ပၢင်လိူၵ်ႈတင်ႈ ၵမ်းထိ 1 ၼႂ်းမိူင်းတႆးသၢမ်ၸႄႈဝဵင်း ဢၼ်သိုၵ်းမၢၼ်ႈယိုတ်းမိူင်း ဢွၼ်ၼမ်းၸတ်းႁဵတ်းၼႂ်းဝၼ်းတီႈ 28/12/2025 ၼႆႉ ယဝ်ႉတူဝ်ႈၵႂႃႇယဝ်ႉသေ ယၢမ်းလဵဝ်တိုၵ်ႉပႂ်ႉၶေႃႈတွပ်ႇ တႃႇႁူႉလႆႈဝႃႈ ပႃႇတီႇလႂ် လႆႈၶႅပ်းသဵင်ၵၢင်ၸႂ်ၵႃႈႁိုဝ်ၼႆယူႇ ။

ယၢမ်းလဵဝ် တႃႇႁူႉလႆႈဝႃႈ ၼႂ်းဝဵင်းမူႇၸေႊတင်းသဵင်ႈၼႆႉ ၸိူဝ်းမီးပုၼ်ႈၽွၼ်းပႂ်ႉတီႈ ႁူင်းပၼ်သဵင် ၼႂ်းဝဵင်းမူႇၸေႊ ယင်းတိုၵ်ႉၼပ်ႉဢၢၼ်ႇ ၶႅပ်းမႄးသေ ပႂ်ႉၶႅပ်းၵၢင်ၸႂ်ဢၼ်သႂ်ႇဝႆႉလူင်ႈၼႃႈ မိူဝ်ႈဝၼ်းတီႈ 17 တေႃႇထိုင် ဝၼ်းတီႈ 27 လိူၼ်တီႊသႅမ်ႊပိူဝ်ႊၼၼ်ႉယူႇ ၼႆယဝ်ႉ။

ၽူႈတူင်ႉၼိုင်ႁဵတ်းၵၢၼ်တူင်ႇဝူင်းၵူၼ်း ၼႂ်းဝဵင်းမူႇၸေႊၵေႃႉၼိုင်ႈ လၢတ်ႈၼႄတီႈၽူႈတွႆႇႁွၵ်ႈဝႃႈ “ယၢမ်းလဵဝ် တႃႇႁူႉလႆႈၶေႃႈတွပ်ႇဝႃႈ ၽႂ်ပေႉၼၼ်ႉ တိုၵ်ႉပႂ်ႉ (ကြိုတင်မဲ) ယူႇ။ ၶႅပ်းၵၢင်ၸႂ်လူင်ႈၼႃႈၼၼ်ႉသမ်ႉ ပဵၼ်ဝႆႉ သိုၵ်း 3000 ၵေႃႉ ပျီႇတူႉၸိတ်ႉ 3000 ၵေႃႉ တင်းမူတ်းၼႆႉ မီးမွၵ်ႈ 6000 ၵေႃႉၼႆႉ ပဵၼ်ၵူၼ်းပႃႇတီႇသၢင်ႇသီႈတင်းမူတ်း။ ၶႅပ်းမႄးၸိူဝ်းၼႆႉ ၶဝ်ဢဝ်ၵႂႃႇၵဵပ်းဝႆႉတီႈႁူင်းပလိၵ်ႈတင်းမူတ်း” ၼႆယဝ်ႉ။

ၼႂ်းဝဵင်းမူႇၸေႊၼႆႉ မီးပႃႇတီႇၵၢၼ်မိူင်း ၸိူဝ်းမီးလွင်ႈၸမ်ၸႂ်ၵၼ်တင်း သိုၵ်းမၢၼ်ႈယိုတ်းမိူင်း ၶဝ်ႈလိူၵ်ႈတင်ႈ တင်းသဵင်ႈမီးယူႇ 9 ပႃႇတီႇ။ ဢၼ်ႁႅင်းယႂ်ႇလိူဝ်ပိူၼ်ႈသုတ်းတႄႉ ပဵၼ်ပႃႇတီႇသၢင်ႇသီႈ လႄႈ ပႃႇတီႇသိူဝ်ၽိူၵ်ႇ တင်း ပႃႇတီႇၵူၼ်းမိူင်း (PPP) ။

ၵူၼ်းမိူင်းမူႇၸေႊ လၢတ်ႈၼႄလွင်ႈငဝ်းလၢႆးၵၢၼ်လိူၵ်ႈတင်ႈ ဝၼ်းမိူဝ်ႈၼႆႉတီႈၽူႈတွႆႇႁွၵ်ႈဝႃႈ “ဢၼ်ပဵၼ်ပျီႇတူႉၸိတ်ႉ လႄႈသိုၵ်းၼႂ်းဝဵင်းမူႇၸေႊၸိူဝ်းၼႆႉတင်းမူတ်းၼႆႉ ၶဝ်လႆႈသႂ်ႇပၼ် ပႃႇတီႇသၢင်ႇသီႈတင်းမူတ်းၶႃႈၼႃႇ။ ဢၼ်တေပေႉပၢင်လိူၵ်ႈတင်ႈပွၵ်ႈၼႆႉ ၼႂ်းဝဵင်းမူႇၸေႊတႄႉ တေပဵၼ်ပႃႇတီႇသၢင်ႇသီႈ (USDP) ၵူၺ်း” ဝႃႈၼႆ။

ၼႂ်းဝဵင်းမူႇၸေႊၼႆႉ ႁူင်းပၼ်သဵင်းတင်းသဵင်ႈမီးယူႇ 18 တီႈ ၊ ႁူဝ်ၼပ်ႉၵူၼ်းၸိူဝ်းမီးသုၼ်ႇပၼ်သဵင် တင်းသဵင်ႈမီး 44060 ၵေႃႉၼႆ ၾၢႆႇၶွမ်ႊမသျိၼ်ႊၵမ်ၵၢၼ်ပၢင်လိူၵ်ႈတင်ႈ မိူင်း ႁူမ်ႈတုမ် ပိုၼ်ၽၢဝ်ႇဢွၵ်ႇ ပဵၼ်တၢင်းၵၢၼ်ဝႆႉ။