သိုၵ်းလူင်ပွင်ၸိုင်ႈမၢၼ်ႈ ဢွၵ်ႇၶေႃႈပိုၼ်ၽၢဝ်ႇတီႈၼႃႈလိၵ်ႈၾၢႆႇပွင်ႇၶၢဝ်ႇတပ်ႉသိုၵ်းပၼ်ၾၢင်ႉ ၸုမ်းယိပ်းၵွင်ႈၵၢင်ႇ ၼႂ်းမိူင်းႁူမ်ႈတုမ်ပတ်းပိုၼ်ႉ ၵူႈၸုမ်းႁႂ်ႈႁဵတ်း ၸွမ်းၵႂၢမ်းမၼ်ႈၵႅၼ်ႇတီႈယူႇၽႂ်မၼ်း ဢၼ်လႆႈတူၵ်းလူင်းၵၼ်ဝႆႉ တႃႇ လွင်ႈငမ်းယဵၼ်တေမၼ်ႈၵိုမ်း၊ လိူဝ်ၼၼ်ႉၸီႉသင်ႇပႃး ပေႃးထိုင်မႃး လိူၼ်ၾႅပ်ႊၿိဝ်ႊရီႊၸိုင် ႁႂ်ႈၸုမ်းယိပ်းၵွင်ႈၵၢင်ႇ ထွၼ်ထွႆၶိုၼ်း ဝႃႈၼႆ။
ဝၼ်းတီႈ 25/01/2019 သိုၵ်းလူင်ပွင်ၸိုင်ႈမၢၼ်ႈ ဢွၵ်ႇၶေႃႈပိုၼ်ၽၢဝ်ႇပၼ်ၾၢင်ႉ ႁႂ်ႈ ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း တင်းသဵင်ႈ ၼႂ်းမိူင်းႁူမ်ႈတုမ် ဢၼ်ပူၼ်ႉပႅၼ်တူင်ႉၼိုင် ၶၢမ်ႈၼႃႈလိၼ်- ၶဝ်ႈၸူးတီႈ ဢမ်ႇၸႂ်ႈၼႃႈလိၼ်ၸဝ်ႈၵဝ်ႇ ၸိူဝ်းၼၼ်ႉ ႁႂ်ႈထွႆထွၼ်ပွၵ်ႈၶိုၼ်းတီႈယူႇၽႂ်မၼ်း 12/02/2019 ႁႂ်ႈယဝ်ႉတူဝ်ႈ တႃႇၵေႃႇသၢင်ႈလွင်ႈငမ်းယဵၼ်လႄႈ ၵၢၼ်ၵိုတ်းသိုၵ်း ဝႃႈၼႆ။
ၼႂ်းၶေႃႈပိုၼ်ၽၢဝ်ႇ ပႃးဝႆႉဝႃႈ “ ယူႇတီႈတပ်ႉသိုၵ်းလူင်ပွင်ၸိုင်ႈမၢၼ်ႈ ပိုၼ်ၽၢဝ်ႇလွင်ႈၵိုတ်းတိုၵ်း တႃႇၶၢဝ်းတၢင်း 4 လိူၼ်ၼၼ်ႉ တႄႇဢဝ် ဝၼ်းတီႈ 21 လိူၼ်ၻီႊသႅမ်ႊၿိူဝ်ႊ ထိုင် ဝၼ်းတီႈ 24/01/2019 မႃးၼႆႉ ၸုမ်းယိပ်း ၵွင်ႈၵၢင်ႇ ၸၢဝ်းၶိူဝ်းၼင်ႇၵၼ် ပဵၼ်ပၢင်တိုၵ်းၵၼ် 13 ပွၵ်ႈ၊ ပူၼ်ႉပႅၼ်ၼႃႈတီႈ 168 ပွၵ်ႈ၊ ၵဵပ်းၶွၼ်ႇ 10 ပွၵ်ႈ၊ ၵဵပ်းသိုၵ်းမႂ်ႇ 20 ပွၵ်ႈ၊ ပႂ်ႉမူၵ်းယိုဝ်းသိုၵ်းမၢၼ်ႈ 10 ပွၵ်ႈလႄႈ ၵႃးသိုၵ်းမၢၼ်ႈ ဢၼ်ယဵပ်ႇၺႃးမၢၵ်ႇႁၢင်ႈၵၢင် 2 ပွၵ်ႈ ပွင်ႇဝႃႈ သိုၵ်းၸၢဝ်းၶိူဝ်း ပူၼ်ႉပႅၼ်ၶေႃႈပိုၼ်ၽၢဝ်ႇလွင်ႈငမ်းယဵၼ်” ဝႃႈၼႆ။
လိူဝ်ၼၼ်ႉ ပႃးဝႆႉဝႃႈ ပေႃးမီးၵၢင်ၸႂ်ၶႂ်ႈႁဵတ်းလွင်ႈငမ်းယဵၼ်တႄႉတႄႉၸိုင် တၵ်းလႆႈ ႁဵတ်းၸွမ်းၶေႃႈမၼ်ႈၵႅၼ်ႇ ဢၼ် လႆႈဢုပ်ႇ ၵၼ်ဝႆႉ မိူၼ်ၼင်ႇ RCSS တေလႆႈတူင်ႉၼိုင် ၸွမ်းၼင်ႇၽႅၼ်ႇ တီႈဢၼ် ပႃးၼႂ်း ၶေႃႈၵိၼ် ၵႅၼ်ႇမိူဝ်ႈလူင်း လၢႆးမိုဝ်း လွင်ႈငမ်းယဵၼ်ၸၼ်ႉမိူင်းႁူမ်ႈတုမ် တီႈဝဵင်းၵဵင်းတုင် မိူဝ်ႈဝၼ်းတီႈ 19 လိူၼ် မေႊ 2012 ။ ၸုမ်းဝၢၼ်ႈႁႆး SSPP တေ လႆႈတူင်ႉၼိုင်ၸွမ်း ၽႅၼ်ႇတီႈဢၼ်လႆႈတူၵ်းလူင်းၵၼ်တင်းလူင်ပွင်ၸိုင်ႈဝႆႉ တီႈၼေႇပျီႇ တေႃႇ မိူဝ်ႈဝၼ်း တီႈ 15/12/2015။ ၸုမ်းဢူၺ်းလီပွတ်းႁွင်ႇၶဝ်ၵေႃႈ တၵ်းလႆႈႁဵတ်းၸွမ်းၶေႃႈပိုၼ်ၽၢဝ်ႇ တပ်ႉသိုၵ်း လူင်ပွင်ၸိုင်ႈမိူဝ်ႈ ဝၼ်းတီႈ 12/12/2018 ဢၼ်ၶဝ်ပိုၼ်ၽၢဝ်ႇတေၵိုတ်းတိုၵ်းၼၼ်ႉ။ ၸုမ်းယၢင်း KNU လႄႈ KNLA (PC) ၶဝ်ၵေႃႈ တေ လႆႈႁဵတ်းၸွမ်း ၸွမ်းၼင်ႇလိၵ်ႈၵိၼ်ၵႅၼ်ႇ NCA ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ