ဝၼ်းထိ 6 BBC ႁၢႆးငၢၼ်းဝႃႈ ၶုၼ်ႁေႃၶမ်း Sultan  ၸဝ်ႈ Hassan  Bolkiah မိူင်းပရူးၼၢႆး သင်ႇႁႂ်ႈၵိုတ်းလွင်ႈၸႂ်ႉမၢႆမီႈ ပၼ်တူတ်ႈတၢမ်ႇတၢႆ ၸၢႆးတေႃႇၸၢႆးႁၵ်ႉၵၼ် ၊ ယူႇလူၺ်ႈၵၼ် ဢၼ်ပဵၼ်မၢႆမီႈမႂ်ႇၸိုင်ႈမိူင်းဢၼ်တိုၵ်ႉ ပိုၼ်ၽၢဝ်ႇၸႂ်ႉတိုဝ်း မိူဝ်ႈလိူၼ်ဢေႊပရိူဝ်ႊ ပူၼ်ႉမႃးၼႆႉ။

မၢႆမီႈမိူင်းပရူႊၼၢႆႊဢၼ်ဢွၵ်ႇမႂ်ႇၼႆႉတႅမ်ႈဝႆႉဝႃႈ – “သင်ဝႃႈ ၵူၼ်းၸၢႆးတေႃႇၵူၼ်းၸၢႆး ႁၵ်ႉၵၼ် ၊ ႁူမ်ႈၽၢၵ်ႈၼွၼ်းလူၺ်ႈၵၼ်ၸိုင် ၽိတ်းမၢႆမီႈၸိုင်ႈမိူင်းလႄႈ တေပၼ်တၢမ်ႇတၢႆ ”-ၼႆၼၼ်ႉ ၸုမ်းတူင်ႇဝူင်းလုမ်ႈၾႃႉ ဢွၼ်ၵၼ်သႄႉသွမ်းသေ တုၵ်းယွၼ်းႁႂ်ႈထွတ်ႇထွၼ်ယႃႉပႅတ်ႈမၢႆမီႈၼႆႉ။

ၶုၼ်ႁေႃၶမ်း Sultan  လၢတ်ႈမိူဝ်ႈဝၼ်းတိတ်ႉ ဝၼ်းတီႈ 5 ပူၼ်ႉမႃးၼႆႉဝႃႈ – တေၵိုတ်းယင်ႉ မၢႆမီႈၼႆႉသေ၊ ပရူႊၼၢႆႊ တေလူင်းလၢႆးမိုဝ်းၼႂ်းလိၵ်ႈႁူမ်ႈမၢႆ ၸၢတ်ႈၸိုင်ႈလုမ်ႈၾႃႉ ၸွမ်းၵူႈၸိုင်ႈမိူင်း ၊ ဢၼ်ပဵၼ်ၶေႃႈတူၵ်းလူင်း တႃႇၵႅတ်ႇၶႄႁႄႉၵင်ႈ  လွင်ႈတဵၵ်းတဵင်ၶႃငႅၼ်းၵၼ်  ၼၼ်ႉ ဝႃႈၼႆ။

လိူဝ်ၼၼ်ႉ ၸဝ်ႈမုၼ်ယႂ်ႇၶုၼ်ႁေႃၶမ်း Hassanal Bolkiah ယင်းလၢတ်ႈဝႃႈ- ၽြႃးပဵၼ်ၸဝ်ႈ  ႁၼ်ႊလႃႊ ၵေႃႈတေဢမ်ႇလႆႈၸႂ်  ၵၢၼ်ၸႂ်ႉတိုဝ်းမၢႆမီႈဢၼ်ႁုၵ်ႉႁၢႆႉလိူဝ်ႁႅင်း ။ မၢႆမီႈပၼ်တူတ်ႈတၢမ်ႇတၢႆၼိူဝ် ၵူၼ်းတင်ႈၸႂ်ၶႃႈႁႅမ်ပိူၼ်ႈလႂ်၊ ၵူၼ်းၵႃႉယႃႈမဝ်းၵမ်လႂ် ၸိူဝ်းၼႆႉ ပိုၼ်ၽၢဝ်ႇၸႂ်ႉတိုဝ်းမႃးၸဵမ်ပၢၼ် 1957 ပုၼ်ႉသေတႃႉ ယူႇတီႈၾၢႆႇၸိုင်ႈမိူင်း ယင်းပႆႇလႆႈၶႃႈႁႅမ်တၢႆ ၽူႈမီးတၢင်းၽိတ်းသေၵမ်း သေပွၵ်ႈ ဝႃႈၼႆ။

မၢႆမီႈမႂ်ႇဢၼ်မိူင်းပရူႊၼၢႆး   ဢၼ်ၵူၼ်းလုမ်ၾႃႉ သႄႉသွမ်းယူႇ    ၼၼ်ႉဝႃႈ  ၸၢႆးတေႃႇၸၢႆး ႁၵ်ႉၵၼ် ယူႇလူၺ်ႈၵၼ် ၼၼ်ႉ တူတ်ႈတၢမ်ႇ တၵ်းလႆႈ ဢဝ်မၢၵ်ႇႁိၼ် ထိုမ်ႈသႂ်ႇ တေႃႇထိုင်တၢႆ၊ ဢမ်ႇၼၼ် တတ်းၶႅၼ် တတ်းၶႃ ။ ၸိူဝ်းၼႆႉ လုမ်ႈၽႃႉဝႃႈ ပဵၼ်ၵၢၼ်ပူၼ်ႉပႅၼ်သုၼ်ႇလႆႈသုၼ်ႇပဵၼ်ၵူၼ်း။ တၢင်းၽိတ်းဢၼ် ယိင်းတေႃႇယိင်း ႁၵ်ႉၵၼ် ယူႇလူၺ်ႈၵၼ်ၼၼ်ႉတႄႉ တူတ်ႈတၢမ်ႇမီးဝႆႉဝႃႈ တေလႆႈၺႃးၶွၼ်ႉ 40 ၵမ်း ဢမ်ႇၼၼ် တူတ်ႈၶွၵ်ႈ 10 ပီ ဝႃႈၼႆဝႆႉ။

ယွၼ်ႉပိူဝ်ႈမၢႆမီႈၼႆႉသေ ၸၢႆးၸိူင်းလႄႈ ၽူႈႁွင်ႉၵႂၢမ်းၸိုဝ်ႈသဵင်ယႂ်ႇ ၸၼ်ႉ Hollywood လၢႆလၢႆၵေႃႉၵေႃႈ သၢၼ်ၶတ်းၼေၵၢင်ၸႂ်လူၺ်ႈ ဢမ်ႇၵႂႃႇလိုဝ်ႈသဝ်းတီႈႁူင်းႁႅမ်းၸိုဝ်ႈသဵင်ယႂ်ႇ ၶွင်ၶိူဝ်းႁေႃၶမ်း Sultan   ဢၼ်မီးတီႈလၢႆလၢႆၸိုင်ႈမိူင်း ၼႂ်းလုမ်ႈၾႃႉၼႆႉ – ဝႃႈၼႆ။

ၶေႃႈမုလ်းၶၢဝ်ႇ BBC