ပိူင်ပဵၼ်လၢၵ်ႇလၢႆး ယူႇယူႇၾႆးၽုပ်ႉလုၵ်ႉမႆႈပဵၼ်တီႈ ပဵၼ်ၵမ်း ၼႂ်းႁိူၼ်းလင်ၼိုင်ႈ တီဝဵင်းလိူဝ်ႇ(မၼ်းတလေး)

ႁိူၼ်းလင်ၼိုင်ႈတီႈဝဵင်းလိူဝ်ႇ (မၼ်းတလေး) ၼၼ်ႉ ယူႇယူႇၾႆးၽုပ်ႉလုၵ်ႉမႆႈ ႁင်းၵူၺ်းလူၺ်ႈဢမ်ႇမီးၵူၼ်းၽဝ်ႁိုဝ် ၾႆးၾႃႉသျွတ်ႉသင်လႄႈ ၸဝ်ႈၼႃႈတီႈၾၢႆႇၶႄၾႆး လႄႈၵူၼ်းဝၢၼ်ႈဢွၼ်ၵၼ်ပႂ်ႉတူၺ်းပေႃးၵိုၼ်းၶွၼ်ႈယူႇ ဝႃႈၼႆ။

မၢႆႁိူၼ်း 14/11  ယူႇ သဵၼ်ႈတၢင်း မျႃႇၸၼ်ႇတႃႇ ၼႂ်းၵႄႈသဵၼ်ႈတၢင်းလူင် 28 လႄႈ 29 ဝဵင်းတႃႈလိူဝ်ႇၼၼ်ႉ တင်ႈဢဝ်မိူဝ်ႈဝႃး 18/04/2019 ယၢမ်းၵၢင်ၼႂ်တေႃႇထိုင်မိူဝ်ႈၼႆႉ ယူႇယူႇၾႆးၽုပ်ႉလုၵ်ႉမႆႈ ၽႃႁိူၼ်း၊ ပိုၼ်ႉႁိူၼ်း ႁင်းၵူၺ်း၊ ပဵၼ်ယွၼ်ႉသင်ၼႆ ၽႂ်ယင်းပႆႇႁူႉတေႃႇထိုင်ယၢမ်းလဵဝ် ဝႃႈၼႆ။

ၵူဝ်ႇပွၵ်ႉ ၵူၼ်းယူႇႁိမ်းၵိၼ်ၸမ်တင်းႁိူၼ်းလင်ၼၼ်ႉလၢတ်ႈဝႃႈ-  မိူဝ်ႈဝႃး လုၵ်ႉမႆႈ မွၵ်ႈ 9 ၵမ်း 10 ၵမ်း၊ မိူဝ်ႈၼႆႉမွၵ်ႈ 4-5 ၵမ်း။ ၾႆးၽုပ်ႉၸွမ်း တိူၵ်ႈၶူဝ်းလဵင်း( ပီႇတူဝ်ႇ)၊ ဢၢင်ႇလၢင်ႉဝၢၼ်ႇ၊ လၢႆႇၼမ်ႉၼႂ်းႁိူၼ်း၊ ပိုၼ်ႉႁိူၼ်း ၽႃႁိူၼ်း ၸိူဝ်းၼႆႉ။ လုၵ်ႉမႆႈသေ ၶိုၼ်းမွတ်ႇၵႂႃႇသေ။ ဢမ်ႇမႆႈႁိုင်။ ၽုပ်ႉၶိုၼ်ႈမႃးသေ မွတ်ႇၵႂႃႇၵူၺ်း။ ၵမ်ႈၼမ်တႄႉဢွၼ်ၵၼ်ဝႃႈ ၾိင်ႈၾႃႉရႃႇသီႇမႆႈလိူဝ်ႁႅင်းလႄႈ ၾႆးၽုပ်ႉၼႆ။ ၵူၼ်းပိုၼ်ႉတီႈဢၼ်ယုမ်ႇယမ်ၽီတႄႉဝႃႈ ပဵၼ်ၽီၵဝ်း (မၢၼ်ႈႁွင်ႉဝႃႈ ပူင်ႇၼၵႃႉတႅၵ်ႉ) ၼႆ။ ႁဝ်းၶႃႈၵူၼ်းယူႇႁိမ်းၵိၼ်ၸမ်တႄႉ ၾၢင်ႉသတိဝႆႉယႂ်ႇၼမ်ယူႇၶႃႈဢေႃႈ – ဝႃႈၼႆ။

ၵမ်ႈၽွင်ႈဝႃႈ တႂ်ႈႁိူၼ်းၶဝ်ၼၼ်ႉမီးသၢႆၵႅတ်ႉသ်သၽႃႇဝ ၵေႃႈပဵၼ်လႆႈ။ ပေႃးၾိင်ႈၾႃႉမႆႈလိူဝ်ႁႅင်းမႃး တီႈဢၼ်မီးဢၢႆၵႅတ်ႉသ်ၶိုၼ်ႈမႃးတွင်ႈသႂ်ႇဝႆႉ မိူၼ်ၼင်ႇ ၸွၵ်ႉ ၸဵင်ႇ ႁိူၼ်းၸိူဝ်းၼၼ်ႉ ၾႆးၵႆႉမေႃလုၵ်ႉႁုပ်ႇ ဝႃႈၼႆ။

ၼႂ်းဝၼ်းမိူဝ်ႈၼႆႉ 19/04/2019 ၵေႃႈ ၽူႈယႂ်ႇၵူၼ်းလူင်ၼႂ်းပွၵ်ႉယွမ်ႇ၊ ၸဝ်ႈၼႃႈတီႈၾၢႆႇၵဵဝ်ႇၶွင်ႈၶဝ်မႃးတွင်ႈထၢမ်ၸဝ်ႈႁိူၼ်းယူႇသေ လူတ်ႉၶႄၾႆးလႄႈၵူၼ်းၼႂ်းဝၢၼ်ႈၼႂ်းပွၵ်ႉၵေႃႈ ဢွၼ်ၵၼ်မႃးပႂ်ႉတူၺ်းဝႆႉယူႇဝႃႈၼႆ။

ယၢမ်းဝၢႆးဝၼ်းၼႆႉတႄႉ လႆႈငိၼ်းဝႃႈၸဝ်ႈႁိူၼ်းပၢင်းသင်ၶၸဝ်ႈမႃး ဝၢၼ်းပရိၵ်ႈဝႆႉယူႇသေ၊ ၶူဝ်း လႄႈ ၸေႈ၊ ပပ်ႉ ၸိူဝ်းဢၼ်တေမႆႈငၢႆႈၼၼ်ႉၵေႃႈ ဢွၼ်ၵၼ်တေႃႉဢွၵ်ႇဝႆႉၼွၵ်ႈႁိူၼ်းဝႆႉယူႇ ဝႃႈၼႆ။

ၶေႃႈမုလ်းၶၢဝ်ႇ – DVB, Irrawaddy