မၢၵ်ႇတႅၵ်ႇတီႈမၢၼ်ႈပၢင်ႇ(ပလွင်ႈ) ထုင်ႉမိူင်းဝီး ၼႂ်းၸေႈဝဵင်းၼမ်ႉၶမ်းလႄႈ လုၵ်ႈဢွၼ်ႇတၢႆ 2 ၵေႃႉမၢတ်ႇၸဵပ်း 8 ၵေႃႉ။ လႆႈႁၢမ်သူင်ႇတူဝ်ႁူင်းယႃလူင်ၼမ်ႉၶမ်း။
မၢၵ်ႇၼႆႉတႅၵ်ႇမိူဝ်ႈဝၼ်းတီႈ 26 /04/2019 ယၢမ်းဝၢႆးဝၼ်း 5 မူင်း။ ပဵၼ်မၢၵ်ႇလူင်ဢၼ်ၸႂ်ႉၼႂ်းပၢင်တိုၵ်း။ၵူၼ်းၼမ်ႉၶမ်းလၢတ်ႈဝႃႈ လႅပ်ႈပဵၼ်မၢၵ်ႇလူင်မေႃႇထႃႇ ဢၼ်လႆႈဝႅၵ်ႇဢဝ်ၼၼ်ႉလႄႈ မၢၵ်ႇတႅၵ်ႇသဵင်လင်ႁႅင်း။ ဝၢၼ်ႈဢၼ်ယူႇႁိမ်းႁွမ်းၼၼ်ႉပေႃးလႆႈငိၼ်းသဵင်ဝႃႈၼႆ။
ၵူၼ်းမၢၼ်ႈပၢင်ႇ ၶူဝ်လူင်လိသေႃးလၢတ်ႈဝႃႈ- “လႅပ်ႈတေလုၵ်ႈဢွၼ်ႇၶဝ်ႁၼ်မၢၵ်ႇၼႆႉတူၵ်းဝႆႉသေ ၵဵပ်းမႃးလဵၼ်ႈလႄႈ တႅၵ်ႇၼႂ်းမိုဝ်းၶဝ်ႁိုဝ်ၼႆ ၸဝ်ႈၼႃႈတီႈပလိၵ်ႈလႄႈ ၵူၼ်းလူင်ဝၢၼ်ႈ လၢတ်ႈၸိူင်ႉၼႆ။ မၢၵ်ႇၼႆႉတႅၵ်ႇသဵင်လင်ႁႅင်းတႄႉတႄႉ။ မၢၼ်ႈပၢင်ႇပလွင်ႈတင်း မၢၼ်ႈပၢင်ႇၶူဝ်လူင်လိသေႃး ႁဝ်းၶႃႈ ယၢၼ်ၵၼ်ပဵၼ် 4 လၵ်း။ ႁဝ်းၶႃႈလႆႈငိၼ်း သဵင်မၼ်းလင်တႄႉတႄႉ။” – ဝႃႈၼႆ။
တီႈၶၢဝ်ႇ RFA တႄႉဢွၵ်ႇဝႆႉဝႃႈ လုၵ်ႈဢွၼ်ႇၵေႃႉၼိုင်ႈ ၵႂႃႇၽဝ်ထၢၼ်ႇၸွမ်း ဢူႈမႄႈမၼ်း သေ ပွၵ်ႈႁိူၼ်းၶိုၼ်းၼၼ်ႉ ႁၼ်မၢၵ်ႇသေၵဵပ်းမႃးလဵၼ်ႈတင်းဢူၺ်းၵေႃႉမၼ်းလႄႈ မၢၵ်ႇ လႆႈတႅၵ်ႇတိူဝ်ႉလုၵ်ႈဢွၼ်ႇတၢႆထင်တီႈ သွင်ၵေႃႉ။ ပဵၼ် လူၺ်းဢီႇႁွမ် 2 ပီလႄႈ မၢႆးၼၢႆႇၽဵဝ်း ဢႃယု 8 ပီ။
ဢၼ်ႁွတ်ႈထိုင်ႁူင်းယႃၼမ်ႉၶမ်း 8 ၵေႃႉၼၼ်ႉ တႃႇ 4 ၵေႃႉ မၢတ်ႇၸဵပ်းလိူဝ်ႁႅင်း။ ၼႂ်း 4 ၵေႃႉၼၼ်ႉ တႃႇ 2 ၵေႃႉၼၼ်ႉလႆႈမႆႈၸႂ်ဝႆႉဝႃႈၼႆ။
ၼႂ်းထုင်ႉမိူင်းဝီးၼၼ်ႉ လိူဝ်သေ တပ်ႉသိုၵ်းတပ်ႉမတေႃႇမၢၼ်ႈယဝ်ႉ ယင်းမီးၸုမ်းသိုၵ်းတဢၢင်း လႄႈ ၸုမ်းပီႇတုၸိတ်ႉတူင်ႉၼိုင်။ ၸဝ်ႈၼႃႈတီႈပလိၵ်ႈၼမ်ႉၶမ်းတႄႉလၢတ်ႈဝႃႈ မီးသိုၵ်းၸုမ်းယိပ်းၵွင်ႈၵၢင်ႇလၢႆလၢႆၸုမ်း တူင်ႉၼိုင်ၵႂႃႇမႃး လႄႈ တေပဵၼ်မၢၵ်ႇၽႂ်ၸုမ်းလႂ် တႄႉဢမ်ႇႁူႉ ဝႃႈၼႆ။
ၼႂ်းထုင်ႉမၢၼ်ႈၸေႈၼၼ်ႉမိူဝ်ႈလိူၼ်ၾႅပ်ႉပိဝ်ႊရီႊ ၼႆႉၵေႃႈမၢၵ်ႇတႅၵ်ႇတိူဝ်ႉသႂ်ႇလုၵ်ႈဢွၼ်ႇမၢတ်ႇၸဵပ်း 6 ၵေႃႉ၊ တီႈမၢၼ်ႈလီ ၸေႈဝဵင်းၼမ်ႉတူႈသမ်ႉ မၢၵ်ႇတႅၵ်ႇသႂ်ႇလႄႈၵူၼ်းဝၢၼ်ႈတၢႆ ဢမ်ႇယွမ်း 3 ၵေႃႉမၢတ်ႇၸဵပ်း 5 ၵေႃႉ။
ၼႂ်းၸိုင်ႈတႆးပွတ်းႁွင်ႇၼႆႉ ယွၼ်ႉပၢင်တိုၵ်းသိုၵ်းသိူဝ်ၼမ်လႄႈ မၢၵ်ႇလဵၵ်ႉ၊ယႂ်ႇ ၵႆႉၵႆႉတႅၵ်ႇ သႂ်ႇၵူၼ်းဝၢၼ်ႈ။ ၵမ်ႈၼမ်ပဵၼ်ဢၼ်လုၵ်ႈဢွၼ်ႇၵႂႃႇၵဵပ်းမႃးလဵၼ်ႈသေတႅၵ်ႇသႂ်ႇ။
