ၵူၼ်းႁဝ်းၵူႈၵေႃႉၼႆႉ ဢၼ်ဝႄႈဢမ်ႇလွတ်ႈၵေႃႈ ပႃးပၢၼ်မၢဝ်ႇပၢၼ်သၢဝ်မႂ်ႇမႂ်ႇၼုမ်ႇၼုမ်ႇ ပၢၼ်သိၵ်ႉႁိၵ်ႉ ။ ၸိူဝ်းယၢမ်ႈလတ်းၽၢၼ်ႇမႃး ၶၵ်ႉၼႆႉယဝ်ႉ ၸင်ႇႁူႉပွင်ႇၸႂ်ဝႃႈ ဢၼ်ၸႂ်သၼ်ႇဝႆၶွၼ်းမႃးမိူဝ်ႈၼၼ်ႉၼႆႉ ပႆႇၸႂ်ႈၸၢတ်ႈပၢၼ်ၵူၼ်းတင်းပိုၵ်း ။ ၼုမ်ႇၼုမ်ႇဢွၼ်ႇၵမ်ႈၼမ် ထၢင်ႇဝႃႈ ၸႂ်ၽူင်ႉပိဝ် ၸႂ်တွတ်ႇတဵၼ်ႈပွၵ်ႈၼၼ်ႉ ပဵၼ်တၢင်းႁၵ်ႉသုတ်းႁူဝ်ၸႂ်။ ၸင်ႇၼၼ်လႄႈ ဢဝ်ပၢၼ်မၢဝ်ႇသၢဝ်ႇလူႉပင်းၸွမ်းၸူဝ်ႈပၢၼ်ၼၼ်ႉ လူၺ်ႈပႆႇတၼ်းလႆႈသိူဝ်ႇပိုၼ်ႉတႃႇၸၢတ်ႈပၢၼ်ၵႅၼ်ႇၶႅင် တႃႇလွတ်ႈလႆႈၶူင်းၵၢင်လူင်ၼႆႉ။

ဝၼ်းတီႈ 14 လိူၼ်ၾႅပ်ႊပိဝ်ႊရီႊ ၼႆႉၵေႃႈ မိူၼ်ၵၼ် လုမ်ႈၾႃႉမၵ်းမၼ်ႈဝႆႉ ပဵၼ်ဝၼ်းတၢင်းႁၵ်ႉ ဝၼ်းဝႃႊလႅၼ်ႊထၢႆႊ  Valentine ၼႆလႄႈ ၼုမ်ႇသၢဝ်ၸိူဝ်းတိုၵ်ႉမေႃယွင်ႇၵႂင်ၸွမ်းတၢင်းႁၵ်ႉ ၵႆႉလႄႇ ဢဝ်ၸၢတ်ႈပၢၼ်ၽဝပၢၼ်မၢဝ်ႇပၢၼ်သၢဝ် ၶဝ်ႈလႅၵ်ႈဢဝ် လွင်ႈမူၼ်ႈသိူဝ်းၸူဝ်ႈၵႅပ်ႉ ။ ၵမ်းလိုၼ်းမႃး ဢဝ်ပဵၼ်တၢင်းလိူတ်ႇမႆႈ တႃႇတူဝ်ၵဝ်ႇ တႃႇပေႃႈမႄႈပီႈၼွင်ႉၵူၼ်းႁိူၼ်းၵူၺ်းဢမ်ႇၵႃး လိူတ်ႇမႆႈပႃးထိုင်ၵူၼ်းၼႂ်းဝၢၼ်ႈၼႂ်းၶူင်ႇ ။

ပေႃးတၵ်ႉႁူဝ်ၶေႃႈ ဢၼ်ၵဵဝ်ႇလူၺ်ႈ ဝၼ်းတၢင်းႁၵ်ႉ လႄႈ လွင်ႈၵႃႇမ မႃးၼႆ ၵူၼ်းၼုမ်ႇၵမ်ႈၼမ်တေၸႂ်ၸႃႉ ဢမ်ႇၶႂ်ႈသႂ်ႇၸႂ် ႁၼ်ဝႃႈ ပေႃႈမႄႈၵူၼ်းလူင် ႁႃတၢင်းၽိတ်းသႂ်ႇၶဝ်ၼႆတိၵ်းတိၵ်း။ ၵႃႈပေႉၶႂ်ႈဝႃႈ ဝၼ်းတၢင်းႁၵ်ႉ ဝႃႊလႅၼ်ႊထၢႆႊ ဢၼ်ဝႃႈ ဢမ်ႇငၢမ်ႇၵၼ်တၢင်းၵူၼ်းၼုမ်ႇတႆးႁဝ်းၼႆသေၵေႃႈယဝ်ႉ ၵမ်ၼမ် တိုၼ်းတေလႅၼ်ႈသႂ်ႇ ယွၼ်ႉဝႃႈ တင်းလုမ်ႈၾႃႉ မၵ်းမၼ်ႈဝႆႉၸဵမ်ပိုင်းယဝ်ႉလူး။

ဢၼ်ၵူၼ်းၼုမ်ႇ သူင်သိူဝ်းၸွမ်းဝၼ်းတၢင်းႁၵ်ႉလုမ်ႈၾႃႉၼၼ်ႉ ထုၵ်ႇႁႃႉဢမ်ႇထုၵ်ႇ ငၢမ်ႇႁႃႉ ဢမ်ႇငၢမ်ႇ ၼႆၼၼ်ႉတႄႉ ဢမ်ႇၸႂ်ႈဢၼ်တေလႆႈဢဝ်မႃးထဵင်ၵၼ် မၼ်းပဵၼ်ၾိင်ႈၵိုၵ်းလုမ်ႈၾႃႉၵႂႃႇယဝ်ႉ – ၼႆ ၵူၼ်းၼႂ်းလုမ်ႈၾႃႉ ယွမ်းႁပ်ႉဝႆႉ။

ၵူၺ်းၵႃႈ မိူဝ်ႈထိုင် ဝၼ်းတၢင်းႁၵ်ႉ ပီလႂ်ပီၼၼ်ႉၼၼ်ႉ ၸိူဝ်းပဵၼ်ပၢၼ်ၼုမ်ႇမၢဝ်ႇသၢဝ် ပၢၼ်သိၵ်ႉႁိၵ်ႉ တေႁပ်ႉဢဝ် ပဵၼ်ၽွၼ်းလီတႃႇၸၢတ်ႈပၢၼ်ၸိူင်ႉႁိုဝ်ၼႆၼၼ်ႉၵူၺ်းလမ်ႇလွင်ႈ။

ဝၼ်းတၢင်းႁၵ်ႉၼႆႉ မၢင်ၸိူဝ်းၵေႃႈ ႁပ်ႉႁူႉဝႃႈ ပဵၼ်ဝၼ်းဢၼ် တေလႆႈပၼ်လွင်ႈဢုၼ်ႇၸႂ်ၼႂ်းမုင်ႉႁေႃႁိူၼ်းၼႆၵေႃႈ မီးယူႇ။ မီးပေႃႈမႄႈၵေႃႈ သူင်ႇတၢင်းႁၵ်ႉၸူးပေႃႈမႄႈ ပၼ်လွင်ႈဢုၼ်ႇၸႂ်ပေႃႈမႄႈ ၊ မီးပီႈမီးၼွင်ႉၵေႃႈ သူင်ႇပၼ်တၢင်းႁၵ်ႉၸူးပီႈၼွင်ႉ ။ ၸဵမ်ဢဝ် ၸိူဝ်ႉႁိူဝ်ႇငိူၼ်ႈၶိူဝ်း လႄႈ ဢူၺ်းၵေႃႉဢူၺ်းသႄႈ ပၼ်လွင်ႈဢုၼ်ႇၸႂ်ၵၼ် ပၼ်ႁႅင်းၵၼ် ၸိူဝ်းၼႆႉ ၸၢင်ႈႁဵတ်းၼႂ်းဝၼ်းတၢင်းႁၵ်ႉၼႆႉယူႇ။

ၼႂ်းလူၵ်ႈလုမ်ႈၾႃႉၼႆႉ မီးၵူၼ်းပၢၵ်ႇလၢၼ်ႉႁူဝ်သႅၼ်မၼ်းလႄႈ ၺၢၼ်ႇပၢႆးႁပ်ႉႁူႉၽႂ်မၼ်းဢမ်ႇမိူၼ်ၵၼ် ။ ၸိူဝ်းၶႂ်ႈဢဝ်ဝၼ်းတၢင်းႁၵ်ႉ ဝႃႊလႅၼ်ႊထၢႆႊ ၼႆႉ ပဵၼ်ဝၼ်းဢၼ်လူဝ်ႇၸႂ်ႉၸၢတ်ႈပၢၼ်လူၺ်ႈၵၼ် တၢင်းၵူၼ်းၵေႃႉဢၼ်တူဝ်ၵဝ်ႇႁၵ်ႉၼၼ်ႉၼႆယူႇ။

တၢင်းႁၵ်ႉၼႆႉ ပိုတ်ႇတီႈပွင်ႇမၼ်းယၢပ်ႇ ဢမ်ႇမီးၶိူင်ႈၸၢၵ်ႈတႅၵ်ႈလႆႈဝႃႈ ႁၵ်ႉတႄႉႁႃႉဢမ်ႇႁၵ်ႉတႄႉၼႆၼၼ်ႉလႄႈ ၼုမ်ႇမၢဝ်ႇၼုမ်ႇသၢဝ်ၵေႃႉလႂ်ၵေႃႈ လၢတ်ႈတႄႉၵေႃႈၸူမ်း လၢတ်ႈလူမ်းၵေႃႈယုမ်ႇႁင်းၽႂ်မၼ်း။

သင်လႆႈထူပ်းၵူႈႁၵ်ႉ ဢၼ်မေႃႁၵ်ႉလႄႈ မေႃဢဝ်ပုၼ်ႈၽွၼ်းတင်းၶႅၼ်း သင်ၵႂႃႇၺႃးၵူႈႁၵ်ႉဢၼ်ႁူႉၶႂ်ႈလႆႈၶႂ်ႈဢဝ်ယၢင်ႇလဵဝ်ၵူၺ်းတႄႉ တႃႇၸၢတ်ႈပၢၼ်တေၶိုၼ်ႈယႂ်ႇၼၼ်ႉ ဢမ်ႇႁၼ်တၢင်းမၼ်းသေ ပႃးၵၼ်လူႉလႆႈငၢႆႈငၢႆႈ။

ၵၢပ်ႈယၢမ်းလဵဝ် ၵၢပ်ႈဢေႊဢၢႆႊလူင်ၼႆႉ ၸႂ်ၵူၼ်းၵေႃႈဝႆး တေႁဵတ်းတေသၢင်ႈသင်ၵေႃႈ ၶေႃႈတႅပ်းတတ်းဝႆး ၸင်ႇၼၼ်လႄႈ လွင်ႈၽိတ်းပိူင်ႈၵေႃႈၼမ် ။ ပေႃးၵဵဝ်ႇလူၺ်ႈတၢင်းႁၵ်ႉလႄႈ လွင်ႈၵႃႇမမႃးၵေႃႈ ၶႂ်ႈဢဝ်မႃးၶူၼ်းၶဝ်းလေႃးၵၼ် ။ မၢဝ်ႇသၢဝ်ၵၢပ်ႈပၢၼ်မႂ်ႇ တိၼ်ဝႆးမိုဝ်းဝႆး။

ၸင်ႇၼၼ်လႄႈ ၵၢပ်ႈယၢမ်းလဵဝ် ဢမ်ႇဝႃႈ ၸိုင်ႈမိူင်းလႂ်ၵေႃႈယဝ်ႉ ၼႂ်းႁူင်းႁဵၼ်းသွၼ်လိၵ်ႈၼၼ်ႉ ၸုမ်းၵဵဝ်ႇၶွင်ႈၶဝ် တေလူင်းပၼ်တၢင်းႁူႉၵဵဝ်ႇၵပ်းလွင်ႈၵႃႇမႁွမ်းသွင် ။ ယွၼ်ႉတိၼ်ဝႆး မိုဝ်းဝႆးလႄႈ ဢမ်ႇမီးလွင်ႈၵႅတ်ႇၵင်ႈသင်လူင်ႈၼႃႈ ။ ဢမ်ႇတၼ်းႁူႉၾၢင်ႉ ၽွၼ်းယွၼ်ႈမၼ်း။

တႄႇဢဝ်လွင်ႈႁူမ်ႈၵႃႇမၼၼ်ႉသေ ၸၢင်ႈပႃးမႃးၸွမ်းတၢင်းပဵၼ် လႄႈ လွင်ႈဢမ်ႇၵိုင်ႇလီပဵၼ် ၼႂ်းၸၢတ်ႈပၢၼ်တင်းၼမ်တင်းလၢႆ။

ၸင်ႇၼႆလႄႈ ပေႃးထိုင်မႃးဝၼ်းတၢင်းႁၵ်ႉၼႆ တိူၵ်ႈတီႈႁဝ်းဢမ်ႇႁၢမ်ႈၵၼ်လႆႈႁူဝ်ပၢၵ်ႇတဵမ်သေတႃႉ သင်မေႃၾၢင်ႉၵေႃႈ တေဢမ်ႇလႆႈလိူတ်ႇမႆႈၼႂ်းၸၢတ်ႈပၢၼ်ၵူၼ်း ။

မိူဝ်ႈႁူမ်ႈၵႃႇမၼၼ်ႉ ၵမ်ႈၼမ် တေႁပ်ႉႁူႉဝႃႈ ၸပ်းတၢင်းပဵၼ် HIV ၼႆၵူၺ်း ။ တီႈတႄႉမၼ်း တၢင်းပဵၼ် ဢၼ်ၸၢင်ႈၸပ်းမႃးတီႈၵႃႇမၼၼ်ႉ မီးတင်းၼမ်။ မိူၼ်ၼင်ႇ တၢင်းပဵၼ်ႁုတ်း (ၼိူဝ်ႉလိူဝ်) ၊ ယဵဝ်ႈမႆႈယဵဝ်ႈလိူတ်ႇ ၊ တၢင်းပဵၼ်ၵလၢင်ႇ ၊ တၢင်းပဵၼ်မႁဵင်း လႄႈ တၢင်းပဵၼ်တပ်းၵႂ်ႈၼိူဝ်ႉလိူင်ၸိူဝ်းၼႆႉ။

ၵွပ်ႈၼၼ် လုၵ်ႉတီႈဝၼ်းတၢင်းႁၵ်ႉ ဝၼ်းလဵဝ်ၼႆႉၵူၺ်းသေ ၵိုင်ႇလီဢဝ်ၸၢတ်ႈပၢၼ်လႅၵ်ႈဢဝ် တၢင်းပဵၼ်ၸိူဝ်းၼႆႉယူႇႁႃႉၼႆ ၵိုင်ႇလီဝူၼ်ႉတူၺ်းႁႂ်ႈလီ ။

တၢင်းပဵၼ်ဢၼ်ၸပ်းမႃးၸိူဝ်းၼၼ်ႉ မၢင်ပွၵ်ႈ ဢမ်ႇဢွၵ်ႇၼႄပိူင်ၾၢင်သင် ၊ ၼႃႈႁၢင်ႈလီ တႃႁၢင်ႈငၢမ်းယူႇသေတႃႉ တၢင်းပဵၼ်တိတ်းၸပ်းဝႆႉၼႂ်းတူဝ်လႄႈ ၽဝၸၢတ်ႈပၢၼ်ပဵၼ်ၵူၼ်း မၼ်းႁိုဝ်ၵိုင်ႇ။ ၵွပ်ႈၼၼ် လွၵ်းလၢႆးလီ တႃႇႁႄႉၵင်ႈတႄႉ – သင်ပႆႇတမ်းၸႂ်လႆႈ ထိုင်တီႈတေလႆႈဢဝ်ၸၢတ်ႈပၢၼ်ၸူမ်ၸွမ်းၼၼ်ႉ ႁႂ်ႈဝႄႈလွင်ႈႁူမ်ႈၵႃႇမ။

သင်ဢမ်ႇလိူဝ်လႆႈလႄႈ တေလႆႈႁူမ်ႈၵႃႇမၼႆၵေႃႈ ၸဵမ်ယိင်းၸဵမ်ၸၢႆး လူဝ်ႇမေႃႁူႉလၢႆးႁႄႉၵင်ႈတူဝ်ၵဝ်ႇ။  ႁႂ်ႈၶုၵ်းၸႂ်လႆႈမေႃၸႂ်ႉထူင်ယၢင် ဢၼႃႊမႆႊ( ၶွၼ်ႊတူင်ႊ) သေ ႁႄႉၵင်ႈ ။

တီႈတွၼ်ႈၼႆႉၵေႃႈ ၵၢၼ်ပူၼ်ႉပႅၼ်ၵႃႇမၵၼ်ၼႆႉၵႆႉလႄႇၼႄးဝႃႈ ပဵၼ်လူၺ်ႈယွၼ်ႉၵိၼ်မဝ်းမိင်း ဢမ်ႇႁူႉတူဝ်ႁူႉၶိင်းသေလႄႈပဵၼ်ၵႂႃႇၼႆၵမ်ႈၼမ်။ ယွၼ်ႉၼၼ်လႄႈသင်ၵိၼ်တၢင်းၵိၼ်ဢၼ်မဝ်းမိင်းယဝ်ႉတႄႉ ၵူၼ်းၵမ်ႈၼမ် တေဢမ်ႇတၼ်းၶုၵ်းၸႂ်လႆႈတႃႇႁႄႉၵင်ႈ ၊  ၸိူဝ်းႁႄႉၵင်ႈၵေႃႈ ၸၢင်ႈမီးလွင်ႈယူပ်ႈယွမ်း ။ ဢမ်ႇလွတ်ႈၽေး။

တေႁဵတ်းသင်ၵေႃႈ ႁႂ်ႈၶိုၼ်းဝူၼ်ႉၶွပ်ႈၸၢတ်ႈပၢၼ်ၶၢဝ်းတၢင်းမိူဝ်းၼႃႈ ။ ဢမ်ႇၸႂ်ႈဝႃႈ သိူဝ်းလူၼ်ႉပူၼ်ႉတိၼ်ပူၼ်ႉမိုဝ်းသေ ၽိူဝ်ႇႁူႉတူဝ်ဝႃႈ တေၶႂ်ႈႁႄႉၵင်ႈၵေႃႈ တူၵ်းလိုၼ်း ။ မိူဝ်ႈတူၵ်းလႃႈတူၵ်းလိုၼ်းယဝ်ႉ ၵမ်ႈၼမ် တေႁႃၵိၼ်ယႃႁႄႉၵင်ႈ ႁိုဝ် ၶႂ်ႈယႃႉႁူင်းလုၵ်ႈၸိူဝ်းၼႆႉမီးၼမ်။ သင်ထိုင်ၶၵ်ႉၼၼ်ႉယဝ်ႉ တေတုမ်ႉတိူဝ်းပၢႆးၸႂ် ၊ ထၢတ်ႈၸႂ်တူၵ်းသေ ၸၢင်ႈတုမ်ႉတိူဝ်ႉလွင်ႈၶိုၼ်ႈယႂ်ႇ လႆႈ – ၼၢင်းယိင်း ၽူႈတူင်ႉၼိုင်ၼႂ်းတူင်ႇၵူၼ်းၵေႃႉၼိုင်ႈလၢတ်ႈ။

တီႈတႄႉမၼ်း ဝၼ်းဝႃႊလႅၼ်ႊထၢႆႊ ၼႆႉတိုၼ်းဝႃႈဢမ်ႇၸႂ်ႈဝၼ်းဢၼ်တွၼ်ႈတႃႇသၢဝ်ၼုမ်ႇမၢဝ်ႇၼုမ်ႇမႃးယူႇလူၺ်ႈၵၼ်ၸိူင်ႉၼႆ။ ပဵၼ်ဝၼ်းဢၼ်ႁဝ်းတၵ်းလႆႈၶုၵ်းၶူၼ်ႉဝူၼ်ႉၶွပ်ႈထိုင် မုၼ်ၸဝ်ႈၶရိသ်ႉသျၢၼ်ႊ ၸဝ်ႈၽူႈဢၼ်ဝႆႉၵႃႈၶၼ်ၼိူဝ်တၢင်းႁၵ်ႉ –  ၶႃႈၼၼ်ႉၵူၺ်း။ 

ပေႃးၵွၵ်းတူၺ်းၶိုၼ်းပိုၼ်းၼႆၸိုင် တေလႆႈႁူႉဝႃႈ – ဝၼ်းဝႃႊလႅၼ်ႊထၢႆႊ ဢၼ်ဝႃႈၼႆႉ   မၼ်း ပဵၼ်ဝၼ်းတၢင်းႁၵ်ႉဢၼ်မုၼ်ၸဝ်ႈ (ၶရိသ်ႉသျၢၼ်ႊ) ၸဝ်ႈၼိုင်ႈ ၽူႈၸိုဝ်ႈ – ဝႃႊလႅၼ်ႊထိ ၼွတ်ႉသ်(Priest Valentinos) ဝႆႉၼိူဝ်ၵူၼ်းႁၵ်ႉၵၼ် (မၢဝ်ႇသၢဝ်ၵူႈႁၵ်ႉၵၼ်) မိူဝ်ႈပူၼ်ႉမႃး မွၵ်ႈပီၶရိသ်ႊတ် 270 ၼီႈ ၼၼ်ႉ။ ၽွင်းၼၼ်ႉ ၶုၼ်ၶလေႃးတိဢွတ်ႉသ်ႊ (Claudius) ထူၼ်ႈသွင် မိူင်းၵရိတ်ႉသ် ႁၢမ်ႈမုၼ်ၸဝ်ႈၶရိသ်ႉတ်ၶဝ်ႁဵတ်းပၢင် ၵိၼ်ၶႅၵ်ႇပၼ်ၵူႈမၢဝ်ႇသၢဝ်ၶဝ်ၵူႈတီႈ ။ ၵွပ်ႈပဵၼ် ၽွင်းမီးသိုၵ်းသိူဝ်ဢူၼ်ဢၢၼ်မေႃးမႄးယူႇလႄႈ လူဝ်ႇၵူၼ်းသိုၵ်းၼမ်၊ ၵူဝ်ဢမ်ႇမီးၵူၼ်းႁဵတ်းသိုၵ်း  ဝႃႈၼႆ။

မုၼ်ၸဝ်ႈဝႃႊလႅၼ်ႊထိၼွတ်ႉသ် သမ်ႉ မၵ်းမၼ်ႈဝႆႉၵႃႈၶၼ်တၢင်းႁၵ်ႉ မၢဝ်ႇလႄႈသၢဝ်သေ လၵ်ႉႁဵတ်းပၼ်ပၢင်ၵိၼ်ၶႅၵ်ႇၵူႈ မၢဝ်ႇသၢဝ်ၵူႈၼိုင်ႈ။  ထိုင်တီႈမုၼ်ၸဝ်ႈၼၼ်ႉၺႃး တူတ်ႈတၢမ်ႇတၢႆ။ မိူဝ်ႈၽွင်း ယူႇၼႂ်းၶွၵ်ႈၶင်ၼၼ်ႉ သမ်ႉလႆႈႁၵ်ႉမႅၼ်ႈလုၵ်ႈယိင်းလဝ်း ၽူႈၵုမ်းၶွၵ်ႈ ၵေႃႉၼိုင်ႈ ၸိုဝ်ႈၼၢင်းၵျူႊလိ  (Julie) သေ မိူဝ်ႈဝၼ်းၶုၼ်ၵရိၸ်ႊၶဝ် ပၼ်တၢမ်ႇတၢႆတီႈမၼ်း ဝၼ်းတီႈ 14 လိူၼ်ၾႅပ်ႊပိဝ်ႊရီႊၼၼ်ႉ မၼ်းလႆႈတႅမ်ႈ လိၵ်ႈသင်ႇတၢႆ တီႈၵေႃႉႁၵ်ႉမၼ်း ယဝ်ႉလူင်း လၢႆးမိုဝ်းဝႃႈ – ဝႃႊလႅၼ်ႊထၢႆႊ (Valentine) ၼႆဝႆႉၼႂ်းလိၵ်ႈမၼ်း မိူဝ်ႈ ဝၼ်းတီႈ 14 လိူၼ်ၾႅပ်ႊ ပိဝ်ႊရီႊ လႄႈ ဝၢႆးမၼ်းတၢႆယဝ်ႉ လၢႆသိပ်းပီ ၵူၼ်းၸိူဝ်းဢေးလူမၼ်းၸင်ႇဢွၼ်ၵၼ်မၵ်းမၼ်ႈ ဢဝ် ဝၼ်းဢၼ်မၼ်းတၢႆၼၼ်ႉ ပဵၼ်ဝၼ်းတၢင်းႁၵ်ႉၼႆသေ ဢဝ်ၵုၼ်းမုၼ်တၢင်းႁၵ်ႉမၼ်းမႃး။ ပွင်ႇဝႃႈ ပဵၼ်ဝၼ်းမုၼ်ၸဝ်ႈၶရိတ်ႉသ်ပႃးၼၼ်ႉ ႁဵတ်းၵၢၼ်သုၼ်ႇလႆႈၵူၼ်း။ ၵူၺ်းၵႃႈ ယူႇမႃးလၢႆသိပ်းပီ ဢဝ်ယဵၼ်း ပဵၼ်ဝၼ်းတၢင်းႁၵ်ႉၶွင်ၼုမ်ႇသၢဝ် ၵူႈမၢဝ်ႇသၢဝ်မႃးတင်းလုမ်ႈၾႃႉ  ။ ဝၼ်းမိူဝ်ႈၼႆႉယိင်ႈၶႅၼ်းဢဝ်တီႈပွင်ႇၽိတ်းပိူင်ႈလူင်လၢင်- ယဵၼ်းပဵၼ်ဝၼ်းႁူမ်ႈၵႃႇမ ပႅတ်ႈၼႆႉၸွင်ႇမၼ်းထုၵ်ႇလီပဵၼ် ။