ၶွမ်ႊမသျိၼ်ႊပၢင်လိူၵ်ႈတင်ႈမိူင်းႁူမ်ႈတုမ်ပိုၼ်ၽၢဝ်ႇဝႃႈ တႃႇပႂ်ႉတူၺ်းပၢင်လိူၵ်ႈတင်ႈၵမ်းသၢမ်ၼႆႉ တူဝ်တႅၼ်း 6 ၸိုင်ႈမိူင်းႁွတ်ႈထိုင်ဝႆႉတီႈဝဵင်းလူင်တႃႈၵုင်ႈယဝ်ႉဝႃႈၼႆ။

ပၢင်လိူၵ်ႈတင်ႈၵမ်းသၢမ်ၼႆႉ သိုၵ်းမၢၼ်ႈတေၸတ်းႁဵတ်းၼႂ်းဝၼ်းတီႈ 25/1/2026 မိူဝ်ႈၽုၵ်ႈၼႆႉ ။ ပဵၼ်တူဝ် တႅၼ်းမိူင်း ဢိၼ်ႊတီႊယႃႊ၊ ပႄႊလႃႊရုတ်ႉသ်၊ ဢိၼ်ႊတူဝ်ႊၼီႊသျႃႊ၊ ၼီႊပေႃႊ၊ ၵမ်ႊပေႃႊတီႊယႃႊ၊ ၼီႊၵႃႊၵႂႃႊရႃႊ လႄႈ တူဝ်တႅၼ်းၸုမ်းInternational Conference of Asian Political Parties (ICAPP)ၶဝ်ၸိူဝ်းၼႆႉ -ၼႆ ႁွင်ႈၵၢၼ်ၾၢႆႇပွင်ႇၶၢဝ်ႇ သိုၵ်းမၢၼ်ႈပိုၼ်ၽၢဝ်ႇဝႆႉၼင်ႇၼႆ။

ၽွင်းပၢင်လိူၵ်ႈတင်ႈၵမ်းထိ 1 ၼၼ်ႉတႄႉ ၼွၵ်ႈလိူဝ်တူဝ်တႅၼ်းၸိုင်ႈမိူင်း ဢၼ်လၢတ်ႈမႃးပႃႈ ၼိူဝ်ၼႆႉယဝ်ႉ မီးပႃးတူဝ်တႅၼ်းၸိုင်ႈမိူင်း ထႆး၊ ရတ်ႉသျႃႊ၊ လၢဝ်း၊ လႄႈ ၾိလိပ်ႉပိၼ်ႊသ် ၸိူဝ်းၼႆႉၶဝ်ႈႁူမ်ႈပႃး။

သိုၵ်းမၢၼ်ႈလၢတ်ႈဝႃႈၽႂ်ၶႂ်ႈပႂ်ႉတူၺ်းပၢင်လိူၵ်ႈတင်ႈ ႁႂ်ႈတၢင်ႇသဵၼ်ႈၸိုဝ်ႈမႃးဝႆႉၸဵမ်ၸဝ်ႉဝႃႈၼႆယူႇသေတႃႉ မီးမိူင်းဢၼ်မႅၼ်ႈၽီၵၼ်တင်းသိုၵ်းမၢၼ်ႈၵူၺ်း ဢၼ်မႃးပႂ်ႉတူၺ်း။ ၼႂ်းလုမ်ႈၾႃႉၵမ်ႈပႃႈၼမ်ဢမ်ႇၵမ်ႉထႅမ် ပၢင်လိူၵ်ႈတင်ႈဢၼ်သိုၵ်းမၢၼ်ႈၼမ်းၸတ်း။ ၽွင်းလူင်ၾၢႆႇၼွၵ်ႈမိူင်း မိူင်းမလေႊသျႃႊ မူဝ်ႊႁႃႊမတ်ႉ ႁႃႊသၼ်ႊ ၵေႃႈပိုၼ်ၽၢဝ်ႇလၢတ်ႈမိူဝ်ႈဝၼ်းတီႈ 20/01/2026 ဝႃႈ ယူႇတီႈဢႃႊသီႊယၼ်ႊ ဢမ်ႇၵမ်ႉထႅမ် ဢမ်ႇမၵ်းမၢၼ်ႈ ပၢင်လိူၵ်ႈတင်ႈဢၼ်သိုၵ်းမၢၼ်ႈၸႅၵ်ႇၸၵ်းႁဵတ်းသၢမ်ပွၵ်ႈသၢမ်ၵမ်း။ ၵွပ်ႈၼႆလႄႈ ယူႇတီႈဢႃႊသီႊယၼ်ႊသေ တေဢမ်ႇသူင်ႇတူဝ်တႅၼ်းမိူဝ်းပႂ်ႉတူၺ်း ဝႃႈၼႆ။

ပၢင်လိူၵ်ႈတင်ႈ ၵမ်းသၢမ်ၼႆႉ သိုၵ်းမၢၼ်ႈတေၸတ်းႁဵတ်းၵႂႃႇၼႂ်း 63 ၸႄႈဝဵင်းၼႂ်းပတ်းပိုၼ်ႉၸိုင်ႈမိူင်း။ ၼႂ်းၼၼ်ႉမိူင်းတႆးပႃး 9 ၸႄႈဝဵင်း။