ပၢင်တိုၵ်းပဵၼ်ႁၢဝ်ႈႁႅင်းၼႂ်းဝၢၼ်ႈတႃႈလူင် ဢိူင်ႇၼႃးမၢၵ်ႇၶေႃ ၸေႈဝဵင်းသီႇပေႃႉ။ ၽွင်းၵူၼ်းဝၢၼ်ႈပၢႆႈ ၽေးသိုၵ်း ၼၼ်ႉ မၢၵ်ႇလူင်တူၵ်းသႂ်ႇ၊ တိူဝ်ႉၺႃးၸၢၵ်ႇမၢၵ်ႇသေ  မၢတ်ႇၸဵပ်း  လိူဝ်ႁႅင်း လႆႈသူင်ႇတူဝ်ယူတ်းယႃ ဝႆႉတီႈ ႁူင်းယႃ သီႇပေႃႉ။

ပၢင်တိုၵ်းပဵၼ် မိူဝ်ႈၼႆႉ ဝၼ်းတီႈ 22/01/2019 ယၢမ်းဝၢႆးဝၼ်း ၊ ၵူၼ်းဝၢၼ်ႈတႃႈလူင် ဢၼ်ၺႃးၸၢၵ်ႇမၢၵ်ႇၼၼ်ႉ ၸိုဝ်ႈႁွင်ႉဝႃႈ ၸၢႆးၵမ်ႇ ဢႃယု 22 ပီ  ။

ၸၢႆးၸၢႆး ၵူၼ်းပၢႆႈၽေးသိုၵ်း ႁွတ်ႈတီႈဝတ်ႉၵျွင်းၼႃးမၶေႃ  လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈသဵင်ၵွင်ႈတိုၵ်ႉပၼ်း ၼၼ်ႉမၼ်း ၸၢႆးဢမ်ႇႁတ်းပၢႆႈ၊ ပႅပ်ႉဝႆႉ ၸွမ်းႁိူၼ်းၵူၺ်း  ၵူဝ်ၺႃး ၶျေႃး၊ ၽိူဝ်ႇ သဵင်ၵွင်ႈ  ပၼ်းႁႅင်းမႃး မၼ်းၸၢႆးၵေႃႈ ဢမ်ႇႁတ်းယူႇ၊ ၼႅတ်ႈလႅၼ်ႈဢွၵ်ႇဝၢၼ်ႈမႃး၊ ထိုင်ၼွၵ်ႈဝၢၼ်ႈ (ၾၢႆႇဢွၵ်ႇဝၢၼ်ႈတႃႈလူင် )  မၼ်းၸၢႆးတိူဝ်ႉၺႃးမၢၵ်ႇ။ မၼ်းၼႅတ်ႈၵပ်းၾူၼ်းၸူးဢူၺ်းၵေႃႉမၼ်းမႃးႁပ်ႉ။ ပွတ်းႁဝ်းၶႃႈၼႆႉ မီးသိုၵ်းတႆးသွင်ၸုမ်းၵူၺ်းၶႃႈတူင်ႉၼိုင်ၵႂႃႇမႃး ” ဝႃႈၼႆ။

ၸၢႆးၵမ်ႇၼႆႉမၢတ်ႇၸဵပ်းလိူဝ်ႁႅင်းလႄႈ ယၢမ်းလဵဝ် လႆႈသူင်ႇယူတ်းယႃတူဝ်ဝႆႉတီႈႁူင်းယႃဝဵင်းသီႇပေႃႉ၊   ပဵၼ်ၸုမ်းလႂ်ယိုဝ်းသႂ်ႇ၊ လုၵ်ႉတၢင်းလႂ်ယိုဝ်းသႂ်ႇ ဢၼ်ဝႃႈၼၼ်ႉ ဢမ်ႇႁူႉ၊  လႅပ်ႈတေ သိုၵ်းတေႃႇသိုၵ်းယိုဝ်းၵၼ်သေ မၢၵ်ႇတႅၵ်ႇၸၢၵ်ႇမၢၵ်ႇတိူဝ်ႉၺႃးၵူၺ်း၊  ပၢင်တိုၵ်းပဵၼ်ၸဵမ်မိူဝ်ႈၵၢင်ဝၼ်း တေႃႇထိုင်ၵၢင်ၶမ်ႈ သဵင်ၵွင်ႈယင်းပႆႇယဵၼ် ဝႃႈၼႆ။

ၵူၼ်းဝၢၼ်ႈတႃႈလူင် ထႅင်ႈၵေႃႉၼိုင်ႈ လၢတ်ႈဝႃႈ “ မေႃယႃၼမ်ႉလၼ်ႈဝႃႈ မၢၵ်ႇၼႆႉ လႅပ်ႈတေတူၵ်းတီႈလိၼ်သေ ၸၢၵ်ႇၽူင်ႉသဵၼ်သႂ်ႇမၼ်းၸၢႆး  ။  တိူဝ်ႉမၢတ်ႇႁႅင်းထိုင်လုပ်ႇ ၊ မေႃယႃ  လႆႈဢဝ်ၸၢၵ်ႇမၢၵ်ႇဢွၵ်ႇပၼ်ယဝ်ႉ။ ၵူၺ်းၵႃႈ တီႈႁူင်းယႃၼမ်ႉလၼ်ႈ ဢမ်ႇမီးၶိူင်ႈမၼ်းၸေးလႄႈ   လႆႈသိုပ်ႇသူင်ႇ တူဝ်ၵႂႃႇတီႈႁူင်းယႃသီႇပေႃႉ” ဝႃႈၼႆ။

ၵဵဝ်ႇၵပ်းလွင်ႈပၢင်တိုၵ်းၼႆႉသေ SSPP/SSA ပိုၼ်ၽၢဝ်ႇဝႆႉတီႈ SSPP Info ၼၼ်ႉဝႃႈ RCSS/SSA ၶိုၼ်ႈယိုဝ်းၼႆသေ၊    RCSS/SSA သမ်ႉပိုၼ်ၽၢဝ်ႇဝႆႉတီႈၼႃႈဝႅပ်ႉသၢႆႉ Taifreedom ၼၼ်ႉဝႃႈ SSPP/SSA ယိုဝ်းၵွင်ႈၼႂ်းဝၢၼ်ႈ ဝႃႈၼႆဝႆႉ။

တေႃႈလဵဝ် ၵူၼ်းပၢႆႈၽေးသိုၵ်း တီႈသီႇပေႃႉ တင်းမူတ်း မီး 1,150 ၵေႃႉ။ တီႈဝတ်ႉၼႃးမၢၵ်ႇၶေႃမီး 617 ၵေႃႉ၊ ႁူင်းႁေႃး တူၼ်ႈၵႃႈ 55 ၵေႃႉ၊ ဝတ်ႉၼႃးၵၢင် 290 ၵေႃႉ၊ ဝတ်ႉၼွင်ဢၢင်ႈ 90 ၵေႃႉလႄႈ ၵျွင်းၶရိတ်ႊယၼ်ႇ လီသူး 98 ၵေႃႉ ဝႃႈၼႆ။

ၵူၼ်းပၢႆႈၽေးသိုၵ်းဢွၵ်ႇမႃးသမ်ႉ ပဵၼ်ၵူၼ်းဝၢၼ်ႈ ၼႂ်းလူင်၊ တူၼ်ႈၵႅင်း၊ ႁူဝ်ၼႃး၊ ဝၢၼ်ႈႁူမ်ႈ၊ တႃႈလူင်၊ ၵဵတ်းၽူၼ်၊ ၶၢႆးႁဵဝ်း၊ လူင်ဝၢႆ၊ ၽၵ်းၼၢမ်၊ သႅၼ်ပၢႆး၊ လွႆမွၵ်ႇလႄႈ သၢႆးၶၢဝ် ၸဵမ်ၸိူဝ်းၼႆႉ။