လူင်ပွင်ၸိုင်ႈၼူၵ်ႉယုင်း ဢမ်ပၼ်ၵူၼ်းတူၼ်ႈတီး တူင်ႉၼိုင်မၢႆတွင်းဝၼ်းသုၼ်ႇလႆႈ ၼႂ်းဝၢင်းသူၼ်မွၵ်ႇ ၵၢင်ဝဵင်း

ဝၼ်းတီႈ 10 ၻီႊသႅမ်ႊပိူဝ်ႊ ဝၼ်းသုၼ်ႇလႆႈၵူၼ်းၸၢတ်ႈၸိုင်ႈလုမ်ႈၾႃႉၼၼ်ႉ ၾၢႆႇလိူမ်ႈလႆႇ(ၸီႇပိၼ်ႇ) ဝဵင်းတူၼ်ႈ တီး ဢမ်ႇပၼ်ၸုမ်းတူင်ႉၼိုင်ၸတ်းႁဵတ်းပၢင်ၵႅဝ်ႈမၢႆတွင်းဝၼ်းၼၼ်ႉ ၼႂ်းသူၼ်မွၵ်ႇၵၢင်ဝဵင်းတူၼ်ႈတီး။

ဝၼ်းတီႈ 16/11/2018 ယူႇတီႈ Human Right Educator Network တၢင်ႇလိၵ်ႈယိုၼ်ႈထိုင် တႃႇတေၸတ်းႁဵတ်းပၢင် ၵႅဝ်ႈ ဝၼ်းသုၼ်ႇလႆႈၵူၼ်း ၸၢတ်ႈၸိုင်ႈလုမ်ႈၾႃႉ တီႈၼႂ်းဝၢင်းသူၼ်မွၵ်ႇ ၵၢင်ဝဵင်း(ပူဝ်ႇၶျူပ်ႉဢွင်ႇသၢၼ်း ပန်းခြံ) တူၼ်ႈတီး ၸိုင်ႈတႆး ပွတ်းၸၢၼ်း။ ၽိုၼ်လိၵ်ႈၼၼ်ႉ သူင်ႇထိုင် ၸွမ်ၽွင်းလူင်မိူင်းတႆး။ လိူဝ်ၼၼ်ႉ ၽိုၼ်မိူၼ် သူင်ႇထိုင် ၽွင်းလူင်ၾၢႆႇ လိူမ်ႈလႆႇ ၸႄႈမိူင်း၊ ၽွင်းလူင် ၾၢႆႇၸၢဝ်းၶိူဝ်းမၢၼ်ႈလႄႈ ႁွင်ႈၵၢၼ်ၾၢႆႇလိူမ်ႈလႆႇၸႄႈဝဵင်း ၸဵမ်ၸိူဝ်းၼႆႉ။

တေႃႇၼိၼ်းၼၼ်ႇတႃႇဢွင်ႇ ၽူႈမီးပုၼ်ႈၽွၼ်း Human Right Educator Network တူၼ်ႈတီး လၢတ်ႈတီႈၽူႈတွႆႇ ႁွၵ်ႈ ဝႃႈ “ ၶႃႈႁဝ်းၵႂႃႇထၢမ်တီႈလုမ်းၽွင်းလူင် ယူႇတီႈၾၢႆႇလိူမ်ႈလႆႇ ဢမ်ႇပၼ်ၶႂၢင်ႉၸတ်း ၶဝ်ဝႃႈ ၶဝ်ဢမ်ႇၸၢင်ႈႁဵတ်းသင် ပၼ်လႆႈ” ဝႃႈၼႆ။

မိူဝ်ႈဝၼ်းတီႈ 26/11/2018 ၼႆႉ ယူႇတီႈႁွင်ႈၵၢၼ်ၾၢႆႇလိူမ်ႈလႆႇ ၸႄႈဝဵင်းပိုၼ်ၽၢဝ်ႇဢွၵ်ႇဝႆႉဝႃႈ တွၼ်ႈတႃႇတေၸတ်း ႁဵတ်း ပၢင်ၵႅဝ်ႈဝၼ်းသုၼ်ႇလႆႈၵူၼ်း တီႈသူၼ်မွၵ်ႇ ဢွင်ႇသၢၼ်း ၼႂ်းဝၼ်းတီႈ 10 လိူၼ်ၻီႊသႅမ်ႊပိူဝ်ႊ တႄႇဢဝ် ၶၢဝ်း ယၢမ်း 1 မူင်းဝၢႆးဝၼ်း ထိုင် 8 မူင်းၶိုင်ႈ ၵၢင်ၶမ်ႈၼၼ်ႉ ဢမ်ႇၸၢင်ႈပၼ်ၶႂၢင်ႉသုၼ်ႇ ၸတ်းႁဵတ်းလႆႈ ဝႃႈၼႆ။

လိူဝ်ၼၼ်ႉ တီႈသူၼ်မွၵ်ႇၸွမ်ႁၢၼ်ဢွင်ႇသၢၼ်းၼၼ်ႉ မၼ်းပဵၼ်တီႈၵူၼ်းတင်းၼမ် မႃးဢႅဝ်ႇ မႃးလႄႇမႃး လိုဝ်ႈႁိူဝ်ႉ ၵၼ် ယွၼ်ႉၼၼ် ၼႂ်းသူၼ်မွၵ်ႇၼၼ်ႉ ယွၼ်းၶႂၢင်ႉတႃႇတေၸတ်းႁဵတ်း ပၢင်မူၼ်ႈသိူဝ်းၼၼ်ႉ ဢမ်ႇပၼ်ၶႂၢင်ႉၸတ်း လႆႈ တႅမ်ႈဝႆႉၼင်ႇၼႆ။

တေႃႇၼိၼ်းၼၼ်ႇတႃႇဢွင်ႇ လၢတ်ႈဝႃႈ “ ႁဝ်းၶႃႈ ၵႂႃႇတီႈၵူၼ်းၼမ်သေ လူင်းသူၼ်းတုမ်ဢမ်ႇၸႂ်ႈ။ ႁဝ်းၶႃႈ တေ ၸတ်းႁဵတ်း ပၢင်ပၼ်ပိုၼ်ႉႁူႉ လွင်ႈသုၼ်ႇလႆႈၵူၼ်း၊ ထၢမ်တွပ်ႇၵၼ်လႄႈ ပၢင်မူၼ်းသိူဝ်း ၸဵမ်ၸိူဝ်းၼႆႉ တွၼ်ႈတႃႇ ၵူၼ်းမိူင်းႁဝ်း” ဝႃႈၼႆ။

ၸၢႆးလႃႉမွင်ႇ ၵူၼ်းမိူင်း တူၼ်ႈတီး လၢတ်ႈဝႃႈ “ ပေႃးပဵၼ်ပၢင်ၵမ်ႉထႅမ် တပ်ႉသိုၵ်းမၢၼ်ႈသမ်ႉ ၶဝ်ပၼ်ၶႂၢင်ႉၸတ်းႁဵတ်း ယူႇ။ တွၼ်ႈတႃႇ ၸတ်းႁဵတ်းပၢင်ၵႅဝ်ႈသုၼ်ႇလႆႈၵူၼ်းသမ်ႉ ဢမ်ႇပၼ်ၶႂၢင်ႉၸတ်း တေလႆႈဝႃႈ ပူၼ်ႉပႅၼ်သုၼ်ႇလႆႈ ၵူၼ်းယဝ်ႉ” ဝႃႈၼႆ။

ပၢင်ၵႅဝ်ႈဝၼ်းသုၼ်ႇလႆႈၵူၼ်းၼႆႉ မိူဝ်ႈပီပူၼ်ႉ လႆႈၶႂၢင်ႉသုၼ်ႇလႆႈၸတ်းႁဵတ်း ၼႂ်းဝၢင်းသူၼ်မွၵ်ႇမႃး။ ပီၼႆႉ ယူႇတီႈႁွင်ႈ ၵၢၼ်ၾၢႆႇလိူမ်ႈလႆႇသမ်ႉ ဢမ်ႇပၼ်ၶႂၢင်ႉၸတ်းႁဵတ်း ဝႃႈၼႆ။

တေႃႇၼိၼ်းၼၼ်ႇတႃႇဢွင်ႇ လၢတ်ႈဝႃႈ “ တွၼ်ႈတႃႇ တေၸတ်းႁဵတ်းလႆႈ ဝၼ်းသုၼ်ႇလႆႈၵူၼ်းၼၼ်ႉ တေၶတ်းၸႂ် ၵႂႃႇထႅင်ႈ။ ၵမ်းလိုၼ်းမႃး သင်ဢမ်ႇလႆႈၸိုင် တေၸႂ်ႉလၢႆး Mobile ၶၢႆႉတီႈသေ ၸတ်းၵႂႃႇ” ဝႃႈၼႆ။

ဝၼ်းသုၼ်ႇလႆႈၵူၼ်း ၸၢတ်ႈၸိုင်ႈလုမ်ႈၾႃႉ ဢၼ်တေၸတ်းႁဵတ်း တီႈဝဵင်းတူၼ်ႈတီးၼႆႉ တွၼ်ႈတႃႇ ၵူၼ်းၼုမ်ႇ ၵူၼ်းမိူင်း၊ လွင်ႈပိုၼ်းပဵၼ်မႃး ဝၼ်းသုၼ်ႇလႆႈၵူၼ်း၊ ပၢင်ပၼ်ပိုၼ်ႉႁူႉလွင်ႈသုၼ်ႇလႆႈၵူၼ်း၊ ထၢမ်တွပ်ႇၵၼ်၊ ပၢင် ႁွင်ႉၽဵင်းၵႂၢမ်း လႄႈ သၢႆၼႄ ပၼ်ပိုၼ်ႉႁူႉ ၵဵဝ်ႇၵပ်းလွင်ႈသုၼ်ႇလႆႈၵူၼ်း ၸိူဝ်းၼႆႉ။