ၸုမ်းဢူၺ်းလီပွတ်းႁွင်ႇတင်း ၸုမ်းသိုၵ်းRCSS ၶဵင်ႈၶႅင်ၵၢၼ်သိုၵ်းတေႃႇၵၼ်လႄႈ ၵူၼ်းဝၢၼ်ႈ ဢီႇၼၢႆးႁဵင်ပၢႆ ၸိူဝ်းပၢႆႈၽေးသိုၵ်း ထိုင်ဝိႁၢရ်မၢၼ်ႈသူႈ ဝဵင်းလႃႈသဵဝ်ႈ ၼၼ်ႉ မိူဝ်ႈၼႆႉ ပွၵ်ႈၶိုၼ်းႁိူၼ်းယေး မူႇဝၢၼ်ႈၸဝ်ႈၵဝ်ႇၶိုၼ်း မွၵ်ႈ 200 ၵေႃႉ။
ဝၼ်းတီႈ 01/11/2018 ယၢမ်းႁူဝ်ၶမ်ႈ 6 မူင်းပၢႆၼႆႉ ၵူၼ်းဝၢၼ်ႈဢီႇၼၢႆး တင်း ဝၢၼ်ႈၼႃးႁႃႈ ၼႂ်းဢိူင်ႇဢီႇၼၢႆး ၸိူဝ်းလႆႈပၢႆႈၽေးသိုၵ်းမႃးသွၼ်ႈယူႇတီႈဝတ်ႉဝိႁၢရ်လူင် မၢၼ်ႈသူႈ ၵၢင်ဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ၼၼ်ႉ ယွၼ်ႉငဝ်းလၢႆးၼႂ်းပိုၼ်ႉတီႈ ယဵၼ်ႈၵႂႃႇၽွင်ႈ၊ ၸုမ်းဢူၺ်းလီပွတ်းႁွင်ႇ တင်း သိုၵ်း RCSS ဢမ်ႇပဵၼ်ပၢင်တိုၵ်းၵၼ် ၊ ၾၢႆႇၼိုင်ႈမႆႈၸႂ် ၵၢၼ်ၵဵပ်းမၢၵ်ႇၶဝ်ႈတဝ်ႈၼမ်ႉ လႄႈ ႁူဝ်ၵူၼ်း မွၵ်ႈ 200 ၵေႃႉ ဢွၼ်ၵၼ်ပွၵ်ႈမိူဝ်းၶိုၼ်းၵမ်ႈၽွင်ႈ ယဝ်ႉ ဝႃႈၼႆ။
ၼၢႆးယွတ်ႈ ၵူၼ်းပၢႆႈၽေးသိုၵ်း ဝၢၼ်ႈၼႃးႁႃႈ လၢတ်ႈတီႈၽူႈတွႆႇႁွၵ်ႈဝႃႈ “ ငဝ်းလၢႆးလီယဝ်ႉၼႆၶႃႈဝႃႇ။ ႁဝ်းၶႃႈ ၶႂ်ႈပွၵ်ႈ မိူဝ်းၼႃႇၶႃႈယဝ်ႉ။ တီႈတင်းႁိူၼ်းႁဝ်းၶႃႈၵေႃႈ မီးလုၵ်ႈၸၢႆးၵေႃႉလဵဝ်ၵူၺ်းပႂ်ႉႁိူၼ်းဝႆႉ။ မၢင်ၸိူဝ်းၵေႃႈ ၶႂ်ႈမိူဝ်းၼႃႇ ၶႃႈယဝ်ႉ။ မႆႈၸႂ်သူၼ်ႁႆႈၼႃး ၶႃႈဢေႃႈ။ လိူဝ်ၼၼ်ႉၵေႃႈ မႆႈၸႂ်ၶူဝ်းႁေႃၶူဝ်းႁိူၼ်း ပႃးၸဵမ်ဝူဝ်းၵႂၢႆးဢေႃႈ။ ယွၼ်းၵၼ်ႇတေႃးဝႆႈသႃထိုင် ငိၼ်းၸူမ်းၶွပ်ႇၸႂ်ထိုင် ၸဝ်ႈသြႃႇလူင်ႁဝ်းၶႃႈ ၵျွင်းမၢၼ်ႈသူႈ တီႈဢၼ်လႆႈတူၺ်းထိုင် လဵင်ႉ လူႁဝ်းၶႃႈ ဢၼ်လႆႈမႃးပိုင်ႈယူႇသဝ်းတီႈဝတ်ႉမၢၼ်ႈသူႈၼႆႉမႃး” ဝႃႈၼႆ။
မိူဝ်ႈဝၼ်းတီႈ 29/10/2018 ၼၼ်ႉ သိုၵ်းဢူၺ်းလီပွတ်းႁွင်ႇ တင်း သိုၵ်း RCSS ၶဵင်ႈၶႅင်ၵၢၼ်သိုၵ်းၵၼ် တၢင်းပွတ်း ဢိူင်ႇဢီႇၼၢႆး ၸႄႈဝဵင်းလႃႈသဵဝ်ႈၼၼ်ႉ ၵူၼ်းမိူင်း ဢွၼ်ၵၼ်ပၢႆႈဢွၵ်ႇမႃး ယွၼ်ႉၵူဝ်ပဵၼ်ပၢင်တိုၵ်းၵၼ်။ ႁူဝ်ၵူၼ်း ဢၼ်ပၢႆႈမႃးသွၼ်ႈဝႆႉတီႈ ဝတ်ႉမၢၼ်ႈသူႈၼႆႉ တင်းမူတ်း မီး 1,131 ၵေႃႉ ဝႃႈၼႆ။
ၵူၼ်းဝၢၼ်ႈဢၼ်ပၢႆႈမႃးသွၼ်ႈဝႆႉတီႈဝတ်ႉမၢၼ်ႈသူႈသမ်ႉ ပဵၼ်ၵူၼ်းဝၢၼ်ႈပၢင်ႁုင်း၊ ဝၢၼ်ႈပဵင်း၊ ဝၢၼ်ႈၼႃးႁႃႈ၊ ဝၢၼ်ႈ 13 လၵ်းလႄႈ ဝၢၼ်ႈ 15 လၵ်း ၼႂ်းဢိူင်ႇဢီႇၼၢႆး ၸႄႈဝဵင်းလႃႈသဵဝ်ႈ။ ၵူၼ်းဝၢၼ်ႈမိူင်းတွင် ဢိူင်ႇၼႃးသၢႆး ၸႄႈဝဵင်း ၼမ်ႉတူႈ ၸဵမ်ၸိူဝ်းၼႆႉ၊ တၢင်းပွတ်းမိူင်းယဵၼ်သမ်ႉ ပၢႆႈၵႂႃႇတၢင်းဝဵင်းၼမ်ႉတူႈ၊ ၼၼ်ႉၵေႃႈႁူဝ်ၵူၼ်း ႁဵင်ပၢႆ ၼင်ႇၵဝ်ႇ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ