ၾူၼ်တူၵ်းႁႅင်းလႄႈၼမ်ႉထူမ်ႈလၢႆလၢႆၸေႈမိူင်း ၼႂ်းၸိုင်ႈမိူင်းဢီႇရၼ်ႇ ၼႂ်းဝူင်ႈလဵဝ်ၵူၺ်းၵူၼ်းတၢႆယွၼ်ႉၼမ်ႉထူမ်ႈဢမ်ႇယွမ်း 70 ၵေႃႉ။
ၶၢဝ်ႇ IRNA ပိုၼ်ၽၢဝ်ႇမိူဝ်ႈဝၼ်းတီႈ 5/4/2019 ဝႃႈ ၾူၼ်လူမ်းတူၵ်းႁႅင်း၊ ၼမ်ႉပႃႇလႆထူမ်ႈၼႂ်းၸေႈမိူင်း ၵူဝ်ႇလီသတၼ်ႇ ၸိုင်ႈမိူင်းဢီႇရၼ်ႇ ။
ၾၢႆႇၸွႆႈထႅမ်လႄႈပူင်းပွင်ၵူၼ်းမိူင်း မိူင်းဢီႇရၼ်ႇ လၢတ်ႈတီႈၸုမ်းၶၢဝ်ႇ Teheran Times ဝႃႈ ဝၢၼ်ႈလႄႈဝဵင်း 1900 ပၢႆၺႃးၽေးၼမ်ႉထူမ်ႈ ။ ႁိူၼ်းယေးႁူင်းၸၢၵ်ႈ ပဵၼ်ၵူမ်ႇပဵၼ်ဢုင်။ လင်ႁိူၼ်းဢၼ်လႆလွင်ႈ လုၵွႆၸွမ်းၼမ်ႉမီး 25000 လင် ဝႃႈၼႆ။
ယွၼ်ႉပိူဝ်ႈၾူၼ်လူင် လူမ်းလႅင်ႉၽတ်ႉပဝ်ႇသေ ၼမ်ႉထူမ်ႈဝၢၼ်ႈထူမ်ႈမိူင်း ဢီႇရၼ်ႇၼႆႉ ၵူၼ်းမိူင်းၼပ်ႉႁူဝ်ႁဵင်လႆႈပၢႆႈၽေးၼမ်ႉ။ ပဵၼ်လွင်ႈၼမ်ႉထူမ်ႈႁၢဝ်ႈႁႅင်း သုတ်းၼႂ်းပိုၼ်းမိူင်းဢီႇရၼ်ႇ ဝႃႈၼႆ။
မိူဝ်ႈဝၼ်းတီႈ 5/4/2019 ပူၼ်ႉမႃးၼႆႉၵေႃႈ လူင်ပွင်ၸိုင်ႈမိူင်းဢီႇရၼ်ႇ ပိုၼ်ၽၢဝ်ႇဝႃႈ ၾူၼ်ၸၢင်ႈတူၵ်းထႅင်ႈႁၢဝ်ႈႁႅင်းလႄႈ ႁႂ်ုၵူၼ်းမိူင်းၼႂ်း 5 ၸေႈမိူင်းဢၼ်တိတ်းၸပ်းၸေႈမိူင်း ၶူႇသႅတ်ႉသတၼ်ႇ ၼၼ်ႉပၢႆႈ၊ တီႈမိူင်း ၶူႇသႅတ်ႉသတၼ်ႇ ဢၼ်ၺႃးၼမ်ႉထူမ်ႈဝႆႉႁၢဝ်ႈႁႅင်းယူႇၼၼ်ႉၵေႃႈ ၾူၼ်ၸၢင်ႈတူၵ်းထႅင်ႈ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ