ၸွမ်းၼင်ႇၵူၼ်းမိူင်းပွင်ႇၶၢဝ်ႇသေ ၸဝ်ႈၼႃႈတီႈပလိၵ်ႈဝဵင်းလူင်တူၼ်ႈတီး ၵူႈမၢၵ်ႇဢၼ်ႁၢင်ႈၵၢင်ဝႆႉ ၼႂ်းၵၢင်ဝဵင်းလူင်တူၼ်ႈတီးလႆလုၵ်ႈၼိုင်ႈ၊ ၵူၼ်းမိူင်းတူၵ်းၸႂ်တိုၼ်ႇသၢၼ်ႈၵူဝ်ႁေ၊ ပၢင်ပွႆးလိူၼ်သိပ်းသွင်ပေႃးဢမ်ႇၵိုၼ်းလႆႈ။
မၢၵ်ႈၼၼ်ႉမီးၵူၼ်းသႂ်ႇထူင်ပႃးသီလမ်မႃးႁၢင်ႈၵၢင်ဝႆႉၼႃႈၵၢတ်ႇလူင်တူၼ်ႈတီး မိူဝ်ႈဝၼ်းတီႈ16/11/2018 ၶၢဝ်းယၢမ်းဝၢႆးဝၼ်း 2 မူင်း ။ ၸဝ်ႈၼႃႈတီႈပလိၵ်ႈဝဵင်းလူင်တူၼ်ႈတီး ယႃႉမၢၵ်ႇၼၼ်ႉတႅၵ်ႇၵႂႃႇၶၢဝ်းယၢမ်းဝၢႆးဝၼ်း 3 မူင်း ။
ယိင်းဢုမ်ႈမူၺ် ၽူႈသိုဝ်ႇၶၢဝ်ႇ ၸုမ်းၶၢဝ်ႇၽူႈတွႆႇႁွၵ်ႈ ဢၼ်ႁွတ်းၽႅဝ်ၼႂ်းပိုၼ်ႉတီႈလၢတ်ႈၼႄဝႃႈ – “ ပလိၵ်ႈၶဝ်ပိၵ်ႉတၢင်း သေယႃႉမၢၵ်ႇၼၼ်ႉတႅၵ်ႇ။ လိူဝ်သေတီႈၼႃႈၵၢတ်ႇလူင်ယဝ်ႉ တီႈၼႂ်းႁၢင်ႉ Ocean super market (City Square) ၵေႃႈထူပ်း ႁၼ်ထႅင်ႈထူင်ႇဢၼ်လႅပ်ႈပဵၼ်မၢၵ်ႇထႅင်ႈ 2 လုၵ်ႈ ၸဝ်ႈၼႃႈတီႈၵူတ်ႇထတ်းယဝ်ႉလႆႈႁူႉဝႃႈဢမ်ႇၸႂ်ႈမၢၵ်ႇ။ ၵူၼ်းဝၢၼ်ႈၵူၼ်းမိူင်း တူၵ်းၸႂ် တိုၼ်ႇသၢၼ်ၵူဝ် ႁႄ ။ ပၢင်ပွႆးႁူင်းၾႆးမိၼ်ၶမ်ႈၼႆႉ ၵူၼ်းပေႃးဢမ်ႇၵိုၼ်းလႆႈ” ဝႃႈၼႆ။
မၢၵ်ႇဢၼ်မႃးႁၢင်ႈၵၢင်ပွၵ်ႈၼႆႉ ပဵၼ်ၶွင်ၸုမ်းလႂ် ၼမ်ႉမိုဝ်းၽႂ်ဢၼ်ဝႃႈၼၼ်ႉပႆႇႁူႉ ယူႇတီႈပလိၵ်ႈ ၶဝ်တိုၵ်ႉၵူတ်ႇထတ်းတူၺ်းယူႇ ။ မၢၵ်ႇတႅၵ်ႇပွၵ်ႈၼႆႉဢမ်ႇမီး ၵူၼ်း မၢတ်ႇၸဵပ်း လူႉတၢႆ။
ယၢမ်းလဵဝ်တီႈဝဵင်းလူင်တူၼ်ႈတီးၼႆႉ မီးပၢင်ပွႆးလိူၼ် 12 မူၼ်း ဢၼ်တေၸတ်းႁဵတ်း တႃႇ 10 ဝၼ်း။ တႄႇဢဝ် ဝၼ်းတီႈ 14-23/11/2018။ ပီၼႆႉ ႁူင်း ၾႆးမိၼ် ၶဝ်ႈၶေႉၵၼ် တင်းမူတ်း မီး 410 လုၵ်ႈ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ