သိုၵ်းမၢၼ်ႈတႄႉ ႁႃႁူးဢွၵ်ႇလွတ်ႈပၼ်ႁႃၵၢၼ်မိူင်းၼႆသေ ႁူၺ်းဢဝ်ပႃႇတီႇဢၼ်တေၽွမ်ႉၸွမ်းသေ ဢွၼ်ၼမ်းၸတ်းပၢင်လိူၵ်ႈတင်ႈ ။ ဢၼ်ၸတ်းယဝ်ႉၵႂႃႇ 2 ပွၵ်ႈၼႆႉ ၵမ်ႈၼမ် ပဵၼ်ပႃႇတီႇသၢင်ႇသီႈၼမ်းၼႃႈပေႉဝႆႉၵူၺ်း။ ပွၵ်ႈၵမ်း 3 ၼႆႉၵေႃႈ ၵမ်ႈၼမ် ႁၼ်ဝႆႉ ပႃႇတီႇသၢင်ႇသီႈၵူၺ်း ။

တႃႇပႃႇတီႇသၢင်ႇသီႈတေပေႉလႆႈၼၼ်ႉသိုၵ်းမၢၼ်ႈတိုၼ်းၽႅၼ်ဝႆႉမူတ်းယဝ်ၼႆ ၵူၼ်းဢၼ်ႁၼ်ၸိူင်ႉၼႆၵေႃႈလၢတ်ႈ။ မၢင်ၸိူဝ်းၵေႃႈဝႃႈ ဢမ်ႇၸႂ်ႈယွၼ်ႉပိူၼ်ႈ ပဵၼ်ယွၼ်ႉၸုမ်းၸၢဝ်းၶိူဝ်းဢမ်ႇၽွမ်ႉၵၼ်ၵူၺ်း ၸင်ႇသုမ်း ၼႆၸိူဝ်းၼႆႉၵေႃႈမီး။ ထႅင်ႈပၢင်လိူၵ်ႈတင်ႈႁွပ်ႈ 3 ၼႆႉ တေၸၢင်ႈမီးၽွၼ်းယွၼ်ႈၸိူင်ႉႁိုဝ်ထႅင်ႈ ၵူၼ်းမိူင်းႁၼ်ထိုင်ၸိူင်ႉႁိုဝ် ပႃႇတီႇၵူႈဢၼ် ၸွင်ႇတေမီးလွင်ႈႁၢၼ်ႉၸႂ်ၵၼ် ၼႆၼၼ်ႉ လီၶႆႈၸႂ်တူၺ်း။

ဝၼ်းတီႈ 25 တေထိုင်ၼႆႉ မႅၼ်ႈဝၼ်းဢၼ်သိုၵ်းမၢၼ်ႈ တေၸတ်းပၢင်လိူၵ်ႈတင်ႈထႅင်ႈ ႁွပ်ႈ 3 လႄႈ မၵ်းမၼ်ႈပဵၼ်ဝၼ်းလိုၼ်းသုတ်းၵၢၼ်လိူၵ်ႈတင်ႈတႃႇပွၵ်ႈၵမ်းၼႆႉ ။ ႁူမ်ႈသဵင်ႈ တေၸတ်း တႃႇ 63 ဝဵင်း ၼႂ်းၼၼ်ႉ ပႃးၼႂ်းမိူင်းတႆး 9 ဝဵင်း။

ၶဵတ်ႇလိူၵ်ႈတင်ႈဢၼ်မီးၼႂ်းမိူင်းတႆးၼႆႉ ပဵၼ် မၢၵ်ႇမၢင် ၊ ပၢင်လွင်း ၊ ယွင်ႁူၺ်ႈ ၊ ၾၢႆၶုၼ် ၊ မိူင်းၼၢႆး ၊ ၵေးသီး ၊ မိူင်းသူႈ ၊ သီႇပေႃႉ ၊ ၵျွၵ်ႉမႄး ၸိူဝ်းၼႆႉ ။ ပေႃးၸႅၵ်ႇသေ တူၺ်းၵေႃႈ ပွတ်းဢွၵ်ႇ ပဵၼ် မၢၵ်ႇမၢင် ၊ ပွတ်းၸၢၼ်း ပဵၼ် ပၢင်လွင်း ယွင်ႁူၺ်ႈ ၾၢႆၶုၼ် မိူင်းၼၢႆး ၵေးသီး မိူင်းသူႈ ။ ပွတ်းႁွင်ႇသမ်ႉပဵၼ် သီႇပေႃႉ ၵျွၵ်ႉမႄး။
ပၢင်လိူၵ်ႈတင်ႈ ႁွပ်ႈ 2 သုတ်းယဝ်ႉၵႂႃႇၼႂ်းဝၼ်းတီႈ 11/01/2026 ၼႆႉသေ ပႃႇတီႇၸိူဝ်းပႃးၼႂ်းၵၢၼ်ၶႄႉၶႅင်ႇၵေႃႈ ဢွၼ်ၵၼ် တူင်ႉၼိုင်ႁႃသဵင်လၢႆးၽႂ်မၼ်း ။ ႁႂ်ႈလွတ်ႈလႅဝ်းထၢင်ႇႁၢင်ႈတႄႉ ဢမ်ႇမီးၼႆ ၽူႈၶဝ်ႈၸုမ်းပႃႇတီႇၵၢၼ်မိူင်းၵေႃႉၼိုင်ႈလၢတ်ႈ။

ၵူၼ်းၸိူဝ်း လဵပ်ႈႁဵၼ်းၵၢၼ်တူင်ႉၼိုင်ပႃႇတီႇ ၵမ်ႈၼမ်တႄႉ လၢတ်ႈဝႃႈ ပႃႇတီႇသၢင်ႇသီႈ ဢၼ်သိုၵ်းမၢၼ်ႈၵမ်ႉယၼ်ယူႇလင်ဝႆႉၼၼ်ႉ ၼင်ႇႁိုဝ်ၶဝ်တေပေႉၼၼ်ႉ ၶိုင်ႁႃလၢႆးတၢင်း တႃႇလႆႈၶႅပ်းၵၢင်ၸႂ်လူင်ႈၼႃႈႁႂ်ႈလႆႈၼမ် တႃႇသေႇ ဝႃႈၼႆ။တႃႇသူၼ်းတုမ်ႁႃသဵင် ႁွပ်ႈ 3 ၼႆႉ ၶွမ်ႊမသျိၼ်ႊသိုၵ်းမၢၼ်ႈ မၵ်းမၼ်ႈဝႆႉထိုင် ဝၼ်းတီႈ 23/01/2026 ၵၢင်ၶိုၼ်း 12 မူင်း ။ ပေႃးထိုင်ၶၢဝ်းၼၼ်ႉမႃး ၵူႈပႃႇတီႇ တေလႆႈၵိုတ်းၵၢၼ်သူၼ်းတုမ် ၼႆယဝ်ႉ။

သင်ဝႃႈ ဝၢႆးသုတ်းၶၢဝ်းယၢမ်းမၼ်းယဝ်ႉၵေႃႈ တိုၵ်ႉသူၼ်းတုမ်ယူႇ ၊ ပၢႆႉႁႃသဵင်ၸိူဝ်းၼႆႉ တိုၵ်ႉပူၵ်းဝႆႉ မိူၼ်ၵဝ်ႇယူႇ ၸိုင် ယူႇတီႈၸုမ်းဢၼ်ၵုမ်းပႃႇတီႇမိူၼ်ၼင်ႇ ၶွမ်ႊမသျိၼ်ႊပၢင်လိူၵ်ႈတင်ႈ ပိုၼ်ႉတီႈလႂ်ပိုၼ်ႉတီႈၼၼ် ႁိုဝ်ဢမ်ႇၼၼ် ၾၢႆႇလိူမ်ႈလႆႇ ၼႂ်းပိုၼ်ႉတီႈ တေမႃးၽဵဝ်ႈသိမ်းပႅတ်ႈ ။သင်ဝႃႈ ပႃႇတီႇလႂ် ၺႃးၽဵဝ်ႈသိမ်းပၢႆႉၸိူင်ႉၼၼ် တၵ်းလႆႈပၼ်ၵႃႈၸႂ်ႉၸၢႆႇ ဢၼ်လႆႈၽဵဝ်ႈၵဵပ်းသိမ်းပၢႆႉႁႃသဵင်ၸိူဝ်းၼၼ်ႉ ၼႆ ၼႂ်းပိူင်ၶွမ်ႊမသျိၼ်ႊသိုၵ်းမၢၼ်ႈၼၼ်ႉ ပႃးဝႆႉၼင်ႇၼႆ။

သိုၵ်းမၢၼ်ႈ လၢတ်ႈဝႃႈ ပၢင်လိူၵ်ႈတင်ႈၵမ်းၼႆႉ မီးလွင်ႈပူင်ႇသႂ်လူင်ႉလႅင်းၼႆသေ ၶႅပ်းၵၢင်ၸႂ်လူင်ႈၼႃႈ ပၢင်လိူၵ်ႈတင်ႈႁွပ်ႈၼိုင်ႈၼၼ်ႉ မၢင်ပႃႇတီႇ ယင်းဢမ်ႇတၼ်းႁူႉသင် ။ မိူဝ်ႈပိူၼ်ႈတွတ်ႈၶႅပ်းၵၢင်ၸႂ်လူင်ႈၼႃႈၵေႃႈ ဢမ်ႇတၼ်းႁူႉႁၼ် ၼႆယဝ်ႉ ။

ဢိင်ၼိူဝ်လွင်ႈၼႆႈသေ ၽူႈတူင်ႉၼိုင်ၸွမ်းၼႂ်းပႃႇတီႇဢၼ်ၶဝ်ႈလိူၵ်ႈတင်ႈၸွမ်း ၵေႃႉၼိုင်ႈလၢတ်ႈၼႄၼင်ႇၼႆ –
ပေႃးတႃႇတပ်ႉၶဝ်တႄႉ ၶႅပ်းၵၢင်ၸႂ်လူင်ႈၼႃႈ(ကြိုတင်မဲ) မီးၵႃႈႁိုဝ် ပဵၼ်ပိူၵ်ႉပဵၼ်ပိူၵ်ႉလူင်ဢိူဝ်ႈ ၶဝ်တႄႉၶဝ်လႆႈ။ ပေႃးပဵၼ်ပႃႇတီႇၸၢဝ်းၶိူဝ်းသမ်ႉ ၶဝ်တေဢမ်ႇပၼ်တဵမ် ႁဵတ်းၼႆၼေႈ။ ဝႃႈၸႂ်ႉတၢင်ႇယွၼ်းထႅင်ႈၼႆဝႃႈ ၸွင်ႇပၼ်မႃးထႅင်ႈဢမ်ႇႁူႉ။ ပေႃးယဝ်ႉ ၶေႃႈႁၢမ်ႈတၢပ်ႈၵေႃႈ ၼမ်ၼႃႇ။ ဢၼ်ၼၼ်ႉၵေႃႈဢမ်ႇလႆႈ ဢၼ်ၼႆႉၵေႃႈဢမ်ႇလႆႈ ။မဵဝ်းမၼ်းၼမ်ၼႃႇ ။ မၼ်းဢမ်ႇမိူၼ်မိူဝ်ႈပူၼ်ႉမႃးၵူၺ်ႉ ။ ပၢတ်ႈၼႆႉ ၼမ်ၼႃႇ ၶေႃႈႁႄႉႁၢမ်ႈမၼ်းၼႆႉ

ၸူးၸႂ် ၵူၼ်းမိူင်းတႄႉ ၶႂ်ႈႁႂ်ႈ မီးၶွမ်ႊမသျိၼ်ပၢင်လိူၵ်ႈတင်ႈဢၼ်ယူႇၵၢင် ၊ ၶႂ်ႈႁႂ်ႈၵူႈပႃႇတီႇ မီးသုၼ်ႇၽဵင်ႇပဵင်း ။ ဢၼ်ၸတ်းမႃးၼႂ်းမိူင်းႁူမ်ႈတုမ်ၵူႈၵမ်းၵမ်းၼႆႉ ၵမ်ႉဝႃႈ ပႃႇတီႇၼူၵ်ႉယုင်းပဵၼ်ယႂ်ႇ ၊ ၵမ်ႉဝႃႈ ပႃႇတီႇသၢင်ႇသီႈပဵၼ်ယႂ်ႇသေ ၵုမ်ႇပဵၼ်ၶဝ်ၵုမ်းဝၢၼ်ႈၵုမ်းမိူင်းမႃးၵူၺ်း ။ လူင်ပွင်ၸိုင်ႈၵေႃႈ ၸၢဝ်းၶိူဝ်းဢမ်ႇမီးသုၼ်ႇသင်တဵမ်တီႈ ။ မိူၼ်တင်းဝႃႈ ပႃႇတီႇဢၼ်လဵဝ်ပွင်မိူင်းမႃးပၢၼ်သိုပ်ႇပၢၼ်ၵူၺ်းၼႆ – တႅၼ်းၽွင်းၵဝ်ႇမိူင်းတႆးပွတ်းၸၢၼ်းၵေႃႉၼိုင်ႈ လၢတ်ႈၽူႈတွႆႇႁွၵ်ႈၼင်ႇၼႆ။

ငဝ်းလၢႆးမိူဝ်ႈလဵဝ်ၵေႃႈ ပႃႇတီႇၸၢဝ်းၶိူဝ်းၸိူဝ်းဢမ်ႇၸႂ်ႈမၢၼ်ႈ ဢၼ်ၶဝ်ႈလိူၵ်ႈတင်ႈယူႇၼႆႉ လူင်းသူၼ်းတုမ်ယူႇသေတႃႉ ဢမ်ႇလႆႈၶႅပ်းသဵင်ၼမ် ပဵင်း ပႃႇတီႇဢၼ်ၸၢဝ်းမၢၼ်ႈၼမ်း ။မိူၼ်ၼင်ႇ ၼႂ်းမိူင်းတႆးၵေႃႈ ၵူၼ်းမိူင်းတႆး ပၢႆႈၶဝ်ႈမိူင်းထႆးၼမ်လႄႈ ႁူဝ်ၼပ်ႉဢေႇ ။ လိူဝ်ၼၼ်ႉ ၵူၼ်းသူၼ်ၸႂ်ၵၢၼ်မိူင်းၵေႃႈဢမ်ႇၼမ် ။ သမ်ႉပဵၼ်ပၢင်လိူၵ်ႈတင်ႈဢၼ်သိုၵ်းမၢၼ်ႈဢွၼ်ၼမ်းထႅင်ႈလႄႈ ၽႂ်ဢမ်ႇထၢင်ႇယႂ်ႇ ။ ဢမ်ႇၶႂ်ႈတွတ်ႈၶႅပ်းသဵင် ။

ၵမ်းလိုၼ်း ပေႃးပႃႇတီႇတၢင်ႇဢၼ်ပေႉသမ်ႉ ပဵၼ်တၢင်းၵၢၼ်ႁႃႉဢမ်ႇပဵၼ်တႄႉဝႆႉၵမ်းၼိုင်ႈ ဢၼ်ၼႃႈလဵၵ်ႉၶိုၼ်းသမ်ႉ ပဵၼ်တႆးၵူၺ်းၼႆ – ၵူၼ်းၸၢႆး ဢၼ်တူင်ႉၼိုင် ၼႂ်းၵၢၼ်သူၼ်းတုမ် ပႃႇတီႇၵေႃႉၼိုင်ႈ သိုပ်ႇလၢတ်ႈၼင်ႇၼႆ။

ၼၢင်းယိင်း ၽူႈလဵပ်ႈႁဵၼ်းၵၢၼ်လိူၵ်ႈတင်ႈၵေႃႉၼိုင်ႈ လၢတ်ႈၼႄဝႆႉၼင်ႇၼႆ –

ပေႃးမႃးထတ်းသၢင် ၶိုၼ်းတႄႉတႄႉၼႆ ပဵၼ်တၢင်းယူပ်ႈယွမ်းႁဝ်းၶႃႈဢေႃႈ ။ ဢမ်ႇၸိုဝ်ႈဝႃႈ ပႃႇတီႇသၢင်ႇသီႈၶဝ်ပေႉ ။ပိူၼ်ႈၵေႃႈမီး ၽႅၼ်ၵၢၼ်ဝႆႉတၢင်းၼမ်။ ပႃႇတီႇၶဝ်ၵေႃႈ ပဵၼ်ဢၼ်ယႂ်ႇဝႆႉၶႃႈၼေႃႈ ။ဢၼ်ၶဝ်ၶတ်းၸႂ်ၵေႃႈမီးတင်းၼမ် ။ ပဵၼ်ယွၼ်ႉ ၸၢဝ်းၶိူဝ်းႁဝ်းၵေႃႈဢမ်ႇၽွမ်ႉၵၼ် ။မိူၼ်ၸိူင်ႉၼင်ႇဝႃႈ ဢမ်ႇယုမ်ႇၸႂ်ၵၼ်တေႉသေ ဢမ်ႇၶႂ်ႈသႂ်ႇႁေ။ ဢမ်ႇၵမ်ႉထႅမ်ပၢင်လိူၵ်ႈတင်ႈ ။ ႁဵတ်းဢမ်ႇႁဵတ်းၵေႃႈ ဢမ်ႇမီးၽွၼ်းလီသင် ။ ဝူၼ်ႉႁင်းၽႂ်ႁင်းမၼ်းသေ ၼႆ ပေႃးယူႇတီႈၶႃႈဝႃႈ တႄႉ တီႈၼင်ႈဢၼ်ဝႃႈၼႆႉ ႁဝ်းလႆႈတီႈဢိတ်းၼိုင်ႈၵေႃႈ ၶႅၼ်းဢိၼ်ႉၼိုင်ႈၼၼ်ႉၶႃႈၼႃႇၼေႃႈ

လီလီၸႃႉၸႃႉ ပၢင်လိူၵ်ႈတင်ႈဢၼ်သိုၵ်းမၢၼ်ႈဢဵၼ်းဢၢၼ်းၸတ်းတႄႉ သမ်ႉပေႃးတေယဝ်ႉတူဝ်ႈယဝ်ႉ တင်း 3 ၵမ်း ။ ႁွပ်ႈၼိုင်ႈၼၼ်ႉ ၸတ်းၵႂႃႇပၢႆပီ 2025 ၼႆႉသေ ႁွပ်ႈသွင်သမ်ႉ ယဝ်ႉၵႂႃႇႁူဝ်လိူၼ်ၵျၼ်ႊၼိဝ်ႊရီႊ 2026 ၼႆႉ။

လိူၼ်ၵျၼ်ႊၼိဝ်ႊရီႊ 25 ၼႆႉၵူၺ်းၼင်ႇၵဝ်ႇ တေၸတ်းထႅင်ႈ ႁွပ်ႈ 3 ၵမ်းလိုၼ်းသုတ်းယဝ်ႉလႄႈ ထုၵ်ႇၸႂ်ႁိုဝ် ဢမ်ႇထုၵ်ႇၸႂ်ႁိုဝ်ၵေႃႈယဝ်ႉ သိုၵ်းမၢၼ်ႈတႄႉ ၸတ်းယဝ်ႉၵႂႃႇလိူမ်ႈလိူမ်ႈ ။ ၵူႈၸိုင်ႈမိူင်း တေယွမ်းႁပ်ႉႁႃႉဢမ်ႇယွမ်းႁပ်ႉတႄႉဝႆႉၵမ်းၼိုင်ႈ ဢၼ်ၵမ်ႉယၼ်ပၼ်ၵေႃႈသမ်ႉမီးယူႇလႄႈ ၽူႈလဵပ်ႈႁဵၼ်းၵၢၼ်မိူင်းၶဝ်တႄႉ ဢွၼ်ၵၼ်ထတ်းသၢင် ၵူႈလၢႆပိူင် ။
သင်ဝႃႈ ပၢင်လိူၵ်ႈပွၵ်ႈၼႆႉ ယဝ်ႈတူဝ်ႈသေ ၶိုၼ်းမီးသၽႃးမႂ်ႇ ပူၵ်းတင်ႈလႆႈလူင်ပွင်ၸိုင်ႈယဝ်ႉ သိုၵ်းမၢၼ်ႈၸတ်းၼင်ႇၽႅၼ်ၶဝ်ၶႂ်ႈပဵၼ်လႆႈၸိုင် မိၼ်းဢွင်ႇလၢႆႇ ၸၢင်ႈၶိုၼ်ႈပဵၼ်ၸွမ်ၸိုင်ႈမိူင်းႁူမ်ႈတုမ်။ ဝၢႆးၼၼ်ႉ သိုၵ်းမၢၼ်ႈ တေၸၢင်ႈမီး ၸွမ်ၸိၵ်းသိုၵ်းမၢၼ်ႈၵေႃႉမႂ်ႇမႃး ။ ငၢႆးမိူၼ်မိူဝ်ႈ ပၢင်လိူၵ်ႈတင်း 2010 ၼၼ်ႉ ဝၢႆးသေ ဢူးတဵင်းၸဵင်ႇ ပဵၼ်ၸွမ်ၸိုင်ႈယဝ်ႉ ၶတ်းလိူၵ်ႈဢဝ် ဢူးမိၼ်းဢွင်ႇလၢႆႇ ၶိုၼ်းပဵၼ်ၸွမ်ၸိၵ်းတပ်ႉသိုၵ်းမၢၼ်ႈမႃး ထိုင်ႁၢၼ်ႉၼႆႉ ၼႆ ၽူႈထတ်းသၢင်ၵၢၼ်မိူင်းၶဝ်လၢတ်ႈၼင်ႇၼႆ။

တႃႇတေပဵၼ်မႃးလႆႈ ပၢင်လိူၵ်ႈတင်ႈၼႆႉၵေႃႈ သိုၵ်းမၢၼ်ႈ ၶိုင်ၵူႈလၢႆး ။ ဢွင်ႈတီႈဢၼ် ၸုမ်းလုၵ်ႉၽိုၼ်ႉၶဝ် ယိုတ်းဝႆႉၸိူဝ်းၼၼ်ႉၵေႃႈ ပိုင်ႈဢိင်ဢႃႇၼႃႇၶႄႇသေ ၶိုင်ဢဝ်ၶိုၼ်း လၢႆဝဵင်း ။ ၵိုင်ႉၵၢင်ႉၸႂ်ႉလၢႆးၵျၢမ်းသေဢဝ်ၶိုၼ်း မိူၼ်ၼင်ႇ ၸႂ်ႉႁိူဝ်းမိၼ်သေ ပွႆႇမၢၵ်ႇလူင်မၢၵ်ႇဢွၼ်ႇသႂ်ႇၸွမ်းပိုၼ်ႉတီႈဢၼ်တၢင်ႇၸုမ်းယိုတ်းဝႆႉၸိူဝ်းၼၼ်ႉ လူၺ်ႈဢမ်ႇတူၺ်းၵူၼ်းဝၢၼ်ႈၵူၼ်းမိူင်း ။

ၸွမ်းၼင်ႇ ၸုမ်းပႂ်ႉတူၺ်းပၼ်ႁႃၵၢၼ်မိူင်းၵၢၼ်သိုၵ်း ပဋိပက္ခတွေစောင့်ကြည့်တဲ့ လွတ်လပ်တဲ့အဖွဲ့အစည်း (ACLED) ႁၢႆးငၢၼ်းဝႆႉတႄႉ 2025 ၼႆႉ သိုၵ်းမၢၼ်ႈၸႂ်ႉသၢႆၵၢၼ်မိၼ် လေႃႇတိုၵ်း ၼမ်လိူဝ်သေ 2021 မိူဝ်ႈတႄႇယိုတ်းမိူင်းၼၼ်ႉ 27 ပုၼ်ႈလူးၵွၼ်ႇဝႃႈၼႆ။

ၸွမ်းၼင်ႇ ၸုမ်းတူၺ်းသုၼ်ႇလႆႈလုမ်ႈၾႃႉၶဝ် မၢႆဝႆႉတႄႉ ၵွၼ်ႇၼႃႈ ပၢင်လိူၵ်ႈတင်ႈ မိူဝ်ႈဝၼ်းတီႈ 10/12/2025 ၼႆႉ သိုၵ်းမၢၼ်ႈဢဝ်မၢၵ်ႇပွႆႇသႂ်ႇ ႁူင်းယႃ ၸႄႈဝဵင်းမရွၵ်ႉဢူး တီႈၸႄႈမိူင်းရၶၢႆႇ ၵူၼ်းလူႉတၢႆ 33 ၵေႃႉ ၼပ်ႉပႃးလုၵ်ႈဢွၼ်ႇတိုၵ်ႉၵိူတ်ႇ ။ ပဵၼ်ပိူင်ပဵၼ်ႁုၵ်ႉႁၢႆႉလူင်ဢၼ်ၼိုင်ႈ ဢၼ်သိုၵ်းမၢၼ်ႈ ၸႂ်ႉသၢႆၵၢၼ်မိၼ်သေ တိုၵ်းတေႃး ဝႃႈၼႆ။
ပွတ်းတၢင်းမိူင်းတႆးၵေႃႈ ၼႂ်းဝၼ်းတီႈ 6/12/2025 ၼၼ်ႉၵေႃႈ ႁိူဝ်းမိၼ်သိုၵ်းမၢၼ်ႈပွႆႇမၢၵ်ႇ တီႈဝၢၼ်ႈမိတ်ႉသူင်ႇ (မြစ်ဆုံရွာ) ဢၼ်မီးၼႂ်းၵႄႈ ဝဵင်းမိူင်းမိတ်ႈလႄႈ မၢၼ်ႈပဵင်း ။ မၢၵ်ႇလူင်တူၵ်း 8 လုၵ်ႈ တႅၵ်ႇ 7 လုၵ်ႈ တိူဝ်ႉၵူၼ်းတၢႆ 11 ၵေႃႉ။ ပဵၼ်ၵူၼ်းၸၢႆး 2 ၵေႃႉ ၵူၼ်းယိင်း 9 ၵေႃႉ ။ ၼႂ်းၵူၼ်းလူႉတၢႆၼၼ်ႉ ပႃး လုၵ်ႈဢွၼ်ႇ လႄႈ မႄႈမၢၼ်း ။

ဝၼ်းတီႈ 09/01/2026 ၼၼ်ႉၵေႃႈ သိုၵ်းမၢၼ်ႈဢဝ်ႁိူဝ်းမိၼ်တိုၵ်း ပွႆႇမၢၵ်ႇသႂ်ႇ ႁိမ်းဝၢၼ်ႈ သႅၼ်တေႃ ဢၼ်မီးၼိူဝ်သဵၼ်ႈတၢင်းၸႄႈဝဵင်းမိူင်းယႆၵႂႃႇတၢင်း ဝဵင်းသီႇပေႃႉ ပဵၼ်ဢွင်ႈတီႈသိုၵ်းၵဝ်ႈၵၢင်ႉ (MNDAA) တူင်ႉၼိုင်ယူႇသဝ်းဝႆႉ ။ လိူဝ်ၼၼ်ႉ ၵႂႃႇပွႆႇမၢၵ်ႇတူၵ်းသႂ်ႇ ၼႂ်းထိူၼ်ႇ ႁိမ်းဝၢၼ်ႈ ၼမ်ႉၸၢမ် လႄႈ ဝၢၼ်ႈၼမ်ႉၵူမ်ႇ ဢမ်ႇယွမ်း 5 လုၵ်ႈ။ မီးၵူၼ်းမၢတ်ႇတိူဝ်ႉ ထိုင်တီႈလႆႈၶဝ်ႈႁူင်းယႃယူႇ ၼႆ ၵူၼ်းပိုၼ်ႉတီႈလၢတ်ႈ။

ၸင်ႇၼၼ် ပၢင်လိူၵ်ႈတင်ႈၼႆႉ သိုၵ်းမၢၼ်ႈ ၵႃႈပေႉၶႂ်ႈဝႃႈ ပဵၼ်ပၢင်လိူၵ်ႈတင်ႈ ဢၼ်မီးပႃႇတီႇၸုမ်ႇၵူႈ မီးလွင်ႈၽဵင်ႇပဵင်းပဵၼ်ထမ်းဝႃႈၼႆၵေႃႈယဝ်ႉ ဢိင်ၼိူဝ် ပိူင်ပဵၼ်တေႉ ဢၼ်ပဵၼ်ယူႇမီးယူႇၸိူဝ်းၼႆႉသေ မၼ်းထၢင်ႇၸႅင်ႈႁႅင်းၼႃႇ ထတ်းသၢင်တူၺ်းႁင်းၽႂ်မၼ်းလႃႈ ၼႆ ၵူၼ်းၼုမ်ႇလဵပ်ႈႁဵၼ်းၵၢၼ်မိူင်းၵေႃႉၼိုင်ႈလၢတ်ႈၼင်ႇၼႆ။