ဝၢႆးလင်ပၢင်လိူၵ်ႈတင်ႈ ဝဵင်းလႃႈသဵဝ်ႈမႃးၼႆႉ သိုၵ်းမၢၼ်ႈၶိုင်ပွင်ၵဵပ်းၵူၼ်းသိုၵ်းမႂ်ႇဢမ်ႇထၢတ်ႇ ၵူၼ်းမိူင်းၼႂ်းပိုၼ်ႉတီႈ ဝူၼ်ႉၵႂင်။
တႄႇမိူဝ်ႈဝၼ်းတီႈ 21/1/2026 မႃးသိုၵ်းမၢၼ်ႈ လႄႈ ၶႃႈႁၢပ်ႇၵၢၼ်ၶုၼ် ၾၢႆႇၽွင်းငမ်း ၸိူဝ်းမီးယူႇ ၼႂ်းဝဵင်းလႃႈသဵဝ်ႈ လူင်းၵဵပ်း၊ လူင်းၵူတ်ႇထတ်း သဵၼ်ႈမၢႆႁူဝ်ၼပ်ႉၵူၼ်း ႁႂ်ႈတႅတ်ႈတေႃးထႅင်ႈၵမ်းၼိုင်ႈယူႇ လႆႈႁူႉၼင်ႇၼႆ။
ဢိင်ၼိူဝ်ပၵ်းပိူင်ၾိင်ႈမိူင်းတႃႇႁၢပ်ႇၵၢၼ်သိုၵ်း ဢၼ်သိုၵ်းမၢၼ်ႈယိုတ်းမိူင်းတႄႇၸႂ်ႉတိုဝ်းမႃး မိူဝ်ႈလိူၼ်ၵျႅၼ်ႊၼိဝ်ႊရီႊ ပီ 2024 ၼၼ်ႉသေ ယၢမ်းလဵဝ် သိုၵ်းမၢၼ်ႈ ႁႃၵဵပ်းသဵၼ်ႈမၢႆ ၵူၼ်းၸၢႆး ဢႃႇယု 18 ပီ ထိုင် 35 ပီယူႇ ၼႆယဝ်ႉ။
ၵူၼ်းမိူင်းၵေႃႉယူႇဝႆႉၼႂ်းဝဵင်းလႃႈသဵဝ်ႈ လၢတ်ႈဝႃႈ “ငိၼ်းဝႃႈၶဝ်တေတႄႇၵဵပ်းသိုၵ်းမႂ်ႇၶိုၼ်း။ မိူဝ်ႈလဵဝ်ၶဝ် ၶိုၼ်းထတ်း သဵၼ်ႈမၢႆၵူၼ်းၸိူဝ်းမီးဝႆႉၼႂ်းပိုၼ်ႉတီႈ လႄႈဢမ်ႇမီးၸိူဝ်း ၼၼ်ႉယူႇ” ဝႃႈၼႆ။
ဝဵင်းလႃႈသဵဝ်ႈၼႆႉသိုၵ်းၵဝ်ႈၵၢင်ႉ (MNDAA) ပိုတ်းယိုဝ်းသိုၵ်းမၢၼ်ႈသေဢွင်ႇပေႉယိုတ်းၵုမ်းလႆႈ ၸဵမ်မိူဝ်ႈၽႅၼ်ယၼ်ႇသိုၵ်း 1027 ႁိုင်ၼၢၼ်းၶၢဝ်းတၢင်း 9 လိူၼ်။ ဢိင်ၼိူဝ်မိူင်းၶႄႇ ၵုမ်းၵမ်ပၼ်ႁႅင်းဢီးသေ သိုၵ်းၵဝ်ႈၵၢင်ႉ ၶိုၼ်းလႆႈထွႆပၼ်သိုၵ်းမၢၼ်ႈၶိုၼ်း မိူဝ်ႈလိူၼ်ဢေႊပရိူဝ်ႊလ် ပီ 2024 ။
မိူဝ်ႈပႆႇပဵၼ်ပၢင်တိုၵ်း ၽႅၼ်ယၼ်ႇသိုၵ်း 1027 ၼၼ်ႉ တႃႇၵႂႃႇၾိုၵ်းၵၢၼ်သိုၵ်းမႂ်ႇမႂ်ႇၼၼ်ႉ ၽူႈၵွၼ်းပွၵ်ႉ၊ ၵွၼ်းဢိူင်ႇၶဝ် ႁဵတ်းဝႂ်ၸၢမ်း သုၼ်ႇသေ ပၼ်ၵူၼ်းၼုမ်ႇၸိူဝ်းယူႇၼႂ်းဝဵင်းလႃႈသဵဝ်ႈလိူၵ်ႈဢဝ် ။ ဝၢႆးလင်သိုၵ်းမၢၼ်ႈယိုတ်းမိူင်းမႃးၼႆႉ သိုၵ်းမၢၼ်ႈၸတ်းပၢင်ၾိုၵ်းၵၢၼ်သိုၵ်းမႃး မီးၵႂႃႇ 20 ပွၵ်ႈယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ