ၸဝ်ႈသိလ်ထမ်းဝုၼ်းၸုမ်ႉ ယေႃးတူဝ် မႃးတၢင်ႇထီးထၢတ်ႈ တီႈၼွင်ၼၢင်းယေႈသႅင်ၵေႃႇ ၸႄႈဝဵင်း မိူင်းပၼ်ႇ သင်ၶၸဝ်ႈ လႄႈ တၵ်ႉၵႃႇသတ်ႉထႃး ၶဝ်ႈႁူမ်ႈလူႇတၢၼ်း တင်းၼမ်လၢႆ။
ဝၼ်းတီႈ 25/04/2019 ယၢမ်းဝၢႆးဝၼ်း ၸဝ်ႈသိလ်ထမ်းဝုၼ်းၸုမ်ႉ ဢွၼ်ႁူဝ်သင်ၶၸဝ်ႈလႄႈ တၵ်ႉၵႃႇသတ်ႉထႃး ႁူမ်ႈၵၼ် တၢင်ႇထီးထၢတ်ႈ “ၵွင်းမူးယွၼ်းသူးတဵမ်ထူၼ်ႈ” တီႈၼွင်ၼၢင်းယေႈသႅင်ၵေႃႇ ဢိူင်ႇၼွင်ႁီး ၸႄႈဝဵင်းမိူင်းပၼ်ႇ ၸႄႈ တွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း။
လုင်းၸၢႆးၶိူဝ်း ပေႃႈၾႃႉမႄႈမိူင်း ၸႄႈဝဵင်းမိူင်းပၼ်ႇ လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ ၸဝ်ႈပေႃႈသိလ်ထမ်းဝုၼ်း ၸုမ်ႉ ယေႃးၶိင်းမႃးတၢင်ႇထီး တီႈၵွင်းမူး ယွၼ်းသူးတဵမ်ထူၼ်ႈ တီႈၼွင်ၼၢင်းယေႈသႅင်ၵေႃႇသေ ယဝ်ႉၵေႃႈ ၸဝ်ႈႁဝ်း မဵတ်ႉတႃႇ တြႃး/ ပွၼ်ႈထမ်းပၼ်ၵႂႃႇ။ မီးပီႈၼွင်ႉ တီႈၸမ်ၵႆ ၶဝ်ႈႁူမ်ႈလူႇတၢၼ်း တင်းၼမ်ၶႃႈယဝ်ႉ။ ပေႃးၵိုၼ်းလူင်ဝႆႉ ၶႃႈဢေႃႈ” ဝႃႈၼႆ။
တၵ်ႉၵႃႇသတ်ႉထႃး တီႈၸမ်ၵႆ ဢၼ်မႃးၶဝ်ႈႁူမ်ႈလူႇတၢၼ်းသမ်ႉ မိူၼ်ၼင်ႇ တၵ်ႉၵႃႇသတ်ႉထႃး ၸႄႈဝဵင်းမိူင်းပၼ်ႇ၊ လၢင်းၶိူဝ်း၊ ၵဵင်းတွင်း လႄႈ ဢိၵ်ႇထႅင်ႈ လၢႆလၢႆတီႈ ၸဵမ်ၸိူဝ်းၼႆႉ။
ဝၢႆးတၢင်ႇထီးထၢတ်ႈ“ၵွင်းမူးယွၼ်းသူးတဵမ်ထူၼ်ႈ” တီႈၼွင်ၼၢင်းယေႈသႅင်ၵေႃႇ ၸႄႈဝဵင်းမိူင်းပၼ်ႇယဝ်ႉ ၸဝ်ႈသိလ်ထမ်း ဝုၼ်းၸုမ်ႉ ယေႃးတူဝ် ဢွၵ်ႇၶၢဝ်းတၢင်း ၵႂႃႇတီႈၵွင်းမူး ဢၼ်တိုၵ်ႉၵေႃႇသၢင်ႈဝႆႉတီႈၶုမ်ၵုတ်းၸဝ်ႈၼရေးသူၼ် ဢိူင်ႇႁူၺ်ႈ ဢေႃႈ ၸႄႈဝဵင်းမိူင်းတူၼ် ၸႄႈတွၼ်ႈမိူင်းသၢတ်ႇ ၸိုင်ႈတႆးပွတ်းဢွၵ်ႇ ဝႃႈၼႆ။
လိူဝ်ၼၼ်ႉ ပေႃးထိုင်မႃး ဝၼ်းတီႈ 29/04/2019 ၼႆႉ ၸဝ်ႈသိလ်ထမ်းဝုၼ်းၸုမ်ႉ တေယေႃးတူဝ်ၶဝ်ႈထမ်ႈ တိုဝ်းၵမ်သိလ် ၼႂ်းၶၢဝ်းတၢင်း 3 ပီ 3 လိူၼ် 3 ဝၼ်း တီႈထမ်ႈမိူင်းၵႅတ်ႇ ဢိူင်ႇမိူင်းၵႅတ်ႇ ၸႄႈဝဵင်းမိူင်းတူၼ် ၸႄႈတွၼ်ႈမိူင်းသၢတ်ႇ ၸိုင်ႈ တႆး ပွတ်းဢွၵ်ႇၶူင်း။
