သိုၵ်းလူင်ပွင်ၸိုင်ႈမၢၼ်ႈ ၸႂ်ႉၶိူင်ႈဝိၼ် ယိုဝ်းတပ်းပၢင်သဝ်း ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး တီႈလွႆပၢင်ၶႃး ဢၼ်မီးၼႂ်းၵႄႈ 4 ၸႄႈဝဵင်း – သီႇပေႃႉ၊ မိူင်းယႆ၊ မိူင်းၵိုင်လႄႈ ၵေးသီး။
ဝၼ်းတီႈ 10/3/2019 ယၢမ်းၵၢင်ၼႂ် 7 မူင်းၼၼ်ႉ သိုၵ်းလူင်ပွင်ၸိုင်ႈမၢၼ်ႈ ၽိူမ်ႉထႅမ်ႁႅင်းသိုၵ်း လုၵ်ႉမႃးတၢင်း ဢိူင်ႇ မိူင်းတူင် ငႃးၼိုင်ႈ။ တင်းဝၢၼ်ႈလီႈသမ်ႉ ၽိူမ်ႉႁႅင်းသိုၵ်းထႅင်ႈငႃးၼိုင်ႈ တႄႇယိုဝ်းတင်ႈတႄႇၵၢင်ၼႂ် ထိုင်မႃး ယၢမ်းႁူဝ် ၶမ်ႈ 4 မူင်း ၸႂ်ႉၶိူင်ႈဝိၼ် ၶဝ်ႈယိုဝ်းၸွႆႈ ဝႃႈၼႆ။
ၸၢႆးၵွၼ်း ၽူႈၵွၼ်းၼႂ်းတပ်ႉ SSPP/SSA လၢတ်ႈတီႈၽူႈတွႆႇႁွၵ်ႈဝႃႈ “ သိုၵ်းမၢၼ်ႈ ဢဝ်ၶိူင်ႈဝိၼ်သေ မႃးယိုဝ်းၼႆႉ တုမ်ႉ တိူဝ်ႉၵူၼ်းမိူင်း 3 ၵေႃႉ။ ပဵၼ်ၵူၼ်းဝၢၼ်ႈပၢင်ၶႃး။ ပၢင်တိုၵ်း ပဵၼ်ၵၼ်ႁၢဝ်ႈႁႅင်း။ ယူႇတီႈၾၢႆႇတပ်ႉသိုၵ်း မၢၼ်ႈတႄႉ ၽိူမ်ႉႁႅင်းသိုၵ်းၶိုၼ်ႈတိုၵ်းႁဝ်းၶႃႈ 2 ငႃးသိုၵ်း။ ၾၢႆႇ RCSS ၵေႃႈ ၶိုၼ်ႈယိုဝ်းတီႈပႃႇၵၢင်းၶႃႈ။ ပၢင်တိုၵ်းၼႆႉ သိုၵ်းမၢၼ်ႈ တင်း RCSS ႁူမ်ႈၵၼ်ဢဵၼ်ႁႅင်း 500 ပၢႆ။ မိူဝ်ႈဝၼ်းတီႈ 7 ၼၼ်ႉၵေႃႈ ၶဝ်ႁူမ်ႈၵၼ်သေ ၶိုၼ်ႈယိုဝ်း” ဝႃႈၼႆ။
ၸဝ်ႈသိုၵ်း ၸၢႆးဢူး ၽူႈၶၢၼ်ပၢၵ်ႇ RCSS လၢတ်ႈဝႃႈ“ ဢမ်ႇပႃးတပ်ႉႁဝ်းၶႃႈ။ ပၢင်တိုၵ်းၼၼ်ႉ SSPP တင်း သိုၵ်းလူင် ပွင်ၸိုင်ႈမၢၼ်ႈၵူၺ်း” ဝႃႈၼႆ။
ၵဵဝ်ႇလူၺ်ႈလွင်ႈပၢင်တိုၵ်းၼႆႉသေ ၵူၼ်းဝၢၼ်ႈ 3 ၵေႃႉ လႆႈၺႃးၸၢၵ်ႇမၢၵ်ႇၵွင်ႈသေ လႆႈမၢတ်ႇၸဵပ်းႁၢဝ်ႈႁႅင်း ဝႃႈၼႆ။
ၼွၵ်ႈသေသိုၵ်းလွႆတင်းလူင်ပွင်ၸိုင်ႈမၢၼ်ႈယိုဝ်းၵၼ် သိုၵ်းတႆး ၼင်ႇၵၼ်ၵေႃႈ ၵႆႉၵႆႉယိုဝ်းၵၼ်လႄႈ ၵူၼ်းမိူင်း ၼႂ်း ၸႄႈဝဵင်းၵျွၵ်ႉမႄး၊ ၼမ်ႉတူႈ သီႇပေႃႉ လႆႈဢွၼ်ၵၼ်ပၢႆႈယၢၼ်ႁိူၼ်းယေး မီးၵႂႃႇ 2,500 ပၢႆ ဝႃႈၼႆ။
မိူဝ်ႈၻီႊသႅမ်ႊၿိူဝ်ႊ 21 (2018) ၼၼ်ႉ ၾၢႆႇတပ်ႉသိုၵ်းလူင်ပွင်ၸိုင်ႈမၢၼ်ႈ ပိုၼ်ၽၢဝ်ႇၾၢႆႇလဵဝ်ဝႃႈ တေၵိုတ်းတိုၵ်း 4 လိူၼ်တေႃႇထိုင် 21 April/2019 ၼႆသေတႃႉ တေႃႈလဵဝ် ပႆႇထိုင် 4 လိူၼ် ႁႅၼ်းသိုၵ်းလေႃႇယိုဝ်း SSPP ဢွၼ်တၢင်း။