ၸိူဝ်ႉၸၢတ်ႈ (2) ဝၢၼ်ႈမိူင်း (3) ၽႃႇသႃႇ (4) သႃႇသၼႃႇ – ၶွင်ႁဝ်းၼႆႉ ၸွင်ႇမႂ်းႁၵ်ႉႁိုဝ်?
ပေႃးထၢမ်ၼင်ႇၼႆၸိုင် – ၵူၼ်းႁူဝ်ၸိၾႃႉတင်းမူတ်း တေတွပ်ႇဝႃႈ ႁၵ်ႉဢိူဝ်ႈ ႁၵ်ႉဢိူဝ်ႈၼႆယူႇ ယဝ်ႉ၊ ၸွင်ႇတႄႉႁိုဝ်? တႄႉဢိူဝ်ႈ – တႄႉဢိူဝ်ႈ – တေဝႃႈၼႆယူႇယဝ်ႉ။
ၵႂၢမ်းၸိူဝ်းၼႆႉ ပေႃးမေႃလၢတ်ႈၵႂၢမ်းၵူၼ်းတႄႉ ၽႂ်ၵေႃႈတိုၼ်းႁူႉမေႃလၢတ်ႈသဵင်ႈယဝ်ႉ။ ၵူၺ်း ၵႃႈ တေလႆႈတူၺ်း လၢႆးႁဵတ်းလၢႆးသၢင်ႈမၼ်းလႄႈ လွင်ႈတိုဝ်းၵမ်တူဝ်ၸႂ်မၼ်းၸၢတ်ႈၼႆႉ ၸၢတ်ႈၼႃႈ ၵွၼ်ႇၸၢင်ႈတႅပ်းတတ်းလႆႈယဝ်ႉ။
ၼင်ႇႁိုဝ် တူဝ်ၸႂ်မၼ်း ပေႃးတေလႆႈယူႇလီမူၼ်ႈသိူဝ်း ႁပ်ႉႁွင်းၸေးၸိမ်ႇၵတ်းယဵၼ် ၼႂ်း ၸၢတ်ႈၼႆႉၵေႃႈ တေႃႈဢမ်ႇႁဵတ်း။ ၼင်ႇႁိုဝ် တူဝ်ၸႂ်မၼ်းတေလႆႈၵတ်းယဵၼ် ၼႂ်းၸၢတ်ႈၼႃႈ ၵေႃႈ တေႃႈဢမ်ႇတိုဝ်းၵမ်။ ယူႇမူယူႇမႃ ဢမ်ႇဝူၼ်ႉႁႃတၢင်းၵတ်းယဵၼ်ၸၢတ်ႈၼႆႉၸၢတ်ႈၼႃႈ ၸိူဝ်းၼၼ်ႉၸိုင် ၵူၼ်းၸိူဝ်းၼႆႉယႃႇယုမ်ႇၵႂၢမ်းၶဝ်။ တေႃႈတူဝ်ၸႂ်ၶဝ် ၶဝ်တေႃႈဢမ်ႇႁၵ်ႉ ဢမ်ႇ ဢီးလူ။ ၼႂ်းၸၢတ်ႈၼႆႉ ၶႂ်ႈပဵၼ်သင်ပဵၼ်၊ ယူႇၵိၼ်ၵႂႃႇၵမ်ႈပွင်ႇၵမ်ႈပဵၼ်၊ ဢမ်ႇမူၼ်ႉမႄးတၢင်း တိုဝ်းၵမ်လီတူဝ်ၸႂ်ၸဝ်ႈၵဝ်ႇ၊ တႃႇၵတ်းယဵၼ်ၸၢတ်ႈၼႃႈၵေႃႈ ဢမ်ႇႁဵတ်းဢမ်ႇၵမ်ၼႆတႄႉ ၽႂ်ၵႂႃႇယုမ်ႇၵႂၢမ်းၶဝ်ၵေႃႈမၼ်းၽိတ်းယဝ်ႉ။
ပေႃးႁၵ်ႉၸိူဝ်ႉၸၢတ်ႈဝၢၼ်ႈမိူင်း၊ ၽႃႇသႃႇ၊ သႃႇသၼႃႇၶွင်ၸဝ်ႈၵဝ်ႇတႄႉၸိုင် ဢွၼ်တၢင်း သုတ်း ႁၵ်ႉတူဝ်ၸႂ်ၸဝ်ႈၵဝ်ႇၵွၼ်ႇလႄႈ။ လၢႆးႁဵတ်းလၢႆးသၢင်ႈဢၼ်တေပၼ် တၢင်းယၢပ်ႇၸႂ် ၶၢၼ်ၸႂ်တုၵ်ႉၶ ၼႂ်းၸၢတ်ႈၼႆႉၵေႃႈ ပေႃးမေႃငိူင်ႉဝႄႈဢွၼ်တၢင်း ပေႃးမေႃတိုဝ်းၵမ်ဢၼ်တေ လီၸၢတ်ႈၼႃႈၼၼ်ႉၵွၼ်ႇ – ၸင်ႇတေၸၢင်ႈႁၵ်ႉထွတ်ႈမျၢတ်ႈ 4 ယိူင်ႈယဝ်ႉ၊ ပေႃးႁၵ်ႉတူဝ် ၸဝ်ႈၵဝ်ႇၼင်ႇၼႆယဝ်ႉသေ သူပ်းၵေႃႈဝႃႈၵၢၼ်ၸိူဝ်ႉၸၢတ်ႈဝၢၼ်ႈမိူင်း၊ ၽႃႇသႃႇ၊ သႃႇသၼႃႇ ၵေႃႈ ၵဝ်ႁၵ်ႉဢိူဝ်ႈၼႆၵွၼ်ႇ – ပိူၼ်ႈၸင်ႇၸၢင်ႈယုမ်ႇယဝ်ႉ။
တူဝ်ၸႂ်ၸဝ်ႈၵဝ်ႇတေႃႈဢမ်ႇႁၵ်ႉ၊ သမ်ႉဝႃႈ ႁၵ်ႉၸိူဝ်ႉၸၢတ်ႈဝၢၼ်ႈမိူင်း၊ ၽႃႇသႃႇ၊ သႃႇသၼႃႇ ယူႇၼႆတႄႉ ၽူႈဢၼ်ႁူႈပွင်ႇၶဝ်ႈၸႂ်ၶဝ် တိုၼ်းတေဝႃႈၸဝ်ႈၵဝ်ႇပဵၼ်ၵူၼ်းလႅၼ်လူင်ၵူၺ်း ယဝ်ႉ။
ၵမ်ၸၢၵ်ႈၵျႃႇ
ၽိုၼ်လိၵ်ႈပႃႉၽႃ ၵွၼ်းၶေႃ
8.1.94
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ