတွႆႇႁွၵ်ႈၼင်ႇၼႆ။
“တၢင်ႇလူတ်ႉၵႃး ၼုမ်ႇၸၢမ်ႁွမ် (ၸုမ်းၸွႆႈထႅမ်တူင်ႇဝူင်းၵူၼ်းမၢၼ်ႈၸၢမ်မိူင်းမု) ၼၼ်ႉၵႂႃႇၶႃႈဢေႃႈ။ ။မၼ်းၸၢႆးဢမ်ႇတၼ်းထိုင်ႁူင်းယႃလႃႈသဵဝ်ႈၶႃႈ။ ပူၼ်ႉဝၢၼ်ႈၼႃးၵေး မႃးဢိတ်းၼိုင်ႈၵေႃႈမႃးတၢႆပႅတ်ႈ။ သေၶိုၼ်းဢဝ်တူဝ်မၼ်းမိူဝ်းမိူင်းမု ၶိုၼ်းဢေႃႈ။ ၶဝ်ဢဝ်ၶၢပ်ႈတူဝ်မၼ်းမႃးၽဝ်ပၼ်ဝၼ်းတီႈ 20 ၼၼ်ႉၵမ်းလဵဝ်ၶႃႈ။ တီႈႁိူၼ်းၶဝ်တႄႉ ႁႅၼ်းလူႇပၼ်ယူႇၶႃႈဢေႃႈ မိူဝ်ႈဝႃး (ဝၼ်းတီႈ 21/5/2019) ၼႆႉ”– ဝႃႈၼႆ။
ထုင်ႉသၼ်လွႆ ၾၢႆႇတူၵ်းမိူင်းမု ၼၼ်ႉ ပဵၼ်တၢင်းၵႂႃႇ လွႆႁၢင်း ဢၼ်ပဵၼ်ပၢင်တိုၵ်းႁၢဝ်ႈႁႅင်းၼႂ်းၵႄႈ သိုၵ်းဢူၺ်းလီပွတ်းႁွင်ႇ၊ သိုၵ်းRCSS လႄႈ သိုၵ်းတပ်ႉမတေႃႇမၢၼ်ႈ မိူဝ်ႈႁၢင်လိူၼ်မၢတ်ႉၶျ် ပူၼ်ႉ မႃးၼႆႉ။ ၵူၼ်းမိူင်းမုလၢတ်ႈဝႃႈ ထုင်ႉသၼ်လွႆၼၼ်ႉ ပဵၼ်တီႈၸုမ်းသိုၵ်းယိပ်းၵွင်ႈၵၢင်ႇတူင်ႉၼိုင်။ ၸုမ်းလႂ်မႃးၵေႃႈမႃးတီႈသၼ်လွႆၼၼ်ႉတႃႇသေႇလႄႈ မၢၵ်ႇၼၼ်ႉတေပဵၼ်ၼမ်ႉမိုဝ်းၽႂ် ၸုမ်းလႂ်တႄႉ ဢမ်ႇၸၢင်ႈလၢတ်ႈ ဝႃႈၼႆ။
“ပၢႆလိူဝ်ပဵၼ်သိုၵ်းသိူဝ်ယူႇတၢင်းပီ ၽွင်းသိုၵ်းယဵၼ်ၼႆႉၵူၺ်းႁဝ်းၶႃႈၸၢင်ႈၵႂႃႇႁႆႈၵႂႃႇသူၼ်။ ပေႃးဝႃႈ ၵႂႃႇသူၼ် ၵႂႃႇႁႆႈသမ်ႉ ၺႃးမၢၵ်ႇတႅၵ်ႇသႂ်ႇႁဵတ်းၼႆတိၵ်းတိၵ်းတႄႉ ၵူၼ်းမိူင်းၵူၺ်းယဝ်ႉတေယၢပ်ႇ တေတၢႆတိၵ်းတိၵ်း။ ၽူႈၵဵဝ်ႇၶွင်ႈၶဝ် ၶႅၼ်းၵေႃႈ ၽဵဝ်ႈပၼ်ၽွင်ႈၶႃႈမၢၵ်ႇၸိူဝ်းၼၼ်ႉ ”– ပႃႈၼၢင်း ၵူၼ်းမၢၼ်ႈၸၢမ် လၢတ်ႈ။
လုင်းသၢင်ႇၵျၢၼ်ႇၼႆႉ ပဵၼ်ၵူၼ်းလႃႈသဵဝ်ႈ မႃးတႄႇၼႃႈႁိူၼ်းၵိုၵ်းတင်းၵူၼ်းမိူင်းမုသေ ယူႇသဝ်းႁႃၵိၼ်လဵင်ႉတွင်ႉတီႈမိူင်းမု ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ