Tuesday, March 19, 2024

ၵူၼ်းပၢႆႈၽေးသိုၵ်း တီႈသီႇပေႃႉ ပႆႇၸၢင်ႈပွၵ်ႈႁိူၼ်းၶိုၼ်း တိုၵ်ႉလူဝ်ႇတၢင်းၸွႆႈထႅမ်တင်းၼမ်

Must read

ၵူၼ်းပၢႆႈၽေးသိုၵ်း တီႈဝတ်ႉၼႃးမၢၵ်ႇၶေႃ ဢိူင်ႇၼႃးမၢၵ်ႇၶေႃ ႁူဝ်ၵူၼ်း 500 ပၢႆၼၼ်ႉ မီးၸုမ်းၵူၼ်းၼုမ်ႇ ၶူဝ်လမ်၊ လၢႆးၶႃႈ ႁူမ်ႈၵၼ် ၵႂႃႇၵမ်ႉထႅမ် ငိုၼ်းတွင်းလႄႈ ၶွင်ၵိၼ်တၢင်းယႅမ်ႉ။

Photo by – Mr. Moon On/လုၵ်ႈႁဵၼ်း တီႈဝတ်ႉၼႃးမၢၵ်ႇၶေႃ ၸႄႈဝဵင်းသီႇပေႃႉ

ၽူႈမီးၼမ်ႉၸႂ်ၸေႇတၼႃႇ ၸၢႆးၵျေႃႇၺဵင်းလႄႈ ၼၢင်းၸၢမ်ၽွင်း ၸႄႈဝဵင်းတႃႈၶီႈလဵၵ်း ၵမ်ႉၸွႆႈမႃးသေ ဝၼ်းတီႈ 23-24/01/2019 ၸုမ်းၵူၼ်းၼုမ်ႇၶူဝ်လမ် လႄႈ လၢႆးၶႃႈ ႁူမ်ႈၵၼ်ဢဝ်ပုၼ်ႈၽွၼ်း ၵႂႃႇယိုၼ်ႈမႅင်ႇၸွႆႈထႅမ်ပၼ် ၼႂ်းမိုဝ်း ၵူၼ်းပၢႆႈၽေးသိုၵ်း တီႈဝတ်ႉၼႃးမၢၵ်ႇၶေႃ ဢိူင်ႇၼႃးမၢၵ်ႇၶေႃ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ ဝႃႈၼႆ။

- Subscription -

ၸၢႆးမူၼ်း ၵူၼ်းၼုမ်ႇ ၶူဝ်လမ် ဢၼ်ႁပ်ႉပုၼ်ႈၽွၼ်း ၵႂႃႇၸွႆႈထႅမ် ၵူၼ်းပၢႆႈၽေးသိုၵ်း တီႈဝတ်ႉၼႃးမၢၵ်ႇၶေႃၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ “ ယူႇတီႈၸုမ်းၵူၼ်းၼုမ်ႇႁဝ်း ၵႂႃႇၵမ်ႉၸွႆႈထႅမ်ၵူၼ်းပၢႆႈၽေးသိုၵ်းတႄႉ ပဵၼ်ၶွင်ၵိၼ် ယႅမ်ႉ လႄႈ ၶိူင်ႈၸႂ်ႉတိုဝ်း ၼႂ်းႁူင်းႁဵၼ်း။ တေႃႈလဵဝ် လုၵ်ႈႁဵၼ်းၸမ်တေလႆႈတွပ်ႇလိၵ်ႈလႄႈ လႆႈၵမ်ႉၸွႆႈပၼ် မိူၼ်ၼင်ႇ ပပ်ႉ လိၵ်ႈ၊ ၵမ်ႉတႅမ်ႈ ၸိူဝ်းၼႆ။ လုၵ်ႈႁဵၼ်းပၢႆႈၽေးသိုၵ်းမီးမွၵ်ႈ 100 ၵေႃႉ။ ယူႇတီႈႁွင်ႈၵၢၼ်ၾၢႆႇပၢႆးပၺ်ၺႃ မႃးပူင်သွၼ် ပၼ် ၽႅဝ်တီႈဝတ်ႉယူႇ။ လွင်ႈလုၵ်ႈႁဵၼ်း တေတွပ်ႇလိၵ်ႈၼၼ်ႉ ႁၢင်ႈႁႅၼ်းၶပ်းၶိုင်ဝႆႉၸိူင်ႉႁိုဝ် ဢမ်ႇႁူႉ ”ဝႃႈၼႆ။

Photo by – Mr. Moon On/လုၵ်ႈႁဵၼ်း တီႈဝတ်ႉၼႃးမၢၵ်ႇၶေႃ ၸႄႈဝဵင်းသီႇပေႃႉ

တေႃႈလဵဝ် ၵူၼ်းပၢႆႈၽေးသိုၵ်း ဢၼ်မီးတီႈဝတ်ႉၼႃးမၢၵ်ႇၶေႃၼႆႉ တင်းမူတ်း မီးႁူဝ်ၵူၼ်း 580 ပၢႆ။ ပဵၼ်ၵူၼ်းဝၢၼ်ႈ တူၼ်ႈၵႅင်း၊ ဝၢၼ်ႈႁူမ်ႈ၊ တႃႈလူင်၊ ၶၢႆးႁဵဝ်းလႄႈ ႁူဝ်ၼႃး ၸဵမ်ၸိူဝ်းၼႆႉ။

ၸၢႆးမူၼ်း လၢတ်ႈဝႃႈ “ ၵူၼ်းဝၢၼ်ႈတႃႈလူင်တႄႉ ၶႂ်ႈပွၵ်ႈမိူဝ်းၶိုၼ်းႁိူၼ်းယေးၵၼ်ၼႃႇယဝ်ႉ။ ယွၼ်ႉဝႃႈ လူဝ်ႇဢဝ် ထူဝ်ႇလႄႈ ၶဝ်ႈၵၢပ်ႇ။ မၢင်ၵေႃႉ ၵၢၼ်ႉလူင်းယဝ်ႉ ပႆႇလႆႈၵဵပ်းၵေႃႈမီး ယွၼ်ႉၼၼ်လႄႈ ၶႂ်ႈပွၵ်ႈမိူဝ်းၵဵပ်း။ ၵူၼ်းပၢႆႈၽေး မၢင်ၵေႃႉ ၼႅတ်ႈပၢႆႈဢွၵ်ႇမႃး ၽၵ်းတူႁိူၼ်း ပေႃးဢမ်ႇတၼ်းလႆႈၶတ်းၵၢၵ်ႇသေႃးၵေႃႈမီး။ ဢမ်ႇလႆႈဢိုတ်းၽၵ်းတူ ႁိူၼ်းၵေႃႈ မီး။ မိူဝ်ႈၼႆႉ ယၢမ်းၵၢင်ၼႂ်တႄႉ ဢွၼ်ၵၼ်ပွၵ်ႈမိူဝ်းၵမ်ႈၽွင်ႈယူႇ ယွၼ်ႉငဝ်းလၢႆး ၼႂ်းပိုၼ်ႉတီႈပႆႇလီ သိုၵ်းတိုၵ်ႉၶဵင်ႈၶႅင် ၵၼ်ယူႇ လႆႈဢွၼ်ၵၼ်ပွၵ်ႈမႃးတီႈဝတ်ႉၶိုၼ်း” ဝႃႈၼႆ။

“ ယွၼ်ႉဝႃႈ ဢွၼ်ၵၼ်ပၢႆႈဢွၵ်ႇမႃး ႁိုင်ယဝ်ႉ ဢမ်ႇပႆႇၸၢင်ႈပွၵ်ႈႁိူၼ်း ၶိုၼ်းလႄႈ လွင်ႈၶဝ်ႈၼမ်ႉတၢင်းၵိၼ် လႄႈ ၶူဝ်း ၼုင်ႈတၢင်းဝႆတႄႉ တိုၵ်ႉလူဝ်ႇထႅင်ႈတင်းၼမ်ယူႇ။ သင်ပဵၼ်လႆႈ ၶႂ်ႈမွၵ်ႇထိုင် ၽူႈမီးၼမ်ႉၸႂ်ၸေႇတၼႃႇ ႁႂ်ႈ ဢွၼ်ၵၼ် မႃးၸွႆႈထႅမ် တူၺ်းၵၼ်ၽွင်ႈ” ဝႃႈၼႆ။

တေႃႈလဵဝ် ၵူၼ်းပၢႆႈၽေးသိုၵ်းၼႂ်းၸႄႈဝဵင်းသီႇပေႃႉ ဢၼ်ပၢႆႈဢွၵ်ႇမႃးသွၼ်ႈဝႆႉတီႈဝတ်ႉသမ်ႉ မိူၼ်ၼင်ႇ ဝတ်ႉၼႃး မၢၵ်ႇၶေႃ၊ ဝၢၼ်ႈၼႃးၵၢင်၊ ဝတ်ႉၼွင်ဢၢင်လႄႈ ၵျွင်းၶရိတ်ႊယၼ်ႇ လီသူး ၸိူဝ်းၼႆႉ။ ယၢမ်းလဵဝ် ႁူဝ်ၵူၼ်းပၢႆႈၽေးသိုၵ်း ပႆႇၸၢင်ႈပွၵ်ႈႁိူၼ်း မီးယူႇ 1,000 ပၢႆ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း