ပီ 2018 ဢၼ်ယဝ်ႉမႃးၼႆႉ မိူင်းတႆးပွတ်းႁွင်ႇ ပဵၼ်သုၼ်  တီႈပၢင်တိုၵ်းတႄႇပဵၼ်သေ ပၢင်တိုၵ်းၸၢဝ်းၶိူဝ်းတေႃႇၸၢဝ်းၶိူဝ်းပိုတ်းယိုဝ်းၵၼ်ၼႆႉ ႁၢဝ်ႈႁႅင်း ႁိုင်ၼၢၼ်းလိူဝ် ပၢင်တိုၵ်း ၼႂ်းၵႄႈၸၢဝ်းၶိူဝ်းလႄႈ သိုၵ်းလူင်ပွင်ၸိုင်ႈ ဝႃႈၼႆ။

MIPS ဢိၼ်ႊသတီႊၵျုတ်ႉ မၢၼ်ႈ ၵဵဝ်ႇၵပ်းလွင်ႈႁူမ်ႇလူမ်ႈလႄႈ လွင်ႈငမ်းယဵၼ်ၼႆႉ ပိုၼ်ၽၢဝ်ႇၵပ်း သိုပ်ႇ ပပ်ႉႁၢႆးငၢၼ်းလွင်ႈငမ်းယဵၼ် ပီ 2018  တီႈႁူင်းႁဵၼ်း Melia  ဝဵင်းလူင်တႃႈၵုင်ႈ မိူဝ်ႈဝၼ်းတီႈ 2/4/2019  ။

ၽူႈၸတ်းပွင်ၵၢၼ် MIPS တွၵ်ႊတိူဝ်ႊမိၼ်းၸေႃႇဢူးလၢတ်ႈဝႃႈ – ပေႃးတေမႃးတူၺ်းပၼ်ႁႃ လွင်ႈယိပ်းၵွင်ႈၵၢင်ႇပိုတ်းယိုဝ်းၵၼ် တီႈမိူင်းမၢၼ်ႈၼႆၸိုင် လိူဝ်သေပၢင်တိုၵ်းၼႂ်း​ ၵႄႈသိုၵ်း လူင်ပွင်ၸိုင်ႈမၢၼ်ႈလႄႈၸၢဝ်းၶိူဝ်းယဝ်ႉ ယင်းတေလႆႈဝူၼ်ႉသွၼ်ႇတႃႇၵႄႈလိတ်ႈ ပၼ်ႁႃ ဢၼ်ၸုမ်းယိပ်းၵွင်ႈၵၢင်ႇၸၢဝ်းၶိူဝ်းၼင်ႇၵၼ် ပိုတ်းယိုဝ်းၵၼ်ၼႆႉပႃး – ဝႃႈၼႆ။

မိူၼ်ၼင်ႇၼႂ်းမိူင်းတႆးၼႆႉ ၸုမ်းယိပ်းၵွင်ႈၵၢင်ႇ မီးဝႆႉမိူၼ်ၼင်ႇ RCSS /SSPP/TNLA/MNDAA  ၸိူဝ်းၼႆႉသေတႃႉ ပၢင်တိုၵ်းၼႆႉ ပဵၼ်ၼႂ်းၵႄႈ ၸုမ်းဢူၺ်းလီပွတ်းႁွင်ႇ (TNLA လႄႈ SSPP) လႄႈ တင်း သိုၵ်း RCSS ဢၼ်လူင်းလၢႆးမိုဝ်းၵိုတ်းတိုၵ်း NCA  ဝႆႉၼၼ်ႉပဵၼ်လိူဝ်ႁႅင်း။

ၼႂ်းပီ 2018 ၼႆႉ ယွၼ်ႉပၢင်တိုၵ်းၼႂ်းၸိုင်ႈတႆးသေ ၵူၼ်းပၢႆႈၽေးသိုၵ်း မီး 12000  ပၢႆ၊ ၼႂ်းၼၼ်ႉ ဢၼ်ပၢႆႈၽေးသိုၵ်း ၸုမ်းယိပ်းၵွင်ႈၵၢင်ႇၸၢဝ်းၶိူဝ်းၼင်ႇၵၼ် မီး 7000 ပၢႆ။ ပၢင်တိုၵ်းၼႂ်းပတ်းပိုၼ်ႉမိူင်းႁူမ်ႈတုမ် 50 ၸေႈဝဵင်း၊ ပဵၼ် 490 ၵမ်း၊ ၼႂ်းၼၼ်ႉ သိုၵ်းတပ်ႉမတေႃႇမၢၼ်ႈလႄႈ သိုၵ်းၸၢဝ်းၶိူဝ်း ယိုဝ်းၵၼ် 367 ၵမ်း၊ သိုၵ်းၸၢဝ်းၶိူဝ်းၼင်ႇၵၼ်ယိုဝ်းၵၼ်မီး 93 ၵမ်း၊လႄႈပဵၼ်တင်း ၸၢဝ်းၶၢဝ်းတၢင်ႇဢၼ် 30 ၵမ်း။ပၢင်တိုၵ်းၼႆႉပဵၼ်ၼႂ်းၸေႈဝဵင်း ၼမ်ႉတူႈ၊ ၵူတ်ႉၶၢႆ၊ ၽႃပုၼ်၊ ၽႃၵၢၼ်ႉ၊ လႄႈ တၼၢႆး ၼႆ  တႅမ်ႈဝႆႉၼႂ်းၽိုၼ်ႁၢႆးငၢၼ်း MIPS ၼင်ႇၼႆ။

ၶေႃႈမုလ်း- Mizzima