ၸဝ်ႈသိလ်ထမ်းဝုၼ်းၸုမ်ႉ ၶဝ်ႈတိုဝ်းၵမ်သိလ် ၼႂ်းဝႃႇသႃႇ 3 လိူၼ်တီႈထမ်ႈမိူင်းၵႅတ်ႇ တႃႇၶၢဝ်းတၢင်း 90 ဝၼ်း ၼၼ်ႉ တေႃႈလဵဝ် ယေႃးတူဝ်ဢွၵ်ႇထမ်ႈၶိုၼ်းယဝ်ႉ ဝႃႈၼႆ။
ဝၼ်းတီႈ 24/10/2018 ၸဝ်ႈတူၼ်ၶူးသုၶမ်းလႄႈ လုၵ်ႈၼွင်ႉပွင်ႈပၢႆ၊ တၵ်ႉၵႃႇသတ်ႉထႃး တီႈၸမ်/ၵႆလႄႈ ႁွင်ႈ ၵၢၼ်ၾၢႆႇ လူင်ပွင်ၸိုင်ႈ ၵမ်ႈၽွင်ႈ ႁူမ်ႈၵၼ်မႃးပႂ်ႉႁပ်ႉတွၼ်ႈလႄႈ ဝႆႈသႃတီႈထမ်ႈမိူင်းၵႅတ်ႇ ဢိူင်ႇမိူင်းၵႅတ်ႇ ၸႄႈဝဵင်း မိူင်းသၢတ်ႇ ၸိုင်ႈတႆးပွတ်းဢွၵ်ႇၶူင်း။ မီးတၵ်ႉၵႃႇသတ်ႉထႃး ၶဝ်ႈႁူမ်ႈဝႆႈသႃ ၼပ်ႉႁူဝ်ႁဵင် ဝႃႈၼႆ။
ပီႈၼွင်ႉတၵ်ႉၵႃႇ ၵူၼ်းမိူင်းတူၼ် ဢၼ်လႆႈၵႂႃႇၶဝ်ႈႁူမ်ႈဝႆႈသႃ ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈဝၼ်းတီႈ 24 ၸဝ်ႈပေႃႈသိလ်ထမ်းဝုၼ်းၸုမ်ႉ ဢွၵ်ႇထမ်ႈ။ ဝၼ်းတီႈ 25 ယၢမ်းဝၢႆးဝၼ်း 4 မူင်းသမ်ႉ ၸဝ်ႈပေႃႈယေႃး တူဝ်မႃး တီႈ သိမ်ႇဢၼ်ႁဵတ်းဝႆႉၼၼ်သေ မႃးမဵတ်ႉတႃႇတြႃးပၼ်တၵ်ႉၵႃႇသတ်ႉထႃးတီႈၼၼ်ႈ။ လိူဝ်ၼၼ်ႉ ဝၼ်းတီႈ 26 မိူဝ်ႈၼႆႉၵေႃႈ ၸဝ်ႈပေႃႈသိလ်ထမ်းဝုၼ်းၸုမ်ႉ တေမဵတ်ႉတႃႇတြႃးပၼ်ထႅင်ႈ။ ၸဝ်ႈႁဝ်း တေယေႃးတူဝ်ပွၵ်ႈမိူဝ်း တၢင်း မိူင်းၽူင်းၼၼ်ႉ မိူဝ်ႈလႂ်ပႆႇႁူႉ” ဝႃႈၼႆ။
ၼႂ်းပၢင်ၸဝ်ႈသိလ်ထမ်းဝုၼ်းၸုမ်ႉဢွၵ်ႇထမ်ႈတီႈမိူင်းၵႅတ်ႇၼၼ်ႉ မီးတၵ်ႉၵႃႇသတ်ႉထႃး ၼႂ်းၸိုင်ႈတႆးပတ်းပိုၼ်ႉ ၶဝ်ႈ ႁူမ်ႈဝႆႈသႃ ၼပ်ႉႁူဝ်ႁဵင်။ လိူဝ်ၼၼ် မီးတၵ်ႉၵႃႇသတ်ႉထႃး တီႈၸမ်ၵႆ မႃးၸႃႇၵလဵင်ႉလူ တင်းၼမ်လၢႆ ဝႃႈၼႆ။
မိူဝ်ႈဝၼ်းတီႈ 23/07/2018 ၼၼ်ႉ ၸဝ်ႈသိလ်ထမ်းဝုၼ်းၸုမ်ႉ ယေႃးတူဝ်မဵတ်ႉတႃႇတြႃး ပၼ်တၵ်ႉၵႃႇသတ်ႉထႃး လႄႈ ၶဝ်ႈတိုဝ်းၵမ်ၽွင်းၶၢဝ်းၼႂ်းဝႃႇ 3 လိူၼ်တီႈထမ်ႈဢိူင်ႇမိူင်းၵႅတ်ႇ ၸႄႈဝဵင်းမိူင်းသၢတ်ႇ ၸႄႈတွၼ်ႈမိူင်းသၢတ်ႇ ၵႂႃႇ ဝႃႈၼႆ။
မိူဝ်ႈပီ 2017 ၼၼ်ႉ ၸဝ်ႈသိလ်ထမ်းဝုၼ်ႉၸုမ်ႉ ယေႃးတူဝ်ၶဝ်ႈတိုဝ်းၵမ် ၽွင်းၶၢဝ်းၼႂ်းဝႃႇ 3 လိူၼ် တီႈႁူဝ်ၼမ်ႉဝူင်း ဢိူင်ႇမိူင်းပူးဢွၼ်ႇ ၸႄႈဝဵင်းမိူင်းပဵင်း ၸိုင်ႈတႆးပွတ်းဢွၵ်ႇၶူင်း ဝႃႈၼႆ။
ၸဝ်ႈၶူးဝႃးဝုၼ်းၸုမ်ႉၼႆႉ ၶိုၼ်ႈပဵၼ်သၢင်ႇမိူဝ်ႈဢႃယုလႆႈ 11 ၶူပ်ႇ၊ဢႃယု 12 ပီတၵ်ႉၵႃႇသတ်ႉထႃး ဢိူင်ႇမိူင်းၽူင်း ၵႂႃႇမွၵ်ႇယေႃးမုၼ်ႁပ်ႉဢဝ်ၸဝ်ႈမႃးပူၵ်းပွင်သႃသၼႃ တီႈဝတ်ႉၽရႃႉထၢတ်ႈ သီႊတွၼ်ႊရိူင်း (သီရိတွၼ်းႁိူင်း) ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း တေႃႇထိုင်ဝၼ်းမိူဝ်ႈၼႆႉ။
