ၵၢတ်ႇၵၢင်ၶမ်ႈ တီႈပွၵ်ႉတပိၼ်ႇသူၺ်ႇထီး ႁိမ်းႁေႃသဝ်ယၢမ်းမူင်း (နာရီစင်) တၢင်းၼႃႈ ဢူဝ်းသျိၼ်း – City Square Shopping Centre ဢၼ်မီးၵၢင်ဝဵင်းတူၼ်ႈတီး ၸိုင်ႈတႆးပွတ်းၸၢၼ်းၼၼ်ႉ ၸဝ်ႈႁၢၼ်ႉၶၢႆတၢင်းၵိၼ် လႆႈၶၢႆႉပၼ်ဢွင်ႈတီႈၶၢႆၵၢတ်ႇ ။
ၸဝ်ႈႁၢၼ်ႉၶၢႆၵၢတ်ႇၵၢင်ၶမ်ႈ လႆႈၶၢႆႉဢွၵ်ႇပၼ်ဢွင်ႈတီႈ ၼႂ်းဝၼ်းတီႈ 15/5/2026 သေ ထိုင်မႃးဝၼ်းတီႈ 17/5/2026 တႄႇယႃႉၵၢတ်ႇၵႂႃႇ ဝႃႈၼႆ ။
ယၢမ်းလဵဝ် ၾၢႆႇတၢင်းၽူႈမီးပုၼ်ႈၽွၼ်းၶဝ် သၢင်ႈပၼ်ဢွင်ႈတီႈမႂ်ႇသေ ၸႂ်ႉၵူၼ်းၶၢႆၵၢတ်ႇၵၢင်ၶမ်ႈၶၢႆႉၵႂႃႇ တၢင်းၾၢႆႇႁွင်ႇၵၢတ်ႇမဵဝ်ႉမ ၊ သဵၼ်ႈတၢင်း ၵူၼ်းၵႃႉ (ကုန်သည်လမ်း) ။ ယၢမ်းလဵဝ် ၸဝ်ႈႁၢၼ်ႉတင်းသဵင်ႈ ယၢပ်ႇၵိၼ်း ဢမ်ႇမီးဢွင်ႈတီႈၶၢႆ – ဝႃႈၼႆ ။
ၼၢင်းယိင်းၵူၼ်းဝဵင်းတူၼ်ႈတီးလၢတ်ႈၽူႈတွႆႇႁွၵ်ႈဝႃႈ -“ၵၢတ်ႇၵဝ်ႇဢၼ်မီးၼႃႈ Ocean ၼၼ်ႉပိူၼ်ႈယႃႉမူတ်းယဝ်ႉ ၊ ၵၢတ်ႇမႂ်ႇဢၼ်ၶဝ်သၢင်ႈဝႆႉပၼ်ၼႆႉ ဢမ်ႇမီးႁွင်ႈႁၢၼ်ႉသင် လႆႈတမ်းတင်ႇသေၶၢႆၵူၺ်း ၊ တီႈမၼ်းၵေႃႈ ၵႅပ်ႈၼႃႇ ၊ တီႈၵိုတ်းရူတ်ႉၵေႃႈဢမ်ႇမီး ၊ ၵူၼ်းၶၢႆ ၵေႃႈဢမ်ႇၸႄးယဝ်ႉ ၊ ၵူၼ်းၵေႃႈဢမ်ႇၵိုၼ်း”- ဝႃႈၼႆ ။
လိူဝ်ၼၼ်ႉဢမ်ႇၵႃး ယွၼ်ႉပဵၼ်ဢွင်ႈတီႈမႂ်ႇ ဢမ်ႇမီးၵူၼ်းမႃးလႄႇသိုဝ်ႉၵၼ်လႄႈ ႁဵတ်းႁႂ်ႈၸဝ်ႈႁၢၼ်ႉ ဢမ်ႇလႆႈၶၢႆၶူဝ်း ။
ၵၢတ်ႇမႂ်ႇဢၼ်တိုၵ်ႉမႃးပိုတ်ႇၼႆႉ မီးၵူၼ်းၶၢႆ တၢင်းၵိၼ်တၢင်းယႅမ်ႉလႄႈၵုၼ်ႇၵူႈသႅၼ်းသႅၼ်း ၊ သိူဝ်ႈၽႃႈၸိူဝ်းၼႆႉသေ ယၢမ်းလဵဝ် မီးႁၢၼ်ႉတၢင်းၶၢႆ မွၵ်ႈ 40 ႁၢၼ်ႉၼႆႉ – ၵူၼ်းပိုၼ်ႉတီႈလၢတ်ႈၼင်ႇၼႆ ။
လႆႈႁူႉဝႃႈ – ၵၢတ်ႇၵဝ်ႇဢၼ်မီးႁိမ်းႁေႃသဝ်ယၢမ်းမူင်းၼၼ်ႉ ယူႇတီႈႁွင်ႈၵၢၼ်ၾၢႆႇလိူမ်ႈလႆႇလႄႈ ၶွမ်ႊပၼီႊ (သီဟဖွံ့ဖြိုးတိုးတက်ရေးကုမ္ပဏီ )ၸတ်းႁဵတ်းပၢင်လူင်းလၢႆးမိုဝ်း တူၵ်းလူင်းၵၼ် တႃႇၵေႃႇသၢင်ႈ ႁိူၼ်းတိုၵ်း လႄႈ ဢွင်ႈတီႈၵိုတ်းရူတ်ႉၵႃး ။ တေသုင် 7 ၸၼ်ႉ လႆႈႁူႉၼင်ႇၼႆ။
တီႈဝဵင်းတူၼ်ႈတီးၼႆႉ ယၢမ်းလဵဝ် မီးၵၢတ်ႇၵၢင်ၶမ်ႈဝႆႉ 3 တီႈ ။ ပဵၼ်တီႈၵၢတ်ႇမဵဝ်ႉမ( ႁိမ်းႁေႃသဝ်ယၢမ်းမူင်း ) ၊ ၵၢတ်ႇၵၢင်ၶမ်ႈ တၢင်းၼႃႈ ႁူင်းႁဵၼ်းၸၼ်ႉသုင်မၢႆ 3 လႄႈ ၵၢတ်ႇမႂ်ႇဢၼ်တိုၵ်ႉပိုတ်ႇဝႆႉတင်းၼႃႈ ယေးငိုၼ်းၵမ်ႇပေႃးၸ ၼႆယဝ်ႉ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ