ၵႃးတၢင်ႇၵုၼ်ႇ၊ ရူတ်ႉၶိူင်ႈ လႄႈ ရူတ်ႉၵႃးၵူႈသႅၼ်းၸိူဝ်းလတ်းၵႂႃႇမႃးၼိူဝ်သဵၼ်ႈတၢင်း ဝဵင်းသႅၼ်ဝီ – ၵုၼ်လူင် မိူင်းတႆးပွတ်းႁွင်ႇၼႆႉ ၵႆႉပဵၼ်ၽေးၵိုင်ႉၵၢင်ႉသေ ပိၼ်ႈ၊ ၽႃႇၵၼ်ၸဵမ် ၸိူဝ်းၼႆႉ ၼႆယဝ်ႉ။

ရူတ်ႉၵႃးၸိူဝ်းၵႆႉပဵၼ်ၽေးၵိုင်ႉၵၢင်ႉၼႆႉ ၵမ်ႈၼမ်ပဵၼ်ၵႃးဢၼ်တေႃႉတၢင်ႇၶူဝ်းၵုၼ်ႇတၢင်းမိူင်းၶႄႇ ၶဝ်ႈမႃးတၢင်းမိူင်းတႆးပွတ်းႁွင်ႇ။

ၵူၼ်းမိူင်းၵေႃႉယူႇၼႂ်းပိုၼ်ႉတီႈ လၢတ်ႈၼႄဝႃႈ “ဢၼ်ၵႆႉပိၼ်ႈၼႆႉပဵၼ်ၵႃးလူင်ၸိူဝ်းသႂ်ႇမၢႆၶႄႇႁႄ ၶဝ်ႈမႃးၼၼ်ႉယဝ်ႉ။ ပေႃးပဵၼ်ၵႃးတၢင်ႇၵုၼ်ႇတၢင်းမိူင်းၶႄႇၼႆႉ ၵမ်ႈၼမ်ပဵၼ်သီလႅင်လၢႆလၢႆ။ ၶဝ်ဢမ်ႇထိင်း လႆႈတၢင်းဝႆးၶဝ်ၼၼ်ႉၼႃႇ။ ၵူၼ်းႁေႃႈမၼ်းၵေႃႈ လႅပ်ႈဢမ်ႇႁူႉလွင်ႈသဵၼ်ႈတၢင်းလီလီ။ သဵၼ်ႈၼၼ်ႉ ၵမ်းၵမ်း ၵႆႉၽႃႇၵၼ်၊ ပေႃးဢမ်ႇၽႃႇၵၼ်ၵေႃႈ ၵႃးတၢင်ႇၵုၼ်ႇပိၼ်ႈ။ ႁဵတ်းၼႆယူႇတိၵ်းတိၵ်းယဝ်ႉ” ဝႃႈၼႆ။

ၵႃးလူင်ဢၼ်သႂ်ႇမၢႆရူတ်ႉမိူင်းၶႄႇသေၶဝ်ႈမႃးတၢင်းၼႂ်းမိူင်းတႆးၼႆႉ ၵမ်ႈၼမ်တေႃႉဢဝ်ၵုၼ်ႇၵူႈသႅၼ်းသႅၼ်း တၢင်းမိူင်းၶႄႇလူင်းမႃးယဝ်ႉ ၶိုၼ်းတၢင်ႇထၢၼ်ႇႁိၼ်၊ ၵုၼ်ႇလိပ်းၵူႈသႅၼ်းသႅၼ်း ၵႂႃႇတၢင်းၽၵ်းတူလႅၼ်လိၼ် မိူင်းၶႄႇ -မိူင်းတႆး ၶျိၼ်ႊသူၺ်ႇႁေႃႇ ၼႆယဝ်ႉ။

ၵူၼ်းမိူင်းသႅၼ်ဝီလၢတ်ႈၼႄတီႈၽူႈတွႆႇႁွၵ်ႈဝႃႈ “ၵႃးၸိူဝ်းၼၼ်ႉ ၶဝ်ၵႂႃႇမႃးၵၢင်ၶိုၼ်းၵမ်ႈၼမ်ယဝ်ႉ။ ပေႃးၵၢင်ၼႂ်မိူင်းလႅင်းၵေႃႈ သမ်ႉပေႃးလႆႈႁၼ်ၵႃးၶဝ်ပိၼ်ႈ၊ ၵႃးၽႃႇၵၼ်ဝႆႉၸိူဝ်း ၼႆႉ။ မၢင်ၸိူဝ်းသမ်ႉ ႁေႃႈတူၵ်းႁူၺ်ႈႁႄ ပိၼ်ႈယူႇၵေႃႈမီး” ၼႆယဝ်ႉ။

ဝၢႆးလင်ပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 မႃး လုၵ်ႉတီႈၾၢႆႇၼွၵ်ႈဝဵင်းလႃႈသဵဝ်ႈ တေႃႇပေႃးထိုင် ၸႄႈဝဵင်းသႅၼ်ဝီ – ၵုၼ်လူင်-ႁူဝ်ပၢင်ႇ-လႅၼ်လိၼ်ၽၵ်းတူၶၢမ်ႈမိူင်းၶႄႇ ၶျိၼ်ႊသူၺ်ႇႁေႃႇၸိူဝ်းၼႆႉ ပဵၼ်ၸုမ်းသိုၵ်းၵဝ်ႈၵၢင်ႉ (MNDAA) ၵုမ်းၵမ်ဝႆႉ။

တႄႇပီ 2024 မႃး ရူတ်ႉၵႃးတၢင်ႇၶူဝ်းၵုၼ်ႇၵူႈသႅၼ်းသႅၼ်း ဢၼ်လုၵ်ႉတၢင်းမိူင်းၶႄႇမႃးမိူင်းတႆးၼၼ်ႉ သႂ်ႇမၢႆရူတ်ႉမိူင်းၶႄႇသေ ၶဝ်ႈမႃးထိုင်ၼႂ်းမိူင်းတႆးပွတ်းႁွင်ႇလႆႈၵမ်းသိုဝ်ႈ ၼႆ ယဝ်ႉ။