တီႈဝဵင်းတူၼ်ႈတီးၸိုင်ႈတႆးပွတ်းၸၢၼ်းၼၼ်ႉ သိုၵ်းမၢၼ်ႈသင်ႇႁဵတ်းၶဵင်ႇလဵၼ်ႈၼမ်ႉၸွမ်းသဵၼ်ႈတၢင်းလူင်လႄႈ သဵၼ်ႈတၢင်းလဵပ်ႈဝဵင်း ၵူၼ်းၼုမ်ႇၵူၼ်းမိူင်း ဢမ်ႇတူင်ႉတိုၼ်ႇဢမ်ႇသူၼ်ၸႂ် ဢွၼ်ၵၼ်မႆႈၸႂ်ၵူဝ်ၺႃးသိုၵ်းမၢၼ်ႈတီႉၺွပ်းၸွမ်းတႃႈၸွမ်းတၢင်းၵူၺ်းယဝ်ႉဝႃႈၼႆ။
တီႈသဵၼ်ႈတၢင်းလဵပ်ႈဝဵင်းၾၢႆႇဢွၵ်ႇၼၼ်ႉ သိုၵ်းမၢၼ်ႈၸႂ်ႉႁဵတ်းၶဵင်ႇလဵၼ်ႈၼမ်ႉ 9 တီႈ။ ပၢႆသင်ႇပႃးဝႃႈ တႃႇလူတ်းယွၼ်ႇၵၢၼ်ၸႂ်ႉၼမ်ႉမၼ်းၸၢၵ်ႈ ၼမ်ႉမၼ်းၸိူဝ်ႉၽိူင်းၼၼ်ႉ ႁႂ်ႈၵူၼ်းမိူင်းပႆႇတၢင်းဢႅဝ်ႇ ပႆတၢင်းလဵၼ်ႈၼမ်ႉဢဝ်ဝႃႈၼႆ။
လွင်ႈလဵၼ်ႈၼမ်ႉႁူတ်းၼမ်ႉၽွင်းၶၢဝ်းသၢင်းၵျၢၼ်ႇပီၼႆႉ ၵူၼ်းမိူင်းဢမ်ႇပေႃးသူၼ်ၸႂ်ၵၼ်ယွၼ်ႉဝႃႈ တီႈဝဵင်းတူၼ်ႈတီးၼႆႉ ၾိင်ႈၾႃႉရႃႇသီႇၵတ်းလၢင်ႈ၊ ၼမ်ႉမၼ်းၸၢၵ်ႈႁႃယၢပ်ႇ ၵႃႈၶၼ်သုင် လႄႈ ယွၼ်ႉပိူဝ်ႈ ငဝ်းလၢႆးၵၢၼ်မိူင်းသုၵ်ႉယုင်ႈ – ယွၼ်ႉပိူဝ်ႈသိုၵ်းမၢၼ်ႈတီႉၺွပ်းၵူၼ်းၼုမ်ႇၾိုၵ်းၵၢၼ်သိုၵ်း ၸဵမ်ၸိူဝ်းၼႆႉ ၼႆၵူၼ်းၼုမ်ႇဝဵင်းတူၼ်ႈတီးၵေႃႉၼိုင်ႈလၢတ်ႈၼင်ႇၼႆ။
“ပွႆးသွၼ်းၼမ်ႉ ၼႂ်း 4-5 ပီမႃးၼႆႉ ဢမ်ႇလီမူၼ်ႈလီသိူဝ်းပဵင်းမိူဝ်ႈပီ 2019 ၼၼ်ႉသေဢိတ်း။ မိူၼ်ၼင်ႇယၢမ်းလဵဝ် 2 ဝူင်ႈၶဝ်ၸင်ႇႁႂ်ႈႁဝ်းသႂ်ႇၼမ်ႉမၼ်းရူတ်ႉၵႃးၼိုင်ႈၵမ်း။ တေၸၢင်ႈႁဵတ်းႁိုဝ်ဢႅဝ်ႇလႄႇလႃႇ။ သမ်ႉထႅင်ႈဢၼ်ၼိုင်ႈ ၵူဝ်သိုၵ်းမၢၼ်ႈ တီႉၺွပ်းဢဝ်ၵႂႃႇၾိုၵ်းၵၢၼ်သိုၵ်း။ ပေႃးၵႂႃႇဢႅဝ်ႇလိုၵ်းၸွမ်းတႃႈၸွမ်းတၢင်းၶဝ်ၵႆႉပႂ်ႉတီႉလႄႈ မၼ်းတေဢမ်ႇလီသိူဝ်းမူၼ်ႈၼင်ႇၵဝ်ႇ”– ဝႃႈၼႆ။
ယၢမ်းလဵဝ်တီႈဝဵင်းတူၼ်ႈတီး ပလိၵ်ႈၵုမ်းရူတ်ႉၵႃးတႂ်ႈသိုၵ်းမၢၼ်ႈၵေႃႈလိုပ်ႈလမ်းတီႉၺွပ်းရူတ်ႉၵႃးဢမ်ႇမီးဝႂ်ၶွၼ်ႇယူႇၵူႈဝၼ်း ၵူႈၵိဝ်ႇ။ ၽႂ်ၵေႃႈဢမ်ႇႁတ်းဢွၵ်ႇႁိူၼ်းလႄႈရူတ်ႉၵႃးၵႂႃႇမႃးသမ်ႉပေႃးဢႄႇမၢင်။
ၵူၼ်းမိူင်းၸိူဝ်းလုၵ်ႉတၢင်ႇတီႈတၢင်ႇလႅၼ်ပၢႆႈၽေးသိုၵ်းမႃးသွၼ်ႈယူႇသဝ်းဝႆႉတီႈဝဵင်းတူၼ်ႈတီးသေ ပႆႇၸၢင်ႈပွၵ်ႈႁိူၼ်းၶိုၼ်းယင်းတိုၵ်ႉမီးၼမ်လၢႆ။ ၵူၼ်းပၢႆႈၽေးသိုၵ်းၵေႃႈလၢတ်ႈဝႃႈ ဢိင်ၼိူဝ်လွင်ႈယၢပ်ႇၽိုတ်ႇလၢႆလၢႆလွင်ႈ ငဝ်းလၢႆးၵၢၼ်မိူင်းဢမ်ႇၼိမ်သဝ်းသေ ဢမ်ႇမီးၽႅၼ်ၵၢၼ်ဢႅဝ်ႇယဵမ်ႈ ယွၼ်ႉဝႃႈသိုၵ်းမၢၼ်ႈၵူတ်ႇထတ်းသဵၼ်ႈမၢႆၶႅၵ်ႇႁႅင်းၼႃႇၽႅဝ်- ဝႃႈၼႆ။
ပီၼႆႉပွႆးသွၼ်းၼမ်ႉ ပွႆးလဵၼ်ႈၼမ်ႉတီႈဝဵင်းတူၼ်ႈတီး ဢမ်ႇမီးၶႅၵ်ႇတၢင်ႇဝၢၼ်ႈတၢင်ႇဝဵင်းမႃးဢႅဝ်ႇ။ ၵမ်ႈၼမ်တေပဵၼ်ၵူၼ်းၼႂ်းတပ်ႉသိုၵ်းမၢၼ်ႈ၊ ၼွၵ်ႈလိူဝ်ၼၼ်ႉတေမီးၵူၼ်းတၢင်းဝၢၼ်ႈႁိမ်းႁွမ်းဝဵင်းတူၼ်ႈတီးၵူၺ်း။ တင်ႈတႄႇဝၼ်းတီႈ 9/4/2026 မႃး မီးပႃးပၢင်မူၼ်ႈသိူဝ်းႁွင်ႉၽဵင်းၵႂၢမ်းတီႈပၢင်ႇပွႆႇႁူင်းၾႆးမိၼ် ဢဝေႇယႃႇ။ ၵူၼ်းၵႂႃႇဢမ်ႇပေႃးၼမ်သေတႃႉၵေႃႈ ယင်းမီးပႃးၵူၼ်းၽိတ်းမေႃးပေႃႉထုပ်ႉႁႅမ်ႁူဝ်ၵၼ်ႁေလူးၵွၼ်ႇၵူၼ်းတူၼ်ႈတီးလၢတ်ႈၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ