မိူဝ်ႈၼႆႉ ဝၼ်းတီႈ 28/12/2025 ပဵၼ်ဝၼ်းသိုၵ်းမၢၼ်ႈယိုတ်းမိူင်းႁဵတ်းပၢင်လိူၵ်ႈတင်ႈ ၸႂ်ႉၵူၼ်းမိူင်း ၼႂ်းမိူင်းတႆးပွတ်းႁွင်ႇ၊ ပွတ်းၸၢၼ်း၊ ပွတ်းဢွၵ်ႇ ၵႂႃႇပၼ်သဵင်တီႈႁူင်းပၼ်သဵင် ၼႂ်းၶဵတ်ႇလိူၵ်ႈတင်ႈၽႂ်မၼ်း တင်ႈတႄႇၶၢဝ်းယၢမ်းၵၢင်ၼႂ် 6 မူင်း တေႃႇထိုင် ယၢမ်းတၢမ်းၶမ်ႈ 4 မူင်း ၼႆယဝ်ႉ။

ၼႂ်းမိူင်းတႆးပွတ်းႁွင်ႇတႄႉ ၸတ်းႁဵတ်းပၢင်လိူၵ်ႈတင်ႈၵႂႃႇ သၢမ်ဝဵင်းၵူၺ်း။ ပဵၼ်ဝဵင်းမူႇၸေႊ၊ ဝဵင်းလႃႈသဵဝ်ႈ လႄႈ ဝဵင်းၼွင်ၶဵဝ်။ ႁူင်းပၼ်သဵင်ၼႆႉ သိုၵ်းမၢၼ်ႈ တမ်းဝၢင်းႁဵတ်းလႆႈ ၸွမ်းၼႂ်းဝဵင်းၵူၺ်း ဢမ်ႇပႃးၼွၵ်ႈဝဵင်း။

ၸၢႆးသႃႇ ၵူၼ်းမိူင်းဝဵင်းမူႇၸေႊၵေႃႉႁူႉႁၼ်ငဝ်းလၢႆး ၸွမ်းႁူင်းပၼ်သဵင် ၼႂ်းဝဵင်းမူႇၸေႊ လၢတ်ႈၼႄတီႈၽူႈ တွႆႇႁွၵ်ႈဝႃႈ “ၶဝ်ၼုင်ႈၶူဝ်းသိုၵ်း၊ ၶူဝ်းယႄး (ပလိၵ်ႈ) ၶဝ်ႁႄ ယိပ်းၵွင်ႈ ႁႄ ပႂ်ႉဝႆႉၸွမ်းၵဵဝ်ႇ၊ ၸွမ်းႁူဝ်တၢင်းၸိူဝ်း တေၶဝ်ႈၵႂႃႇတီႈႁူင်းပၼ်သဵင်ၼၼ်ႉ လၢႆၸၼ်ႉဢေႃႈ။ ႁၢၼ်ႉၶၢႆၵုၼ်ႇယွႆႈ၊ ႁၢၼ်ႉၶၢႆတၢင်းၵိၼ်ၵူႈသႅၼ်းသႅၼ်း ၸိူဝ်းမီးၸမ် တူင်ႇတၢင်ႇႁူင်းပၼ်သဵင်ၶဝ်ၼၼ်ႉၵေႃႈ ၺႃးသင်ႇဢိုတ်းဝႆႉ။ ၶဝ်ဢမ်ႇပၼ်ပိုတ်ႇလၢၼ်ႉၶႃႈမိူဝ်ႈၼႆႉ” ၼႆယဝ်ႉ။

ၼင်ႇႁိုဝ်ႁူင်းပၼ်သဵင် တေမီးလွင်ႈႁူမ်ႇလူမ်ႈၼႆသေ သိုၵ်းမၢၼ်ႈၼႆႉ ဢမ်ႇပၼ်ၵူၼ်းမိူင်းၸိူဝ်းတေၵႂႃႇ တွတ်ႈမႄးပၼ်သဵင် သႂ်ႇၶႅပ်းၵၢင်ၸႂ် တီႈႁူင်းပၼ်သဵင်ပႃးထႅင်ႈ ၼႆယဝ်ႉ။

မိူၼ်ၼႆၼင်ႇၵဝ်ႇ ၵူၼ်းမိူင်းၼႂ်းဝဵင်းလႃႈသဵဝ်ႈ ၸိူဝ်းၵႂႃႇပၼ်သဵင်ၵေႃႈ ၺႃးသိုၵ်းမၢၼ်ႈႁၢမ်ႈ ဢမ်ႇပၼ်ဢဝ် ၾူၼ်းၵႂႃႇၸွမ်း ၼႆယဝ်ႉ။