မိူဝ်ႈဝၼ်းတီႈ 22/6/2026 ယၢမ်းတၢမ်းၶမ်ႈ 4 မူင်း ဢူးတိၼ်ႇမွင်ႇသူၺ်ႇ ႁွင်ႈၵၢၼ်ၽွင်းလူင်ၾၢႆႇၼွၵ်ႈမိူင်း မိူင်းႁူမ်ႈတုမ် ႁူပ်ႉထူပ်းၸွမ်း H.E. Mr. Indra Mani Pandey ၽူႈၼမ်းၼႂ်းသုင်သုတ်း ၸုမ်းပၢႆးပၺ်ႇၺႃႇ လႄႈ ပၢႆးမၢၵ်ႈမီး ဢၢဝ်ႇၿင်းၵလႃး (ၵူတ်ႉၼမ်ႉပၢင်ႇလၢႆႇ ၿင်းၵလႃး) BIMSTEC တီႈဝဵင်းလူင်ၼေႇပျီႇတေႃႇ ။
ၽွင်းတူဝ်တႅၼ်း လူင်ပွင်ၸိုင်ႈသိုၵ်းမၢၼ်ႈယိုတ်းမိူင်း တင်း ၽူႈၼမ်းၼႂ်း ၸုမ်းပၢႆးပၺ်ႇၺႃႇ လႄႈ ပၢႆးမၢၵ်ႈမီး ဢၢဝ်ႇၿင်းၵလႃး ႁူပ်ႉၵၼ်ၼၼ်ႉ လႆႈဢုပ်ႇဢူဝ်းၵၼ်ၵႂႃႇ လွင်ႈၵၢၼ်ႁပ်ႉပဵၼ် ၽူႈၼမ်းၼႂ်း မုၵ်ႉၸုမ်း လႄႈ ၽႅၼ်ၵၢၼ်ႁၢင်ႈႁႅၼ်း တႃႇၸတ်းပၢင် ၶွပ်ႈတဵမ် 30 ပီ ၵၢၼ်ၵေႃႇတင်ႈ BIMSTEC ၼႂ်းဝၼ်းတီႈ 6/6/2027။
မိူဝ်ႈပၢင်ၵုမ်လူင် လွင်ႈႁူမ်ႈမိုဝ်း ပၢႆးပၺ်ႇၺႃႇ လႄႈ ပၢႆးမၢၵ်ႈမီး ဢၢဝ်ႇၿင်းၵလႃး ဢၼ်လူင်ပွင်ၸိုင်ႈမိူင်းထႆး ႁပ်ႉႁဵတ်းပဵၼ်ၸဝ်ႈႁိူၼ်းၼၼ်ႉၵေႃႈ ၾၢႆႇသိုၵ်းမၢၼ်ႈ ယၢမ်ႈၶဝ်ႈႁူမ်ႈပၢင်ၵုမ်ၸွမ်း။ ၼွၵ်ႈလိူဝ်မိူင်းမၢၼ်ႈယဝ်ႉ မီးမိူင်းၿင်းၵလႃးတဵတ်ႉၶျ်၊ ဢိၼ်ႊတီႊယိူဝ်ႊ၊ ၼီႊပေႃႊ၊ သီလင်းၵႃ ၸိူဝ်းၼႆႉၵေႃႈ ပဵၼ်ဝႆႉလုၵ်ႈၸုမ်း BIMSTEC ပႃး ဝႃႈၼႆ။
ၸုမ်းပၢႆးပၺ်ႇၺႃႇ လႄႈ ပၢႆးမၢၵ်ႈမီး ဢၢဝ်ႇၿင်းၵလႃး (ၵူတ်ႉၼမ်ႉပၢင်ႇလၢႆႇ ၿင်းၵလႃး) BIMSTEC ၼႆႉ ၵေႃႇတင်ႈၶိုၼ်ႈမႃးမိူဝ်ႈ 1997ၼၼ်ႉသေ ယိူင်းဢၢၼ်းတႃႇႁူမ်ႈမိုဝ်းၵၼ် ႁဵတ်းသၢင်ႈ ႁႂ်ႈၵၢၼ်ပၢႆးမၢၵ်ႈမီး ၵူႈၸိုင်ႈမိူင်း ၸိူဝ်းပဵၼ်လုၵ်ႈၸုမ်း ၶိုၼ်ႈယႂ်ႇၶိုတ်းၸၼ်ႉ။ ယၢမ်းလဵဝ် ၶၵ်ႉၵၢၼ်ဢၼ်လုၵ်ႈၸုမ်း BIMSTEC ႁူမ်ႈၵၼ်ႁဵတ်းသၢင်ႈဝႆႉၼၼ်ႉ မီးယူႇ 7 ဢၼ် ၾၢႆႇမိူင်းမၢၼ်ႈ လႆႈႁပ်ႉပုၼ်ႈၽွၼ်း ၼမ်းႁဵတ်းၵႂႃႇ ၶၵ်ႉၵၢၼ် ၵဵဝ်ႇလူၺ်ႈ ၵၢၼ်ၽုၵ်ႇသွမ်ႈ လႄႈ ၶူဝ်းၶွင်ၵိၼ်ယႅမ်ႉပဵင်းပေႃး ယူႇ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ