ၼႂ်းလုၵ်ႈလိူၼ်မေႊ 2026 ၼႆႉ  သုၼ်ငဝ်ႈသၻႃႊလိင်ႉၶ် ႁႂ်ႈၵူၼ်းၸိူဝ်းၸႂ်ႉတိုဝ်းၶိူင်ႈသၻႃႊလိင်ၶ်ႉ ယိုၼ်ယၼ် ID တၢင်ႇမၢႆၾၢင်ႁႂ်ႈတႅတ်ႈတေႃးၼႆယူႇ ။ လွင်ႈၼႆႉႁဵတ်းႁႂ်ႈတုမ်ႉယွၼ်ႈထိုင် ၵူၼ်းၸိူဝ်း ၸႂ်ႉသတႃႊလိင်ႉၶ်သေဢမ်ႇၶႂ်ႈဢွၵ်ႇၸိုဝ်ႈဢွၵ်ႇသဵင် ၸိူဝ်းၼၼ်ႉပႃး

ဝၢႆးသေ သိုၵ်းမၢၼ်ႈယိုတ်းမိူင်း မိူဝ်ႈ 2021 ၼၼ်ႉသေ မိူင်းႁူမ်ႈတုမ်မၢၼ်ႈပတ်းပိုၼ်ႉ ဢမ်ႇထၢင်ႇႁၢင်ႈၸႂ်ႉလႆႈ ဢိၼ်ႊထိူဝ်ႊၼႅတ်ႉ ။ ဢမ်ႇတူၺ်းၶၢဝ်ႇငၢဝ်း ဢမ်ႇၸၢင်ႈၵပ်းသိုပ်ႇၵၼ်လႆႈလွတ်ႈလႅဝ်းထၢင်ႇႁၢင်ႈ ။ ၸင်ႇၼၼ်လႄႈ ၵူၼ်းၸိူဝ်းလူဝ်ႇၸႂ်ႉတိုဝ်းတႃႇၶေႃႈမုလ်းၶၢဝ်ႇသၢၼ်ၸိူဝ်းၼႆႉ ဢွၼ်ၵၼ် သင်ႇသိုဝ်ႉၸႂ်ႉ ၶိူင်ႈ သၻႃႊလိင်ႉၶ် ၼႆႉမႃး  ။

သၻႃႊလိင်ႉၶ် ဢၼ်ဝႃႈ ၼႆႉ  ပဵၼ်ၶိူင်ႈဢၼ် ၸၼ်ဢဝ် ႁႅင်းဢိၼ်ႊထိူဝ်ႊၼႅတ်ႉ တီႈလၢဝ်ထဵမ်းသေ ၸႂ်ႉတိုဝ်းတႃႇၵပ်းသိုပ်ႇၵပ်းသၢၼ်ၵၼ်လႆႈၵူႈယွမ်ႇ လူၺ်ႈဢမ်ႇလူဝ်ႇၸၼ်ၸႂ်ႉတီႈလၵ်းဢိၼ်ႊထိူဝ်ႊၼႅတ်ႉၼိူဝ်လိၼ်မိူင်း။

သၻႃးလိင်ႉၶ်ၼႆႉ ၶဝ်ႈတၢင်းတိုဝ်းတႃႇၸုမ်းလုၵ်ႉၽိုၼ်ႉၽွင်းသိုၵ်းမၢၼ်ႈယိုတ်းမိူင်းတႄႉတႄႉဝႃႈဝႃႈ ။ ၶဝ်ႈတၢင်းတိုဝ်းသေတႃႉ သမ်ႉလႆႈမႆႈၸႂ်ယူႇလၢႆလွင်ႈ ၼိုင်ႈၵေႃႈ ၵူဝ်တပ်ႉသိုၵ်းမၢၼ်ႈ ထတ်းထွင်ႁူႉလႆႈတီႈယူႇသဝ်းၸုမ်းလုၵ်ႉၽိုၼ်ႉတႅတ်ႈတေႃး ၊ သွင်ၵေႃႈ ၾၢႆႇသိုၵ်းမၢၼ်ႈၵေႃႈ ၸၢင်ႈၸႂ်ႉၶိုၼ်းသၻႃႊလိင်ႉၶ်သေ ႁဵတ်းၶဵၼ်တေႃႇၶိုၼ်း ၼႆၸိူဝ်းၼႆႉ ။

ဝၢႆးၼၼ်ႉ NUG ၸင်ႇဢွၵ်ႇမႃး ပိူင်ၸႂ်ႉသၻႃးလိင်ႉၶ်ၵမ်းၼိုင်ႈ ။ ယွၼ်ႉဝႃႈ သိုၵ်းမၢၼ်ႈ ၵႆႉသွၵ်ႈႁႃ ဢွင်ႈတီႈဢၼ်ၸုမ်းလုၵ်ႉၽိုၼ်ႉၸႂ်ႉသၻႃႊလိင်ႉၶ်သေ ပွႆႇမၢၵ်ႇသႂ်ႇ ။

မိူဝ်ႈ 2024 ၼၼ်ႉ NUG ၊ သိုၵ်းၵဝ်ႈၵၢင်ႉ MNDAA ၊ သိုၵ်းလွႆတဢၢင်း TNLA လႄႈ သိုၵ်းရၶၢႆႇ AA ၸိူဝ်းၼႆႉ တႃႇႁူမ်ႇလူမ်ႈဢၢႆႊထီႊၼႆသေ ယၢမ်ႈတတ်းမၵ်း လွင်ႈၸႂ်ႉတိုဝ်းဢိၼ်ႊထိူဝ်ႊၼႅတ်ႉ လႄႈ သၼ်ႊယႃႊၾူၼ်ႊ ၸိူဝ်းၼႆႉ ၼႆ Myanmar Internet Project  ယၢမ်ႈႁၢႆးငၢၼ်းဝႆႉၼင်ႇၼႆ။

ၽွင်းၼၼ်ႉ သင်ပဵၼ် ၼႂ်းဢွင်ႈတီႈ ဢၼ် NUG ၵုမ်းၸိုင် ၽႂ်ၸႂ်ႉၶိူင်ႈသၻႃႊလိင်ႉၶ်သေ ပိုတ်ႇၸႂ်ႉဢိၼ်ႊထိူဝ်ႊၼႅတ်ႉၵေႃႈ  တေလႆႈပၼ်ၵႃႈတၢင်ႇမၢႆၾၢင်မၼ်း 5 သႅၼ်ပျႃး ထိုင် 6 သႅၼ်ပျႃး ။ ၵူၺ်းၵႃႈ တေထတ်းထွင်လီလီသေ ၸင်ႇပၼ်ၸႂ်ႉ ၼႆ ႁွင်ႈၵၢၼ်ၾၢႆႇၵပ်းသိုပ်ႇၵပ်းသၢၼ် တႂ်ႈ NUG ယၢမ်ႈ ပိုၼ်ၽၢဝ်ႇဝႆႉၼင်ႇၼၼ်။

ယွၼ်ႉသိုၵ်းမၢၼ်ႈ ၵႆႉလမ်းၸွပ်ႇၸွမ်းသၢႆဢိၼ်ႊၼိူဝ်ႊၼႅတ်ႉသၻႃႊလိင်ႉၶ်ၼၼ်ႉသေ ပွႆႇမၢၵ်ႇသႂ်ႇလႄႈ ၵူၼ်းမိူင်းၸိူဝ်းဢမ်ႇၵဵဝ်ႇသင်ၸွမ်းၸုမ်းလုၵ်ႉၽိုၼ်ႉၵေႃႈ ၺႃးၸၢၵ်ႇမၼ်းၸွမ်း ။ ၵမ်ႈၼမ် တေပဵၼ်ပွတ်းတၢင်း ၸႄႈၵႅင်း မိူင်းမၢၼ်ႈပွတ်းၼိူဝ် ၸိူဝ်းၼႆႉ။

ၼႂ်းမိူင်းႁူမ်ႈတုမ်မၢၼ်ႈၼႆႉ လၵ်းလၵ်းတႄႉၵေႃႈ ၵမ်ႈၼမ် ဢမ်ႇလႆႈၸႂ်ႉဢိၼ်ႊထိူဝ်ႊၼႅတ်ႉလွတ်ႈလႅဝ်းလႄႈၸႂ်ႉသၻႃႊလိင်ႉၶ်ၵူၺ်း ၼႆ ၽူႈတူင်ႉၼိုင်ၾၢႆႇဢၢႆႊထီႊတႆးၵေႃႉၼိုင်ႈလၢတ်ႈၼႄၼင်ႇၼႆ –

လၵ်းလၵ်းတႄႉ ယွၼ်ႉဢမ်ႇမီးဢိၼ်ႊထိူဝ်ႊၼႅတ်ႉလႄႈၸႂ်ႉၵူၺ်း ။ သၻႃႊလိင်ႉၼႆႉဢမ်ႇၸႂ်ႈၵႃႈၶၼ်ထုၵ်ႇၶႃႈ ။ၵႃႈဝႆႉၼင်ႇၵဝ်ႇ ဢဝ်ငိုၼ်းမၢၼ်ႈဝႃႈ 50-60 သႅၼ်ၸိူဝ်းၼႆႉ ။ မိူဝ်ႈပူၼ်ႈမႃး 3 ပီၼႆႉ ပဵၼ် သႅၼ်ႁွမ်း 200-300 သႅၼ်လူးၵွၼ်ႇ ။ တီႈတႄႉမၼ်း ၶၼ်သၻႃႊလိင်ႉၶ် မၼ်းဢမ်ႇလႆႈၵႃႈပဵင်းၼၼ်ႉ ပိူၼ်ႈႁဵတ်းၵိၼ်ၼႂ်းၵႄႈမၼ်းၵူၺ်း
ၼႂ်းႁူဝ်လိူၼ်မေႊ 2026 ၼႆႉ ၵဝ်ႉငဝ်ႈသၻႃႊလိင်ႉၶ် ၸင်ႇယုၵ်ႉမုၼ်းပိူင်မႂ်ႇထႅင်ႈဝႃႈ ႁႂ်ႈသႂ်ႇပၼ် ID – သၻႃႊလိင်ႉၶ် ဢၼ်ထုၵ်ႇမႅၼ်ႈ ။ ဢၼ်တႄႇထတ်းထွင်တႄႉ ပဵၼ်မိူင်းၵၼ်ႊၺႃႊ မိူဝ်ႈႁၢင်ႈလိူၼ်ဢေႊပရိူဝ်ႊလ် ၼႆႉ ၽႂ်ဢမ်ႇသႂ်ႇပၼ် သဵၼ်ႈမၢႆ ID ႁႂ်ႈထုၵ်ႇမႅၼ်ႈၵေႃႈ တေႃႇထိုင် ဝၼ်းတီႈ 30 ဢေႊပရိူဝ်ႊလ်ၼၼ်ႉ တေပိၵ်ႉဢိုတ်းပႅတ်ႈဝႃႈၼႆဝႆႉ။

ထိုင်မႃး လိူၼ်မေႊ ဝၼ်းတီႈ 8 ၼႆႉ ငဝ်ႈသၻႃႊလိင်ႉၶ် ၸင်ႇသူင်ႇၶေႃႈၵႂၢမ်းၸူးၵူၼ်းၸိူဝ်းၸႂ်ႉသၻႃႊလိင်ႉၶ် ဝႃႈ “Travel Registration” ၼႆသေ ႁႂ်ႈၵူၼ်းၸိူဝ်းသိုဝ်ႉၸႂ်ႉသၻႃးလိင်ႉၶ်ၸိူဝ်းၼႆႉ တၢင်ႇမၢႆၾၢင် ၸွမ်းၼင်ႇပိူင်တမ်းဝႆႉ။
ပိူင်လူင် ၵူၼ်းၸိူဝ်းဢၼ်လႆႈသိုဝ်ႉသၻႃႊလိင်ႉၶ် တၢင်ႇၸိုင်ႈမိူင်းမႃးၸႂ်ႉၼၼ်ႉ ႁႂ်ႈတၢင်ႇၼႄ Global id ။  တူဝ်ယၢင်ႇမၼ်း သင်ယူႇမိူင်းမၢၼ်ႈသေ သိုဝ်ႉၸႂ်ႉသၻႃႊလိင်ႉၶ်ၸိုင် ႁႂ်ႈဢဝ်ဝႂ်ၶၢမ်ႈမိူင်း ၽၢတ်ႉသပွတ်ႇသေ တၢင်ႇသဵၼ်ႈၸိုဝ်ႈ ။ ဝႃႈၼၼ်သေတႃႉ မိူင်းမၢၼ်ႈသမ်ႉ ပႆႇၸႂ်ႈမိူင်းဢၼ်ၸႂ်ႉသၻႃႊလိင်ႉၶ်လႆႈပဵၼ်တၢင်းၵၢၼ်လႄႈ ယၢပ်ႇယူႇလၢႆလွင်ႈ ။

သင်ဝႃႈ မီးလိၵ်ႈၶဝ်ႈမႃးပၼ်ၾၢင်ႉ ႁႂ်ႈသႂ်ႇပၼ် ID သၻႃႊလိင်ႉ  သင်ဝႃႈ လႆႈႁပ်ႉႁၼ်လိၵ်ႈယွၼ်း ID ယဝ်ႉလႄႈ ဢမ်ႇထႅမ်ပၼ်ၸိုင် ယူႇတီႈ ငဝ်ႈသၻႃႊလိင်ႉၶ်သေ တေၸၢင်ႈပိၵ်ႉဢိုတ်းပႅတ်ႈၶိူင်ႈလႂ်ၶိူင်ႈၼၼ်ႉယူႇ ၼႆ လိုဝ်းယူႇၼႂ်းၵႄႈၵူၼ်းၸႂ်ႉသၻႃႊလိင်ႉၶ်ဝႆႉယူႇယၢမ်းလဵဝ်။

ပိူင်လူင် ဢၼ်မီးပိူင်ယွၼ်း ID ၼႆႉမႃးၼႆႉ ၸၢင်ႈပဵၼ်ယွၼ်ႉ ၶႂ်ႈၵမ်ၵိၼ်းတေႃႇ ၸုမ်းၵျႃႊၽျႅၼ်ႉၸိူဝ်းၼႆႉ ။မၢင်ၸိူဝ်းၵူၼ်းၸႂ်ႉသၻႃႊလိင်ႉၶ် ထိုင်ၶၢဝ်းလူဝ်ႇၸၢႆႇငိုၼ်းၵေႃႈ ဢမ်ႇၸၢႆႇလႄႈ ၸင်ႇမီးပိူင်ၸိူဝ်းၼႆႉမႃး ။ ၵူၺ်းၵႃႈ တၢင်းယိူင်းဢၢၼ်းၸဝ်ႈၶွင်သၻႃႊလိင်ႉၶ်ၶႂ်ႈပဵၼ်သင်တႄႉၼႆၼၼ်ႉ ဢမ်ႇႁၼ်ပိုၼ်ၽၢဝ်ႇတႅတ်ႈတေႃး ၼႆ- ၽူႈတူင်ႉၼိုင်ၾၢႆႇဢၢႆႊထီႊတႆးၵေႃႉၼိုင်ႈလၢတ်ႈၼႄၼင်ႇၼႆ –
ၼႂ်းၵႄႈၼႆႉၵေႃႈ ၸုမ်းလွၵ်ႇလႅၼ်ငိုၼ်းၼိူဝ်ဢွၼ်ႊလၢႆႊ ၸုမ်းၵျႃႊၽျႅၼ်ႉၸိူဝ်းၼႆႉၵေႃႈ သမ်ႉၸႂ်ႉ သၻႃႊလိင်ႉၶ်ၸိူဝ်းၼႆႉႁဵတ်းၵၢၼ် ။ မိူၼ်ၸိူင်ႉတၢင်းမျႃႉဝတီႇၸိူဝ်းၼႆႉ ၸႂ်ႉသၻႃႊလိင်ႉၶ်လၢႆလၢႆယဝ်ႉ  ဢၼ်လၵ်ႉလႅၼ်ၵိၼ်ၸိူင်ႉၼႆ ။ မိူၼ်ၼင်ႇတၢင်ႇမိူင်းၵေႃႈၸႂ်ႉသၻႃႊလိင်ႉၶ် မိူၼ်ၼင်ႇၵမ်ပူႊၶျႃႊၶဝ် ၽီႊလပိၼ်ႊၶဝ်ၼႆၸိူဝ်းၼႆႉ ။

သိုပ်ႇလၢတ်ႈဝႃႈ – သၻႃႊလိင်ႉၶ်ၼႆႉ ပေႃးသိုဝ်ႉမႃးယဝ်ႉၼႆ ၸႂ်ႉလႆႈၵူႈတီႈ။ ၵူၺ်းၵႃႈ ဝႃႈ ပေႃးဢမ်ႇၸွမ်းပိူင်သၻႃႊလိင်ႉၶ်ၵေႃႈ ၸၢင်ႈၺႃးပိၵ်ႉတႄႉ ။ တေႃႈၼင်ႇ ပွတ်းတၢင်းမျႃႉဝတီႇၼႆႉ မိူဝ်ႈလဵဝ် သမ်ႉပေႃးၺႃးပိၵ်ႉယဝ်ႉ ။ ပေႃး IP မၼ်းၼႄဝႃႈ ၸႂ်ႉၼႂ်းမျႃႉဝတီႇၼႆ ငဝ်ႈသၻႃႊလိင်ႉၶ် တတ်းပႅတ်ႈၵမ်းလဵဝ်ယဝ်ႉ ဝႃႈၼႆ။

မိူင်းႁူမ်ႈတုမ်မၢၼ်ႈၼႆႉ ၸဵမ်မိူဝ်ႈသိုၵ်းယိုတ်းမိူင်းၼၼ်ႉသေ ဢွင်ႈတီႈၶၢတ်ႇဢိၼ်ႊထိူဝ်ႊၼႅတ်ႉၸိူဝ်းၼၼ်ႉ သိုဝ်ႉၸႂ်ႉသၻႃႊလိင်ႉၶ် လူၺ်ႈဢမ်ႇလူဝ်ႇတၢင်ႇမၢႆႁင်းၵူၺ်း ၊ ၵမ်ႈၼမ် ဢဝ်ၸိုဝ်ႈမၢႆၾၢင်တၢင်ႇၸိုင်ႈမိူင်းဢၼ်လႆႈဝႂ်ၶၢင်ႉမၼ်းသေ မႃးၸႂ်ႉမိူင်းႁူမ်ႈတုမ်မၢၼ်ႈ တႄႇၼႆႉၵႂႃႇတႄႉ ၽႂ်ၸႂ်ႉၵေႃႈ တေလႆႈဢဝ်သဵၼ်ႈၸိုဝ်ႈတႄႉသႂ်ႇၵူၺ်း ၼႆယူႇ ။

မိူဝ်ႈဢွၼ်တၢင်း တႄႉ ပေႃးသိုဝ်ႉၶိူင်ႈသၻႃႊလိင်ႉၶ် မႃးယဝ်ႉ ၵေႃႈ မႃးလူင်း Activate KIT Number မၼ်း သေ ၸၢႆႇငိုၼ်းလိူၼ်ယဝ်ႉ ၵေႃႈတႄႇ ၸႂ်ႉလႆႈၵမ်းလဵဝ် ။ ယၢမ်းလဵဝ်ၼႆႉ ၸိူဝ်းပဵၼ် Regional Philippines Japan and Argentina ၸိူဝ်းၼႆႉ ၶွမ်ႇမၼီႇသၻႃႊလိင်ႉၶ် ယွၼ်း ID ၵူႈၶိူင်ႈယဝ်ႉ မၢင်ၶိူင်ႈဢမ်ႇယွၼ်းယၢမ်းလဵဝ် ၵေႃႈ တေၸၢင်ႈယွၼ်းၶၢဝ်းၼႃႈ မၢင်ၶိူင်ႈမၼ်းယွၼ်းဢမ်ႇဢွၵ်ႇမႃးတီႈၼႃႈမၼ်းၵမ်းလဵဝ် တေလႆႈၵႂႃႇၼႂ်း Setting မၼ်း မၢင်ၶိူင်ႈသမ်ႉ သင်ၸႂ်ႉဢမ်ႇပႆႇမီး (2) လိူၼ်ဢမ်ႇပႆႇယွၼ်း ၵေႃႈ တေၸၢင်ႈမီး ၼႆ – ၽူႈၸႂ်ႉတိုဝ်ႉသၻႃႊလိင်ၶ်ႉ တႅမ်ႈတၢမ်ႇဝႆႉၼိူဝ်ၽဵတ်ႉသုၼ်ႇတူဝ်ဝႃႈၼႆ။

ၶိူင်ႈသၻႃႊလိင်ႉၶ်ၼႆႉ ၶူင်ႁဵတ်းဢွၵ်ႇမႃး တီႈ ၶွမ်ႊပၼီႊဢၼ်လဵပ်ႈႁဵၼ်းၵွင်းၵၢင်ႇၵၢင်ႁၢဝ် SpaceX  ၼၼ်ႉသေ ပဵၼ်ၵူၼ်းမၢၵ်ႈမီးၸၼ်ႉသုင်သုတ်းၼႂ်းလုမ်ႈၾႃႉ ဢီႊလွၼ်ႊမၵ်ႉသ် တႄႇဢွၵ်ႇၶေႃႈဝူၼ်ႉ ဢွၼ်ၶူင်သၢင်ႈ သၻႃးလိင်ႉၶ်ၼႆႉမႃး ။

ယိူင်းဢၢၼ်း ဢၼ်သၢင်ႈသၻႃႊလိင်ႉၶ်ၼႆႉ ဢီႊလွၼ်ႊမၵ်ႉသ် ယၢမ်ႈလၢတ်ႈဝႃႈ ႁႂ်ႈၵူႈတီႈၵူႈငွၼ်ႈၸႂ်ႉလႆႈ ဢိၼ်ႊထိူဝ်ႊၼႅတ်ႉ ၼႆၼၼ်ႉ ၸမ်တၢင်းယိူင်းဢၢၼ်းမႃးလွႆးလွႆး ၼႆယူႇ။ သၻႃးလိင်ႉၶ်ၼႆႉ ဢီႊလွၼ်ႊမၵ်ႉသ် ယၢမ်ႈ တႄႇ သိုပ်ႇမိုတ်ႇပၼ် မိူဝ်ႈပွႆးပိုတ်ႇႁူင်းၵၢၼ်လူင် Space X Satellite မိူဝ်ႈ 2015 လိူၼ်ၵျၼ်ႊၼိဝ်ႊရီႊ တီႈမိူင်း ဝေႃႊသျိၼ်ႊတၼ်ႊ ဝဵင်း Redmond  ၼႆယဝ်ႉ။

ထိုင်မႃး လိူၼ်ၾႅပ်ႊပိဝ်ႊရီႊ 2018 ၼၼ်ႉ ဢီႊလွၼ်ႊမၵ်ႉၶ် ၸင်ႇ ၸၢမ်းသူင်ႇလၢဝ်ထဵမ်း 2 လုၵ်ႈ ဢၼ်တေၸႂ်ႉၵၢၼ်သၻႃႊလိင်ႉၶ်ၼၼ်ႉ ၶိုၼ်ႈၼိူဝ်ၵၢင်ႁၢဝ် ။  ထိုင်မႃး ပီ 2019 လိူၼ်ၾႅပ်ႊပိဝ်ႊရီႊ ၸင်ႇပွႆႇလုၵ်ႈလၢဝ်ထဵမ်ႊၶိုၼ်ႈၵၢင်ႁၢဝ်ထႅင်ႈ တင်းသဵင်ႈ 60 လမ်း ။

ဝၢႆးသေ ႁူႉဝႃႈ ပဵၼ်ၵၢၼ်ယဝ်ႉၼၼ်ႉ တႄႇဢဝ် 2020 ထိုင် 2024 ၼႆႉ ပွႆႇလၢဝ်ထဵမ်းတႃႇၸႂ်ႉသၻႃႊလိင်ႉၶ်လႆႈ ၼပ်ႉႁူဝ်ႁဵင်လမ်း ။ ၸႂ်ႉလႆႈလၢႆၸိုင်ႈမိူင်း ပႃးၸဵမ်မိူင်းႁူမ်ႈတုမ်မၢၼ်ႈ ။ ဝႃႈၼၼ်သေတႃႉ မိူင်းမၢၼ်ႈတႄႉ ပႆႇၸႂ်ႉလႆႈ ပဵၼ်တၢင်းၵၢၼ် ။ ဢမ်ႇမီးလူင်ပွင်ၸိုင်ႈဢၼ်ၼိမ်တဵင်ႈလႄႈ ထိုင်မိူဝ်ႈလဵဝ် တိုၵ်ႉမီးလွင်ႈၶွင်ႈၶမ်ပိူင်ၸႂ်ႉတိုဝ်း သၻႃႊလိင်ႉၶ်ယူႇ ။

သိင်ႊၵႃႊပူဝ်ႊ မလေႊသျႃႊ ဢိၼ်ႊတူဝ်ႊၼီႊသျႃႊ ၽီႊလပိၼ်ႊ ၵမ်ႊပူႊၶျႃႊ  ဝႅတ်ႉၼၢမ်း ၸိူဝ်းၼႆႉတႄႉ ၸႂ်ႉတိုဝ်းလႆႈ သတႃႊလိင်ႉၶ် ဢၼ်ႁႅင်းဢိၼ်ႊထိူဝ်ႊၼႅတ်ႉ ၶိုၵ်ႉၶႅမ်ႉလႅတ်းၽႂ်း 100 MBPS ထိုင် 200 MBPSလိူဝ်လိူဝ် လူးၵွၼ်ႇဝႃႈၼႆ။