ၼႂ်းၶၢဝ်းၶိဝ်းဝူင်ႈဝၢင်ႈၼႆႉ တပ်ႉသိုၵ်းတပ်ႉမတေႃႇမၢၼ်ႈ ဢဝ်လိူင်ႈ ၸွႆးတြႃး ၸုမ်းၶၢဝ်ႇ ဢီႊရႃႊဝတီႊ   လူၺ်ႈမၢတ်ႈတြႃး ၆၆ ဃ ၼႄးဝႃႈ တႅမ်ႈၶၢဝ်ႇလွင်ႈပၢင်တိုၵ်းမိူင်းရၶႅင်ႇ ၼၼ်ႉ  ၸပ်းၾၢႆႇ၊ ဢမ်ႇယူႇၵၢင် ဢမ်ႇပဵၼ်ထမ်း ဝႃႈၼႆ။

တပ်ႉသိုၵ်းတပ်ႉမတေႃႇမၢၼ်ႈ ပိုတ်ႇဢမု ၶၻီးဝႆႉတီႈႁူင်းပလိၵ်ႈၸႄႈဝဵင်း ၵျွၵ်ႉတတႃးလႄႈ ဝၼ်းတီႈ 22 လိူၼ်ဢေႊပရိူဝ်ႊၼႆႉ ၾၢႆႇႁူင်းပလိၵ်ႈ ႁွင်ႉၽူႈမီးပုၼ်ႈၽွၼ်းၸုမ်းၶၢဝ်ႇ ဢီႊရႃႊဝတီႊ    တႃႇၵူတ်ႇထတ်းထဵတ်ႈထၢမ် ။

သိုဝ်ႇၶၢဝ်ႇ ဢီႊရႃႊဝတီႊ   ဢွၵ်ႇၶၢဝ်ႇဝႆႉဝႃႈ – ၸွမ်ႁၢၼ် ၸေႃႇမိၼ်းထုၼ်း ၾၢႆႇပွင်ႇၶၢဝ်ႇ တပ်ႉသိုပ်းတပ်ႉမတေႃႇမၢၼ်ႈလၢတ်ႈတီႈ ဢီႊရႃႊဝတီႊ  ဝႃႈ ပၼ်ႁႃၸၢဝ်းၶိူဝ်းတီႈၼၼ်ႈ ပေႃးယႂ်ႇၼႃႇယဝ်ႉ။ ပေႃးသိုဝ်ႇၶၢဝ်ႇၶဝ်သမ်ႉတႅမ်ႈ ၸပ်းၾၢႆႇသေၼႆ ၵူဝ်ပၼ်ႁႃၸၢဝ်းၶိူဝ်းမိူင်းရၶႅင်ႇ ယႂ်ႇမႃးတိၵ်းတိၵ်းလႄႈၸင်ႇလႆႈႁၢင်ႈႁႅၼ်းတႃႇဢၢဝ်လိူင်ႈသိုဝ်ႇၶၢဝ်ႇ။ – ဝႃႈၼႆ။

ၸွမ်ႁၢၼ် ၸေႃႇမိၼ်းထုၼ်းလၢတ်ႈထႅင်ႈဝႃႈ ဢၼ်တပ်ႉသိုပ်းလႆႈဢဝ်လိူင်ႈတီႈၸုမ်းၶၢဝ်ႇ ဢီႊရႃႊဝတီႊ  ၼႆႉ ပဵၼ်ၶၢဝ်ႇဢၼ် ၼၵ်းၶၢဝ်ႇ မူဝ်းမျိၼ်ႉ တႅမ်ႈဝႆႉ ဢၼ်မီးၸိုဝ်ႈဝႃႈ ၽိုၼ်လိၵ်ႈမျွၵ်ႉဢူး( မြောက်ဦးမှတ်တမ်း) ၼႆၼၼ်ႉသေ တီႈၶၢဝ်ႇႁူဝ်ၼၼ်ႉ ဢမ်ႇတႅမ်ႈပႃးသဵင်ၾၢႆႇတပ်ႉသိုၵ်းသေဢိတ်း။ ၾၢႆႇပွင်ႇၶၢဝ်ႇတပ်ႉမတေႃႇ သပ်းၸႅင်ႈၶၢဝ်ႇၵႂႃႇၸိူင်ႉၼႆ – ၼႆၵူၺ်းၵေႃႈ ဢမ်ႇတႅမ်ႈပႃး။ တႅမ်ႈၸပ်းၾၢႆႇၼႃႇလႄႈ ၸင်ႇလႆႈဢဝ်လိူင်ႈၸုမ်းၶၢဝ်ႇ ဢီႊရႃႊဝတီႊ   – ဝႃႈၼႆ။

ဢၼ်တပ်ႉသိုပ်းတပ်ႉမတေႃႇ ႁၢင်ႈႁႅၼ်းတႃႇဢဝ်လိူင်ႈ (ၸွႆးတြႃး)ၼႆႉပဵၼ်သိုဝ်ႇၶၢဝ်ႇ ဢီႊရႃႊဝတီႊ   လႄႈ သိုဝ်ႇၶၢဝ်ႇ ဢႃႊဢႅပ်ႉၾ်ဢေႊ ။ ၵူၺ်းၵႃႈ တႃႇဢဝ်လိူင်ႈ သိုဝ်ႇၶၢဝ်ႇ ဢႃႊဢႅပ်ႉၾ်ဢေႊ တႄႉ ယွၼ်ႉပိူဝ်ႈ တပ်ႉသိုၵ်း ပွင်ႇၶၢဝ်ႇတီႈ ၶွင်ႊသီႊမီႊတီႊယႃႊၶၢဝ်ႇမၢၼ်ႈ လႄႈ ယူႇတီႈ ၶွင်ႊသီႊမီႊတီႊယႃႊၶၢဝ်ႇမၢၼ်ႈလႆႈၶဝ်ႈၵၢင်ၸွႆႈၵႄႈလိတ်ႈဝႆႉပၼ်လႄႈထိုင်တီႈ သိုၵ်းမၢၼ်ႈ ဢမ်ႇတၼ်းလႆႈပိုတ်ႇၶၻီး ဢဝ်လိူင်ႈ- ဝႃႈၼႆ။

ဢူးမျိၼ်ႉၵျေႃႇ ၽူႈၶဝ်ႈၶွင်ႊသီႊမီႊတီႊယႃႊၶၢဝ်ႇမၢၼ်ႈ လၢတ်ႈဝႃႈ – တပ်ႉသိုၵ်းလူင်ပွင်ၸိုင်ႈမၢၼ်ႈၼႆႉ လႅပ်ႈၶဝ်တေၶႂ်ႈလွၵ်ႇၸုမ်းသိုဝ်ႇၶၢဝ်ႇ ႁႂ်ႈဝႄႈ(ဢမ်ႇတႅမ်ႈ) ၶၢဝ်ႇပၢင်တိုၵ်းမိူင်းရၶႅင်ႇၵူၺ်း၊ ၾၢႆႇၼိုင်ႈၵေႃႈ ၶဝ်တေဢဝ်လိူင်ႈၸုမ်းသိုဝ်ႇၶၢဝ်ႇ ဢီႊရႃႊဝတီႊ   ၼႆၶဝ်ယင်းဢမ်ႇပွင်ႇမႃးတီႈၶွင်ႊသီႊမီႊတီႊယႃႊၶၢဝ်ႇမၢၼ်ႈ ။ ၸိူင်ႉၼႆတႄႉဢမ်ႇလီပဵၼ် ။ မိူၼ်တၢင်းဢိုတ်းႁူဢိုတ်းတႃၵူၼ်းမိူင်း ႁႂ်ႈၵူၼ်းမိူင်းဢမ်ႇလႆႈႁူႉၸွမ်းသင်ၵူၺ်းဝႃႈၼႆ။

ၼွၵ်ႈလိူဝ်ၸုမ်းသိုဝ်ႇၶၢဝ်ႇယဝ်ႉ တပ်ႉသိုၵ်းတပ်ႉမတေႃႇမၢၼ်ႈၼႆႉ ယင်းဢဝ်လိူင်ႈ တိၺွပ်းဝႆႉပႃး ၶုၼ်သိုၵ်းလူင်ၵဝ်ႇ ၼေႇမဵဝ်းၸိၼ်ႇ၊ တႃႇရႅၵ်ႉထိူဝ်ႊ မိၼ်းထိၼ်ႇၵူဝ်ႇၵူဝ်ႇၵျီး ၽူႈတူင်ႉၼိုင်ၵၢၼ်မိူင်း မိူင်းမၢၼ်ႈ သေဢမ်ႇၵႃး ၼင်ႇႁိုဝ်ၸိူဝ်းၶဝ်တေလွတ်ႈမႃးၼၼ်ႉ မိူဝ်ႈၶၢဝ်းသွၼ်းၼမ်ႉၼၼ်ႉ ၸုမ်းၸိူဝ်ႉသၢႆၼူၵ်ႉယုင်း( တွင်းမဵဝ်းသႅတ်ႉ) ၶဝ်ႁွင်ႉၵႂၢမ်းတုၵ်းယွၼ်းႁႂ်ႈပွႆႇပၼ်  တပ်ႉသိုပ်းတပ်ႉမတေႃႇမၢၼ်ႈ ယင်းလႆႈဢဝ်လိူင်ႈ (ပိုတ်ႇဢမုၶၻီး) ၸုမ်းၸိူဝ်ႉသၢႆၼူၵ်ႉယုင်းၼၼ်ႉထႅင်ႈလူးၵွၼ်ႇ။

ၽူႈၶၢၼ်ပၢၵ်ႇပႃႇတီႇ NLD  တွၵ်ႊတိူဝ်ႊမဵဝ်းၺုၼ်ႉၵေႃႈလၢတ်ႈတီႈၸုမ်းၶၢဝ်ႇဢီႊရႃႊဝတီႊ   ဝႃႈ ဢၼ်ဢဝ်လိူင်ႈ ၸုမ်းသိုဝ်ႇၶၢဝ်ႇဝႃႈ ၵူၼ်းတူင်ႉၼိုင်ၵၢၼ်မိူင်းဝႃႇၸိူဝ်းၼႆႉ မၼ်းပဵၼ်ၼမ်ႉမိုဝ်းတပ်ႉသိုၵ်းတပ်ႉမတေႃႇမၢၼ်ႈလႄႈ ယူႇတီႈပႃႇတီႇတႄႉ လိူဝ်သေပဵၼ်ၸႂ်ဢမ်ႇလီၸွမ်း ဢမ်ႇၸၢင်ႈၶဝ်ႈၵႄႈႁဵတ်းႁိုဝ်ပၼ် ဝႃႈၼႆ။