သိုၵ်းဢူၺ်းလီပွတ်းႁွင်ႇလႄႈ တပ်ႉမတေႃႇမၢၼ်ႈ ယိုဝ်းၵၼ်ၼႂ်းၸေႈဝဵင်းလႃႈသဵဝ်ႈ

သိုၵ်းဢူၺ်းလီပွတ်းႁွင်ႇလႄႈ တပ်ႉသိုၵ်းလူင်ပွင်ၸိုင်ႈမၢၼ်ႈ ပိုတ်းယိုဝ်းၵၼ်ၼႂ်းၸေႈဝဵင်းလႃႈသဵဝ်ႈႁၢဝ်ႈႁႅင်း ။ ၼႂ်းလိူၼ်ၼႆႉၵူၺ်း ယိုဝ်းၵၼ် 3 ပွၵ်ႈယဝ်ႉ။

သိုၵ်းမၢၼ်ႈလႄႈ သိုၵ်းဢူၺ်းလီပွတ်းႁွင်ႇ   သိုၵ်းၶၢင် ၊ သိုၵ်းလွႆ TNLA   လႄႈသိုၵ်းၵဝ်ႈၵၢင်ႉပဵၼ်ပၢင်တိုၵ်းၵၼ်ႁိမ်း ဝၢၼ်ႈပၢင်ႇၵွင်းမူး ဢိူင်ႇမိူင်းၵႅတ်ႈ ၸေႈဝဵင်းလႃႈသဵဝ်ႈ ။ ပၢင်တိုၵ်းပဵၼ်မိူဝ်ႈဝၼ်းတီႈ 14/02/2019 တင်ႈဢဝ်ယၢမ်း ၵၢင်ၼႂ် 9 မူင်းထိုင် ၵၢင်ဝၼ်းတဵင်ႈၵေႃႈ သဵင်ၵွင်ႈယင်းပႆႇယဵၼ်။

လုင်းၸၢႆးသၢမ် ၵူၼ်းမိူင်းၵႅတ်ႈ လၢတ်ႈဝႃႈ-“ ပၢင်တိုၵ်းၼႆႉပဵၼ်မိူဝ်ႈဝူင်ႈပူၼ်ႉ ၵမ်းၼိုင်ႈယဝ်ႉ။ ၸင်ႇႁႃယဵၼ်ၵႂႃႇ 2-3 ဝၼ်းၵူၺ်း။ ယၢမ်းလဵဝ်သမ်ႉပဵၼ်ထႅင်ႈ တီႈပၢင်ႇၵွင်းမူး ဢၼ်မီးၾၢႆႇတူၵ်းမိူင်းၵႅတ်ႈ ယၢၼ်ၵႆမွၵ်ႈ 25 လၵ်း။ ဢၼ်မီးၼိူဝ်သဵၼ်ႈတၢင်းသႅၼ်ဝီ-ၵူတ်ႉၶၢႆ။ ၵူၼ်းမိူင်းပၢႆႈၽေးသိုၵ်းၵႂႃႇတၢင်ႇတီႈတႄႉပႆႇမီး။ ပိုၼ်ႉတီႈၼႆၼႆႉ ယၢမ်ႈႁူပ်ႉၽေးသိုၵ်းမႃးၸဵမ်လႂ် ႁူပ်ႉယူႇတႃႇသေႇလႄႈ ၵူၼ်းဝၢၼ်ႈၵေႃႈ ပၢႆႈၵႂႃႇယူႇၼႂ်းႁူၺ်ႈၼႂ်းလွႆ ၼႂ်းသူၼ်ၽႂ်မၼ်း။ ပေႃးပၢင်တိုၵ်းယဵၼ်ၵေႃႈပွၵ်ႈမႃးၶိုၼ်းႁဵတ်းၼႆၵူၺ်း။ ၵူၺ်းၵႃႈဢၼ်ၵူၼ်းမိူင်းပႅၵ်ႇၸႂ်ဢၢမ်းဢေႃးတႄႉ ႁဵတ်းသင် ၸိုင်ႈဝႃႈသိုၵ်းမၢၼ်ႈပိုၼ်ၽၢဝ်ႇၵိုတ်းတိုၵ်း 4 လိူၼ်။ ယၢမ်းလဵဝ်ယင်းပႆႇထိုင် 2 လိူၼ် တီႈမိူင်းၵႅတ်ႈၼႆႉပဵၼ်ပၢင်တိုၵ်း 3 ပွၵ်ႈယဝ်ႉ။ ပေႃးပဵၼ်ပၢင်တိုၵ်း ၵူၼ်းမိူင်းယူႇယၢပ်ႇ ႁႃၵိၼ်လဵင်ႉတွင်ႉယၢပ်ႇ ”- ဝႃႈၼႆ။

တီႈပဵၼ်ပၢင်တိုၵ်းၵၼ်ဝၼ်းမိူဝ်ႈၼႆႉ ပဵၼ်ဝၢၼ်ႈၵူၼ်းလွႆလႄႈ ပီႈၼွင်ႉၶၢင် ယူႇသဝ်း။

တင်ႈဢဝ်မိူဝ်ႈဝူင်ႈပူၼ်ႉ ဝၼ်းသုၵ်း ဝၼ်းတီႈ 8/02/2019 တေႃႇထိုင် ဝၼ်းတီႈ 12/02/2019  ၵေႃႈ သိုၵ်းမၢၼ်ႈလႄႈ ၸုမ်းသိုၵ်းဢူၺ်းလီ ပဵၼ်ပၢင်တိုၵ်းၵၼ်တီႈဝၢၼ်ႈပၢင်ၽႃႈ၊ ပၢင်ၵေႃႈ၊ၼမ်ႉဝၢႆ ဢၼ်မီးၼႂ်းဢိူင်ႇမိူင်းၵႅတ်ႈ။  မီးလွင်ႈမၢတ်ႇၸဵပ်း လုတၢႆတင်းသွင်ၾၢႆႇ။ သိုၵ်းမၢၼ်ႈတေႃႉၵူၼ်းမၢတ်ႇၸဵပ်းၶဝ်လူင်းၵႂႃႇတင်းလႃႇသဵဝ်ႈ- ဝႃႈၼႆ။

ဝၢႆးလင်ပၢင်တိုၵ်း ၸုမ်းသိုၵ်းဢူၺ်းလီ ၶၢၼ်းၵူၼ်းဝၢၼ်ႈၵွင်း၊ ႁူဝ်သေႃး၊ လွႆၶႅင်း၊ ပၢင်ၵေႃႈ၊ပၢင်ၽႃႈ ၼမ်ႉဝၢႆ၊ ပၢင်ၵၢၼ်ႈ၊ ၼွင်ၶဵဝ်ၸိူဝ်းၼႆး ၵႂႃႇၶုတ်းတၢင်း၊ ၶုတ်းတပ်ႉ တီႈတပ်ႉပၢင်သဝ်းၶဝ် ၵူႈဝၼ်း – ၵူၼ်းဝၢၼ်ႈၼႂ်းဢိူင်ႇမိူင်းၵႅတ်ႈလၢတ်ႈ။

ယၢမ်းလဵဝ် ထုင်ႉမိူင်းၵႅတ်ႈၼႆႉ မီးသိုၵ်းမၢၼ်ႈ ပလိၵ်ႈမၢၼ်ႈလႄႈ သိုၵ်းၵူၼ်းမိူင်း ပီတုၸိတ်ႉ ပူဝ်ႇမူၼ်း ၵုမ်းၵမ်ဝႆႉ။