သူၼ်မွၵ်ႇ (ဗိုလ်ချုပ်ပန်းခြံ) ဢၼ်မီးၵၢင်ဝဵင်းတူၼ်ႈတီး ၸိုင်ႈတႆးပွတ်းၸၢၼ်းၼၼ်ႉ ႁွင်ႈၵၢၼ်ၾၢႆႇလိူမ်ႈလႆႇဢၢၼ်း ယႃႉပႅတ်ႈသေ တေသၢင်ႈ ႁွင်ႈႁၢၼ်ႉတၢင်းၶၢႆ   ။

  ႁွင်ႈၵၢၼ်ၾၢႆႇလိူမ်ႈလႆႇ ႁူမ်ႈတင်းၶွမ်ႊပၼီႊၵေႃႇသၢင်ႈ တၢင်ႇလိၵ်ႈယွၼ်း ဝႆႉတီႈ လူင်ပွင်ၸိုင်ႈမိူင်း ၼႂ်းလိူၼ်ၼူဝ်ႊဝႅမ်ႊပိူဝ်ႊ ဝၼ်းတီႈ 5 ပီ 2025  ပူၼ်ႉမႃး ။

 ၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ဢမ်ၵိုင်ႇလီယႃႉ၊ သူၼ်မွၵ်ႇၼၼ်ႉ ပဵၼ်တီႈၵူၼ်းပိုၼ်ႉတီႉၵႂႃႇလႄႇလိုဝ်ႈႁိူဝ်ႉ ၊ တီႈတူၼ်ႈတီးၼႆႉ ဢၼ်ဢမ်ႇလႆႈပၼ်ငိုၼ်းသေၶဝ်ႈၼႆႉ မီးတီႈၼၼ်ႈၵူၺ်းယဝ်ႉ ၊   ပေႃးသၢင်ႈႁွင်ႈႁၢၼ်ႉတၢင်းၶၢႆၸိူဝ်းၼၼ်ႉ ၼႂ်းဝဵင်းၼႆႉ တေဢမ်ႇမီးတၢင်းႁၢင်ႈလီသင်ယဝ်ႉ ၊ ပဵၼ်လၢႆး ၶဝ်ႁဵတ်းၵိၼ်ၵူၺ်း”- ဝႃႈၼႆ ။

ႁွင်ႈႁၢၼ်ႉဢၼ်တေသၢင်ႈတီႈသူၼ်မွၵ်ႇ ဢွင်ႇသၢၼ်းၼၼ်ႉယူႇတီႈႁွင်ႈၵၢၼ်ၾၢႆႇလိူမ်ႈလႆႇလႄႈ ၶွမ်ႊပၼီႊ (ရှမ်းချယ်ရီတောင်တန်း) ဢဝ်ပုၼ်ႈၽွၼ်း ဝႆႉ – လႆႈႁူႉၼင်ႇၼႆ ။

ၵဵဝ်ၵပ်းလွင်ႈႁွင်ႈၵၢၼ်ၾၢႆႇလိူမ်ႈလႆႇတေသၢင်ႈႁွင်ႈႁၢၼ်ႉတီႈသူၼ်မွၵ်ႇၼႆႉ ယူႇတီႈၵူၼ်းပိုၼ်ႉတီႈ ၵိုင်ႇလီသၢၼ်ၶတ်းႁၢဝ်ႈႁႅင်းၼႆ ၵူၼ်းၸၢႆးပိုၼ်ႉတီႈၵေႃႉၼိုင်ႈလၢတ်ႈၼင်ႇၼႆ ။

ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ထုၵ်ႇလီသၢၼ်ၶတ်းတေႉတေႉလွင်ႈၼႆႉ ဢမ်ႇလီယွမ်းႁပ်ႉ  ၊ လွင်ႈၼႆႉၵူၼ်းပိုၼ်ႉတီႈၵေႃႈ ပႆႇပေႃးႁူႉၵၼ် ၊ ပႃႇတီႇပဢူဝ်းဢၼ်ဢွင်ႇပေႉပၢင်လိူၵ်ႈတင်ႈ  တီႈတူၼ်ႈတီးၼႆႉၵေႃႈ ၶႂ်ႈဢဝ်မိူင်းတႆး ႁဵတ်းမိူင်းပဢူဝ်းၵူၺ်း  ၶဝ်ဢမ်ႇသူၼ်ၸႂ်လွင်ႈၼႆႉ ၊ ပႃႇတီႇသင်ႇသီႈၵေႃႈယွၼ်ႉၶဝ်သုမ်းလႄႈ ဢမ်ႇသူၼ်ၸႂ်လွင်ႈၼႆႉ”- ဝႃႈၼႆ ။

တီႈဝဵင်းတူၼ်ႈတီးသူၼ်မွၵ်ႇမီးသၢမ်ဢၼ် ပဵၼ်သူၼ်မွၵ်ႇမျႃႉၵၼ်ႇတႃႇ (မြကန်သာပန်းခြံ) ၊ သူၼ်မွၵ်ႇၶူဝ်ၽႅၼ်( ကြိုးတံတားပန်းခြံ) လႄႈ သူၼ်မွၵ်ႇ ဢွင်ႇသၢၼ်း( ဗိုလ်ချုပ်ပန်းခြံ)   ။ ၼႂ်းၼၼ်ႉ ဢၼ်ၵူၼ်းပိုၼ်ႉတီႈဢမ်ႇလႆႈပၼ်ငိုၼ်းၶဝ်ႈၼၼ်ႉ ၵိုတ်းသူၼ်မွၵ်ႇ ၸွမ်သိုၵ်းဢွင်ႇသၢၼ်း (ဗိုလ်ချုပ်ပန်းခြံ )ဢၼ်လဵဝ်  ၼႆႉၵူၺ်းယဝ်ႉ ။

ၼႂ်းသူၼ်မွၵ်ႇၼၼ်ႉ ၼႄဝႆႉ ႁုၼ်ႇႁၢင်ႈ ၸွမ်သိုၵ်းဢွင်ႇသၢၼ်းသေဢမ်ႇၵႃး ၼႄပႃး ႁၢင်ႈ ဢၼ်ပဵၼ်တီႈမၢႆတွင်း လိၵ်ႈႁူမ်ႈမၢႆပၢင်လူင် ဢၼ်ၵိုၵ်းပိုၼ်း ဢၼ်လႆႈလူင်းလၢႆးမိုဝ်း မိူဝ်ႈပီ1947 တႃႇပဵၼ်တီႈမၢႆတွင်း ၵၢၼ်လုၵ်ႉၽိုၼ်ႉ လွတ်ႈလႅဝ်းသဝ်းၶေႃ မိူင်းမၢၼ်ႈၼၼ်ႉ ၼႆယဝ်ႉ။