ႁူင်းၸၢၵ်ႈဢၼ်ၼိုင်ႈ ၼႂ်းမိူင်းၶႄႇပွတ်းႁွင်ႇ ပဵၼ်လွင်ႈတႅၵ်ႇၽူင်ႉၾႆးမႆႈႁၢင်ႈႁႅင်း ၵူၼ်းတၢႆ 2 ၵေႃႉ၊ မၢတ်ႇၸဵပ်း 84 ၵေႃႉ၊ ႁၢႆလၢႆဝႆႉထႅင်ႈ 5 ၵေႃႉ – သိုဝ်ႇၶၢဝ်ႇၸိုင်ႈမိူင်းႁၢႆးငၢၼ်းဝႆႉ (မိူဝ်ႈၼႆႉ) ဝၼ်းတီႈ 19 လိူၼ်ၵျႅၼ်ႊၼိဝ်ႊရီႊ ၼင်ႇၼႆ။
လွင်ႈတႅၵ်ႇၽူင်ႉၼႆႉ ပဵၼ်ၵႂႃႇမိူဝ်ႈဝႃး ဝၼ်းတီႈ 18 လိူၼ်ၵျႅၼ်ႊၼိဝ်ႊရီႊ ယၢမ်းဝၢႆးဝၼ်း မွၵ်ႈ 3 မူင်း တီႈႁူင်းၸၢၵ်ႈ Baogang United Steel၊ ၽွင်းမိူဝ်ႈ ၼႂ်းႁူင်းၸၢၵ်ႈ တႅၵ်ႇၼၼ်ႉ ၸွမ်းႁိမ်းႁွမ်းပိုၼ်ႉတီႈၵေႃႈ တုမ်ႉယွၼ်ႈသၼ်ႇၶွၼ်းၵႂႃႇႁၢဝ်ႈႁႅင်း။
ၼႂ်းၵူၼ်း ၸိူဝ်းၶိုၼ်ႈႁူင်းယႃဝႆႉၼၼ်ႉ တႃႇ 5 ၵေႃႉ မၢတ်ႇၸဵပ်းႁၢဝ်ႈႁႅင်းဝႆႉ။ ယၢမ်းလဵဝ် ၽူႈမီးပုၼ်ႈၽွၼ်းၶဝ် တိုၵ်ႉၵူတ်ႇထတ်း လွင်ႈတၢင်းပိူင်ပဵၼ်မၼ်းဝႆႉယူႇ ဝႃႈၼႆ။
ႁူင်းၸၢၵ်ႈ ဢၼ်ပဵၼ်လွင်ႈတႅၵ်ႇၽူင်ႉၵႂႃႇၼႆႉ ပဵၼ်ႁူင်းၸၢၵ်ႈႁႄႈလဵၵ်း ၶွင်လူင်ပွင်ၸိုင်ႈ။ တီႈမိူင်းၶႄႇၼႆႉ ၵႆႉပဵၼ်ၽေးၵိုင်ႉၵၢင်ႉၼႂ်းႁူင်းၵၢၼ်၊ ႁူင်းၸၢၵ်ႈတႅၵ်ႇ၊ လိၼ်ၵူၼ်ႇ လႄႈ မေႃႇႁႄႈ ၵူၼ်ႇပင်း ၸိူဝ်းၼႆႉ။
မိူဝ်ႈပီ 2015 ပူၼ်ႉမႃးၼၼ်ႉၵေႃႈ ပဵၼ်လွင်ႈတႅၵ်ႇၽူင်ႉယႂ်ႇလူင် သွင်ဢၼ် တီႈတႃႈႁိူဝ်း တီႇယႅၼ်ႇၵျိၼ်း မိူင်းၶႄႇ၊ မီးၵူၼ်းလူႉတၢႆ 173 ၵေႃႉ၊ မၢတ်ႇၸဵပ်းၼပ်ႉႁူဝ်ပၢၵ်ႇထႅင်ႈ၊ ပိုၼ်ႉတီႈၸွမ်းႁိမ်းႁွမ်းဝဵင်း လူႉၵွႆၵႂႃႇတၢင်းၼမ်။
မိူၼ်ၼႆ ၼႂ်းလိူၼ်မေႇ ပီ 2025 ၼၼ်ႉၵေႃႈ ႁူင်းၸၢၵ်ႈ ၶေႊမီႊၶိူဝ်ႊ ဢၼ်ၼိုင်ႈ ၼႂ်းမိူင်းၶႄႇပွတ်းဢွၵ်ႇ တႅၵ်ႇၽူင်ႉ ၵူၼ်းတၢႆ 5 ၵေႃႉ၊ မၢတ်ႇၸဵပ်းဢမ်ႇယွမ်း 19 ၵေႃႉ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ