ဝၼ်းတီႈ 17 လိူၼ်ၵျုၼ်ႊ (မိူဝ်ႈဝႃး)ၼႆႉ ၽူႈဢွၼ်ႁူဝ်လၢႆၸိုင်ႈမိူင်း ဢွၼ်ၵၼ်ႁွတ်ႈထိုင်ၵႂႃႇ တီႈဝဵင်း ၵႃႊၸၼ်ႊ (Kazan) မိူင်းရတ်ႉသျႃး တႃႇၶဝ်ႈႁူမ်ႈၶဝ်ႈႁူမ်ႈ ၾူဝ်ႊရမ်ႊရတ်ႉသျႃး – ဢႃႊသီႊယၼ်ႊ ဢၼ် ရတ်ႉသျႃး ႁပ်ႉပဵၼ်ၸဝ်ႈႁိူၼ်းသေ ၸတ်းႁဵတ်း ဝႃႈၼႆ။

ၼႂ်းၼၼ်ႉပႃး ၶုၼ်ႁေႃၶမ်း မိူင်းပရူႊၼၢႆး ၊ ၸွမ်ၸိုင်ႈမိူင်း ၾိလိပ်ႉပိၼ်ႊသ်၊ ၸွမ်ၽွင်းလူင် မိူင်းမလေႊသျႃႊ၊ မိူင်းထႆး၊ မိူင်းသိင်ႊၵပူႊ၊ မိူင်းဝႅတ်ႊၼၢမ်ႊ လႄႈ ၸွမ်ၽွင်းလူင် မိူင်းတီႊမေႃႊ လၢတ်ႉသတေႉ ၸိူဝ်းၼႆႉ။

ၼႂ်းဝၼ်းတီႈ 17 ၼၼ်ႉ ၸွမ်ၸိုင်ႈမိူင်းရတ်ႉသျႃး ဝလႃႊတီႊမႃႊပူႊတိၼ်ႊ တင်း ၸွမ်ၸိုင်ႈမိူင်းၾိလိပ်ႉပိၼ်ႊသ် လႆႈဢုပ်ႇၵုမ်ၵၼ်ၵႂႃႇ။ ၸွမ်ၸိုင်ႈမိူင်းၾိလိပ်ႉပိၼ်ႊသ် လႆႈမွၵ်ႇႁွင်ႉဝႆႉ ႁႂ်ႈၸွမ်ၸိုင်ႈရတ်ႉသျႃး ၶဝ်ႈ ႁူမ်ႈၸွမ်း ၼႂ်းပၢင်ၵုမ်ၽူႈဢွၼ်ႁူဝ်ၸုမ်းဢႃႊသီႊယၼ်ႊ ဢၼ်မိူင်းၾိလိပ်ႉပိၼ်ႊသ် တေႁပ်ႉပဵၼ်ၸဝ်ႈ ႁိူၼ်းသေ ၸတ်းႁဵတ်းၵႂႃႇတီႈဝဵင်းမၼီႊလႃႊ ၼႂ်းလိူၼ်ၼူဝ်ႊဝႅမ်ႊပိူဝ်ႊ တေထိုင်ၼႆႉ ဝႃႈၼႆ။

ၸွမ်ၸိုင်ႈရတ်ႉသျႃး လၢတ်ႈဝႃႈ ၼႂ်းပီ 2025 ၼၼ်ႉ လွင်ႈၵပ်းသိုပ်ႇၵႃႉၶၢႆၵႄႈၵၢင် ရတ်ႉသျႃး တင်း ၾိလိပ်ႉပိၼ်ႊသ် မီး 500 လၢၼ်ႉ ဢမေႊရိၵၼ်ႊတေႃႇလႃႇ ဝႃႈၼႆ။

ၾူဝ်ႊရမ်ႊ ရတ်ႉသျႃး – ဢႃႊသီႊယၼ်ႊၼႆႉ တေၸတ်းႁဵတ်းတေႃႇထိုင် ဝၼ်းတီႈ 19 လိူၼ်ၵျုၼ်ႊ တီႈဝဵင်းၵႃႊသၼ်ႊ ၼႂ်းမိူင်းရတ်ႉသျႃးပွတ်းၵၢင်၊ ယၢၼ်ၵႆၵၼ်တၢင်း ငဝ်ႈၸိုင်ႈဝဵင်းလူင် မေႃႊသၵူဝ်ႊ မွၵ်ႈ 800 ၵီႊလူဝ်ႊမီႊတိူဝ်ႊ။ ပဵၼ်ပၢင်ၾူဝ်ႊရမ်ႊၸၼ်ႉသုင် ဢၼ်ၸတ်းႁဵတ်းပွၵ်ႈၵမ်းႁႅၵ်ႈ ၼႆယဝ်ႉ။

ၾူဝ်ႊရမ်ႊ ရတ်ႉသျႃး – ဢႃႊသီႊယၼ်ႊၼႆႉ ယိူင်းဢၢၼ်းၼင်ႇႁိုဝ် ၵၢၼ်မိူင်း၊ ၵၢၼ်ပၢႆးမၢၵ်ႈမီး လႄႈ ၵၢၼ်ငၢၼ်းၸိူဝ်းႁူမ်ႈၵၼ်ႁဵတ်းသၢင်ႈၵႄႈၵၢင် ရတ်ႉသျႃး တင်း ၸုမ်းဢႃႊသီႊယၼ်ႊ တေမီးလွင်ႈ မၼ်ႈၵိုမ်းၼႅၼ်ႈၼႃမႃး ဝႃႈၼႆ။

တီႈၼႂ်းပၢင်ၾူဝ်ႊရမ်ႊၼၼ်ႉ လိူဝ်သေၽူႈဢွၼ်ႁူဝ် မိူင်းမလေးသျႃး၊ ၵမ်ႊပေႃႊတီႊယိူဝ်ႊ၊ မိူင်းထႆး၊ ပရူႊၼၢႆး၊ ဝႅတ်ႉၼမ်း လႄႈ သိင်ႊၵပူႊယဝ်ႉ မိူၼ်ၼင်ႇ ၽွင်းလူင်ၾၢႆႇၼွၵ်ႈမိူင်း ဢိၼ်ႊတူဝ်ႊၼီးသျႃး၊ ၽူႈမီးၸၼ်ႉသုင် မိူင်း UAE ၊ ၵႃႊၸႅတ်ႉသတၼ်ႊ၊ ၵႃႊၵျိတ်ႊသတၼ်ႊ ၸိူဝ်းၼႆႉၵေႃႈ ၶဝ်ႈႁူမ်ႈၶိုၼ်ႈ ႁွတ်ႈၸွမ်း ၼႆယဝ်ႉ။