သင်ၶၸဝ်ႈဢၼ်မႃးၶၢတ်ႈယူႇလိုဝ်ႈသဝ်းတီႈႁိူၼ်းတၵ်ႉၵႃႇ တီႈဝဵင်းဢွင်ႇပၢၼ်း ၸေႈဝဵင်းၵၢတ်ႇ လေႃႉ (ၵလေႃး) ၼၼ်ႉ ၽိတ်းမေႃးၵၼ်ထိုင်တီႈတႅင်းၵၼ် လႆႈႁၢမ်သူင်ႇႁူင်းယႃ။
မိူဝ်ႈဝၼ်းတီႈ 1 လိူၼ်ဢေႊပရိူဝ်ႊယၢမ်းၵၢင်ၼႂ် 2 မူင်း ၊ သင်ၶၸဝ်ႈ ဢၼ်ၶၢတ်ႈယူႇႁိူၼ်း တေႃႇဢေးဢေးၶႅင်ႇ ပွၵ်ႉၺွင်ႇပိၼ်ႇထွၵ်ႈၼၼ်ႉ ၽိတ်းမေႃးၵၼ်။ ဢူးပၺႃႇသီႇရိ ဢႃႇယု 44 ဝႃႇၸဝ်ႈ 16 ဝႃႇပဵၼ်သင်ၶၸဝ်ႈဢၼ်ယူႇ တီႈၵျွင်းမႁႃႇၸီႇ သႃသၼႃႉယဵၵ်ႉတႃႇ ဝဵင်းဢူၵ်ႉတုၼ်း တိူင်းပႃႇၵိူဝ် ဢဝ်မိတ်ႈတႅင်းသႂ်ႇပဵမ်ႉ ဢူးပၺႃႇသီႇရိ(ၼႃႇမ ၸဝ်ႈတင်းသွင် မိူၼ်ၵၼ်) ပဵၼ်သင်ၶၸဝ်ႈယူႇ ဝတ်ႉၵျွင်း မျႃႉၼၼ်ႇတႃႇ ၵမ်ႇၽႃႇဢေး ဝဵင်းသႃႇဝတ်ႉထိ ၸေႈဝဵင်းလႄႇဝေး တိူင်းပႃႇၵိူဝ် ။ မၢတ်ႇၸဵပ်း လိူဝ်ႁႅင်းလႄႈ ၸုမ်းၸွႆႈထႅမ်ၵူၼ်းပဵၼ် ဝဵင်းဢွင်ႇပၢၼ်း လႆႈဢဝ်တူဝ်ၸဝ်ႈသူင်ႇ ႁူင်းယႃလူင် ၸဝ်ႈၸၢမ်ႇထုၼ်း ဝဵင်းတူၼ်ႈတီး ဝႃႈၼႆ။
ဢူးၸဵင်ႇၶျုၼ်း ၽူႈၵွၼ်းပွၵ်ႉ ၺွင်ႇပိၼ်ႇထွၵ်ႈ လၢတ်ႈဝႃႈ-“ ႁဝ်းၶႃႈႁွင်ႉၸဝ်ႈႁိူၼ်းသေ ပၼ်ၾၢင်ႉ 2 ပွၵ်ႈယဝ်ႉ ဝႃႈယႃႇပေၶၢတ်ႈႁိူၼ်းပၼ်သင်ၶၸဝ်ႈ။ ႁႂ်ႈၸဝ်ႈႁဝ်းၶဝ် ၵႂႃႇယူႇတီႈဝတ်ႉၵျွင်း ။ ၼႆႉသမ်ႉတိုၵ်ႉ ႁပ်ႉသင်ၶၸဝ်ႈမႃးယူႇပဵၼ်လၢႆလၢႆတူၼ်။ ၼႆႉမၼ်းဢမ်ႇႁၢင်ႈလီတႃ။ ၸိုဝ်ႈပွၵ်ႉၵေႃႈလႆႈလုၸွမ်း။ ဢၼ်ပဵၼ်ပၼ်ႁႃၵမ်း ၼႆႉၵေႃႈ ၶႃႈႁဝ်းၶဝ်လႆႈႁွင်ႉၸဝ်ႈႁိူၼ်းမႃးလူင်းလၢႆးမိုဝ်းယဝ်ႉ ဝႃႈတေဢမ်ႇၶၢတ်ႈ ႁိူၼ်းပၼ်သင်ၶၸဝ်ႈထႅင်ႈ။ လွင်ႈၼႆႉတီႈႁွင်ႈၵၢၼ်ၾၢႆႇသႃသၼႃၵေႃႈ ႁဝ်းၶႃႈတေတၢင်ႇလၢတ်ႈ ယွၼ်းတၢင်းၶႆႈၸႂ်ၵႂႃႇယူႇ ”- ဝႃႈၼႆ။
ၵူၼ်းဢွင်ႇပၢၼ်း ပွၵ်ႉၺွင်ႇပိၼ်ႇထွၵ်ႈၵေႃႉၼိုင်ႈလၢတ်ႈဝႃႈ သင်ၶၸဝ်ႈၸိူဝ်းဢၼ်မႃးၶၢတ်ႈ ယူႇတီႈ ႁိူၼ်းတေႃႇဢေးဢေးၶႅင်ႇ ၼၼ်ႉ မီးလၢႆၸဝ်ႈလၢႆပႃးတႄႉဢမ်ႇႁူႉတႅတ်ႈတေႃး။ ၵူၺ်းၵႃႈလႆႈႁၼ်မီး ၼမ်ဝႆႉ။ ၶဝ်ၸဝ်ႈမႃးႁဵတ်းသင်တႄႉဢမ်ႇလႆႈႁူႉၸွမ်း။ ၵၢင်ၼႂ်မႃးတႄႉႁၼ်ၵႂႃႇတုင်းသွမ်းယူႇ ဝႃႈၼႆ။ ၵူၺ်းၵႃႈၾၢႆႇၸဝ်ႈၼႃႈတီႈလၢတ်ႈဝႃႈ တိုၵ်ႉၵူတ်ႇထတ်းတူၺ်းယူႇ ဝႃႈၼႆ။
ယၢမ်းလဵဝ်ၸဝ်ႈၸၢင်းပၺႃႇသီႇရိ ဢူၵ်ႉတုၼ်း ၸဝ်ႈဢၼ်ဢဝ်မိတ်ႈတႅင်းၼၼ်ႉ ပၢႆႈဝႆႉလႄႈ ပလိၵ်ႈလႄႈၸဝ်ႈ ၼႃႈတီႈ ၶဝ် တိုၵ်ႉလမ်းတိယူႇ တႃႇပၼ်တူတ်ႈတၢမ်ႇၸွမ်းၼင်ႇမၢႆမီႈမီးဝႆႉၼၼ်ႉ ဝႃႈၼႆ။
ၶေႃႈမုၼ်းၵမ်ႈၽွင်ႈ ဢၢင်ႈဢိင်တီႈ- ၵမ်ႇပေႃးၸ ထၢႆးမ်
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ