မိူဝ်ႈဝႃးၼႂ်းဝၼ်းတီႈ 22/4/2026 ႁွင်ႈၵၢၼ်ၽွင်းလူင်ၾႆးၾႃႉ လူင်ပွင်ၸိုင်ႈမိူင်းႁူမ်ႈတုမ် ဢူးၵူဝ်ႇၵူဝ်ႇလုၼ်ႇ လၢတ်ႈၵႂႃႇတီႈၼႂ်းပၢင်ၵုမ် တီႈၼေႇပျီႇတေႃႇ ၵဵဝ်ႇၵပ်းလွင်ႈၾႆးၾႃႉဝႃႈ တႄႇဢဝ်ၼႆႉၵႂႃႇ တေၸႅၵ်ႇၾႆးၾႃႉပၼ်ၵူၼ်းမိူင်းႁႂ်ႈၼမ်မႃးလိူဝ်ၵဝ်ႇဝႃႈၼႆသေတႃႉ ၾႆးၾႃႉ တင်းတိုၵ်ႉၵမ်းၵမ်းမွတ်ႇယူႇ။

တီႈဝဵင်းတူၼ်ႈတီႈ ၸိုင်ႈတႆးပွတ်းၸၢၼ်းၼႆႉ ပူၼ်ႉမႃးၶၢဝ်းတၢင်း 3 လိူၼ်ၼႆႉ ၾႆးမွတ်ႇ ၼိုင်ႈ ဝၼ်း 3 ၵမ်း။ ဝႃႈၼၼ်သေတႃႉ ၵႃႈၸႂ်ႉၾႆးၾႃႉ(ၵႃႈမီႇတႃႇ) ယင်းတိုၵ်ႉလႆႈပၼ်ၵႃႈယႂ်ႇယူႇ ႁဵတ်းႁႂ်ႈၵူၼ်းမိူင်းယၢပ်ႇၵိၼ်းၸႂ် – ဝႃႈၼႆ။

ၼၢင်းယိင်းၵူၼ်းမိူင်းဝဵင်းတူၼ်ႈတီးလၢတ်ႈၽူႈတွႆႇႁွၵ်ႈဝႃႈ – “ ႁိူၼ်းႁဝ်း ႁဝ်းမီးသွင် ၵေႃႉမႄႈ လုၵ်ႈၵူၺ်း ၊ ဢွၼ်တၢင်းၵႃႈမီႇတႃႇၼႆႉ ၼိုင်ႈလိူၼ် 35000 ပျႃးၸိူဝ်းၼႆႉၵူၺ်း ၊ ၵမ်းၼႆႉၾႆး ၵေႃႈမွတ်ႇ ၊ ၶဝ်ႈၽၵ်းၵေႃႈဢမ်ႇလႆႈႁုင်ၵိၼ်လီလီ။ ဢမ်ႇလႆႈၸႂ်ႉၾႆးၾႃႉ ၼမ်သေတႃႉ ၵႃႈ မီႇတႃႇၼႆႉ ပုင်ႈၶိုၼ်ႈထိုင် 80000 -90000 ပျႃး ၼႆႉ ၵူၼ်းမႃးဢၢၼ်ႇမီႇတႃႇမၼ်းၽိတ်းႁႃႉ ၵႃႈၶၼ်မၼ်းၶိုၼ်ႈႁႃႉၵေႃႈဢမ်ႇႁူႉ ၊ ပုင်ႈၶိုၼ်ႈၼမ်ႁႅင်းၼႃႇ”- ဝႃႈၼႆ ။

ၾၢႆႇၸဝ်ႈၼႃႈတီႈၾႆးၾႃႉ မႃးဢၢၼ်ႇမီႇတႃႇ ၸိူင်ႉႁိုဝ်၊ ၶဝ်ၼပ်ႉသွၼ်ႇၸိူင်ႉႁိုဝ်လႄႈထိုင်တီႈလႆႈ ၵဵပ်းၸိူင်ႉၼႆ ၶဝ်ၵေႃႈဢမ်ႇသပ်းၸႅင်ႈပၼ်ၸဝ်ႈႁိူၼ်း။ ၽႂ်ၵေႃႈဢမ်ႇလႆႈႁူႉလွင်ႈတၢင်းလီလီ – ၵူၼ်းပိုၼ်ႉတီႈ လၢတ်ႈၼင်ႇၼႆ။

ၵႃႈၾႆးၾႃႉ ၼႂ်းၸႄႈဝဵင်းတူၼ်ႈတီး  ပေႃးၸႂ်ႉၼႂ်းၵႄႈ 1 ယူႊၼိတ်ႊထိုင် 5000 ယူႊၼိတ်ႊၼႆႉ တေလႆႈၸၢႆႇငိုၼ်း 1 ယူႊၼိတ်ႊ  250 ပျႃး ။

လုၵ်ႈႁဵၼ်းၸၼ်ႉၸွမ် ၼၢင်းယိင်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ၾႆးၾႃႉၼႆႉ ၶၢဝ်းပၼ်လႄႈ ၶၢဝ်းတတ်း ဢမ်ႇမီးၶၢဝ်းဢမ်ႇမီးယၢမ်း။ ၶႂ်ႈပၼ်ၶၢဝ်းလႂ်ၵေႃႈပၼ်သေ ၶႂ်ႈတတ်းၶၢဝ်းလႂ် ၵေႃႈ တတ်း။ ၵမ်ႈၼမ် မႃးဢမ်ႇတၼ်းထိုင် ၶိုင်ႈၸူဝ်ႈမူင်းၵေႃႈ ၶိုၼ်းၶၢတ်ႇယဝ်ႉ။ မၢင်ပွၵ်ႈ ႁုင်ၶဝ်ႈဝႆႉ ယင်းပႆႇတၼ်းသုၵ်း ၶဝ်ႈလူႉပႅတ်ႈၵေႃႈ တင်းၼမ်။ ဢမ်ႇတၼ်းလႆႈႁဵတ်းၵၢၼ်သင် ၊ လိူၼ်ပူၼ်ႉမႃးၼႆႉ ၶႃႈလႆႈပၼ် ၵႃႈၾႆးၾႃႉပဵၼ် 2 သႅၼ်ပျႃး ပေႃးၶႂ်ႈတူၵ်းၸႂ်ယဝ်ႉဝႃႈ “- ဝႃႈၼႆ ။  

ၵူၼ်းႁဵတ်းၵၢၼ်ၼႂ်းလုမ်းၾႆးၾႃႉ ၵေႃႉၼိုင်ႈလၢတ်ႈၽူႈတွႆႇႁွၵ်ႈဝႃႈ -“ တီႈဝဵင်းတူၼ်ႈတီးၼႆႉ တေၸႅၵ်ႇပၼ်ၾႆးၾႃႉ ပၼ်ႇပုတ်ႈၵၼ်ၸႂ်ႉ ။  ယွၼ်ႉဝႃႈ တေႃႈလဵဝ်ၼႆႉ ပဵၼ်ၶၢဝ်းမႆႈ ၼမ်ႉႁႅင်ႈ ႁႅင်း ၾႆးၾႃႉ လူတ်းယွမ်းသေ ပၼ်ဢမ်ႇၵုမ်ႇလႆႈလႄႈ တေပၼ်ႇပုတ်ႈ ၸတ်းၶၢဝ်းယၢမ်းသေ ပၼ်ၵႂႃႇ”- ဝႃႈၼႆ ။

ၾႆးၾႃႉၼႂ်းမိူင်းတႆး ပွတ်းၸၢၼ်းၼႆႉ ဢဝ်တီႈႁူင်းၸၢၵ်ႈၾႆးၾႃႉၵဵင်းတွင်းသေ ၸႅၵ်ႇၸၢႆႇပၼ်ၸႂ်ႉ ဝႃႈၼႆသေတႃႉ တီႈတိူင်းသိုၵ်း တပ်ႉသိုၵ်းမၢၼ်ႈပၵ်းသဝ်းတႄႉ လႆႈၾႆးၾႃႉမၢၼ်ႇလီ- ဢမ်ႇၶၢတ်ႇသေပွၵ်ႈ။ ၵူၼ်းမိူင်းတႄႉ ဢမ်ႇမီးၾႆးၾႃႉၸႂ်ႉ။ ယွၼ်ႉပိူဝ်ႈၾႆးၾႃႉ ဢမ်ႇမႃးမၢၼ်ႇသေ ထိုင်တီႈၾႆးမႆႈႁိူၼ်းယေး ဝတ်ႉဝႃးၽႃသိူဝ်ႇၵေႃႈ ယၢမ်ႈမီးမႃးတင်းၼမ်တင်းလၢႆ။

ၸူဝ်ႈသိုၵ်းမၢၼ်ႈ ယိုတ်းမိူင်းမႃးၼႆႉ ၵၢၼ်ပၢႆးမၢၵ်ႈမီးတူၵ်းတႅမ်ႇႁႅင်း။ ၵူၼ်းမိူင်းႁႃၵိၼ်ယၢပ်ႇ။ ပၢင်တေႃႇလွင်း ယႃႈမဝ်း ၵမ် ၽူႈလၵ်ႉၸၵ်ႉၶုတ်ႈ ယိင်ႈၶႅၼ်းလိူင်ႇၼမ်ႁႅင်း။ ၾႆးၾႃႉၵႆႉၶၢတ်ႇ ၼႂ်းမိူင်းတႆးပတ်းပိုၼ်ႉ ဢွၼ်ၵၼ်ထူပ်းတၢင်းယၢပ်ႇၽိုတ်ႇထႅင်ႈ ႁၢဝ်ႈႁႅင်း။