မိူဝ်ႈဝၼ်းတီႈ 23/12/2025 ၼႆႉ သိုဝ်ႇၶၢဝ်ႇထႆး Bangkok Post ႁၢႆးငၢၼ်းဝႃႈ ၸဝ်ႈၼႃႈတီႈ ပလိၵ်ႈထႆး တီႉၺွပ်းလႆႈ ၵူၼ်းမိူင်းမၢၼ်ႈသီႇၵေႃႉ တီႈႁူင်းႁႅမ်း ႁိမ်းဝၢင်းႁိူဝ်းမိၼ် သုဝၼၽုမ်း ဝဵင်းလူင်ၵုင်းထဵပ်ႈ ၸိူဝ်းၶဝ်ဢၢၼ်းတေႃႉဢဝ် ၶိူင်ႈၻရူၼ်ႊ မိူင်းၶႄႇ မိူဝ်းသူင်ႇပၼ်သိုၵ်းမၢၼ်ႈ တီႈမိူင်းမၢၼ်ႈ ဝႃႈၼႆ။

ၵူၼ်းၸိူဝ်းၺႃးတီႉၺွပ်းၼၼ်ႉ ပဵၼ်ၵူၼ်းၸၢႆး ဢႃႇယု 32 ပီ ၵေႃႉၼိုင်ႈ၊ ဢႃယု 24 ပီ ၵေႃႉၼိုင်ႈ၊ 21 ပီၵေႃႉၼိုင်ႈ လႄႈ 34 ပီ ၵေႃႉၼိုင်ႈ။ ၶဝ်တင်း 4 ၵေႃႉၼႆႉ ပဵၼ်ၸၢဝ်းၶိူဝ်းမၢၼ်ႈ။ ၸဝ်ႈၼႃႈတီႈပလိၵ်ႈ ၶဝ်ႈၵႂႃႇ ၵူတ်ႇထတ်း တီႉၺွပ်း လႆႈတီႈႁူင်းႁႅမ်း Grand BS Airport Hotel Suvarnabhumi ဢၼ်မီးၼႂ်းသဵၼ်ႈတၢင်း 30/4 ယၢၼ်ၵႆၵၼ်တင်းၶူင်ႇႁိူဝ်းမိၼ် မွၵ်ႈ 3 ၵီႊလူဝ်ႊမီႇတိူဝ်ႊ ၼႆယဝ်ႉ။

ပိူင်ပဵၼ်ဢၼ်ၸဝ်ႈၼႃႈတီႈပလိၵ်ႈၶဝ် ၸွမ်းသွၵ်ႈႁႃတီႉၺွပ်းဢဝ်ၵူၼ်းၸိူဝ်းၼႆႉတႄႉ – မိူဝ်ႈဝၼ်းတီႈ 21 လိူၼ်တီႊသႅမ်ႊ ပိူဝ်ႊၼၼ်ႉ ၶၢဝ်ႇလိုဝ်းဝႃႈ မီးၶိူင်ႈၻရူၼ်ႊ မိၼ်ၵႂႃႇမိၼ်မႃး ၸွမ်းႁိမ်းႁွမ်း ၶူင်ႇႁိူဝ်းမိၼ် သုဝၼ်ႊၼၽုမ်ႊယူႇ ၼႆလႄႈ ၶွင်ႇသီႇၾၢႆႇႁူမ်ႇလူမ်ႈၸိူဝ်ႉၸၢတ်ႈ (NSC) မိူင်းထႆးၸင်ႇၶဝ်ႈၸွပ်ႇသွၵ်ႈႁႃဢွင်ႈတီႈဢၼ် ၶိူင်ႈၻရူၼ်ႊ တႄႇမိၼ်ၶိုၼ်ႈ ၼၼ်ႉသေ သမ်ႉၵႂႃႇႁၼ်မႅၼ်ႈၸၢႆးၵူၼ်းမၢၼ်ႈ 4 ၵေႃႉၼၼ်ႉလႄႈတီႉၺွပ်းလႆႈ ဝႃႈၼႆ။

ၶိူင်ႈၻရူၼ်ႊ ဢၼ်ၾၢႆႇၸဝ်ႈၼႃႈတီႈပလိၵ်ႈထႆးၶဝ် တီႉၺွပ်းလႆႈ တီႈၸၢႆးၵူၼ်းမၢၼ်ႈ 4 ၵေႃႉၼၼ်ႉ ပဵၼ်ၶိူင်ႈ DJI ၶွမ်ႊပၼီႊမိူင်းၶႄႇ ၶူင်သၢင်ႈႁဵတ်းဢွၵ်ႇဝႆႉ။ မိူဝ်ႈတႄႇတႄႉ သွၵ်ႈႁၼ် 10 လမ်းၵူၺ်း။ ၸဝ်ႈၼႃႈတီႈထႆးဝႃႈလႅပ်ႈတေမီးထႅင်ႈၼႆသေ ၶိုၼ်းသိုပ်ႇႁူမ်ႈမိုဝ်းၵၼ်တင်း ၶွမ်ႊမသျိၼ်ႊၾၢႆႇၵၢၼ်ၵပ်းသၢၼ် လႄႈ ၾၢႆႇပိုၼ်ၽၢဝ်ႇၸိူဝ်ႉၸၢတ်ႈ (NBTC) တင်း ၸုမ်းၾၢႆႇႁူမ်ႇလူမ်ႈမိူင်းထႆးသေ သိုပ်ႇသွၵ်ႈႁႃထႅင်ႈလႄႈ ၸင်ႇတီႉၺွပ်းလႆႈ ၶိူင်ႈၻရူၼ်ႊထႅင်ႈ တႃႇ 2500 လမ်းပၢႆ ၼႆယဝ်ႉ။

ၶိူင်ႈၻရူၼ်ႊသႅၼ်းဢၼ်တီႉၺွပ်းလႆႈဝႆႉၼႆႉ ငၢႆးၵၼ်တင်း ၶိူင်ႈၻရူၼ်ႊ ဢၼ်ၸႂ်ႉတိုဝ်းၼႂ်း ပၢင်တိုၵ်းမိူင်းယူႊၶရဵၼ်ႊ ဝႃႈၼႆ။

ၶိူင်ႈၻရူၼ်ႊၸိူဝ်းၼႆႉ လုၵ်ႉတၢင်းမိူင်းၶႄႇ လၵ်ႉတေႃႉၶဝ်ႈမိူင်းထႆး။ ၵူၼ်းၵေႃႉၸိုဝ်ႈႁွင်ႉ David ၼၼ်ႉ လုၵ်ႉတၢင်းဢွၼ်ႊလၢႆႊသေ ၶၢတ်ႈႁွင်ႈ တီႈႁူင်းႁႅမ်းဝႆႉပၼ် တႃႇၵူၼ်းၸၢဝ်းမၢၼ်ႈ 4 ၵေႃႉၼႆႉ ။

ၵူၼ်းၸိူဝ်းၺႃးၸဝ်ႈၼႃႈတီႈမိူင်းထႆးၶဝ် တီႉၺွပ်းၼႆႉၵေႃႈ ပဵၼ်ၵူၼ်းၵိၼ်ၸၢင်ႈမႃးဢဝ်ၶိူင်ႈၻရူၼ်ႊ တီႈၵုင်းထဵပ်ႈ တႃႇဢဝ်ၶဝ်ႈမိူင်းမၢၼ်ႈ ဝႃႈၼႆသေတႃႉ ဢမ်ႇပႆႇလႆႈႁူႉၶေႃႈမုၼ်းတႅတ်ႈတေႃးသင်တီႈၶဝ်။ ၵူၼ်းၵေႃႉၸၢင်ႈၶဝ်မႃး ၼၼ်ႉၵေႃႈ ပဵၼ်ပေႃႈလဵင်ႉ သထေးၼႂ်းမိူင်းမၢၼ်ႈ ၸိုဝ်ႈႁွင်ႉ Kevin Cho ဝႃႈၼႆ။

ၼင်ႇႁိုဝ်တေႁူႉ ၶေႃႈမုၼ်းဢၼ်ၵဵဝ်ႇၵပ်းတင်း လိူင်ႈၵၢၼ်လၵ်ႉတေႃႉၶိူင်ႈၻရူၼ်ႊ ၶဝ်ႈမိူင်းထႆးတင်းၼမ်တင်းလၢႆ ၽွင်းလူင်ပွင်ၸိုင်ႈမိူင်းထႆး ဢွၵ်ႇပၵ်းပိူင်ၾိင်ႈမိူင်း ႁၢမ်ႈၸႂ်ႉတိုဝ်း ၵၢၼ်ပွႆႇၻရူၼ်ႊၵူႈသႅၼ်းသႅၼ်း ၼႂ်းမိူင်းထႆးပတ်းပိုၼ်ႉၼႆႉၼၼ်ႉ ၾၢႆႇၸဝ်ႈၼႃႈတီႈၶဝ် တေသိုပ်ႇၵူတ်ႇထတ်းၵႂႃႇထႅင်ႈ ႁႂ်ႈႁူႉလွင်ႈတၢင်းလီလီသေ ပိုၼ်ၽၢဝ်ႇဢွၵ်ႇပၼ်ထႅင်ႈၵမ်း ၼိုင်ႈ ၼႆယဝ်ႉ။