ၶူဝ်လူင်ဝဵင်းသီႇပေႃႉ ဢၼ်မီးၼိူဝ်သဵၼ်ႈတၢင်းလူင်ႁၢႆးဝေး ဝဵင်းလိူဝ်ႇ- လႃႈသဵဝ်ႈ ၺႃးၸုမ်းယိပ်းၵွင်ႈၵၢင်ႇ ဢိုတ်းႁပ်းဝႆႉ ဢမ်ႇပၼ်ၵူၼ်းမိူင်းလတ်းၶၢမ်ႈၵႂႃႇမႃး လွတ်ႈလႅဝ်း ႁိုင်ၶၢဝ်းတၢင်း မွၵ်ႈ 4 လိူၼ်ယဝ်ႉလႄႈ ၵူၼ်းမိူင်းပိုၼ်ႉတီႈ ဢိၵ်ႇ ၵူၼ်းမိူင်းၸိူဝ်းႁဵတ်းၵၢၼ်ၵႃႉၶၢႆ လူဝ်ႇတေႃႉၶူဝ်းၵုၼ်ႇၶၢမ်ႈၵႂႃႇဝၢၼ်ႈတႂ်ႈမိူင်းၼိူဝ် ႁူပ်ႉတၢင်းယၢပ်ႇႁၢဝ်ႈႁႅင်း ၼႆယဝ်ႉ။
ယၢမ်းလဵဝ် ယွၼ်ႉပၼ်ႁႃသိုၵ်းမိူင်းဢမႄႇရိၵၼ်ႇ လႄႈ ဢီႇရၢၼ်ႇ တင်း ဢိတ်ႉသရေး ယိုဝ်းၵၼ်ႁၢဝ်ႈႁႅင်းသေ ထိုင်တီႈလႆႈဢိုတ်းသဵၼ်ႈတၢင်းၵၢၼ်ၵႃႉၶၢႆၼမ်ႉမၼ်းမဵၼ်လႄႈ ႁဵတ်း ႁႂ်ႈၸိုင်ႈမိူင်းၼႂ်းလုမ်ႈၾႃႉလၢႆလၢႆၸိုင်ႈ မိူင်း ႁူပ်ႉတၢင်းယၢပ်ႇလွင်ႈၵၢၼ်သိုဝ်ႉ လႄႈ ၸႂ်ႉတိုဝ်းၼမ်ႉမၼ်းၸၢၵ်ႈ ထိုင်တီႈၾၢႆႇလူင်ပွင်ၸိုင်ႈ ပေႃးလႆႈ ႁဵတ်းလိၵ်ႈပိုၼ်ဢွၵ်ႇပဵၼ်တၢင်း ၵၢၼ် ႁႂ်ႈၵူၼ်းမိူင်းၽႂ်မၼ်းယွမ်းၸႂ်ႉၼမ်ႉမၼ်းၸၢၵ်ႈ ၼႆယဝ်ႉ။
ၵူၼ်းမိူင်းပိုၼ်ႉတီႈ ဝဵင်းသီႇပေႃႉၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ “ပၢႆသလိူဝ်ႁႃသိုဝ်ႉၼမ်ႉမၼ်းၸၢၵ်ႈ ယၢပ်ႇယဝ်ႉ တေႃႇထိုင်မိူဝ်ႈလဵဝ် သိုၵ်းမၢၼ်ႈၼႆႉ ဢမ်ႇပႆႇယွမ်းပိုတ်ႇပၼ် ၶူဝ်လူင်။ ပၢမ်ႉၼမ်ႉမၼ်းသမ်ႉ ၶဝ် ပိုတ်ႇပၼ်ၵၢင်ၼႂ်ၼိုင်ႈၵမ်းၵူၺ်း။ ပေႃးယဝ်ႉ ဢိုတ်းပႅတ်ႈတင်းဝၼ်းယဝ်ႉ။ မိူဝ်ႈၶဝ်ပိုတ်ႇပၼ် ၼၼ်ႉသမ်ႉ လႆႈ ၵႂႃႇၶဝ်ႈထႅဝ်ႁႄပႂ်ႉသိုဝ်ႉဢဝ်။ ပၢႆသလိူဝ်ၵႂႃႇၵႂႃႇမႃးမႃးၵေႃႈယၢပ်ႇ။ မိူဝ်ႈလဵဝ်ၼႆႉ ၵိၼ်းႁႅင်းလိူဝ်ၵဝ်ႇ ပၢႆသလိူဝ်လႆႈပၼ်ၵႃႈၶၢမ်ႈၼမ်ႉၵႃႈ သမ်ႉလႆႈသိုဝ်ႉၼမ်ႉမၼ်းၸၢၵ်ႈၵႃႈယႂ်ႇထႅင်ႈ” ဝႃႈၼႆ။
မိူဝ်ႈႁူဝ်ပီ 2026 လိူၼ်ၵျႅၼ်ႊၼိဝ်ႊရီႇမႃး သိုၵ်းမၢၼ်ႈတႄႇပၼ်ၵူၼ်းမိူင်းပိုၼ်ႉတီႈ ပႆၶၢမ်ႈၶူဝ်လူင်ဝဵင်းသီႇပေႃႉ ၵႂႃႇမႃးယူႇသေတႃႉ ယွၼ်ႉဢမ်ႇပၼ်ဢဝ်ရူတ်ႉၶိူင်ႈတင်း ၵႃးလတ်း ၶၢမ်ႈလႄႈ ႁဵတ်းႁႂ်ႈၵူၼ်းမိူင်းႁူပ်ႉတၢင်းယၢပ်ႇၽိုတ်ႇႁၢဝ်ႈႁႅင်းၼႆယဝ်ႉ။
သင်ၶႂ်ႈဢဝ်ၶူဝ်းၵုၼ်ႇလတ်းၶၢမ်ႈဝဵင်းသီႇပေႃႉၸိုင် ၸဝ်ႈရူတ်ႉၸဝ်ႈၵႃး လႆႈဢွမ်ႈသဵၼ်ႈတၢင်းလူင်သေ ဢွၵ်ႇၶၢဝ်းတၢင်းလႄႈ ႁဵတ်းႁႂ်ႈလႆႈၸႂ်ႉၶၢဝ်းယၢမ်းႁိုင် ၵွပ်ႈၼၼ်ယၢမ်းလဵဝ် သမ်ႉလႆႈႁူပ်ႉလွင်ႈၵႃႈၶၼ်ၼမ်ႉမၼ်းၸၢၵ်ႈၶိုၼ်ႈသုင်ႁႅင်းၵူၺ်းဢမ်ႇၵႃး ယင်းႁႃသိုဝ်ႉယၢပ်ႇထႅင်ႈလူးၵွၼ်ႇ ၼႆယဝ်ႉ။
မိူဝ်ႈႁူဝ်လိူၼ်မၢတ်ႉၶျ်ပူၼ်ႉမႃးၼႆႉ ၾႆးမႆႈတီႈဝၢၼ်ႈၼွင်ဢႅင်ႇ ရူတ်ႉၶႄၾႆးၼႂ်းဝဵင်းသီႇပေႃႉ ဢမ်ႇၸၢင်ႈၶၢမ်ႈၶူဝ်လူင်ၵႂႃႇၶႄၾႆးၸွႆႈလႄႈ ႁဵတ်းႁႂ်ႈၾႆးမႆႈႁိူၼ်းၵႂႃႇတင်းလင် ပဵၼ်ၽဝ်ႇ ၵႂႃႇတင်းသဵင်ႈ ၼႆယဝ်ႉ။ ယွၼ်ႉသိုၵ်းမၢၼ်ႈဢမ်ႇယွမ်းပိုတ်ႇပၼ်ၶူဝ်လူင်ဝဵင်းသီႇပေႃႉလႄႈ တႃႇၶၢမ်ႈၵေးၼမ်ႉတူႈၼၼ်ႉ ၵူၼ်းမိူင်းလႆႈၸၢင်ႈၵူၼ်းဢဝ်ၶၢမ်ႈၵႂႃႇ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ