ဝၼ်းတီႈ 20/1/2026 ၶွမ်ႊမသျိၼ်ႊပၢင်လိူၵ်ႈတင်ႈမိူင်းႁူမ်ႈတုမ် ပိုၼ်ၽၢဝ်ႇဢွၵ်ႇမႃး ပႃႇတီႇၵၢၼ်မိူင်းၸိူဝ်းဢွင်ႇပေႉလႆႈဝႆႉတီႈၼင်ႈ ၼႂ်းပၢင်လိူၵ်ႈတင်ႈ ၵမ်းတီႈ 1 လႄႈ 2 ။

ပႃႇတီႇၵၢၼ်မိူင်းဢၼ်ၶဝ်ႈၶေႉၶဵင်ႇပၢင်လိူၵ်ႈတင်ႈၵမ်းၼႆႉတင်းမူတ်း မီး 57 ဢၼ်။

ၼႂ်းၼၼ်ႉပႃႇတီႇဢၼ်ၶဝ်ႈၶေႉၶဵင်ႇပၢင်လိူၵ်ႈတင်ႈပတ်းပိုၼ်ႉၸိုင်ႈမိူင်း မီး 12 ဢၼ်။

1-ပႃႇတီႇသၢင်ႇသီႈ USDP

2- ပႃႇတီႇၵူၼ်းမိူင်း PP

3- ပႃႇတီႇလုၵ်ႈႁဵၼ်းၵမ်ႉၸွႆႉၵူၼ်းမိူင်း PCSP

4-ပႃႇတီႇၼမ်းၼႃႈၵူၼ်းမိူင်း PPP

5-ပႃႇတီႇသိူဝ်ၽိူၵ်ႇ SNDP

6-ပႃႇတီႇတီႇမူဝ်ႇၶရေႇသီႇမိူင်းႁူမ်ႈတုမ် UDP

7- ပႃႇတီႇ ႁႅင်းႁူမ်ႈတုမ်တီႇမူဝ်ႇၶရေႇသီႇၸိူဝ်ႉၸၢတ်ႈ NDF

8- ပႃႇတီႇၽွမ်ႉႁူမ်ႈတီႇမူဝ်ႇၶရေႇသီႇၸိူဝ်ႉၸၢတ်ႈ(တစည/NUP)

9- ပႃႇတီႇ ၽွမ်ႉႁူမ်ႈလႄႈလွင်ႈငမ်းယဵၼ်မိူင်းႁူမ်ႈတုမ် UPUP

10- ပႃႇတီႇ တီႇမူဝ်ႇၶရႅတ်ႉတိတ်ႉၸိုင်ႈမိူင်းၸိူဝ်ႉၸၢတ်ႈ DNP

11- ပႃႇတီႇႁုၼ်ႈမုၼ်းမႂ်ႇသုင်ၸဝ်ႈႁႆႈၸဝ်ႈၼႃး မိူင်းမၢၼ်ႈ MFDP

12- ပႃႇတီႇႁုၼ်ႈမုၼ်းမႂ်ႇသုင် ၵၢၼ်မၢၵ်ႈမီးလီပဵၼ်ၸိူဝ်ႉၸၢတ်ႈ NIDP ၸဵမ်ၸိူဝ်းၼႆႉ။

ပၢင်လိူၵ်ႈတင်ႈဢၼ်သိုၵ်းမၢၼ်ႈဢွၼ်ၼမ်းၸတ်းႁဵတ်းယဝ်ႉၵႂႃႇ 2 ၵမ်း။ မိူဝ်ႈဝၼ်းတီႈ 28/12/2025 ၵမ်းၼိုင်ႈလႄႈ ဝၼ်းတီႈ 11/1/2026 ၵမ်းၼိုင်ႈ။

ဢၼ်ၸတ်းႁဵတ်းယဝ်ႉတူဝ်ႈၵႂႃႇ 2 ၵမ်းၼႆႉ ပႃႇတီႇသၢင်ႇသီႈ USDP ဢွင်ႇပေႉလႆႈတီႈၼင်ႈၼႂ်းသၽႃးၵူၼ်းမိူင်းဝႆႉတင်းမူတ်း 397 တီႈၼင်ႈ။ ပဵၼ်- သၽႃးၵူၼ်းမိူင်း 183 တီႈၼင်ႈ၊ သၽႃးၸိူဝ်ႉၸၢတ်ႈ 47 တီႈၼင်ႈလႄႈ သၽႃးၸႄႈမိူင်း/တိူင်း 167 တီႈၼင်ႈ- သေ လႆႈဝႆႉတီႈၼင်ႈၼမ်သုတ်းၼႂ်းသၽႃး။

ဢွင်ႇပေႉလႆႈတီႈၼင်ႈ ၼမ်သုတ်းထိသွင်ၼႂ်းသၽႃးပဵၼ် ပႃႇတီႇၽွမ်ႉႁူမ်ႈၸၢဝ်းၶိူဝ်း တသၺ NUP လႆႈဝႆႉ 23 တီႈၼင်ႈ။ ပဵၼ်သၽႃးၵူၼ်းမိူင်း 3 တီႈၼင်ႈ သၽႃးၸိူဝ်ႉၸၢတ်ႈ 6 တီႈၼင်ႈ လႄႈ သၽႃးၸႄႈမိူင်း 14 တီႈၼင်ႈ။

ပႃႇတီႇၽွမ်ႉႁူမ်ႈမွၼ်း MUP သမ်ႉၼမ်ထိ 3 လႆႈဝႆႉ 18 တီႈၼင်ႈ။ ပဵၼ်သၽႃးၵူၼ်းမိူင်း 5 တီႈၼင်ႈ၊သၽႃးၸိူဝ်ႉၸၢတ်ႈ 5 တီႈၼင်ႈလႄႈ သၽႃးၸႄႈမိူင်း 8 တီႈၼင်ႈ။

ၼမ်သုတ်းထိ 4 ပဵၼ် ပႃႇတီႇၸိူဝ်ႉၸၢတ်ႈၼႃႇၵ (NNP) တင်းမူတ်းလႆႈဝႆႉ 10 တီႈၼင်ႈ။ ပဵၼ်သၽႃးၵူၼ်းမိူင်း 3 တီႈၼင်ႈ၊ သၽႃးၸိူဝ်ႉၸၢတ်ႈ 1 တီႈၼင်ႈလႄႈ သၽႃးၸႄႈမိူင်း 6 တီႈၼင်ႈ။

ပႃႇတီႇသိူဝ်ၽိူၵ်ႇ SNDP ၸင်ႇပဵၼ်မၢႆ 5။ လႆႈဝႆႉတီႈၼင်ႈ 9 တီႈ။ ပဵၼ်သၽႃးၵူၼ်းမိူင်း 4 တီႈလႄႈသၽႃးၸႄႈမိူင်းလႄႈတူင်း 5 တီႈ။ သၽႃးၸိူဝ်ႉၸၢတ်ႈတႄႉပႆႇလႆႈသေတီႈ။

ၼွၵ်ႈလိူဝ်ပႃႇတီႇ 5 ဢၼ်ၼႆႉယဝ်ႉ တေမီးပႃႇတီႇ သူဝ်ႇမီး ( ZCD )လႆႈ 7 တီႈၼင်ႈ၊ ပႃႇတီႇ ပဢူဝ်း (PNO) 7 တီႈၼင်ႈ၊ ပႃႇတီႇၵူၼ်းမိူင်း (PP) 7 တီႈၼင်ႈ၊ ပႃႇတီႇရၶႅင်ႇ (AFP) 7 တီႈၼင်ႈ၊ ပႃႇတီႇၸၢဝ်းၶိူဝ်းရၶႅင်ႇ(ANP/RNP) 6 တီႈၼင်ႈ၊ ပႃႇတီႇ PPP 3 တီႈၼင်ႈ၊ ပႃႇတီႇၵူၼ်းမိူင်းယၢင်းလႅင် 3 ၊ ပႃႇတီႇၽွမ်ႉႁူမ်ႈၶွတ်ႇလိူတ်ႈ တႆးလႅင် 3 ၊ ပႃႇတီႇထၼူႉ (DNDP) လႆႈ 2 ၊ ပႃႇတီႇ တီႇမူဝ်ႇၶရႅတ်ႉတိတ်ႉ ယၢင်းၽိူၵ်ႇ (KNDP) 2 ပႃႇတီႇႁုၼ်ႈမုၼ်းမႂ်ႇသုင် ၵၢၼ်မၢၵ်ႈမီးလီပဵၼ်ၸိူဝ်ႉၸၢတ်ႈ NIDP လႆႈ 2 တီႈၼင်ႈ ၊ ပႃႇတီႇဝႃႉ (WNP) လႆႈဝႆႉ 1 တီႈၼင်ႈလႄႈ ပႃႇတီႇလီႇသူး (LNDP) 1 တီႈၼင်ႈ၊ ပႃႇတီႇ ၶၢင် 1 တီႈၼင်ႈလႄႈ ပႃႇတီႇဢၶႃႇ 1 တီႈၼင်ႈ ပႃႇတီႇၶွၼ်ႊၵရႅတ်ႉ ၶျၢင်း 1 တီႈၼင်ႈ၊ ပႃႇတီႇႁုၼ်ႈမုၼ်းမႂ်ႇသုင်ၸဝ်ႈႁႆႈၸဝ်ႈၼႃး 1တီႈၼင်ႈ၊ ပႃႇတီႇသုၼ်ႇလဵဝ် 1 တီႈၼင်ႈ ၼႆမႃးၶပ်းၶပ်းတၢမ်းတၢမ်းၵၼ် ဢၼ်ဢွင်ႇပေႉပၢင်လိူၵ်ႈတင်ႈဝႆႉမီးယူႇ 24 ပႃႇတီႇ။

ၵူၼ်းပၵ်းတႃၵၢၼ်မိူင်း ၸဝ်ႈၼိုင်ႈလၢတ်ႈဝႃႈ – ပေႃးတူၺ်းႁူဝ်ၼပ်ႉဢၼ်ပႃႇတီႇသၢင်ႇသီႈလႆႈဝႆႉၵမ်းၼိုင်ႈၵမ်းသွင်ၼႆႉၵူၺ်းၵေႃႈ ၶဝ်သမ်ႉပေႃးၽွတ်ႈလူင်ပွင်ၸိုင်ႈလႆႈယူႇယဝ်ႉ။ ပွင်ႇဝႃႈ သင်ၸိူဝ်ႉပၢင်လိူၵ်ႈတင်ႈၵမ်း 3 ဢမ်ႇပဵၼ်ၸတ်းၼႆၵေႃႈ ၶဝ်ပေႃးဢမ်ႇမႆႈၸႂ်သင်ယဝ်ႉ။ ၶဝ်တိုၼ်းႁၢင်ႈႁႅၼ်းဝႆႉၸိူင်ႉၼၼ်ယဝ်ႉလူး မၼ်းၵေႃႈပဵၼ်ၼင်ႇ လွၵ်းဢၼ်သိုၵ်းမၢၼ်ႈၶဝ်တမ်းဝႆႉၼၼ်ႉၵူၺ်း- ဝႃႈၼႆ။

ပၢင်လိူၵ်ႈတင်ႈ ၵမ်းသၢမ်ၼႆႉတႄႉ ဢၢၼ်းဝႆႉဝႃႈတေၸတ်းႁဵတ်းဝၼ်းတီႈ 25/01/2026 ၼႆႉလႆႈႁူႉၼင်ႇၼႆ။

ၽူႈၶၢၼ်ပၢၵ်ႇတပ်ႉသိုၵ်း ၸွမ်ႁၢၼ်ၸေႃႇမိၼ်းထုၼ်းတႄႉလၢတ်ႈပဵၼ်တၢင်းၵၢၼ်ဝႆႉဝႃႈ ပၢင်လိူၵ်ႈတင်ႈၵမ်းၼိုင်ႈၼႆႉ ၵူၼ်းမႃးပၼ်သဵင်ၵၢင်ၸႂ်တင်းမူတ်းမီး 52.13 % သေ ပၢင်လိူၵ်ႈတင်ႈၵမ်း 2 ၼႆႉတႄႉမီးၵူၼ်းမႃးပၼ်သဵင်ၵၢင်ၸႂ် 55.95 % ဝႃႈၼႆဝႆႉ။