တပ်ႉသိုၵ်းၸိုင်ႈတႆး သွင်တပ်ႉ ၸီႉသင်ႇၵိုတ်းၵၢၼ်တိုၵ်းတေႃးၵၼ်

0

ပႃႇတီႇမႂ်ႇသုင်ၸိုင်ႈတႆး တင်း ၶွင်ႇသီႇဢဝ်ၶိုၼ်းၸိုင်ႈတႆး ၸီႉသင်လူင်း ၵူႈတပ်ႉမုၵ်ႉ တပ်ႉၸုမ်း  ႁႂ်ႈၵိုတ်းၵၢၼ်တိုၵ်းတေႃးၵၼ် ၵႂႃႇ တင်းသွင်တပ်ႉ။

ၽူႈၼမ်းတပ်ႉသိုၵ်းၸိုင်ႈတႆး 2 ၸဝ်ႈ ၸွမ်သိုၵ်းလူင်ယွတ်ႈသိုၵ်းလႄႈ ၸွမ်သိုၵ်းလူင်ပၢင်ႇၾႃႉ

ဝၼ်းတီႈ 21/3/2019 ၼႆႉ ဢိင်ၼိူဝ်ၶေႃႈတႅပ်းတတ်း ပၢင်ၵုမ်လူင် ၵေႃၵမ်ၵၢၼ်လူင်ငဝ်ႈငုၼ်း CEC  ၶွင်ႇသီႇဢဝ်ၶိုၼ်းၸိုင်ႈတႆး ဢုပ်ႇဢူဝ်းတႅပ်းတတ်းသေ ဢွၵ်ႇလိၵ်ႈပိုၼ်ၽၢဝ်ႇၽိုၼ်ၼိုင်ႈ၊ ၼႂ်းၼၼ်ႉ တႅပ်းတတ်း ပိုၼ်ၽၢဝ်ႇပႃး ဝႃႈ “– လိူဝ်သေ ၵႅတ်ႇၶႄ ႁႄႉၵင်ႈတူဝ်ၵဝ်ႇၼၼ်ႉ ၾၢႆႇတပ်ႉသိုၵ်း RCSS လႆႈၵိုတ်းတိုၵ်းတေႃႇ ပႃႇတီႇမႂ်ႇသုင်ၸိုင်ႈတႆး တင်ႈတႄႇ ဝၼ်းတီႈ 20/3/2019 ၼႆႉယဝ်ႉ” – ဝႃႈၼႆ။

ၵဵဝ်ႇၵပ်းလွင်ႈ ၼႆႉ ၽူႈၵွၼ်းတပ်ႉ  SSPP ၸဝ်ႈၼိုင်ႈၵေႃႈလၢတ်ႈဝႃႈ – “ယူႇတီႈ ႁူဝ်ပဝ်ႈလူင် ၸီႉသင်လူင်းမႃး ႁႂ်ႈၵိုတ်းၵၢၼ်တိုၵ်းတေႃးၵၼ် တင်ႈတႄႇ ဝၼ်းတီႈ 19/3/2019 ယၢမ်း ဝၢႆးဝၼ်း 3 မူင်း 45 မိၼိတ်ႉၼၼ်ႉယဝ်ႉလႄႈ လႆႈငၢၵ်ႈဢွၵ်ႇပိုၼ်ႉတီႈ ပၢင်တိုၵ်း ၸဵမ်မိူဝ်ႈဝၼ်းၼၼ်ႉၵမ်းလဵဝ်ယဝ်ႉ” -ဝႃႈၼႆ။

ဢိင်ၼိူဝ်ၶေႃႈၸီႉသင်ၼႆႉသေ ပၢင်တိုၵ်းဝၢၼ်ႈတူၼ်ႈၵႅင်းဢိူင်ႇၼႃးမၢၵ်ႇၶေႃ ဢၼ်ႁဵတ်းႁႂ်ႈ ၾႆးပေႃးမႆႈႁိူၼ်းၵူၼ်းဝၢၼ်ႈ ၼၼ်ႉၵေႃႈ ၵိုတ်းယိုတ်းၵႂႃႇဝၼ်းၼၼ်ႉၵမ်းလဵဝ် ။

ၽူႈၵွၼ်းဝၢၼ်ႈ ၼႂ်းထုင်ႉၼႃးမၢၵ်ႇၶေႃ ၵေႃႉၼိုင်ႈၵေႃႈလၢတ်ႈဝႃႈ – “ႁဝ်းၶႃႈ လႆႈငိၼ်းဝႃႈ ၾၢႆႇၶူဝ်းၶဵဝ် သင်ႇၵိုတ်းယဝ်ႉၼႆ ႁဝ်းၶႃႈၵေႃႈယိၼ်းၸူမ်းဢေႃႈ။ ၸူမ်းၼမ်ႉတႃပေႃးတူၵ်းဢေႃႈ ဝၼ်းၼၼ်ႉ။ ယွၼ်ႉပၢင်တိုၵ်းသေ ႁဝ်းၶႃႈတုၵ်ႉၶ  မႃးႁိုင်ၼႃႇယဝ်ႉၶႃႈ။ ယႃႇတိုၵ်းၵၼ်ထႅင်ႈၶႃႈ။ သၢၼ်မိုဝ်းၵၼ် ၵႅတ်ႇ ၵင်ႈၵူၼ်းဝၢၼ်ႈၵူၼ်းမိူင်းသေၵမ်း” – ဝႃႈၼႆ။

တပ်ႉသိုၵ်း RCSS တင်း SSPP ၼႆႉ လႆႈပဵၼ်ပၢင်တိုၵ်းၵၼ် တင်ႈတႄႇ ႁၢင်ပီ 2018 မႃး။ သွင်ၾၢႆႇတိုၵ်းတေႃးၵၼ် ၼႂ်းၸႄႈဝဵင်းၼမ်ႉတူႈ၊ လႃႈသဵဝ်ႈ၊ သီႇပေႃႉ၊ ၵျွၵ်ႉမႄး၊ မိူင်းၵိုင်၊ ၵေးသီး တင်းသီႇပေႃႉ။ ယွၼ်ႉပၢင်တိုၵ်းသေ ၵူၼ်းမိူင်း ဢၼ်လႆႈၺႃးၽေးသိုၵ်း မီးၼပ်ႉႁူဝ်ႁဵင်၊ ၵူၼ်းသိုၵ်းၵေႃႈလူႉတၢႆ တင်းသွင်ၾၢႆႇ၊ ႁိူၼ်းၵူၼ်းဝၢၼ်ႈၺႃးၾႆးမႆႈ၊ ၵူၼ်းဝၢၼ်ႈ ၺႃးၸၢၵ်ႇသိုၵ်း ၸိူဝ်းလူႉတၢႆၵႂႃႇ ၵေႃႈမီး။

ဢုပ်ႇဢူဝ်း ၽူႈတွႆႇႁွၵ်ႈ

SHARE

LEAVE A REPLY

Please enter your comment!
Please enter your name here