ၸဝ်ႈသိလ်ထမ်းဝုၼ်းၸုမ်ႉ ၸီႉၸမ်ႈၼႄတၢင်းပီႈၼွင်ႉၵူၼ်းမိူင်း ၼႂ်းထုင်ႉမိူင်းတုမ်း ၸႄႈဝဵင်းမိူင်းသၢတ်ႇ ၵေႃႇသၢင်ႈထၢတ်ႈၵွင်းမူး မိူၼ် ထၢတ်ႈပုတ်ႉထၵႃႇယႃႇ ဢၼ်မီးၼႂ်းမိူင်းဢိၼ်ႊၻီႊယိူဝ်ႊၼၼ်ႉ ဝႃႈၼႆ။
ၵူၼ်းမိူင်းတုမ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ထၢတ်ႈၵွင်းမူးၼႆႉ ၸဝ်ႈသိလ်ထမ်းဝုၼ်းၸုမ်ႉ ဢွၼ်ႁူဝ် ႁဝ်းၶႃႈ တၵ်ႉၵႃႇသတ်ႉထႃး ၼႂ်းမိူင်းတုမ်း ႁူမ်ႈၵၼ် လူႇတၢၼ်းၵေႃႇသၢင်ႈမႃးၶႃႈ။ မိူဝ်ႈပီ 2016 ၼၼ်ႉ ၸဝ်ႈပေႃႈသိလ်ထမ်းဝုၼ်းၸုမ်ႉ ယၢမ်ႈမႃးၵေႃႇသၢင်ႈထၢတ်ႈဝႆႉသူႇၼိုင်ႈ ၸိုဝ်ႈထၢတ်ႈတႄႉ ထၢတ်ႈမင်ႇၵလႃႇၸုမ်ႈမိူင်း (ဢမ်ႇၼၼ်) ထၢတ်ႈဝဵင်းၼၢင်းၵဝ်ႈႁၢၼ်ႉၼႆၵေႃႈႁွင်ႉၶႃႈ။ တေႃႈလဵဝ် ႁဝ်းၶႃႈ ၶိုၼ်းႁဵတ်းထႅင်ႈသူႇၼိုင်ႈၶႃႈ ပိူင်ၾၢင် ႁၢင်ႈထၢတ်ႈၵွင်းမူးၼႆႉ တေဢၢၼ်းသၢင်ႈမိူၼ် ထၢတ်ႈပုတ်ႉထၵႃႇယႃႇ ဢၼ်မီးၼႂ်းမိူင်းဢိၼ်ႊၻီႊယိူဝ်ႊၼၼ်ႉ” ဝႃႈၼႆ။
မိူဝ်ႈဝၼ်းတီႈ 29/05/2018 ၼၼ်ႉ သင်ၶၸဝ်ႈလႄႈ တၵ်ႉၵႃႇသတ်ႉထႃး ဢွၼ်ၵၼ်ဝၢင်းမၢၵ်ႇဢုတ်ႇ တႃႇ သၢင်ႈထၢတ်ႈၵွင်းမူးၼႆႉမႃး တီႈၾၢႆႇတူၵ်းမိူင်းတုမ်း ယၢၼ်ၵႆ ဝၢၼ်ႈၽၵ်းႁႃႈ မွၵ်ႈၼိုင်ႈလၵ်း ၼႂ်းထုင်ႉမိူင်းတုမ်း ၸႄႈဝဵင်းမိူင်းသၢတ်ႇ ၸိုင်ႈတႆးပွတ်းဢွၵ်ႇၶူင်း။
ထၢတ်ႈၵွင်းမူး တီႈၼႂ်းထုင်ႉမိူင်းတုမ်းၼႆႉ ယိူင်းဢၢၼ်းဝႆႉ တေသၢင်ႈႁႂ်ႈယဝ်ႉ ၼႂ်းၶၢဝ်းတၢင်း 2 ပီ ဝႃႈၼႆ။
ၸၢႆးလူင် ၵူၼ်းမိူင်းတုမ်း လၢတ်ႈဝႃႈ “ သင်ဝႃႈ ပီႈၼွင်ႉတၵ်ႉၵႃႇသတ်ႉထႃးႁဝ်း တီႈၸမ်ၵႆ ဢမ်ႇဝႃႈ ၼွၵ်ႈမိူင်းၼႂ်းမိူင်း ၸွမ်းလႅၼ်လိၼ်တႆး-ထႆး ႁူမ်ႈလူၺ်ႈ ပီႈၼွင်ႉတၢင်းမိူင်းၵူၵ်း၊ မိူင်းတူၼ်၊ ၼႃးၵွင်းမူး၊ ပုင်ႇပႃႇၶႅမ် လႄႈ မိူင်းသၢတ်ႇ သင်ၶႂ်ႈလူႇ ၶႂ်ႈတၢၼ်း ပဵၼ်ၸဝ်ႈတႃႇၼၸိုင် ႁဝ်းၶႃႈႁပ်ႉလူႇၶၢမ်ႇယူႇၶႃႈ၊ ၼင်ႇႁိုဝ် ပေႃးတေလႆႈပဵၼ်ၵုသူလ်တႃႇၼ တၢင်းလီၸွမ်းၵၼ် ၵႂႃႇၶႃႈ” ဝႃႈၼႆ။
ၼႂ်းၶၢဝ်းတၢင်းဝႃႇသႃ 3 လိူၼ် ပီ 2018 ၼႆႉ သိလ်ထမ်းၸဝ်ႈဝုၼ်းၸုမ်ႉ ၶဝ်ႈတိုဝ်းၵမ်(ၵျၢင်ႉၵမ်သိလ်) တီႈထမ်ႈ မိူင်းၵႅတ်ႇ ၼႂ်းၸႄႈဝဵင်းမိူင်းသၢတ်ႇ ၸိုင်ႈတႆးပွတ်းဢွၵ်ႇၶူင်း ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ