တပ်ႉပၢင်သဝ်းလွႆလမ် ပၢင်သဝ်း ၶွင်ႊသီႊဢဝ်ၶိုၼ်းၸိုင်ႈတႆး တပ်ႉသိုၵ်းၸိုင်ႈတႆး RCSS/SSA  ၺႃးၸုမ်းယိပ်းၵွင်ႈၵၢင်ႇၸုမ်းၼိုင်ႈ ယိုဝ်းၵွင်ႈလူင်သႂ်ႇ တူၵ်းၸမ်ပၢင်သဝ်း 4 ၵမ်း။

ပၢင်သဝ်း RCSS/SSA ဢၼ်ၺႃးယိုဝ်း မိူဝ်ႈၼႆႉ 13/02/2019 ယၢမ်းႁူဝ်ၶမ်ႈ 6 မူင်း ၼႆႉ ပဵၼ်ပၢင်သဝ်းမၢႆ11   ပၢင်သဝ်းလွႆလမ် ဢၼ်မီးၼႂ်းၸေႈဝဵင်းမိူင်းတူၼ် တိတ်းၸပ်းလႅၼ်လိၼ်ထႆး-တႆး။     မီးၼႂ်းလိၼ်တႆး။ မီးတေႃႇၼႃႈဝတ်ႉၾႃႉဝဵင်းဢိၼ်း ဝၢၼ်ႈလၢၵ်းတႅင်ႇ ဢိူင်ႇပဵင်းလူင် ၸေႈဝဵင်းဝဵင်းႁႅင် ၸေႈတွၼ်ႈၵဵင်းမႆႇ ၸိုင်ႈထႆး။ လုၵ်ႉတီႈလႅၼ်လိၼ် တီႈဝတ်ႉၾႃႉဝဵင်းဢိၼ်းၶီႇလူတ်ႉၶိူင်ႈ ၵႂႃႇမွၵ်ႈၶၢဝ်းတၢင်း ၶိုင်ႈၸူဝ်ႈမူင်း။

ၽူႈမီးၸၼ်ႉၼႂ်းတပ်ႉသိုၵ်း RCSS/SSA ၸဝ်ႈၼိုင်ႈလၢတ်ႈဝႃႈ – “ ႁဝ်းၶႃႈတိုၵ်ႉထတ်းတူၺ်းယူႇၶႃႈ ဝႃႈပဵၼ်ၸုမ်းလႂ်ယိုဝ်းမႃး။ မၢၵ်ႇၵွင်ႈလူင်ၼႆႉမၼ်းလုၵ်ႉၾၢႆႇတၢင်းမိူင်းတေႃႉယိုဝ်းမႃးၶႃႈဢေႃႈ ။ တၢင်းၼၼ်ႉမီးတင်းတပ်ႉမၢၼ်ႈ လႄႈတပ်ႉဝႃႉ။ ယိုဝ်းမႃး မွၵ်ႈ 6 လုၵ်ႈ။ ဢၼ်မႃးတူၵ်းႁိမ်း ၸမ်ပၢင်သဝ်းႁဝ်းၶႃႈ မီး 4 လုၵ်ႈ။ ၵတ်ႉၵႃႈဢမ်ႇမီးလွင်ႈမၢတ်ႇၸဵပ်းလုတၢႆ လုသုမ်းသင်” – ဝႃႈၼႆ။

တီႈပၢင်သဝ်းသိုၵ်းလွႆလမ်ၼၼ်ႉမီးပႃးပၢင်သဝ်းၵူၼ်းပၢႆႈၽေးသိုၵ်းမိူင်းတႆး မႃးသွၼ်ႈယူႇဝႆႉ 200 ပၢႆ။ ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး ႁၢႆးငၢၼ်းဝႃႈ မိူဝ်ႈႁၢင်ပီ ပီၵၢႆၼၼ်ႉ သိုၵ်းမၢၼ်ႈ ၶလယ 293 ပွႆႇၶိူင်ႈမိၼ် ၻရူၼ်ႊ မိၼ်မႃးတၢင်းပၢင်သဝ်းလွႆလမ်လႄႈ ၵူၼ်းပၢႆႈၽေးလႆႈတူၵ်းၸႂ်ၵူဝ်ႁႄ ၵူဝ်ပဵၼ်ပၢင်တိုၵ်းသိုၵ်းသိူဝ်ယူႇ ဝႃႈၼႆ။

တပ်ႉသိုၵ်းၸိုင်ႈတႆး RCSS/SSA ၼႆႉလူင်းလၢႆးမိုဝ်း ၵိုတ်းတိုၵ်းၵၼ်ဝႆႉ တင်း လူင်ပွင်ၸိုင်ႈမၢၼ်ႈ။

မိူဝ်ႈဝၼ်းတီႈ 25/01/2019 ၼၼ်ႉ တပ်ႉသိုၵ်းမၢၼ်ႈ ပိုၼ်ၽၢဝ် ႇဝႆႉဝႃႈ သိုၵ်းၸၢဝ်းၶိူဝ်း ဢၼ်ပူၼ်ႉပႅၼ်ၼႃႈလိၼ်သေ တူင်ႉၼိုင်ဝႆႉယူႇၼၼ်ႉ ဝၼ်းမိူင်းႁူမ်ႈတုမ် 12/02/2019 ဝႆႉပဵၼ်ဝၼ်းလိုၼ်းသုတ်းသေ ႁႂ်ႈဢွၼ်ၵၼ်ထွႆထွၼ်ပွၵ်ႈၶိုၼ်းႁႂ်ႈယဝ်ႉတူဝ်ႈ။

ယူႇတီႈ  RCSS/SSA တွပ်ႇလၢတ်ႈတီႈၽူႈတွႆႇႁွၵ်ႈဝႃႈ ဢမ်ႇလႆႈယႃႉၶေႃႈၵိၼ်ၵႅၼ်ႇသင် ၊ ဢမ်ႇၸႂ်ႈၼင်ႇတပ်ႉသိုၵ်းတပ်ႉမတေႃႇ မၢပ်ႇၽၢမ်းၸိၼႄး ဝႃႈၼႆ။