မိူဝ်ႈဝႃး ဝၼ်းတီႈ 23/12/2025 ယၢမ်းၵၢင်ၶမ်ႈမွၵ်ႈ 8 မူင်း ၾႆးမႆႈ တီႈၵဵပ်းၼမ်ႉမၼ်းၸၢၵ်ႈ (ၵူဝ်ႇတွင်ႇ) ၶွင် ၸုမ်းသိုၵ်းတဢၢင်း (TNLA) တီႈပွၵ်ႉသႃႇယႃႇၵုင်း (သာယာကုန်း) ၸႄႈ ဝဵင်းၼမ်ႉၶမ်း မိူင်းတႆးပွတ်းႁွင်ႇ။

ဢွင်ႈတီႈၾႆးမႆႈၼၼ်ႉ ပဵၼ်တီႈၶင်ၼမ်ႉမၼ်းၸၢၵ်ႈ ၵူႈသႅၼ်းသႅၼ်းၵူၺ်းဢမ်ႇၵႃး ၼႂ်းဝၢင်းဢၼ်ၾႆးမႆႈ ၼၼ်ႉ မီးပႃးၼမ်ႉဢႅတ်ႉသိတ်ႉလႄႈ ႁဵတ်းႁႂ်ႈၾႆးလုၵ်ႉမႆႈၵႂႃႇႁၢဝ်ႈႁႅင်း ႁိုင်မွၵ်ႈ 1 ၸူဝ်ႈမူင်း ဝႃႈၼႆ ။

ၸၢႆးပီး ၵူၼ်းမိူင်းဝဵင်းၼမ်ႉၶမ်း လၢတ်ႈၼႄၽူႈတွႆႇႁွၵ်ႈဝႃႈ – “ ၾႆးၼႆႉႁဵတ်းႁိုဝ်တႄႇမႆႈတႄႉ ဢမ်ႇပႆႇလႆႈႁူႉ။ ၶမ်ႈဝႃးၼႆႉ မီးၵူၼ်းမၢတ်ႇၸဵပ်းၸွမ်းဢေႃႈ။ တီႈၼၼ်ႉ ပဵၼ်ၵူဝ်ႇတွင်ႇ ၶွင် “တႃႉၵွင်းဝႆး”။ မၼ်းၼႆႉ ပဵၼ်ၽူႈႁပ်ႉပုၼ်ႈၽွၼ်း ႁဵတ်းၵၢၼ်မၢၵ်ႈမီးပၼ် ၸုမ်းသိုၵ်းလွႆၶဝ် ။ ၾႆးမႆႈႁႅင်းၼႅၼ်ႇၼႃႇ လႆႈဢဝ်ၵႃးၶႄၾႆး မွၵ်ႈသီႇႁႃႈလမ်း မႃးႁူတ်းႁိုင်မွၵ်ႈ 1 ၸူဝ်ႈမူင်းၼႆႉ ၸင်ႇမွတ်ႇၵႂႃႇ” ၼႆယဝ်ႉ။

ၵူၼ်းမၢတ်ႇၸဵပ်းယွၼ်ႉၾႆးမႆႈ 2 ၵေႃႉၼႆႉ လၢမ်းၶၢတ်ႈဝႃႈ ပဵၼ်သိုၵ်းပႂ်ႉယၢမ်းၶဝ်ၼႆ ၵူၼ်းမိူင်းဝဵင်းၼမ်ႉၶမ်း လၢတ်ႈၼႄၼင်ႇၼႆ။

ၵဵဝ်ႇလူၺ်ႈလွင်ႈၾႆးမႆႈၼႆႉသေ ႁွင်ႈၵၢၼ်ၾၢႆႇပိုၼ်ၽၢဝ်ႇသိုၵ်းတဢၢင်း (TNLA) တႄႉ ပႆႇပိုၼ်ၽၢဝ်ႇ ယိုၼ်ယၼ် သင်ဢွၵ်ႇမႃး ႁႂ်ႈပဵၼ်တၢင်းၵၢၼ်။

မိူဝ်ႈဝၼ်းတီႈ 16/12/2025 ၼၼ်ႉၵေႃႈ ယၢမ်းၵၢင်ဝၼ်း ၾႆးလုၵ်ႉႁိုၼ်ႇမႆႈ ႁၢၼ်ႉၶၢႆၼမ်ႉမၼ်းၸၢၵ်ႈ တီႈဝဵင်းဢေးတႃႇယႃႇ ၸႄႈဝဵင်းတူၼ်ႈတီးသေ ၵူၼ်းမၢတ်ႇၸဵပ်းၵႂႃႇၵေႃႉၼိုင်ႈ၊ ၼႂ်းဝၼ်းလဵဝ်ၵၼ်ၵူၺ်း ယၢမ်းၵၢင်ၶမ်ႈ 8 မူင်း ၾႆးမႆႈႁၢၼ်ႉၶၢႆသၢင်ႇၵၢၼ်း ၼႂ်းၵၢတ်ႇဝဵင်းသီႇသႅင်ႇ မိူင်းတႆးပွတ်းၸၢၼ်းထႅင်ႈ။

ထိုင်မႃးဝၼ်းတီႈ 17 ၾႆးမႆႈႁၢၼ်ႉၶၢႆၼမ်ႉမၼ်းၸၢၵ်ႈ တၢင်းၶဝ်ႈဝဵင်းသႅၼ်ဝီထႅင်ႈႁၢဝ်ႈႁႅင်း ဢမ်ႇမီးၵူၼ်းမိူင်း မၢတ်ႇၸဵပ်းၵႂႃႇၸွမ်းဝႃႈၼႆသေတႃႉ ဢွင်ႈတီႈၵဵပ်းသိမ်းၼမ်ႉမၼ်း လႄႈ ၵႃးတၢင်ႇၼမ်ႉမၼ်းၸၢၵ်ႈလၢႆလမ်း မႆႈပႃးၵႂႃႇ ၸွမ်းၾႆးလႄႈ လူႉသုမ်းငိုၼ်းၵႂႃႇ ၼပ်ႉႁူဝ်ႁဵင်သႅၼ်ပျႃး ၼႆယဝ်ႉ။

ၼႂ်းလိူၼ်တီႊသႅမ်ႊပိူဝ်ႊ ပီ 2025 ၼႆႉ ၾႆးမႆႈ ၼႂ်းမိူင်းတႆးပွတ်းၸၢၼ်း 2 ပွၵ်ႈ၊ မိူင်းတႆးပွတ်းႁွင်ႇ 2 ပွၵ်ႈ။