မိူဝ်ႈဝႃးၵမ်းၼိုင်ႈ၊ မိူဝ်ႈၼႆႉၵမ်းၼိုင်ႈ မီးၸုမ်းသိုၵ်းၶိုၼ်ႈလေႃႇတပ်ႉပႃႇတီႇမႂ်ႇသုင်ၸိုင်ႈတႆး SSPP/SSA လႄႈ ၾၢႆႇပႃႇ တီႇမႂ်ႇသုင်ၸိုင်ႈတႆး တီႉလႆႈတူဝ်တၢႆၵူၼ်းသိုၵ်းလၢႆၵေႃႉ ဝႃႈၼႆ။
ဝၼ်းတီႈ 07/03/2019 ယၢမ်းၵၢင်ၼႂ် 9 မူင်း မီးငႃးသိုၵ်းလၢႆလၢႆငႃးသိုၵ်း ႁၢင်ႈႁႅၼ်းလေႃႇတပ်ႉ SSPP/SSA တီႈလွႆပၢင် ၶႃး ယူႇၼႂ်းၵႄႈၼမ်ႉလၼ်ႈ၊ ၵေးသီးလႄႈ မိူင်းၵိုင် ၾၢႆႇၸဵင်ႇၸၢၼ်းဝၼ်းဢွၵ်ႇဝဵင်းသီႇပေႃႉ ၼႂ်းၸႄႈဝဵင်းသီႇပေႃႉ ၸႄႈတွၼ်ႈ ၵျွၵ်ႉမႄး ၸိုင်ႈတႆးပွတ်းႁွင်ႇ။ ၾၢႆႇ SSPP ဝႃႈသိုၵ်း RCSS တင်းသိုၵ်းလူင်ပွင်ၸိုင်ႈမၢၼ်ႈ ႁူမ်ႈၵၼ်ၶိုၼ်ႈ လေႃႇတပ်ႉ လွႆပၢင်ၶူင်ႉ ပၢင်ၶႃး ဝႃႈၼႆ။
ၸဝ်ႈသိုၵ်းၸၢႆးဢူး ၽူႈၶၢၼ်ပၢၵ်ႇ RCSS/SSA လုမ်းၵပ်းသၢၼ်တီႈဝဵင်းတူၼ်ႈတီး လၢတ်ႈတီႈၽူႈတွႆႇႁွၵ်ႈဝႃႈ “ သိုၵ်း မၢၼ်ႈတင်း သိုၵ်း RCSS ႁူမ်ႈၵၼ်ယိုဝ်းၼၼ်ႉ မၼ်းဢမ်ႇၸႂ်ႈ။ လႆႈငိၼ်းဝႃႈ ၶဝ်ယိုဝ်းၵၼ်ၼၼ်ႉ မၼ်းပဵၼ်တင်း သိုၵ်းမၢၼ်ႈၵူၺ်း ဢမ်ႇၸႂ်ႈပဵၼ်တင်းႁဝ်း။ ဢၼ်ဝႃႈ ႁဝ်းလႄႈ တင်းသိုၵ်းမၢၼ်ႈ ႁူမ်ႈၵၼ်ဢၼ်ဝႃႈၼၼ်ႉ မၼ်းဢမ်ႇ ၸႂ်ႈ၊ မၢင်ပွၵ်ႈၼႆႉ မၢၼ်ႈမႃးဢဝ်ၸိုဝ်ႈသဵင်ၸွမ်း။ မိူဝ်ႈႁဝ်းတင်း TNLA ယၢမ်ႈပဵၼ်ပၢင်တိုၵ်းၵၼ်ၼၼ်ႉ ပေႃးႁဝ်း ပဵၼ် ပၢင်တိုၵ်းၵၼ်မိူဝ်ႈလႂ် သိုၵ်းမၢၼ်ႈၼႆႉ မႃးဢိူမ်ႈၸွမ်းဝႆႉႁဵတ်းၼႆတိၵ်းတိၵ်း၊ ႁႂ်ႈပိူၼ်ႈထၢင်ႇဝႃႈ ႁဝ်းပဵၼ် ၸုမ်းလဵဝ်ၵၼ် တိၵ်းတိၵ်းၼႆ မၼ်းပဵၼ်ဝႆႉႁဵတ်းၼၼ် တီႈတႄႉမၼ်းဢမ်ႇၸႂ်ႈ။ ပေႃးႁဝ်းႁၼ်သိုၵ်းမၢၼ်ႈၼႆၵေႃႈ ႁဝ်းၵေႃႈယိုဝ်းၵၼ် ယဝ်ႉ လွင်ႈဢၼ်ဝႃႈ ႁူမ်ႈၵၼ်ဢၼ်ဝႃႈၼၼ်ႉ မၼ်းဢမ်ႇမီး” ဝႃႈၼႆ။
သိုၵ်းလူင်ပွင်ၸိုင်ႈမၢၼ်ႈ ဢၼ်ၶိုၼ်ႈယိုဝ်း SSPP/SSA တီႈလွႆပၢင်ၶႃးၼၼ်ႉ သိုၵ်းမၢၼ်ႈလူႉတၢႆ 3 ၵေႃႉ ပဵၼ်ၸၼ်ႉ ႁူဝ်သိုၵ်းလူင် 1 ၵေႃႉ။ ႁူဝ်ႁၢၼ် 1 ၵေႃႉလႄႈ သိုၵ်းႁၢၼ် 1 ၵေႃႉ ဝႃႈၼႆ။
တၢင်းၾၢႆႇ SSPP/SSA ဝႃႈတႄႉ “ပၢင်တိုၵ်းၼႆႉ ပဵၼ်ႁၢဝ်ႈႁႅင်း။ မိူဝ်ႈဝႃး ယိုဝ်းၵၼ်ၵမ်းၼိုင်ႈ ၵၢင်ၼႂ် 9 မူင်းတေႃႇ 10 မူင်းပၢႆ။ မိူဝ်ႈၼႆႉၵေႃႈယိုဝ်းထႅင်ႈ၊ မိူဝ်ႈဝႃးၼႆႉ ၶဝ်ႁူမ်ႈၵၼ်မႃးယိုဝ်း။ ၼႂ်းပၢင်တိုၵ်းၼၼ်ႉ သိုၵ်းမၢၼ်ႈတၢႆ 3 ၵေႃႉ” ဝႃႈၼႆ။
ၵူၼ်းပိုၼ်ႉတီႈ ၼမ်ႉလၼ်ႈ လၢတ်ႈဝႃႈ “ မိူဝ်ႈၼႆႉ သိုၵ်းမၢၼ်ႈ လုၵ်ႉတၢင်း တူင်ႇလၢဝ်းၽိူမ်ႉႁႅင်းသိုၵ်း ၶိုၼ်ႈၵႂႃႇတၢင်း လွႆပၢင်ၶႃးထႅင်ႈ 2 ငႃးသေ တေႃႈလဵဝ် တိုၵ်ႉပဵၼ်ပၢင်တိုၵ်းၵၼ်ႁၢဝ်ႈႁႅင်း” ဝႃႈၼႆ။
ဢိင်ၼိူဝ် လွင်ႈပဵၼ်ပၢင်တိုၵ်းတၢင်းပွတ်းႁွင်ႇ ၼႂ်းၸႄႈဝဵင်းသီႇပေႃႉၼႆႉသေ ၵူၼ်းမိူင်း ၼပ်ႉႁူဝ်ႁဵင် လႆႈဢွၼ်ၵၼ်ပၢႆႈ ယၢၼ်ႁိူၼ်းသေ ၵႂႃႇသွၼ်ႈႁူမ်ႈၽုၺ်းဝႆႉၸွမ်းဝတ်ႉဝႃးၽႃသိူဝ်ႇၵၼ် ဝႃႈၼႆ။
တေႃႈလဵဝ် ၵူၼ်းပၢႆႈၽေးသိုၵ်း ဢၼ်ပၢႆႈမႃးသွၼ်ႈဝႆႉၸွမ်းဝတ်ႉဝႃးသမ်ႉ မိူၼ်ၼင်ႇ တီႈဝတ်ႉၼမ်ႉသိမ်ႇ 52 ၵေႃႉ၊ တီႈ ဝတ်ႉမၢၼ်ႈလီႈ 1,354 ၵေႃႉ၊ ဝတ်ႉၽူဝ်းတေႃႇ ပွၵ်ႉၸၢင်ႈၶမ်းၸၢၼ်း 365 ၵေႃႉ၊ ဝတ်ႉ (2500) ႁူဝ်ၵူၼ်း 198 ၵေႃႉ၊ ႁူင်း ႁဵၼ်းၸၼ်ႉဢွၼ် တူင်ႈၸၢင်ႉ 234 ၵေႃႉ၊ ဝတ်ႉၼႃးမၢၵ်ႇၶေႃ 176 ၵေႃႉလႄႈ ဝတ်ႉၵုင်းၸၢင်ႈလဵၵ်း 60 ၵေႃႉ တင်းမူတ်း ႁူဝ်ၵူၼ်း 2,439 ၵေႃႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ