မိူဝ်ႈၼႆႉဝၼ်းတီႈ 25/1/2026 ပဵၼ်ဝၼ်းပၢင်လိူၵ်ႈတင်ႈ တီႈဝဵင်းပၢင်လွင်း ၸိုင်ႈတႆးပွတ်းၸၢၼ်း ပလိၵ်ႈမၢၼ်ႈ ၸႂ်ႉဢဵၼ်ႁႅင်းတင်းၼမ် ဢဝ်ႁူမ်ႇလူမ်ႈၼႂ်းပွၵ်ႉၼႂ်းဝဵင်း သိုၵ်းမၢၼ်ႈသမ်ႉၸႂ်ႉပျီႇတူႉၸိတ်ႉလႄႈ ပလိၵ်ႈၸႅၵ်ႇၶဝ်ႈၼမ်ႉတၢင်းၵိၼ်ပၼ် ၵူၼ်းၵႂႃႇပၼ်သဵင်ၵၢင်ၸႂ် ဝႃႈၼႆ ။
မိူဝ်ႈဝႃးဝၼ်းတီႈ 24/1/2026 ၼႆႉ ပလိၵ်ႈမၢၼ်ႈတႂ်ႈသိုၵ်းမၢၼ်ႈ ၸႂ်ႉႁႅင်းသိုၵ်း ႁူဝ်ၵူၼ်း 200 ပၢႆ ဢဝ်ႁူမ်ႇလူမ်ႈ တီႈႁူင်းတွတ်ႈၶႅပ်းၵၢင်ၸႂ် ဢၼ်မီးၼႂ်းၸႄႈဝဵင်းပၢင်လွင်းလၢႆလၢႆတီႈ ။
ၽွင်းၵူၼ်းမိူင်းၵႂႃႇပၼ်သဵင်ၵၢင်ၸႂ်ယူႇၸိူဝ်းၼၼ်ႉသမ်ႉ ပလိၵ်ႈမၢၼ်ႈလႄႈ ပျီႇတူႉၸိတ်ႉ တႂ်ႈသိုၵ်းမၢၼ်ႈ ၸႅၵ်ႇပၼ် ၶဝ်ႈၼမ်ႉတၢင်းၵိၼ်ၵူၼ်းမႃးတွတ်ႈၶႅပ်းၵၢင်ၸႂ် – ဝႃႈၼႆ။
ၵူၼ်းၸၢႆးဢႃယု 40 ပၢႆယူႇဝဵင်းပၢင်လွင်းလၢတ်ႈၽူႈတွႆႇႁွၵ်ႈဝႃႈ –“ ယႄး(ပလိၵ်ႈ) ၶဝ်မႃးၸဵမ် မိူဝ်ႈ ဝႃး ပဵၼ် 200 ပၢႆ တႃႇဢဝ်ႁူမ်ႇလူမ်ႈ ၼႆဝႃႇ ၊ ပႃးတင်းသိုၵ်းမၢၼ်ႈႁေ ။ ၶဝ်ဢမ်ႇမႃးယူႇၽွမ်ႉၵၼ် ပဵၼ်တီႈလဵဝ်ၸိူင်ႉၼၼ်။ ၶဝ်မႃးပဵၼ်တီႈ ပဵၼ်တီႈ မၢင်တီႈၵေႃႈ 10 ၵေႃႈ မၢင်တီႈၵေႃႈ 20 ၵေႃႉ။ တီႈတၢင်းဝၢၼ်ႈတႄႉ ပျီႇတူႉၸိတ်ႉၵူၼ်းမိူင်း ဢဝ်ႁူမ်ႇလူမ်ႈပႃး ၊ ယွၼ်ႉဝႃႈ ၼႂ်းဝဵင်းပၢင်လွင်း ၼႆႉ ပဵၼ်ပိုၼ်ႉတီႈမီးပၢင်တိုၵ်းသိုၵ်းသိူဝ် လႄႈ ၶဝ်ၵေႃႈဢမ်ႇႁတ်း တမ်းၸႂ်လွင်ႈႁူမ်ႇလူမ်ႈ ။ ၸင်ႇဝႃႈ ဢဝ်ဢဵၼ်ႁႅင်းတင်းၼမ်မႃးပႂ်ႉဝႆႉ ”-ဝႃႈၼႆ ။
ဢိင်ၼိူဝ်သိုၵ်းမၢၼ်ႈလွၵ်ႇငိုတ်ႈဝႆႉ လူင်ႈၼႃႈသေ ဝၼ်းပၢင်လိူၵ်ႈတင်ႈ မိူဝ်ႈၼႆႉ တီႈဝဵင်းပၢင်လွင်း ၵူၼ်းၵႂႃႇပၼ်သဵင်ၵၢင်ၸႂ် မီးၼမ်ယူႇဝႃႈၼႆသေတႃႉ- မူၼ်ႈမူၼ်ႈသိူဝ်းသိူဝ်း ပႃးၸႂ်ပႃးၶေႃးသေ မႃးပၼ်သဵင်ၵၢင်ၸႂ်တႄႉဢမ်ႇၸႂ်ႈ။ မႆႈၸႂ် ၵူဝ်ဢမ်ႇမီးလွင်ႈႁူမ်ႇလူမ်ႈလႄႈၸင်ႇဢွၼ်ၵၼ်ၵႂႃႇ ၵူၼ်းပိုၼ်ႉတီႈလၢတ်ႈၼင်ႇၼႆ ။
မီးၵူၼ်းႁူႉႁၼ်ၸွမ်းလၢတ်ႈတီႈၽူႈတွႆႇႁွၵ်ႈဝႃႈ- ၵူၼ်းဝၢၼ်ႈဢၼ်ၵႂႃႇၸွႆႈ တႃႇပၢင်လိူၵ်ႈတင်ႈၼၼ်ႉ လႆႈၵႃႈလၢႆးဝၼ်းၼိုင်ႈဝၼ်း 3 မိုၼ်ႇပျႃး – ဝႃႈၼႆ ။
ၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ –“ၼႂ်းၸႄႈဝဵင်းပၢင်လွင်းၼႆႉ မၢင်တီႈၵႂႃႇတွတ်ႈၼမ် ၊ မၢင်တီႈၵႂႃႇတွတ်ႈဢႄႇ ၊ တီႈပွၵ်ႉႁဝ်းၶႃႈတႄႉ ဢမ်ႇပေႃးၵႂႃႇၵၼ် ၊ တၢင်းပွၵ်ႉပဢူဝ်းၶဝ်ယူႇတႄႉ ၵူၼ်းၵႂႃႇတွတ်ႈၼမ်ၼႃႇ ။ သိုၵ်းမၢၼ်ႈၶဝ်တႄႉ ၵူၼ်းၵႂႃႇတွတ်ႈၶႅပ်းၵၢင်ၸႂ်ၸိူဝ်းၼၼ်ႉ ၶဝ်ႈၵေႃႈၶဝ်တေလဵင်ႉယူႇ မိူဝ်ႈဝႃးၼႆႉၵူၼ်းၵႂႃႇၸွႆႈတီႈႁူင်းတွတ်ႈၶႅပ်းၵၢင်ၸႂ်ၸိူဝ်းၼၼ်ႉတင်း ၶဝ်ပၼ်ၼိုင်ႈၵေႃႉ 3 မိုၼ်ႇပျႃးၼႆ ၊ တႆးႁဝ်းတႄႉ တေၵႂႃႇပႄႉလႆႈပိူၼ်ႈ ၊ ဢဵၼ်ႁႅင်းတႆးၼႆႉဢႄႇၼႃႇ တီႈပၢင်လွင်းၼႆႉၸၢဝ်းပဢူဝ်းၼမ်ၼႃႇ ပႃႇတီႇပဢူဝ်းမီးယူႇၼႆၵေႃႈ ၶဝ်တေၵႂႃႇသႂ်ႇတႃႇၸၢဝ်းၶိူဝ်းၶဝ် ၊ ပႃႇတီႇသၢင်ႇသီႈၵေႃႈ တေဢမ်ႇပေႉၶဝ်လႆႈ”– ဝႃႈၼႆ ။
တီႈၼႂ်းၸႄႈဝဵင်းပၢင်လွင်းၼႆႉ ႁူင်းတွတ်ႈၶႅပ်းၵၢင်ၸႂ် ႁူမ်ႈသဵင်ႈ မီး 140 ႁူင်း ။ ပႃႇတီႇဢၼ်ၶဝ်ႈလိူၵ်ႈတင်ႈ မီး 5 ဢၼ် ။ပဵၼ် ပႃႇတီႇ ပႃႇတီႇသိူဝ်ၽိူၵ်ႇ (SNDP) ၊ ပႃႇတီႇသၢင်ႇသီႈ (USDP) ၊ ပႃႇတီႇပဢူဝ်း (PNO) ၊ ပႃႇတီႇဢွၼ်ၼမ်းၵူၼ်းမိူင်း (PPP) ၊ ပႃႇတီႇၸိူဝ်ႉၸၢတ်ႈဢၢင်းသႃး (အင်းအမျိုးသားအဖွဲ့ချုပ်ပါတီ INLP) ၸိူဝ်းၼႆႉသေ ၵူၼ်းမီးသုၼ်ႇတွတ်ႈၶႅပ်းၵၢင်ၸႂ်မီး 138349 ၵေႃႉ ၼႆယဝ်ႉ ။
ပၢင်လိူၵ်ႈတင်ႈ ပွၵ်ႈၵမ်း 3 ၼႆႉ မိူင်းႁူမ်ႈတုမ်ပတ်းပိုၼ်ႉ ဢၢၼ်းၸတ်းႁဵတ်း 63 ၸႄႈဝဵင်း ဝႃႈၼႆသေတႃႉ မိူဝ်ႈဝႃး 24/01/2026 ၼႆႉသိုၵ်းမၢၼ်ႈၶိုၼ်းၵိုင်ႉၵၢင်ႉပိုၼ်ၽၢဝ်ႇဝႃႈ ယုၵ်ႉလိူၵ်ႈ 2 ၸႄႈဝဵင်း။ တင်းမူတ်းလႆႈၸတ်းၵႂႃႇ 61 ၸႄႈဝဵင်းၵူၺ်းဝႃႈၼႆ။
ၼႂ်း 61 ၸႄႈဝဵင်းၼႆႉ ၼႂ်းမိူင်းတႆး ပႃး 9 ၸႄႈဝဵင်း ပဵၼ် ၸႄႈဝဵင်းမၢၵ်ႇမၢင်၊ ၸႄႈဝဵင်းပၢင်လွင်း၊ ၸႄႈဝဵင်းယွင် ႁူၺ်ႈ၊ ၸႄႈဝဵင်းၾၢႆၶုၼ်၊ ၸႄႈဝဵင်းမိူင်းၼၢႆး၊ ၸႄႈဝဵင်းၵေးသီး၊ ၸႄႈဝဵင်းမိူင်းသူႈ၊ ၸႄႈဝဵင်းသီႇပေႃႉ လႄႈ ၸႄႈဝဵင်းၵျွၵ်ႉမႄး ။
သိုၵ်းမၢၼ်ႈၼႆႉ ၸတ်းႁဵတ်းပၢင်လိူၵ်ႈတင်ႈၸုမ်ႇၵူႈ ၼႂ်းမိူင်းႁူမ်ႈတုမ်ပတ်းပိုၼ်ႉၵႂႃႇ သၢမ်ပွၵ်ႈ။ ပွၵ်ႈၵမ်းၼိုင်ႈ ၸတ်းႁဵတ်း ဝၼ်းတီႈ 28 လိူၼ်တီႊသႅမ်ႊပိူဝ်ႊ ပီ 2025၊ ပွၵ်ႈၵမ်းသွင် ၸတ်း ၼႂ်းဝၼ်းတီႈ ယဝ်ႉၵႂႃႇ မိူဝ်ႈဝၼ်းတီႈ 11 လိူၼ်ၵျႅၼ်ႊၼိဝ်ႊရီႊ ပီ 2026 ၊ ပွၵ်ႈၵမ်းသၢမ်တႄႉ ႁဵတ်းၵႂႃႇ 25 လိူၼ်ၵျႅၼ်ႊၼိဝ်ႊရီႊ ပီ 2026 ၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ