ပၢင်တိုၵ်းတပ်ႉသိုၵ်းမိူင်းရၶႅင်ႇလႄႈ တပ်ႉသိုၵ်းလူင်ပွင်ၸိုင်ႈမၢၼ်ႈပိုတ်းယိုဝ်းၵၼ်ႁိုင်ၼၢၼ်းၶိူဝ်းယႂ်း။ ႁဵတ်းႁႂ်ႈၵူၼ်းမိူင်းရၶႅင်ႇ ပၢႆႈၽေးသိုၵ်း ယၢၼ်ႁိူၼ်းယေးတီႈယူႇမီး သၢမ်မိုၼ်ႇပၢႆယဝ်ႉဝႃႈၼႆ။

တင်ႈဢဝ်လိူၼ်ၵျၼ်ႊၼိဝ်ႊရီႊပီ 2019 ၼႆႉမႃး ပၢင်တိုၵ်းပဵၼ်ၼႂ်းမိူင်းရၶႅင်ႇၶိူဝ်းယႂ်းႁိုင်ၼၢၼ်းလႄႈ ၵူၼ်းမိူင်းလႆႈပၢႆႈယၢၼ်ႁိူၼ်းယေး။  ဢၼ်လႆႈလုတၢႆမၢတ်ႇၸဵပ်းၸွမ်းပၢင်တိုၵ်းၵေႃႈမီး။

မိူဝ်ႈဝၼ်းတီႈ 6 လိူၼ်ဢေႊပရိူဝ်ႊၼႆႉ ၵူၼ်းပၢႆႈၽေးသိုၵ်း 4000 ပၢႆၶိုၼ်းပွၵ်ႈယူႇ ဝၢၼ်ႈၽႂ် ႁိူၼ်းမၼ်း ၽွင်ႈ ယဝ်ႉလႄႈ ၵိုတ်းႁူဝ်ၵူၼ်း 27000 ၵေႃႉ ပႆႇၸၢင်ႈပွၵ်ႈႁိူၼ်းၶိုၼ်းၼႆ ဢူးယေးမိၼ်းဢူး ၾၢႆႇၸွႆႈ ထႅမ်ၵူၼ်းထူပ်းၽေး ၸေႈမိူင်းရၶႅင်ႇ လၢတ်ႈတီႈႁွင်ႈၵၢၼ်ၶၢဝ်ႇ RFA ။

ၵူၼ်းပၢႆႈၽေးသိုၵ်းၸိူဝ်းၼႆႉ ၵမ်ႈၽွင်ႈၵေႃႈ ပၢႆႈယွၼ်ႉၸုမ်းယိပ်းၵွင်ႈၶဝ်ႈယိုဝ်းၼႂ်းဝၢၼ်ႈၶဝ်၊ ၵမ်ႈၽွင်ႈၵေႃႈ ပၢင်တိုၵ်းဢမ်ႇတၼ်းထိုင်ဝၢၼ်ႈသေတႃႉ ဢွၼ်ၵၼ်မႆႈၸႂ်ၵူဝ်ႁႄသေ ပၢႆႈ ဝႃႈၼႆ။ ၵူၼ်းပၢႆႈၽေးသိုၵ်းၸိူဝ်းၼႆႉ ယူႇသဝ်းဝႆႉတီႈ ပၢင်သဝ်းၵူၼ်းပၢႆႈၽေး ဢၼ်မီးတီႈ ဝဵင်းပူင်ႇၼႃးၵျုၼ်း၊ ၵျွၵ်ႉတေႃႇ၊ မျွၵ်ႉဢူး၊ မိၼ်းပျႃး၊ယတေႉတွင်ႇ၊ ပူးတီးတွင်ႇ ၸိူဝ်းၼႆႉ။ ဢူးယေးမိၼ်းဢူး ၾၢႆႇၸွႆႈထႅမ်ၵူၼ်းထူပ်းၽေး ၸေႈမိူင်းရၶႅင်ႇ ယင်းမွၵ်ႇလၢတ်ႈပႃးဝႃႈ လူင်ပွင်ၸိုင်ႈမိူင်းႁူမ်ႈတုမ် ၵမ်ႉၸွႆႈၶဝ်ႈၼမ်ႉတၢင်းၵိၼ်တီႈၵူၼ်းပၢႆႈၽေးၸိူဝ်းၼႆႉ မႅၼ်ႈတႃႇငိုၼ်းမၢၼ်ႈ 4000 သႅၼ်ပျႃးယဝ်ႉ ဝႃႈၼႆ။

ဢူးၸေႃႇထေး ၽူႈၸိသင်ႇ လႄႈ ၽူႈၶၢၼ်ပၢၵ်ႇတီႈလုမ်းၸွမ်ၸိုင်ႈ လၢတ်ႈတီႈၽူႈသိုဝ်ႇၶၢဝ်ႇဝႃႈ တင်ႈဢဝ်လိူၼ်ၵျၼ်ႊၼိဝ်ႊရီႊ တေႃႇထိုင်လိူၼ်မၢတ်ႉသဵင်ႈၼႆႉ တပ်ႉသိုၵ်းရၶႅင်ႇလႄႈ သိုၵ်းလူင်ပွင်ႈၸိုင်ႈလႆႈပိုတ်းယိုဝ်းၵၼ် ၶိူဝ်းယႂ်း ၊ ၵူၼ်းမိူင်းတၢႆယွၼ်ႉပၢင်တိုၵ်း 12 ၵေႃႉ မၢတ်ႇၸဵပ်း 20 ပၢႆ။ ၵူၺ်းၵႃႈမၢတ်ႇၸဵပ်းလုတၢႆယွၼ်ႉသိုၵ်းၾၢႆႇလႂ်ၼႆတႄႉ ဢမ်ႇလႆႈပိုၼ်ၽၢဝ်ႇပႃး။

ၶေႃႈမုလ်းၶၢဝ်ႇ RFA