ဢိင်ၼိူဝ် ငဝ်းလၢႆးဝၢၼ်ႈမိူင်းယုင်ႈ ၵၢၼ်ႁႃၵိၼ်လဵင်ႉတွင်ႉ ယၢပ်ႇယဵၼ်းသေ ၵူၼ်းၼႂ်းမိူင်းတႆး ပႃးၸဵမ်ၵူၼ်းၼႂ်းမိူင်းႁူမ်ႈတုမ်မၢၼ်ႈပတ်းပိုၼ်ႉ လႆၶဝ်ႈမိူင်းထႆးၼမ်မႃးၵူႈပီပီ။ မၢင်ႇၵိူဝ်းတေလႆႈႁဵတ်းႁႃၵိၼ်ငၢႆႈၼႆသေ ၶၢမ်ႇၸုၼ်ႉၶၢမ်ႇပႅတ်ႈၶူဝ်းၶွင်ႁိူၼ်းယေးသေ ႁဵတ်းၵၢၼ်ၼႂ်းတၢင်ႇၸိုင်ႈမိူင်းသေတႃႉ ဢမ်ႇမိူၼ်ၸႂ်ၵူႈလွင်ႈ ။ လႆႈသုၵ်ႉၸႂ်ၸွမ်းဝတ်းဝႂ် ပေႃးဝတ်းဝႂ် ဢမ်ႇတဵမ်ထူၼ်ႈၵေႃႈ ဢမ်ႇထၢင်ႇႁၢင်ႈယူႇ ၊ ပေႃးယူႇဢမ်ႇမႅၼ်းၸွမ်းၶွပ်ႇၸွမ်းပိူင်ၸိုင်ႈမိူင်းပိူၼ်ႈၵေႃႈ သမ်ႉ လႆႈၵူဝ်ၺႃးတူတ်ႈတၢမ်ႇလၢႆၸိူဝ်ႉလၢႆပိူင် ။ မိူၼ် မိူဝ်ႈလဵဝ်ၵေႃႈ ၾၢႆႇၵူတ်းထတ်းၵူၼ်းၶဝ်ႈမိူင်းမိူင်းထႆး ပိုၼ်ၽၢဝ်ႇ ႁႂ်ႈႁႅင်းၵၢၼ်ၼႂ်းၵဵင်းမႂ်ႇ ၸိူဝ်းယိုၼ်ႈတၢင်ႇယွၼ်းဝႆႉဝတ်းဝႂ်မႂ်ႇၸိူဝ်းၼၼ်ႉ ႁႂ်ႈၵႂႃႇၸႅင်ႈၶေႃႈမုလ်းသုၼ်တူဝ်တီႈတေႃႊမေႃႊ လုမ်းႁွင်ႈၵၢၼ်ၾၢႆႇၵူတ်ႇထတ်းၵူၼ်းၶဝ်ႈမိူင်း ဝႃႈၼႆ။

လုမ်းၾၢႆႇၵူတ်ႇထတ်းၵူၼ်းၶဝ်ႈမိူင်းၵဵင်းမႂ်ႇၸိုင်ႈထႆး Chiang Mai Immigration ပိုၼ်ၽၢဝ်ႇဝႆႉဝႃႈ ဝၼ်းတီႈ 5 ထိုင် ဝၼ်းတီႈ 24/02/2026 ၼႆႉ ႁႂ်ႈႁႅင်းၵၢၼ်ၸိူဝ်းယိုၼ်ႈယွၼ်းဝတ်းဝႂ်ဝႆႉ မိူဝ်ႈဝၼ်းတီႈ 11/11/2025 ၸိူဝ်းၼၼ်ႉ ႁႂ်ႈဢွၼ်ၵၼ်ၵႂႃႇ ၸႅင်ႈၶေႃႈမုလ်းသုၼ်ႇတူဝ် (ၽိသုတ်ႇဢတရၢၵ်ႉ) ဝႃႈၼႆ။
ႁႅင်းၵၢၼ်ယၢၼ်မိူင်းၸိူဝ်းယူႇဝႆႉၼႂ်းၵဵင်းမႂ်ႇ 3 ၸိုင်ႈမိူင်း မိူၼ်ၼင်ႇ ၵူၼ်းမိူင်းႁူမ်ႈတုမ်မၢၼ်ႈ မိူင်းလၢဝ်း မိူင်းဝႅတ်ႉၼၢမ်း ၸိူဝ်းတိုၵ်ႉလႆႈဝႆႉ ဝႂ် Name List ၸိူဝ်းၼႆႉ ႁႂ်ႈဢဝ်ၶိဝ်းဢွၼ်ႊလၢႆႊ ဝႆႉလူင်ႈၼႃႈသေ ၶဝ်ႈၵႂႃႇၸႅင်ႈၶေႃႈမုလ်းတီႈလုမ်းၵူတ်ႇထတ်းၵူၼ်းၶဝ်ႈမိူင်း ။

မိူဝ်ႈၵႂႃႇၼၼ်ႉ ႁႂ်ႈဢဝ် ဝႂ်တႅၼ်းၶႂၢင်ႉႁဵတ်းၵၢၼ် လႄႈ ဝႂ်ၸၢႆႇငိုၼ်း ႁိုဝ် ဝႂ်တိုတ်းငိုၼ်း ၼိုင်ႈသႅၼ်းလႂ် ဢဝ်ၽိုၼ်မိူၼ်မၼ်းၵႂႃႇပႃး 2 ဝႂ် ။
ႁႅင်းၵၢၼ်ၸိူဝ်းဢၼ်ထုၵ်ႇႁွင်ႉၵႂႃႇၸႅင်ႈၶေႃႈမုလ်းသုၼ်ႇတူဝ်ၼႆႉ ယွၼ်ႉဝႃႈ ပႆႇမီးဝတ်းဝႂ်သင်တဵမ်တဵမ်ထူၼ်ႈထူၼ်ႈ ၵူၺ်းၵႃႈ သမ်ႉတိုၵ်ႉယူႇၼႂ်းၶၵ်ႉတွၼ်ႈယိုၼ်ႈယွၼ်းႁဵတ်းဝတ်းဝႂ်ဝႆႉ။ ၵမ်ႈၼမ် တေပဵၼ်ၵူၼ်းဢၼ် လႆႈဝႆႉ Name list လႄႈ ဝႂ်တႅၼ်းၶႂၢင်ႉႁဵတ်းၵၢၼ်( ဝႂ်ဢၼုၺၢတ်ႈႁဵတ်းၵၢၼ်) ၼၼ်ႉၵူၺ်း ။ ၸင်ႇၼၼ် ၾၢႆႇၵူတ်ႇထတ်းၵူၼ်းၶဝ်ႈမိူင်း ႁႂ်ႈၵႂႃႇၸႅင်ႈၶေႃႈမုလ်း ။ လွင်ႈၼႆႉ ပဵၼ်တႃႇႁႅင်းၵၢၼ်ဢၼ်ယူႇၼႂ်းၵဵင်းမႂ်ႇ ၵူၺ်းၼႆ
ထွင်းၶမ်း ၽူႈၵိူဝ်းၵုမ်ႁႅင်းၵၢၼ်ယၢၼ်မိူင်း Map Foundation လၢတ်ႈၼႄဝႆႉၼင်ႇၼႆ –

မၼ်းမိူၼ်ၸိူင်ႉၼင်ႇၶိုၼ်ႈထဝဵၼ်းမႂ်ႇ(ႁပ်ႉသဵၼ်ႈၸိုဝ်ႈမႂ်ႇ) သေယဝ်ႉၵေႃႈ ပပ်ႉၶဵဝ် CI ၼႆႉ ပိူၼ်ႈပႆႇပိုတ်ႇႁဵတ်းပၼ် ။ ပိူင်ဢၼ်ၼႆႉ မၼ်းတိုၼ်းမီးဝႆႉ ၸဵမ်ပိုင်းယူႇယဝ်ႉ ။ ပိူၼ်ႈၶိုၼ်းမႃးၸႅင်ႈတိူၼ်းထႅင်ႈၵမ်း ။ ၵူၼ်းသႅၼ်းၸိူဝ်းဢၼ်ပိူၼ်ႈႁႂ်ႈၵႂႃႇၸႅင်ႈၶေႃႈမုလ်းသုၼ်ႇတူဝ်ၼႆႉ မၢင်ၵေႃႉၵေႃႈ လႆႈႁဵတ်း CI ယဝ်ႉ မၢင်ၸိူဝ်းၵေႃႈ ပႆႇမီးသင်။ ဢၼ်တီႈပိူၼ်ႈပိုတ်ႇႁဵတ်းပၼ် CI မိူဝ်ႈ ဝၼ်းထီႉ 3 လိူၼ်ထူၼ်ႈ 12 ( ပၢႆပီ 2025) ပိူၼ်ႈတေႃႇပၼ်ၵူၼ်းၵဝ်ႇၼၼ်ႉ ဢၼ်ပိူၼ်ႈ ပိၼ်ႇလဵမ်ႈ CI ပၼ်ၸိူဝ်းၼၼ်ႉၼၼ်ႉၼႃႇ။ တႄႇဝႃႈ ၸိူဝ်းဢၼ်တေလႆႈၵႂႃႇၸႅင်ႈၶေႃႈမုလ်းသုၼ်ႇတူဝ်ၼႆႉ ၵမ်ႈၼမ် ၶဝ်ပႆႇမီး CI

ႁႅင်းၵၢၼ်မၢင်ၸိူဝ်း ၵႂႃႇၸၢင်ႈႁႂ်ႈၶွမ်ႊပၼီႊတၢင်ႇယိုၼ်ႈယွၼ်းပၼ်ဝတ်းဝႂ် မၢင်ၵေႃႉၵေႃႈ လႆႈၵမ်းလဵဝ် မၢင်ၵေႃႉၵေႃႈ ဢမ်ႇတၼ်းလႆႈၵၼ်သဵင်ႈ ။ မိူၼ်ၼင်ႇ ပပ်ႉသီၶဵဝ် CI ၼႆႉ ၾၢႆႇၵဵဝ်ႇၶွင်ႈၶဝ် ပိုတ်ႇႁဵတ်းပၼ်ၶၢဝ်းပွတ်းၵူၺ်း။
မၢင်ၵေႃႉၵေႃႈ မၢင်ႇၵိူဝ်းဝႃႈ တေလႆႈဝႆးၼႆသေ ပၼ်ငိုၼ်းၼၢႆးၼႃႈဝႆႉလူင်ႈၼႃႈ ၊ ၵူၺ်းၵႃႈ ဝတ်းဝႂ်ၵေႃႈ ဢမ်ႇတၼ်းလႆႈ ငိုၼ်းၵေႃႈ ဢမ်ႇလႆႈၶိုၼ်းၸိူဝ်းၼႆႉၵေႃႈ မီးတင်းၼမ် ၊ မၢင်ၸိူဝ်းၵေႃႈ တၼ်းလႆႈဝႆႉ Name List မၼ်းလၢႆလၢႆ ၼႆ ႁႅင်းၵၢၼ်ယၢၼ်မိူင်းၵေႃႉၼိုင်ႈလၢတ်ႈၼင်ႇၼႆ။

မိူဝ်ႈလဵဝ် မႅၼ်ႈၽွင်း ႁွင်ႈၵၢၼ်ၾၢႆႇႁႅင်းၵၢၼ်မိူင်းထႆး ပိၼ်ႇလႅၵ်ႈပိူင် system ၵဵပ်းၶေႃႈမုလ်းႁႅင်းၵၢၼ်ဝႆႉလႄႈ ႁႅင်းၵၢၼ် ၸိူဝ်းယိုၼ်ႈယွၼ်းႁဵတ်းဝတ်းဝႂ် တေၸၢင်ႈၸိူင်ႉၵၢတ်ႈႁိုင် ။ ၶဝ်တေဢၢၼ်း ဢဝ်ဝႂ်ဢၼုၺၢတ်ႈႁဵတ်းၵၢၼ်ၼၼ်ႉ ၶဝ်ႈၼႂ်းပိူင်ဢွၼ်ႊလၢႆႊ ။

ၸဵမ်ဢဝ် ၶေႃႈမုလ်း ပေႃႈလဵင်ႉၼၢႆးၸၢင်ႈလႄႈ ႁႅင်းၵၢၼ် ႁႂ်ႈၶဝ်ႈၼႂ်းပိူင်ဢွၼ်ႊလၢႆႊ ။ ၵူၺ်းၵႃႈ သင်ပဵၼ်ၼၢႆးၸၢင်ႈလႄႈ ႁႅင်းၵၢၼ် ၸိူဝ်းဢၼ်ဢမ်ႇမေႃၸႂ်ႉတိုဝ်းဢီႊမေလ်းလႄႈ ဢမ်ႇမေႃၸႂ်ႉလၢႆးၶဝ်ႈဝႅပ်ႉသၢႆႉၸိူဝ်း ၼၼ်ႉတႄႉ တႃႇပၼ်ႇၵၢၼ်လႆႈ တေၸၢင်ႈမီးလွင်ႈၶွင်ႈၶမ်ၼမ် ၼႆယူႇ။

ၼင်ႇႁိုဝ် ပေႃးတေဢမ်ႇလႆႈသုၵ်ႉၸွမ်းပိူင်ႁဵတ်းဝတ်းဝႂ်ၼၼ်ႉ ႁႅင်းၵၢၼ်လႄႈ ၸုမ်းတူင်ႉၼိုင်တႃႇႁႅင်းၵၢၼ်လၢႆၸုမ်းၵေႃႈ ယၢမ်ႈ ႁူမ်ႈၵၼ် ဢွၵ်ႇၼႄသဵင်ၵၢင်ၸႂ် တုၵ်းယွၼ်း မႃးလၢႆပီ ။ႁႂ်ႈလူတ်းယွၼ်ႇပၼ်ၶၵ်ႉတွၼ်ႈႁဵတ်းဝတ်းၸိူဝ်းၼၼ်ႉသေတႃႉ ထိုင်မိူဝ်ႈလဵဝ် ပႆႇထိုင်တီႈ ။ ႁႅင်းၵၢၼ်တိုၵ်ႉလႆႈယုင်ႈၸွမ်းလွင်ႈဝတ်းဝႂ် ။
မိူဝ်ႈလဵဝ်ၵေႃႈ သမ်ႉဝႃႈ တေမႃးလႅၵ်ႈၸႂ်ႉပိူင်ဢွၼ်ႊလၢႆႊၼႆလႄႈ တႃႇၵူၼ်းၸိူဝ်းဢမ်ႇပွင်ႇၸႂ် ဢမ်ႇလူင်ႉလႅၼ်ႇ ၾၢႆႇၸႂ်ႉတိုဝ်းဢိၼ်ႊထိူဝ်ႊၼႅတ်ႉတႄႉ တေၸၢင်ႈတိူဝ်းယၢပ်ႇၵႂႃႇထႅင်ႈ ၼႆ ႁႅင်းၵၢၼ်ၵေႃႉၼိုင်ႈလၢတ်ႈၼင်ႇၼႆ။

ပေႃးၶၵ်ႉတွၼ်ႈႁဵတ်းဝႂ်ယၢပ်ႇယဵၼ်းၸိုင် ႁႅင်းၵၢၼ်ၵမ်ႈၼမ် တေလႅၼ်ႈၸူးၼၢႆးၼႃႈႁိုဝ်ဢမ်ႇၼၼ် ဢေႊၵျႅၼ်ႊသီႊႁပ်ႉႁဵတ်းဝတ်းဝႂ် ၶၢမ်ႇသဵင်ႈငိုၼ်းၼမ်သေ ၵႂႃႇၸၢင်ႈဢဝ် ။ မၢင်ၸိူဝ်းၵေႃႈ ဢမ်ႇႁူႉၶေႃႈမုလ်းသင်ဝႆႉသေ ၼၢႆးၼႃႈ လၢတ်ႈသင်ၵေႃႈဢဝ်လႄႈ ဢမ်ႇၵိုင်ႇလႆႈသဵင်ႈငိုၼ်းၼမ်ၵေႃႈလႆႈသဵင်ႈ။

ႁႅင်းၵၢၼ်မၢင်ၸိူဝ်း သဵင်ႈငိုၼ်းယဝ်ႉသေ ဢမ်ႇႁူႉဝႃႈ ၸၢႆႇတႃႇၶၵ်ႉတွၼ်ႈဢၼ်လႂ်ၼႆၵေႃႈမီး။ ဢမ်ႇႁူႉႁူဝ်ယွႆႈမၼ်း။ ၸင်ႇၼၼ်လႄႈ ဢမ်ႇသၢင်ႇထုၵ်ႇ ၸၢင်ႈၺႃး ၵူၼ်းၸိူဝ်းၸူးငၢႆႈၶဝ် ပႅတ်ႉလႅၼ်ဢဝ်ငိုၼ်းၵႂႃႇ ၼႆ ၵူၼ်းတူင်ႉၼိုင် ၼႂ်းၸုမ်းလူလွမ်ႁႅင်းၵၢၼ်ၵေႃႉၼိုင်ႈလၢတ်ႈ။

ၼင်ႇႁိုဝ် တေလွတ်ႈလႆႈ လွင်ႈၶွင်ႈၶမ်ၸိူဝ်းၼႆႉ ၸုမ်းတူင်ႉၼိုင်တႃႇႁႅင်းၵၢၼ်တႄႉ ပေႃးထိုင်ဝၼ်းလမ်ႇလွင်ႈ မိူၼ်ၼင်ႇ ဝၼ်းႁႅင်းၵၢၼ် ဝၼ်းသုၼ်လႆႈၵူၼ်း ၸိူဝ်းၼႆႉ တေဢွၼ်ၵၼ် ဢွၵ်ႇၼႄသဵင်ၵၢင်ၸႂ် တႃႇတုၵ်းယွၼ်းဢဝ် သုၼ်ႇဢၼ်ႁႅင်းၵၢၼ်ၵိုင်ႇလီလႆႈ ။ ၼႂ်းတွၼ်ႈၼႆႉ သင်ႁႅၼ်းၵၢၼ် ဢမ်ႇပၼ်တၢင်းႁူမ်ႈမိုဝ်း ဢမ်ႇဢွၵ်ႇသဵင်ၸွမ်းၵေႃႈ တႃႇႁႂ်ႈလူင်ပွင်ၸိုင်ႈမိူင်းထႆး တေႁၼ်လွင်ႈယၢပ်ႇၽိုတ်ႇႁႅင်းၵၢၼ်ၼၼ်ႉဢမ်ႇငၢႆႈ ။ ႁႂ်ႈႁႅင်းၵၢၼ်ယၢၼ်မိူင်းၵူႈၵေႃႉ မေႃၽွမ်ႉၵၼ်တုၵ်းယွၼ်းႁႂ်ႈလူင်ပွင်ၸိုင်ႈတူၺ်းထိုင်။ ပေႃးၵုမ်ႇပႂ်ႉႁႂ်ႈ ၸုမ်း NGO ၸုမ်းတူၺ်းထိုင်ႁႅင်းၵၢၼ်ၶဝ် ၵႂႃႇတုၵ်းယွၼ်းၵူၺ်းတႄႉ ၵူဝ်ပိူၼ်ႈဝႃႈ မၢၵ်ႇၽိတ်ႉဢမ်ႇၽဵတ်းၶိင်ၽဵတ်း ၼႆ ထွင်းၶမ်း ၽူႈၵိူဝ်းၵုမ် ၸုမ်းႁႅင်းၵၢၼ်ယၢၼ်မိူင်း MAP Foundation သိုပ်ႇလၢတ်ႈၼင်ႇၼႆ –

ပေႃးႁဝ်းႁဵတ်းၵႂႃႇႁဵတ်းၼႆ မၼ်းမိူၼ်ဝႃႈ မၢၵ်ႇၽိတ်ႉဢမ်ႇၽဵတ်းၶိင်ၽဵတ်းႁေယဝ်ႉၵေႃႈ ႁႅင်းၵၢၼ်သမ်ႉဢမ်ႇတၵ်းသဵင်သင် ႁဝ်းသမ်ႉၵႂႃႇတုၵ်းယွၼ်းပၼ်ယူႇႁဵတ်းၼႆႉ မၼ်းၵေႃႈဢမ်ႇၸႂ်ႈၼၼ်ႉၼႃႇၼေႃႈ။ၸဝ်ႈတူဝ်မၼ်းသမ်ႉဢမ်ႇလိူတ်ႇႁွၼ်ႉ ႁဝ်းသမ်ႉလိူတ်ႇႁွၼ်ႉၼႆ ၵူဝ်လႆႈဝႃႈ ၸိူင်ႉၼၼ်ၼၼ်ႉၼႃႇ။ၸင်ႇၼၼ်လႄႈ ပေႃးပဵၼ်လႆႈ ႁႂ်ႈမီးတၢင်းႁူမ်ႈမိုဝ်း။ ပေႃးမီးၶေႃႈမုလ်းၸိူင်ႉႁိုဝ် ထုၵ်ႇပႅတ်ႉထုၵ်ႇလႅၼ်ၼႆၵေႃႈ မႃးတိူင်ႇမႃးလၢတ်ႈ မႃးပၼ်ၶေႃႈမုလ်း တီႈဢၼ်ပိူၼ်ႈၸွႆႈပီႈၼွင်ႉႁႅင်းၵၢၼ်ၼၼ်ႉၼႃႇ

ႁႅင်းၵၢၼ်ယၢၼ်မိူင်းၼႆႉ ၼွၵ်ႈလိူဝ် လႆႈႁိူဝ်ႉၸွမ်းလွင်ႈဝတ်းဝႂ်ယဝ်ႉ သမ်ႉလႆႈႁိူဝ်ႉပႃး ၽွၼ်းတုမ်ႉယွၼ်ႈဢၼ်ၵူၼ်းၸိူဝ်းၵေႃႇၵၢၼ်ႁၢႆႉၼႂ်းမိူင်းထႆးထႅင်ႈ ။ ၼႂ်းလိူၼ်ၵျၼ်ႊၼိဝ်ႊရီႊၼၼ်ႉ ႁႅင်းၵၢၼ်မိူင်းႁူမ်ႈတုမ်မၢၼ်ႈလႄႈ ႁႅင်းၵၢၼ်ထႆး ၽိတ်းမေႃးၵၼ်သေ ပၼ်ႁႃယႂ်ႇၶိုၼ်ႈမႃးၸွမ်း။ ၾၢႆႇၸဝ်ႈၼႃႈတီႈထႆးၶဝ် ၸင်ႇပိုၼ်ၽၢဝ်ႇ မိူဝ်ႈဝၼ်း တီႈ 15/01/2026 ၼၼ်ႉဝႃႈ တေလူင်းၵူတ်ႇထတ်းႁႅင်းၵၢၼ် ၸိူဝ်းဢမ်ႇယူႇၸွမ်းၶွပ်ႇၸွမ်းပိူင် ၸွတ်ႈတူဝ်ႈမိူင်းထႆး ။ ပေႃးတီႉၺွပ်းလႆႈၵူၼ်းႁဵတ်းၵၢၼ်ၽိတ်းပၵ်းပိူင် ႁဵတ်းၵၢၼ်ဢမ်ႇထုၵ်ႇၸွမ်းဝႂ်ႁဵတ်းၵၢၼ်ၸိူဝ်းၼႆႉ တေပၼ်တူတ်ႈတၢမ်ႇၶွၵ်ႈလႄႈသင် သူင်ႇပွၵ်ႈၶိုၼ်းလႄႈသင် ပေႃးဢမ်ႇတဵမ် 2 ပီ တေဢမ်ႇပၼ်ၶဝ်ႈမိူင်းထႆးထႅင်ႈ ၼႆၸိူဝ်းၼႆႉ ။