ၶွမ်ႊပၼီႊသုၼ်ႇလဵဝ် မိူင်းၶႄႇဢၼ်ၼိုင်ႈလၢတ်ႈဝႃႈ – သွပ်ႇၶၢဝ်ႇလႆႈၶေႃႈသိူင်ႇလပ်ႉ (signal) ႁိူဝ်းမိၼ်ႁၢႆတူဝ်ပွႆႇမၢၵ်ႇ B-2 ဢၼ်တပ်ႉလူမ်းမိူင်းဢမေႊရိၵၼ်ႊ ၸႂ်ႉတိုဝ်းဝႆႉၼၼ်ႉယဝ်ႉ ဝႃႈၼႆ။

ၶွမ်ႊပၼီႊသုၼ်ႇလဵဝ်ၼႆႉ မီးၸိုဝ်ႈဝႃႈ Jinga Technology ငဝ်ႈလုမ်းပၵ်းဝႆႉတီႈမိူင်းၶႄႇ။ ပဵၼ်ၶွမ်ႊပၼီႊ လွၵ်းလၢႆးပၢႆးၸၢင်ႈ ဢၼ်လူင်းလၢႆးမိုဝ်းဝႆႉၸွမ်း တပ်ႉသိုၵ်းမိူင်းၶႄႇ(PLA) သေ ၵဵပ်းၶေႃႈမုလ်း ၾၢႆႇၵၢၼ်သွပ်ႇၶၢဝ်ႇ ၵမ်ႉၸွႆႈပၼ်ဝႆႉ။

ၸွမ်းၼင်ႇၶေႃႈမုလ်း ၾၢႆႇၶွမ်ႊပၼီႊၶဝ်သွပ်ႇၶၢဝ်ႇလႆႈဝႆႉသေ ၼႂ်းဝၼ်းတီႈ 1 လိူၼ်မၢတ်ႉၶျ်ၼႆႉ ဢမေႊရိၵၼ်ႊၸႂ်ႉႁိူဝ်းမိၼ် B-2 ၵႂႃႇပွႆႇမၢၵ်ႇ တီႈမိူင်းဢီႊရၼ်ႊ ဝႃႈၼႆ။

Jinga Technology လၢတ်ႈဝႃႈ – ႁိူဝ်းမိၼ်ပွႆႇမၢၵ်ႇ B-2 မိူင်းဢမေႊရိၵၼ်ႊၼႆႉ ဢဝ် ရေႊတႃႊ (radar) သေ ပႂ်ႉသွပ်ႇၶၢဝ်ႇလမ်းၸွမ်းႁွႆးတိၼ်ဢမ်ႇလႆႈ။ ပဵၼ်ႁိူဝ်းမိၼ်ပွႆႇမၢၵ်ႇ ဢၼ်မီးပႃးလွၵ်းလၢႆးပၢႆးၸၢင်ႈ မေႃႁၢႆတူဝ် (stealth) သႅၼ်းလဵဝ် တီႈၼႂ်းလုမ်ႈၾႃႉ ဝႃႈၼႆ။

လိူဝ်ၼၼ်ႉ ႁိူဝ်းမိၼ်သႅၼ်းၼႆႉ တေႃႉတၢင်ႇလႆႈ ၶိူင်ႈမၢၵ်ႇၼိဝ်ႊၶလီႊယိူဝ်ႊ လႄႈ မၢၵ်ႇမိုဝ်ႉၸိုၼ်းယၢမ်း တင်းၼမ်။ ငိူင်ႉဝႄႈလႆႈ ပၵ်းပိူင်ၵႅတ်ႇၶႄႁႄႉၵင်ႈ ၽေးၶဵၼ်သဵၼ်ႈတၢင်း ၵၢင်ႁၢဝ် ရေႊတႃႊ ၽူႈၶဵၼ်သေ ၵႂႃႇပွႆႇမၢၵ်ႇတိုၵ်းတေႃးလႆႈ လူၺ်ႈလွင်ႈသိူင်ႇလပ်ႉ ၼႆယဝ်ႉ။

ၵွပ်ႈၼၼ်လႄႈ ပိူင်ၵၢၼ်ၵပ်းသိုပ်ႇ ဢၼ်သႂ်ႇဝႆႉၸွမ်းတီႈ ႁိူဝ်းမိၼ် B-2 ၼႆႉ လႆႈၶူင်သၢင်ႈႁဵတ်းဢွၵ်ႇဝႆႉ လူၺ်ႈလွင်ႈသိူင်ႇလပ်ႉႁႅင်းတေႉတေႉ။ ၵူၺ်းၵႃႈ ပၵ်းပိူင်ၾၢႆႇသွပ်ႇၶၢဝ်ႇ ၶွမ်ႊပၼီႊ Jinga Technology ႁႃႁၼ် signal ဢၼ်ႁိူဝ်းမိၼ် B-2 မိူင်းဢမေႊရိၵၼ်ႊၶဝ် ၸႂ်ႉဝႆႉၼၼ်ႉယဝ်ႉ ဝႃႈၼႆ။ ၵဵဝ်ႇလူၺ်ႈ ၶေႃႈပိုၼ်ၽၢဝ်ႇ ၶွမ်ႊပၼီႊပၢႆႈၸၢင်ႈမိူင်းၶႄႇၼႆႉသေ ဢမေႊရိၵၼ်ႊတႄႉ ဢမ်ႇတုမ်ႉတွပ်ႇဝႆႉသင်။

ၶွမ်ႊပၼီႊသုၼ်ႇလဵဝ်မိူင်းၶႄႇၼႆႉ ဢိင်ဢဝ်ၶႅပ်းႁၢင်ႈ ဢၼ်လၢဝ်ထဵမ်း သွပ်ႇၶၢဝ်ႇလႆႈမႃး၊ ဢဝ်ၶေႃႈမုလ်း လွင်ႈသဵၼ်ႈတၢင်းႁိူဝ်းမိၼ် ၵႂႃႇမႃး၊ ၶေႃႈမုလ်းၵၢၼ်သိုၵ်း ဢၼ်ပိုၼ်ၽၢဝ်ႇပၼ် ႁႂ်ႈၵူၼ်းမိူင်းလႆႈႁူႉၸွမ်း၊ သဵၼ်ႈတၢင်း ဢၼ်ႁိူဝ်းမိၼ်သွပ်ႇၶၢဝ်ႇ ၵႂႃႇမႃး၊ သႅၼ်းႁိူဝ်းမိၼ်သိုၵ်း ဢၼ်မီးဝႆႉတီႈတပ်ႉပၢင်သဝ်းသိုၵ်း တီႈလႂ်တီႈၼၼ်ႈ ၸိူဝ်းၼႆႉ မႃးၼပ်ႉသွၼ်ႇ ၼႂ်းၵၢၼ်သွပ်ႇၶၢဝ်ႇဝႆႉ ဝႃႈၼႆ။